2 Samuel 22 - Ohiatonhseratokénti

Táwit Raorénhna Ne Kanonweratónhtsera

¹ Táwit watnitháren ne Roiá꞉ner naowenhnaókons ne kí꞉ken karénhna thóh shiʼwenhniserátekwe nó꞉nen ne Roiá꞉ner shonsaohiatotarísi tsi nòkwah ne rontshanákes ne ronwásons, tánon ne ratshanáke ne Saul.

² Wahén꞉ron: Ne Roiá꞉ner seh nakisténhra í꞉ken, ne nakaʼtenhén꞉ra, ó꞉ni shaʼkatatewenhniʼiotseráwis,

³ Akení꞉io í꞉ken, akisténra, rahonháke nón꞉we nikataséhta, akatrenhostákwa ó꞉ni ne ne kashaststénsera natiatakenatiéra, ne nakatenhenranirát꞉tsera ó꞉ni tsi katasehtá꞉kwa, ne sakeskontákwen; í꞉se stsiatanónstats tsi nòkwah ne kaʼniakatsʼthénshera.

⁴ Iahináton ne Roiá꞉ner, rahón꞉a ne tehoténtson ne tahonwanonweráton, tánon tionkenonsthá꞉ton tsi nòkwah ne ióntshons.

⁵ Asèken ne ionhnontahkwaronhthón꞉tses ne kenhé꞉iat tewakwánen, ne ionontahkwaronhtóntses kaiatatónsera watiatakarateniáton;

⁶ Naosehrí꞉ies ne Sheol watewakseriʼiéhon, ne naoteristaientaʼtsera ne kenhé꞉ion onkenenhrók꞉thase.

⁷ Thóh tsi natewakanikónrahre iahináton ne Roiá꞉ner; raonhá꞉ke nakeʼNí꞉io iahiná꞉ton. Thóh raononsatokentiʼkowáhne wahakewénhnaronhke, tánon tsi tekaʼséntʼthos iahothóntene.

⁸ Ehʼthóhʼne nonhón꞉tsa ontʼtsinonwaténiaʼte tánon watewatkarénron; ne tsikkenskwáhere tsi karonhiá꞉te wahówake tánon watsiowísonkwe, tsioríwa tsi nihonhakwénhen.

⁹ Takaʼienkwaró꞉ten ne tsi tehanionkáronhte, tánon ne iakothóntha ótsire thóh takaʼiákenhne tsi rasaká꞉ronhte; ioswenhthataríhen iotsiró꞉tatse nontáwe rahonháke.

¹⁰ Wathasákete ne tsi karonhiá꞉te, tánon tahátsnenhte; tetsiokaraskówa í꞉ken ne rashitókon.

¹¹ Ne wahosáten Cherub, tánon wathá꞉ten; ronhwáken neh roʼhá꞉wi tsi iowerá꞉re.

¹² Ne wahateróhrokste ne tetsiokaraskówa, tehiottsatanó꞉tes, kwáh kanekanáhnon, wathokwataséte.

¹³ Thóh tsi tewaninekaraʼwánions ne raohén꞉ton ne wakarihón꞉ni nótsire nahióteke nohontsá꞉ke.

¹⁴ Né Roiá꞉ner kwáh ó꞉ni waʼhawéraste ne tsi karonhiáte, tánon ne raowénhna ne Kwáh Éhʼneken Tótthe waʼhonwahwenhnáronke.

¹⁵ Waharónhtate ne raoiénkwires tánon wathonréni ne ronwáshons; wathatsiraríkhon tsi waʼtewaninekarawánion tsi wasakotèkwate.

¹⁶ Ehʼthóhʼne tsi kanatserathátsie ne kaniatarakhekó꞉wane waʼhokéntaʼne, tánon ne tsi kenskwáhere ne tsi ionwenhtsá꞉te iáh tetsoʼteró꞉ron. Tsi nenhatewenhnaién꞉tonwe ne Roiá꞉ner, ne tsi nikashástste rotónrion tsi tehanionká꞉ronte.

¹⁷ Ne Roiá꞉ner tontahatsátate thóh nón꞉we éhʼneken tánon wahatiéna, wahaʼkeskó꞉ko ne kwáh tsionótes.

¹⁸ Sahaʼtiatáko tsi nòkwah ne ratishástste iónkshons, tánon tsi nihá꞉ti ne iónstsons; asèken sótsi ratisháststes nakerihwáke.

¹⁹ Waʼhonkenenhrót꞉thase né shiʼwatiatotharéhon; ók kíʼ Roiá꞉ner tahakéne.

²⁰ Wahatsniénon éhren wahatsiatenháwite tsi nón꞉we ne iótʼteron; wahakenónsthate tsioríhwa tsi rawerientí꞉ios tsi nòkwah ní꞉i.

²¹ Ne Roiá꞉ner wathakeriwaserákwahse ne tahioianénhawe tsi niwakeriwakwahrí꞉shion; ne tahioianénhawe tsi nihiotkwéniens ne katshanákes akwé thontahákon.

²² Asèken wakatewenhnarákwen ne raohianerénhseras ne Roiá꞉ner, tánon iáh ne tewatsioténhen ne kariwahetkénhsera tsi ahiʼiatiatontakwénhni Nakkení꞉io.

²³ Akwé꞉kon niewakatewenhnará꞉kwen tsi nihakenatónhti tsi nátiere, iáh tewakatewenhnóntion ne raorihwatátʼtseras.

²⁴ Kwáh iáh othènon tewakeníkon ne raohén꞉ton, tánon wakataʼtienawákon neh tó꞉sa othènnon ahonkení꞉ke.

²⁵ Né꞉se wá꞉oni ne Roiá꞉ner sahatkárhiakʼse ne tahioianénhawe tsi niwakerihwakwaríshion, ne tahioianénhawe tsi niwakatkwéniens ne raohén꞉ton.

²⁶ O Saiá꞉ner, í꞉se ne sarihwaʼtó꞉ken ronnón꞉hake ne tiesehthákwen; ne iáh tehotinhitseráien waʼsahthaténeste tsi kwáh í꞉ken tsi saiánerehʼ;

²⁷ ne rotiʼiá꞉nere í꞉ken ní꞉se waséneste iateshiá꞉ti tsi sariwakwarí꞉shion, tánon ne tehonahtsiátʼton ní꞉se waséneste tsi sarihwaníron í꞉ken.

²⁸ Asèken sesehniakénton ne kenhnihatisenhnása, ók eʼtàke sehsehiónhni tsi nihiákon ne iontatón꞉ni.

²⁹ Kwáh oriwí꞉io í꞉se nakʼkhásera í꞉ken, Ó Saiá꞉ner, ne Roiá꞉ner tehaswatthétha nakasátakon.

³⁰ Tsi í꞉se tatsniénons entkwéni takeiaskwáseron ne ronterí꞉ios, tánon tsi ratsniénons nakeʼNí꞉io enkwéni niatakatawénrate tsi tewasón꞉tote.

³¹ Kí꞉ken Ní꞉io—ne raoweién꞉na kwáh tkarihwaiéri; ne raorarát꞉tsera ne Roiá꞉ner kariwanírats tsi iotokenskeʼónwe; rahón꞉a ne iontrenhostákwah í꞉ken ratikwé꞉kon ne rahonháke nón꞉we nenhiotaséhtakwe.

³² Asèken ónka nènhne ne Ní꞉io í꞉ken, nék khók ne Roiá꞉ner í꞉ken? Tánon ónka nènhne ne osténra í꞉ken, nek ki ne onkwaNí꞉io í꞉ken?

³³ Ne ne Ní꞉io raónha ne tehatiakwaranát꞉ton ne kashaststénsera; tehotakarónston tsi wák꞉khate.

³⁴ Ne rahonhniá꞉ton ne kashitáke thóh ní꞉iot kwáh ne ne oskenón꞉ton washitáke, tánon thóh nón꞉we nihakatkáwen tsi nón꞉we niʼioriwí꞉io nonontoharakésons.

³⁵ Raʼrihonniénhnis ne katshanákes nateriʼiósehra, ne ká꞉ti ne kenenhtiákes nakakwéni takassáhkete ne tehiotwís꞉taron otsínekwar karístatsi nahó꞉ten ionhniáton aénna.

³⁶ Ní꞉se teská꞉wi ne iontrenhostá꞉kwa sáwenk kaiatakená꞉tshera, tánon ne saienawashé꞉tsera ne onkʼkó꞉wanate.

³⁷ Í꞉se tatienawáʼkonhkwe ne tó꞉sa ahiontiéna, tánon iáh kíʼ nonwénhton tewatiatienénhon.

³⁸ Waʼkhésere ne iónkshons tánon waʼkheiátonhte, tánon iáh tesewakák꞉ton tsi niʼió꞉re wahonwaná꞉tonhte.

³⁹ Wakhenonwarhiákhon; iáh tehotikwénion tahonsahotitáhon, thóh ratiʼiátaien roʼnenhéion akʼkhénton.

⁴⁰ Asèken í꞉se wasʼtsiatánake ne kaʼsháststense nateriʼiósera aoriwá꞉ke; washeiónhnien ne iónstshons nahontenónwaien tiaʼtó꞉kon.

⁴¹ Í꞉se washeiónhnien ne iónstshons naionhkatswaténien, tsi nihiá꞉kon ne iónsshonkwe, wakheiá꞉tonhte.

⁴² Waʼthontkatónhnionwe ók ónka kaʼnèka téiens nahonwatinónsthate; iathonséntʼtho rahonháke ne Roiá꞉ner, ók iáh kíʼ ne thateshakoriwaserakwénhni.

⁴³ Wakhewá꞉heke kwáh ne nokènra ne tsi ionwenhtsá꞉te, Waʼtekhenienstsiá꞉kon tánon waʼkheratatiéson kwáh tsi ní꞉iot onawásta ne tsi tekanatokenhá꞉ties.

⁴⁴ Saskeniá꞉kente tsi nòkwah ne ronteriʼioseranónwe onkweókons; waskatiénawaste í꞉i ohénton iatesét꞉taste tsi nòkwah ne ronhnonhontsakerónons; ne nonkwé꞉okons ne iáh tekheientérine wahontsió꞉tenhse.

⁴⁵ Thiʼononhontsá꞉te tahón꞉ne ronattókeri nakkénton; kwáh tsi niiostó꞉re wahonkewenhná꞉ronhke, tsi wahonkewenhná꞉rakwe.

⁴⁶ Né thihononhontsáte waʼhonnikonhrók꞉ten, tánon rothiʼiatisónkwa tsi taʼhatiʼiákenʼne nostenhró꞉kon tsi nón꞉we nihonathaséhtonʼne.

⁴⁷ Ne Roiá꞉ner ronnhéʼse! Tehonwanonweráton nakitsténra, tánon ronwasenhnakará꞉tat nakeNí꞉io, ne nosténra natiá꞉takenatshera,

⁴⁸ ne ne Ní꞉io rahón꞉a rátsnienons nakhesenhni ne iónkshons tánon tesakohiá꞉tenhas nonkwé꞉okons atianerenhseró꞉kon,

⁴⁹ rahón꞉ha tethatsiatótion roʼnonháke ne ióntshons; ní꞉se wasetsenhnakará꞉thate éhʼneken roʼnonháke ne ionkatkónte, í꞉se saskeníakente tsi nòkwah ne ratiniakátstes.

⁵⁰ Asèken ne kí kí꞉ken ne kwáh enkonsenhnakará꞉thate, Ó Saiá꞉ner, roʼnón꞉hake ne ronhnonhontsakeró꞉nons, tánon tenkeríwakwe ne kanonweratónhtshera to sasénhnakon.

⁵¹ Rahónha noniká꞉ta í꞉ken ne kaiatakenhátshera raoriwá꞉ke ne raononhtí꞉io, tánon rawenéston ne ioriwató꞉ten kaʼnonronkwáhtshera rahonhá꞉ke ne rohiatará꞉kwen, rahonhá꞉ke ne Táwit ó꞉ni tsi nienhatwatsiríne ne tsi nénhwe enkénhake.