2 Samuel 21 - Ohiatonhseratokénti

Táwit Tashá꞉kothorhianeronhase Ne Gibeonró꞉nons

¹ Nón꞉wa neh nón꞉we wahontonhkárhiake tsi nihotenhniseraténionkwe ne Táwit ne náhsen niʼioseráke nikarí꞉weskwe, kwáh iateioseráke; ó꞉ni ne Táwit tsi enhoriwanónhtonhse ne Roiá꞉ner. Ne Roiá꞉ner enhénron, “Kwáh ronekwensarónhnion ne Saul tsi nihoníkon ó꞉ni ne raowátsire, tsioríwa tsi sakononwarhiakhónhnion ne Gibeonró꞉nons.”

² Káti ne ronnontí꞉io iasakonónkʼkhons ne Gibeonró꞉nons tánon wathatitháren. (Nón꞉wa ne Gibeonró꞉nons iáh Israerʼró꞉nons tehatiʼiatótens, ók ne ne iatehonathaténron ne Amorʼró꞉nons; Ehʼthóhʼsane nonkweʼshón꞉ahs ne Israerʼronónke tsi ronwatiriwanirá꞉ti tsi enhonwatinónsthate, Ne Saul rotenienténhon nasakotónhte thóh rahontsá꞉ke ne raotiriwáke nonkweókons NIsraerʼronónke ó꞉ni Judah.)

³ Ne Táwit wasakawénhase ne Gibeonró꞉nons, “Ónhnakwatiérase ní꞉se? Onhní꞉iot tsi kwáh ahonsakeriwakwatá꞉ko, nètho ní꞉se tsi ashiatatériste tsi nihówenk ne Roiá꞉ner?”

⁴ Ne Gibeonró꞉nons wahonwénhase, “Iáh shenetehioriwá꞉ke ne kawistará꞉ken khéhs nowistanó꞉ron tsi naʼteiakwátere ne Saul ó꞉ni ne raowátsire; iáh ó꞉ni teiákwereh nón꞉ka ahiakhinonwarhiá꞉kon ne Israerʼronónke.” Wahén꞉ron, “Ónhnahó꞉ten sewáton nètho ní꞉i tsi nakwatiérase ní꞉se?”

⁵ Wahonwénhase ne ronnontí꞉io, “Ne rónkwe ne shonkwaronhiakénton ó꞉ni rotenikonrón꞉nikwe nashonkwátonhte, ne káti ne kwáh tó꞉sa othenènon ahionkwanaktaién꞉take akwé tsi niwatenáskwa NIsraerʼronónke—

⁶ áhnion ne tsá꞉ta nihonekenteronhtseráien ontionhá꞉ke tasheiaténiet, tánon í꞉i enhiakiniatérenke raohén꞉ton ne Roiá꞉ner ne Gibeon nón꞉we tsi thotenontáhere ne Roiá꞉ner.” Tánon ne ronnontí꞉io wahén꞉ron, “Kwáh kiʼ ienkeiát꞉kawe.”

⁷ Ók ne ronnontí꞉io wahonónsthate nenhné꞉e ne Mephibosheth, ne ne roiénha ne Saul roiénha Jonathan, tsioríwa tsi nihonateriwáseron ne Roiá꞉ner tsi natehóntere ne Táwit ó꞉ni ne Jonathan roiénha Saul.

⁸ Ne ronnontí꞉io iasakohiaténhawe ne teninekenterontseráke nakoiohokón꞉ahs Rizpah ne sakoiénha ne Aiah, ahón꞉a roʼtiwiraientáhon ne Saul, ne Armoni tánon Mephibosheth; tánon ne wísk nihá꞉ti raonekenteronhtserashón꞉ahs ne Merab ne ne sakoién꞉a ne Saul, ahónha roʼtiwiraien꞉táhon ne Adriel ne roiénha ne Barzillai ne ne Meholathró꞉non.

⁹ Thóh iasakót꞉kawe ronhnonháke ne Gibeonró꞉non, tánon wahonwatiniaterénkʼkhons tsi ionón꞉te raohén꞉ton ne Roiá꞉ner. Ne tsá꞉ta nihá꞉ti skátne tsi wahonhní꞉heie. Thóh nón꞉we nahonwatiʼnonwaʼrhiá꞉kon ne tsiotenhniseratsieréntʼton tsi niʼieientwákwas, ne tsi nenhtewatá꞉sawenh teiotikonstón꞉res aieientwáko.

¹⁰ Ehʼthóhʼne ne Saul tenihiá꞉sene Rizpah, ne ne sakoiénha ne Aiah, káiare iaká꞉hawe ne ahontrenhósthakwe thóh ostenrá꞉ke tsi nón꞉we natewehionthó꞉taro, tánon thóh kenteronhtá꞉kwe kwáh tsi nontontásawen naieietʼtwá꞉ko tsi niió꞉re ne ienkahnenhnákene nenhtsiokenhnoréhseron. Ne tsi niwenhní꞉seres kwáh iáh tahiakoríhon notsitenokónhas ne kenhniakotí꞉iere noieróntas, tánon nokaʼrasné꞉ha kontírhios nenhné꞉e iakotekwáhtha.

¹¹ Nó꞉nenh ne Táwit sahonwaró꞉ri tsi niwaʼtsé꞉ra ne Rizpah,

¹² Ne Táwit iaʼhá꞉re tánon iahá꞉ko ne raostsienʼshó꞉ahs ne Saul ó꞉ni ne raonekenteronhtserashón꞉ahs ne Jonathan ne ne ronhnón꞉kwe thóh nithonénon tsi watonhontsáien ne Jabesh-gilead, ne ronhnón꞉ha thóh nón꞉we thonwatiʼiatanénhskwen tsi tsiontʼkerontákwa ne Beth-shan, thóh nón꞉we ne Philistiaró꞉nons nahatiʼnihiontón꞉nion raotiʼierón꞉tas, ne thóh shiwenhniserá꞉tekwe ne Philistiaró꞉nons sahonwanonwarhiákhon Saul thóh nón꞉we Gilboa.

¹³ Ne Táwit thóh nón꞉we natethó꞉ha ne raostsienhshón꞉a ne Saul ó꞉ni ne raotistsienshón꞉ahs ne raonekenteronhtseraʼshón꞉ahs Jonathan; tánon sahatistsienʼtarohrók꞉khon tsi niháti ne ronwatiniáteren.

¹⁴ Wahatihiatátha ne raostsienʼshón꞉ahs ne Saul ó꞉ni ne oanekenteronhtsershón꞉ahs Jonathan thóh tsi watonhontsá꞉ien ne Benjamin thóh nón꞉we Zela, thóh raotsatonkwákon ne roní꞉ha Kish; akwé thóh nahatí꞉iere tsi nisakorí꞉honte ne ronnontí꞉io. Ne shonteweʼienénhtane, ne Ní꞉io watharihwaseráko naterénhnaient ne tsi ionwenhtsá꞉te.

Wahonteniʼkonratsánite Ne Táwit Raonkwetaʼshón꞉ahs

¹⁵ Ne Philistiaró꞉nons iahón꞉ne nahonterí꞉io nʼIsraerʼró꞉nons, tánon ne Táwit thóh nón꞉ne niaháre skátne ne raonhatseraʼshón꞉ahs. Wahonterí꞉io ne Philistiaró꞉nons, tánon ne Táwit wathaʼwisénheie.

¹⁶ Ishbi-benob, rahónha ne saiá꞉ta ne tahaʼwatsiratátie ne ratikowanénskwe, ne raoshí꞉kwara tsá꞉ta tsatesewasénhnon nikaʼkontseráke niʼiókste ne ne otsínekwar nikaristó꞉ten, tánon raónha ronwasheronhniáton náse ioteriʼiosthákwas, wahén꞉ron kwáh raónha enhonhnonwarhiákhon ne Táwit.

¹⁷ Ók Abishai ne roiénha ne Zeruiah tá꞉re naosnié꞉non, tánon iahotiatónhti ne Philistiaró꞉non tánon wahononwaʼrhiá꞉khon. Ehʼthóhʼne ne Táwit rahonkweʼtashón꞉ahs wahonwarahrásten, “Ní꞉se iáh thaʼtetsiotonhontsóhon nahonsétewe nahiakwateriʼiósera, ne káti ní꞉se tó꞉sa sháswat nahohá꞉sera NIsraerʼronónke.”

¹⁸ Ehʼthóhʼne ó꞉nenh nateriʼiósera thontáʼsawenh wahonterí꞉io ne Philistiaró꞉nons, thóh nón꞉we Gob; ehʼthóhʼne Sibbecai ne ne Hushathró꞉non wahononwarhiákhon Saph, ne raónha thóh nithotwatsirínon ne ratikowáʼnenskwe.

¹⁹ Ehʼthóhʼne shé꞉kon ó꞉ia sonteriʼioserakétsko tsi nòkwah ne Philistiaró꞉nons thóh nón꞉we Gob; tánon Elhanan ne roiénha ne Jaare-oregim, ne ne Bethlehemró꞉non, raónha wahononwarhiákhon ne Goliath, ne rahónia ne watʼtsikwaróhara kwáh ne ne waʼsheriʼietónhnis tewateronhtarenhwá꞉kwa.

²⁰ Shé꞉kon sonteriʼioseraién꞉tane ne Gath nón꞉we, ehʼthóh nón꞉we nihanákerehkwe ne rónkwe teiotenonhianíton tsi rakowánenhne, iáh-iak natehasnonshón꞉tonkwe ne shaʼtsanakarátis, tánon iáh-iak natehahiakwiróntons ne shaʼshitakaratísons, tewásen kaiéri nakwé꞉kon; rahónha ó꞉ni thóh nón꞉we nithót watsirínon ne ratiʼkowanénskwe.

²¹ Nó꞉nenh thaʼsakoiéron nʼIsraerʼró꞉nons, Jonathan ne roiénha ne Táwit iathatekén꞉a Shimei, rahónha wahononwarhiákhon.

²² Kí꞉ken kaiéri nihátikwe thóh nithonatwatsirínon ne ratikowanénhskwe thóh nón꞉we Gath; ne ronwatiʼnonwarhiakhónnion ne Táwit tánon ne raonkwetaʼshón꞉ahs.