2 Samuel 2 - Ohiatonhseratokénti

Ne Táwit Rowaiatahrákwen Naonontí꞉ioke Ne Judah Nón꞉we

¹ Shontóhetste kí꞉ken ne Táwit wahoriwanóntonhse ne Roiá꞉ner, “Kwáh kén iá꞉ke kaknikáiens ne kanatowánens ne Judah?” Ne Roiá꞉ner wahá꞉wenhase, “Wáhs thóh iaʼháse.” Ne Táwit wahén꞉ron, “Kaʼónte niʼkáien ne kanatowánens nón꞉we niá꞉ke?” Wahén꞉ron, “Hebron nón꞉we niaháse.”

² Káti ne Táwit thóh nón꞉we niaháre, wahón꞉ne ne tekeniʼiá꞉se rotiniá꞉kons, ne ne Ahinoam ne ne Jezreelró꞉non, tánon ne Abigail ne ne Nabal rotiniá꞉konhne ne ne Carmelró꞉non.

³ Ne Táwit iaʼsakoiathénhawe ne ronnón꞉kwe ne ratikweʼkónhne, kwáh tsi nihá꞉ti ó꞉ni ne raotiwátsires; tánon thóh nón꞉we nahonthatíteron kanátakon ne Hebron.

⁴ Ehʼthóhʼne nonkweʼó꞉kons ne Judah tahón꞉ne, tánon thóh nón꞉we naonwahiataráko ne Táwit asakotenontí꞉ioste ne Judahró꞉nons. Nó꞉nen saonwaró꞉ri ne Táwit, “Ne nonkweʼó꞉kons ne Jabesh Gilead ronwaʼiatáten ne Saul,”

⁵ ne Táwit iasakotóri ratiʼrihwakarénies tsi thaʼtíteron nonkweʼó꞉kons ne Jabesh Gilead, tánon wasakonénhase, “Aiá꞉wenhs ní꞉se atsisewaiatatériste ne Roiá꞉ner, tsioríhwa tsi wehsewé꞉neste kí꞉ken tsi sewarihwatókenhne raonháke ne Saul sewaiá꞉ner, ó꞉ni tsi watsisewaiaʼtátah!

⁶ Ó꞉nen aiá꞉wenhs ne Roiá꞉ner aréhneste ne iorihwatóten kanoronkwáhtsera ó꞉ni kariwatokentítshera ne tionhá꞉ke! Tánon Í꞉i ó꞉ni tenkwariwaʼserákwase tsioríhwa tsi kí꞉ken thóh ne sewáiere.

⁷ Neh kíʼ aoríhwa ne satshanáke akasháststeke, tánon akarihwásthake; asèken ne Saul iaiá꞉ner kénʼne rawenhé꞉ion, tánon nonkweʼókons ne Judah ne ronwaiaʼtarákwen nasakotenotí꞉ioste.”

Ishbaal Ne Ronnontí꞉io í꞉ken NʼIsraeronónke

⁸ Ók ne Abner ne roiénha ne Ner, ne raterihioserakweʼnhní꞉io ne Saul raotsió꞉kwas ronterí꞉ios, iehohiaténha ne Ish-bosheth; “Ne ne rónkwe natehénsera í꞉ken” ne roiénha ne Saul, tánon thóh niehoiaténha ne Mahanaim nón꞉we.

⁹ Raónha waonontí꞉ioste ne Gilead, Asher, Jezreel, Ephraim, Benjamin, tánon kanakeraseraʼkwékon Israel.

¹⁰ Ne Ish-bosheth, “Ne ne rónkwe natehénsera í꞉ken” ne ne Saul roiénha, kaiéri-niwásen natehaʼoseriʼiákon nó꞉nen sahatenontí꞉ioste NʼIsraerʼronónke, tánon teioseráke ronontí꞉iokwe. Ók nonkweʼókons ne Judah ne ne taonwatswaʼnónhna Táwit.

¹¹ Tsi nikaríwas nètho Táwit ronontí꞉iokwe neh nón꞉we Hebron rononháke nonkweʼókons ne Judah ne ne tsá꞉ta niʼioserákekwe tánon iáh-iak niwenhnítakeʼne.

Tsi Waonterí꞉io Ne Gibeon Nón꞉we

¹² Abner ne ne roiénha ne NER, tánon ne raonhatserashón꞉ahs ne Ishbaal ne ne roiénha ne Saul, thóh tahaténhti Mahanaim thóh nón꞉we niahá꞉re Gibeon.

¹³ Joab ne ne roiénha ne Zeruiah, tánon ne raonhatserashón꞉ahs ne Táwit, iaháre tánon wathontátken tsi tionáweroʼte ne Gibeon. Skentsió꞉kwa thóh wahón꞉tsien skáti nòkwahti ne tsi ionáwerote, ne ronátsiakes ákte neh nòkwati tahón꞉tsien ne tsi ionáwerote.

¹⁴ Ne Abner wahawénhase ne Joab, “Áhnion ne kenʼnithotiʼiónsas thón꞉ne tánon tehonkkénhni nonnenihénton.” Joab wahén꞉ron, “Áhnion ákta nithón꞉ne.”

¹⁵ Káti ákta nontahónhne tánon waonhwanásheʼte tsi nahontóhetste, tekenisónwenhre nihá꞉ti ne ne Benjamin ó꞉ni ne Ishbaal ne ne roiénha ne Saul, tánon tékeni-iawénhre nihá꞉ti ne raonhatsherashón꞉ʼahs ne Táwit.

¹⁶ Ne satiʼiatátʼtions wahatiʼié꞉na ne tenhontʼkenhniésere ratinontsínes, tánon wahó꞉hase ne tehonethákwen rahiatákta; káti tenitsá꞉ron wanihiatsénenhne. Ne káti aoríhwa nètho nón꞉we watenátahien ne konwanatónkwah Helkath-hazzurim Kahentáke ne Iosarothí꞉ie thóh nón꞉we Gibeon.

¹⁷ Nateriʼiósera tsi natewatenoniániʼte nètho wenhniserátekwe; tánon ne Abner ó꞉ni ne ronhnón꞉kwe Israerʼronónke wahonwatisénhni ne ne raonhatserashón꞉ahs Táwit.

¹⁸ Ne áhsen niháti ne Zeruiah raonekenterontseraʼshón꞉ahs thóh rón꞉neskwe, ne ne Joab, Abishai, tánon ne Asahel. Nón꞉wa ne Asahel thóh natehó꞉ka tsi ní꞉ioht ne kahentakéha oskenón꞉ton.

¹⁹ Ne Asahel wahó꞉sehre ne Abner, kwáh iahakóntakwe tsi wahó꞉sereh.

²⁰ Ehʼthóhʼne ne Abner onàken ionsahatkátho tánon wahén꞉ron, “Í꞉se kén, Asahel?” Ne raón꞉ha watharihwaseráko, “Hén, Í꞉i.”

²¹ Ne Abner wahawénhase, “Sát꞉kaf tsi tátʼsehre, tánon kakʼnikáien tiéna ne kén nithoiónha, tánon iaháʼsaf ne ronénskwen.” Ók ne Asahel kwáh iehokontáhkwen tsi rósehre.

²² Ne Abner sahawénhase shé꞉kon ne Asahel, “Sátkaf tsi tátʼsehre; ónh nontiéren tsi akonhnonwarhiákon? Ónh ní꞉ioht tsi shé꞉kon ahonsahí꞉ken ne tsatatekénʼha Joab.”

²³ Ók kwáh iáh tehothontáton ne ahonsahókton. Káti ne Abner rashionóntake wahoiénte ne tsi ieiót꞉te ne raoshí꞉kwahra, káti nètho oshí꞉kwahra kwáh iaʼtoiatohétsthakwe. Tánon thóh wahaiatahién꞉tane, ó꞉ni warénheie tsi nón꞉we nihaiátahien. Tánon tsi niʼiá꞉kon ne táhièn neh nón꞉we tsi nón꞉we ne Asahel nihoiatsenénhʼen tánon rawenhé꞉ion, thóh wathátaʼne.

²⁴ Ók ne Joab tánon ne Abishai wahonwásere ne Abner. Tsi niahorakwenhenhátsie iaón꞉newe tsi tionhniá꞉here ne Ammah, thóh nón꞉we í꞉ken ohén꞉ton ne Giah ne ne tsi nieiawénon ne iahonwenhtsatʼténhake ne Gibeon.

²⁵ Ne Benjaminites wahontsataróhroke skát꞉ne nahontahonwatswaʼnónhna Abner, tánon skentsió꞉kwat iahón꞉ton, tánon thóh nón꞉we nahatiʼhenró꞉ten éhʼneken tsi ionhniá꞉here.

²⁶ Ehʼthóhʼne ne Abner iahonáton ne Joab, “Ne asarekówa ienkakóntahkwe kén ne tahitewathatenonwarhiaʼkhónhnion? Iáh kén tesateriéntahre ne tsi ieiótokte tsi nenhwahét꞉kenhne? Thóh ákwah nikaríwes ní꞉se asheró꞉ri ne shonkweʼtashón꞉ahs nahónt꞉kaʼwe tsi sakotísheres ne ronthatekenʼokón꞉ahs?”

²⁷ Joab wahén꞉ron, “Tsi nirón꞉nhe ne Ní꞉io, tó꞉ka ní꞉se iáh tesathatíhon, ne onkweʼókons kwáh kíʼ ienontashón꞉teren ensakotiʼsehréhson ne ronhthatekenʼokón꞉ahs, iáh tahónt꞉kaʼwe tsi niʼió꞉re ienhiórenhne.”

²⁸ Joab wahathátiste ne ieonrawátstah tánon kanenhrakwé꞉kon nonkweʼókons wahthaʼtítahne; iáh kíʼ ó꞉nen tesheshakotísehron NʼIsraerʼró꞉nons khéhs ne ne ahonsahonateriwaʼthentsiá꞉ton nateriʼiósera ne kénʼen wahó꞉tsete.

²⁹ Ne Abner tánon ne raonkweʼtashón꞉ahs wathontáhakwe ne thóh wasontáhteʼkwe iaontéheste ne Arabah; iathatiʼhiáiake ne Jordan, tánon rotinenhraseronnihátsie kwáh oronkwetseraʼkwé꞉kon, iaónhnewe Mahanaim.

³⁰ Ne Joab wahát꞉kaʼwe tsi roséhrene ne Abner; tánon nó꞉nen sashakoiataróhroke nonkweʼtakwé꞉kon, thóh natsá꞉totʼte ne Táwit raonhatserashón꞉ʼahs tió꞉ton iawénhre niháti thiʼkáte ne Asahel.

³¹ Ók ne raonhatseraʼshón꞉ʼahs ne Táwit ronwahthiʼnonwarhiakhónnion ne Abner raonkweʼtashón꞉ʼahs áhsen tewenhniá꞉we iáh-iak niwáhsen nihá꞉ti tsi ratitáraien ne Benjamin.

³² Iahatíhawe ne Asahel raoʼierón꞉ta tánon iaonwahiatháta tsi thóh tsatónkwaien ne roʼníha, thóh nón꞉we Bethlehem. Joab tánon ne raonkweʼtashón꞉ahs wahatenenhraserón꞉ni ashontakwékwe, tánon thóh nón꞉we iahotírenhne Hebron.