2 Samuel 23 - Ohiatonhseratokénti

Ne Nonáke Raowenhnaʼókons Ne Táwit

¹ Nón꞉wa ne kí꞉kens nonáken tsi nithotáti ne Táwit: Ne ne raowénhna ne Táwit, ne roièn꞉a ne Jesse, ne raowenhnaʼókons ne rónkwe tsi niká꞉ien ne Ní꞉io rosenhnakará꞉taton, ne ronwahiatará꞉kwen ne ne raoNí꞉io ne Jacob, ne ronwanonwéstha tsi nihashástste NIsraerʼronónke:

² ne raonikonratokentítshera ne Ní꞉io ratá꞉tis akonhá꞉ke nón꞉we, ne raowénhna kenhná꞉sake kahé꞉re,

³ Ne raNí꞉io NIsraerʼronónke rotatíhon, Naosténra ne Israerʼronónke onkenhá꞉se: Ne ne tsi niká꞉ien sakokkoráston nonkweʼókons nahontakariwaiérike, tsi rokkoráston ne tsi rokweniénstha ne Ní꞉io,

⁴ thóh ní꞉iot kwáh ne ne tsi nateioswát꞉te noronkéne, kwáh tsi ní꞉iot tsi tahiohrakwinekenhenhá꞉tsie kwáh iáh othènon teiotsatarónhnion norónhneke, tsi natehiokaráhiat nó꞉nenh iokennorenhserentá꞉hon éʼneken tsi kahentáien.

⁵ Ne kí꞉ken ne kwáh í꞉ken, tsi thóh ní꞉iot ne Ní꞉io tsi sakohiatateríston natwátsire, Asèken rakonhnienhni ne tsi nénhwen enkénhake ateriwaseronhniá꞉tshera, roriwasherónhni nètho tsi kwáh iáh thatahonsakahiákhon. Kwáh kén iáh ne taharikwakanónhni nakaiáneraste akwé꞉kon natsenawasetsheras ó꞉ni nakahkanéktshera.

⁶ Ók ne iáh teotiniʼioseráien ratikwé꞉kon thóh nihatiʼiatótens tsi ní꞉iot ne oíktas níhse iewátion; asèken iáh thahón꞉ton tahonwatiʼiá꞉takwe rontshanákes áhiontste;

⁷ niahonwatiʼiéna ónenk tsi teionatóken énhonste khék ne ne watenerahetsó꞉tara ne oshí꞉kwara. Tánon kwáh ienwatsá꞉hate tsi otsirá꞉ke enwatsahátonke kwáh thóh nón꞉we.

⁸ Ne kí꞉ken ne raotisenhnashón꞉ahs ne ronterí꞉ios ne Táwit rahonkwetaiéntakwé꞉ne ne Josheb-basshebeth Tahchemonró꞉non; rahón꞉a nohénton iehá꞉takwe kíʼ náhsen nihá꞉ti; ne wáratste raoshí꞉kwara tsi iasakotiatónhti ne shaté꞉kon tewenhniá꞉we nihá꞉ti ronhnón꞉kwe rahón꞉a wasakononwarhiá꞉kon nénskak iakaién꞉te.

⁹ Nó꞉ia thóh ísrate rahiatákʼta ne áhsen niháti ronterí꞉ios ne ne Eleazar ne roiénha Dodo Ahohi nahotaró꞉ten. Táwit ne nikwekónhne nó꞉nenh sahonwatinenhrók꞉thase ne Philistiaró꞉nons ne ronónha thóh nón꞉we nihonanitsiokwaróhronhne nahonterí꞉io. Ne Israerʼró꞉nons éhren sahón꞉nete,

¹⁰ ók iáh kí ne éhren tesawé꞉ton. Ne rahónha wasakononwarhiakhónnion ne Philistiaró꞉nons tsi niió꞉re iathanenhtsakénheie, kíʼ shá꞉ne ne ratshanáke thóh rosará꞉kwakon. Ne Roiá꞉ner tahahá꞉we kowánen atesenhniétshera nètho wenhniserátekwe. Eʼthó꞉ne nonkweʼókons rahonhá꞉ke nionsáien—ók ne khók nahonwatinenskwenhá꞉ton ne roʼnenhéions.

¹¹ Nasénhaton ne rasenhnowánen ne ne Shammah ne roiénha ne Agee, ne ne Hararʼró꞉non. Ne Philistiaró꞉nons thóh skátne thonanitsiokwaró꞉ron ne Lehi nón꞉we, thóh nón꞉we nikahetaiéntakwe onékwas; tánon ne ronetrí꞉ios éhren sahón꞉nete tsi rónhnes ne Philistiaró꞉nons.

¹² Ók thóh nón꞉we nathá꞉tane ne satekahetíhen taháh꞉ne, tánon wasakononwarhiakhónhnion ne Philistiaró꞉nons; tánon ne Roiá꞉ner taʼhá꞉hawe ne koʼwá꞉nenh atesenhniétshera ne thóh wenhniserá꞉tekwe.

¹³ Ne shontonhtásawenh naieietkwáko áhsen niháti ne áhsen-niwáhsen nohénton iehonhnétons iahón꞉ne wahonwatsiátarase Táwit thóh nón꞉we ne ostʼtenró꞉kon ne Adullam, thóh ne ná꞉he ne Philistiaró꞉nons thóh tóh natatoseró꞉tons ahonrá꞉kwakon ne Rephaim.

¹⁴ Ne Táwit thóh ne nón꞉we nihenterónhtakwe atenhénrakon nosténhra watenhén꞉raien; tánon ne rahotiʼtsió꞉kwa Philistiaró꞉nons ronterí꞉ios thóh ne nón꞉we Bethlehem thónneskwe.

¹⁵ Ne Táwit wahén꞉ron tsi nihanónhwas, “Ó ne nónhkha ahionkheká꞉nonte thóh nahontaienekéhawe tsi tsionáwerote ne Bethlehem ne ákta tsi tsiotenhenrakáronte!”

¹⁶ Ehʼthóhʼne ne áhsen niháti ronterí꞉ios iathatinenhrók꞉kawe tsi thóh natathoserótons ne Philistiaró꞉nons, iahatinekótsente tsi tsionáwerote ne Bethlehem ne thóh nón꞉we tsi tsiotenhenrakáronte, tánon tahonwanekenhawíten ne Táwit. Ók iáh neh tehonekíren; neh iahowerónhase Roiá꞉ner,

¹⁷ asèken wahén꞉ron, “Ne Roiá꞉ner rorihwáston ne kíʼ thóh nátiere. Akʼkwéni kén aknekíra ne raotinekwénsa ne ronnón꞉we ne roʼnón꞉ha iehonénon tsi thóh ronhnonnárakwe?” Ne káti wakarihónhni tsi iáh teonekí꞉ren. Ne áhsen nihá꞉ti ronterí꞉ios kiʼ thóh nihotiʼiéren

¹⁸ Nón꞉wa ne Abishai ne roiénha ne Zeruiah, ne iathatekenha énha ne Joab, rahónha sakohentenhséhakwe kíʼ áhsen nihwáhsen nihá꞉ti. Ne wáratste ne raoshí꞉kwara tsi wahonhterí꞉io ne áhsen tehonhnenhniáwe nihá꞉ti ronhnón꞉kwe tánon washakotinonwarhiakhónhnion, tánon wahasenhnowána tseská꞉te tsi nòkwa kíʼ áhsen nihá꞉ti.

¹⁹ Rahón꞉ha sénha rasenhnowanénhne tsi ní꞉iot kíʼ áhsen nihwáhsen nihá꞉ti, tánon neh iahá꞉ton wahateriʼioserakweʼniʼióne; ók iáh kíʼ nonwénton tiehèro neh nahasennowanénhke tsi ní꞉iot kíʼ áhsen nihá꞉ti.

²⁰ Ne Benaiah ne roiénha ne Jehoiada kwáh í꞉ken tsi rasenhnowanénhne tsi raterí꞉ioskwe kènʼne Kabzeel nón꞉we nihanákerehkwe, ne roʼioténtenskwe ne iorihowánens; Kwáh ó꞉ni iehosnenhtón꞉ne nosonkwákon tánon iahanonwarhiákhon kénreks neh shiʼwenhniserátekwe satehionhokwatásekwe.

²¹ Tánon roʼnonwarhiákhon Egyptró꞉non, ne ne ranekenterón꞉takwe rónkwe. Ne Egyptró꞉non rashikwarenháwakwe; ók ne Benaiah ratahtserenháwakwe nenhné꞉e, wahoshikwarákwa ne Egyptró꞉non, tánon wahononwarhiá꞉khon ne kwáh rahón꞉a raoshí꞉kwara wáratste.

²² Thóh kíʼ nihoieránion ne Benaiah ne roiénha ne Jehoiada, tánon wathaténtsa ne kaʼsénhna tseská꞉te kiʼ asenhnihá꞉ti ronterí꞉ios.

²³ Kwáh í꞉ken tsi rasenhnówanenhne tsi nòkwah kíʼ áhsen niwáhsen nihá꞉tikwe, ók iáh kíʼ tiehèro tsi nihatiʼsenhnowanénhskwe nahásen nihá꞉ti. Tánon ne Táwit rahón꞉ha wahorihónten nasakoteriwatsterísthase ne ronwahiatanónhna.

²⁴ Tsi nihá꞉tikwe ne áhsen niwáhsen ne ne Asahel ne iathatekénha ne Joab; Elhanan ne roiénha ne Dodo Bethlehemró꞉non;

²⁵ Ne Shammah tánon ne Elika Harodró꞉nons

²⁶ Ne Helez ne ne Paltiró꞉non; Ira ne roiénha ne Ikkesh Tekoa nón꞉we nitawé꞉non;

²⁷ Ne Abiezer ne ne Anathothró꞉non; Mebunnai ne ne Hushathró꞉non;

²⁸ Zalmon ne ne Ahohró꞉non; Maharai ne ne Netophahró꞉non

²⁹ Ne Heleb ne roiénha ne Baanah ne ne Netophahró꞉non; Ittai ne roiénha ne Ribai ne ne Gibeahró꞉non ne ne Benjamin nónwe;

³⁰ Ne Benaiah ne ne Pirathonró꞉non; Hiddai tsík karonhatátsie ne Gaash nitawénon;

³¹ Ne Abi-albon ne ne Arbathró꞉non; Azmaveth ne ne Bahurimró꞉non;

³² Ne Eliahba ne ne Shaalbonró꞉non; ne raonekenterontserashón꞉ahs ne Jashen: Jonathan,

³³ ne roiénha ne Shammah ne ne Hararʼró꞉non; Ahiam ne roiénha ne Sharar ne ne Hararʼró꞉non;

³⁴ Ne Eliphelet ne roiénha ne Maacah; Eliam ne roiénha ne Ahithophel ne ne Giloró꞉non;

³⁵ Ne Hezro ne ne Carmelró꞉non; Paarai ne ne Arbró꞉non;

³⁶ Ne Igal ne roiénha ne Nathan ne ne Zobahró꞉non; Bani ne ne Gadró꞉non;

³⁷ Ne Zelek ne ne Ammonró꞉non; Naharai ne ne Beerothró꞉non, ne ráhaskwe ne rateriʼiosthákwakwe ne Joab ne roiénha ne Zeruiah;

³⁸ ne Ira ne ne Ithirʼró꞉non; Gareb ne ne Ithirʼró꞉non

³⁹ Ne Uriah ne ne Hitró꞉non—áhsen-niwáhsen-tsá꞉ta ne tsokwékton.