2 Samuel 24 - Ohiatonhseratokénti

Ne Táwit Waʼshakosennarónhnion Ne NIsraerʼronónke ó꞉ni Ne Judah

¹ Shé꞉kon á꞉re ne raonhakwáhtshera ne Roiá꞉ner sahióteke nasakokkónten Israerʼró꞉nons, tánon Táwit wahó꞉nhane nasakotsirónhnien,

² Káti ne ronnontí꞉io wahawénhase ne Joab ó꞉ni ne ronteriʼioserakweʼní꞉ios ne rahón꞉a ratikwekonátieskwe, “Wáhs thóh niahásewe ratitsiokwakwékon NIsraerʼronónke, thóh tewatá꞉sawen Dan tsi niʼió꞉re ne Beer-sheba, tánon ietsisenhnarónhnion nonkweʼókons, káti neh nahonkateriénhtarane thóh nihá꞉ti neh nón꞉we.”

³ Ók Joab wahawénhase ne ronnontí꞉io, “Aiáwenhs ne Roiá꞉ner Saní꞉io í꞉ken ashakotiokówanate nonkweʼókons enskatewenhniá꞉we nihiorihwáke, tsík sénha ne rakará꞉ke Natiá꞉ner ne ronnontí꞉io shé꞉kon roʼkwénion nahatkátho! Ók onhnontiéren Natiá꞉ner ne ronnontí꞉io tsi í꞉rehre kíʼ thóh nahá꞉iere?”

⁴ Ók ne ronnontí꞉io raowénhna otkwé꞉ni tsi nòkwah ne Joab ó꞉ni ne ronteriʼioserakweʼní꞉ios ne ronterí꞉ios. Káti ne Joab ó꞉ni ne ronteriʼioserakweʼní꞉ios ne ronterí꞉ios iahónhne raohénton ne ronnontí꞉io ne nasakotisenhnahrónhnion nonkweʼókons NIsraerʼronónke.

⁵ Iathatiʼiá꞉iake ne Jordan kaniataratátsie thóh iahonthatoserotónhnion ne Aroer entiéne nòkwah ne Aroer tánon ne thóh kanatowanénhke ne kwáh asénhnon nón꞉we níken nahonrá꞉kwakon, tsi nieiawénon ne Gad ó꞉ni tsi nieiawénon ne Jazer.

⁶ Ehʼthóhʼne iahónhnewe ne Gilead, tánon ne Kadesh thóh tsi ronahtonhontsá꞉ien ne Hitró꞉nons; ó꞉ni iahónhnewe ne Danʼke, tánon thóh tontahonténhti Danʼke iathonkwatáse ne Sidon,

⁷ tánon iahónhnewe tsi tewatenhénraien osténra ne Tyre tánon akwé꞉kon tsi kanatatowanénhkes ne Hivró꞉nons ó꞉ni ne Canaanronón꞉ke; tánon thóh nionsahón꞉ne Negeb ne ne Judah thóh nón꞉we Beer-sheba.

⁸ Káti akwé꞉kon nontahón꞉nete tsi niwatonhón꞉tsa, thóh natonhtahónhne Jerusalem ne shiahontenhnitókten ne tiotonháton shiʼwenhnítare tánon ne tewasenháton shiwenhniserakéhatons.

⁹ Ne Joab wahoronhkáten ne ronnontí꞉io tsi nihiá꞉kon wahonwatisenhnarónhnion: ne Israerʼronónke shatékon tewenhniáwe tehonhnenhniaʼwehetsheráhsen nihá꞉ti ronterí꞉ios ne ne roʼtikwénion ne tahonsárakwe, tánon ne Judah nón꞉we wísk tewenhniáwe tehonnenhniawehetsheráhsen.

Waʼhatiríwenhte Ne Táwit Raoriwanerahákʼtshera

¹⁰ Ók onakènhke, ne Táwit wahawerhiasanónhwake tsioríhwa tsi sakoséhton nonkweʼókon. Ne Táwit wahawénhase ne Roiá꞉ner, “Wakeriwáneren kwáh teiotenonhianíton ne tsi niwakatiéren. Ók kíʼ nón꞉wa, Ó Saiá꞉ner, Wakaterénhnaien shonháke, éhren shasáwit ne nakenhí꞉tsera; asèken thóh niwatiéren ne kwáh í꞉ken teiotenonwarorítonhte.”

¹¹ Nó꞉nen ne Táwit sahatkétsko noronhkéne, ne raowénhna ne Roiá꞉ner iahón꞉we rahonháke ne rotokènse Gad, ne ne Táwit rahonkwéta rotokénse, ratónhnions,

¹² “Wáhs tánon tsiénhas ne Táwit: Kwáh rá꞉ton ne Roiá꞉ner: Áhsen niʼiorí꞉wake ítsʼtats ní꞉se, énska khók sathaterá꞉kwas, tánon ní꞉i thóh nenhkonhiérase.”

¹³ Káti ne Gad wahoiatórenhne ne Táwit tánon wahoró꞉ri; wahoriwanón꞉tonhse, “Náhsen nihioserá꞉kes natonhkarhiá꞉kon ahisaiatórenhne ne shonhontsá꞉ke? Kheks kwáh ní꞉se ashatèko áhsen niwenhní꞉take raotihén꞉ton ne iesháshons tsi nikarí꞉wes iesashé꞉res? Kheks áhsen niwenhniseráke ne iakohrá꞉ras kanratarinétsera akaiéntane shonhontsá꞉ke? Ó꞉nen kíʼ tetiatóret, tánon iatesarihwaiéntas onhní꞉iot tsi tahiriwaserákwase tsi niká꞉ien takateniéton.”

¹⁴ Ehʼthóhʼne ne Táwit wahawénhase ne Gad, “Ní꞉i kwáh í꞉ken tsi kowáʼnenh tsi tewakanikónrare; áhnion thóh ietewahiatiénen rasnontsá꞉ke ne Roiá꞉ner, áhseken ne raotaniténron tsi nikowánen; ók tó꞉sa takerí꞉hon nèthoh iatiatsénenhne nónkwe akotshanáke.”

¹⁵ Káti ne Roiá꞉ner tahaténiete ne iakahóras kanratarinétshera ne Israerʼronónke thóh oronkéne tonhtá꞉sawenh tsi niʼió꞉re iekanátonkwe; tánon tsá-ta niwenhniawehetseráhsen nihiá꞉ko wahahéheie, Dan tontá꞉sawen tsi niʼióre ne Beer-sheba.

¹⁶ Ók nó꞉nenh neraronhiakeró꞉non wathanéntseste iathatókente Jerusalem nahá꞉tonhte, ne Roiá꞉ner tonsahotiriwathénien ne tó꞉sa sénha ishiʼnónwe nahiontatréwate, tánon wahawénhase ne raronhiakeró꞉non tsi rahón꞉ha tahaháwine ne atkaronhniátsera rononháke nonkwé꞉okon, “Kwáh totʼnikónhak; thontashatsanónhnek.” Ne raronhiakeró꞉non ó꞉nenh thóh shières tsi tsetethákwas tkaswenhkarakwenhtaron ne Araunah ne Jebusite nónwe.

¹⁷ Nó꞉nenh ne Táwit sahó꞉ken ne raronhiakeró꞉non tsi rahón꞉ha sakotontonhá꞉tsie nonkweʼókon, wahawénhase ne Roiá꞉ner, “Kwáh akonwákhok wakeriwáneren, tánon akonwákhok thóh niwatiéren ne kariwahetʼkénhsera; ók kí꞉ken teiotinakaronhtón꞉ahs, ònhne nihionatsiéren? Áhnion ne satshanáke, wakaterénnaien, í꞉i wakakkónten tánon satkónten ne rakení꞉ha raonónsa.”

Ne Táwit Ratsienharákwah Thóh Káien Oswenhkaráke Ne Tsi Iethetá꞉kwah

¹⁸ Thóh shiʼwenhniserátekwe ne Gad wahohiatórenhne ne Táwit tánon wahawénhase, “Wáhs thóh iahá꞉se shón꞉ni ietsienharákwah raohén꞉ton ne Roiá꞉ner thóh tsi rathetá꞉kwah oskwenhkará꞉ke ne Araunah ne ne Jebusró꞉non.”

¹⁹ Wahateriwathéntsiate tsi nahariwísa ne Gad, Ne Táwit iahá꞉re, tsi nihothenáhon ne Roiá꞉ner.

²⁰ Nó꞉nenh ne Araunah watatʼkatónhnionwe, wahó꞉ke ne ronnontí꞉io tánon ne raonhatseraókons tahón꞉ne tsi nón꞉we níreskwe; tánon ne Araunah iahahiákenhne tánon wahathatsiatiénenhte raohénton ne ronnontí꞉io tsehakonsáien ohontsá꞉ke.

²¹ Ne Araunah wahénron, “Onhnontsiéren ne Natiá꞉ner ne ronnontí꞉io wahoiatórenhne ne raonhá꞉tsera?” Táwit wahén꞉ron, “Ne nahianínon ne iethetákwah tsi kènskaron ne nahón꞉ton ne aronhiá꞉te ietsienharákwah ne Roiá꞉ner rahoriwáke, káti nètho kanratarinétsera tahonsahiakokaraténien nonkweókon.”

²² Eʼthó꞉ne ne Araunah wahawénhase ne Táwit, “Tseríhon natiá꞉ner ne ronnontí꞉io iehá꞉haf tánon iehátat tsi nahó꞉ten ioiá꞉nere ne raorihwáke; kén꞉en í꞉nes ne teotinákares tionhnónskwahrons ne sehiatsatatʼtsá꞉hak, tánon ne iethetákwah iohianóntons ó꞉ni ne ronteniarohrókstha ne teotinákares tionnónskwarons ne óiente wástston.

²³ Akwé꞉kon kí꞉kens, Ó Sanontí꞉io, Araunah wahón꞉ion ronnontí꞉io,” Tánon ne Araunah wahawénhase ne ronnontí꞉io, “Aiáwenhs ne Roiá꞉ner Saní꞉io í꞉ken tahiariwaserá꞉kwase nahontakariwaiérike ní꞉seke.”

²⁴ Ók ne ronnontí꞉io wahawénhase ne Araunah, “Iáh, ók enkonhninónki nakakariaktseriʼióhake; Kwáh iáh kíʼ thahiiatenastkwahtsahá꞉ten ne Roiá꞉ner akeNí꞉io ne iáh othènon tahonkakkaronhníhon.” Káti ne Táwit wahanínon ne iethetákwah kentská꞉ron ó꞉ni ne teotinákares tionnónskwarons ne ne wísk niwáhsen kawistará꞉kens iahát꞉kene.

²⁵ Ehʼthóhʼne ó꞉nen ne Táwit wahahónnhnien ne ietsienharákwah ne Roiá꞉ner, tánon wahatenaskwáhstsahate ó꞉ni iahá꞉thate ne atakarihtétsera. Káti ne Roiá꞉ner watariwaserá꞉ko ne raoterénnaient nonhón꞉tsa aoriwá꞉ke, tánon ne kanratarinétsera tsi tonhsontkaraténi éhren sáwete NIsraerʼronónke.