2 Samuel 19 - Ohiatonhseratokénti

¹ Tsi nionsahonwaró꞉ri ne Joab, “Ne ronnontí꞉io tsi tehaséntʼthos ó꞉ni roʼtiónhnion ne Absalom raoriwá꞉ke.”

² Káti natesenhniétsera nètho wenhniserá꞉tekwe ne iatewatkaraténi tsi wahontiónhnionkwe ratikwé꞉kon ne ronterí꞉ios; séken ne ronterí꞉ios tsi wahatiriwá꞉ronke nètho wenhniserátekwe, “Ne ronnontí꞉io tsi nihonikonrákʼsens ne roʼiénha raoriwá꞉ke.”

³ Ne ronterí꞉ios wahatirihwásehte tsi kanatowanénhke niá꞉hon nètho wenhniserá꞉tekwe ne ronterí꞉ios roʼtiriwasénton ne roʼnón꞉ha tsi nihontéhens tsi nithonatékwen nateriʼioseráke.

⁴ Ne ronnontí꞉io wahatkonwaróroke, tánon ne ronnontí꞉io tehaséntʼthos tsi nihawénhna, “Ó riʼiénha Absalom, Ó Absalom, riʼiénha, riʼiénha!”

⁵ Eʼthó꞉hʼne ne Joab iahatáwehiaʼte raonónskon ne ronnontí꞉io, tánon wahén꞉ron, “Ónwa wenhniserá꞉te wasatkonwaróhroʼke ne raonatehénsera ne ratikonsakésons ratikwé꞉kon ne sanhatserashón꞉ahs tsi roʼnón꞉ha sahatinónsthate tsi sónnhe nón꞉wa wenhniseráte, tánon ne tsi ronhnónnhe ne sanekenteronhtserashón꞉ahs ó꞉ni ne sehiohokón꞉ahs tsionatthonwísens, ó꞉ni ne sewaniák꞉kons ó꞉ni ne tesewahiasénions,

⁶ asèken ne senorónkwa tsi niʼiá꞉kon ne ieshá꞉shons tánon ne ieshá꞉shons ne senorónkwa. Ní꞉se kwáh waséneste nón꞉wa wenhniseráte nètho ronteriʼioserakweʼní꞉ios ó꞉ni ne ratisenhnowánenhs iah othènon satékena tsi nihatiʼiatótens ne sarihwáke; asèken tewaketá꞉kwen nètho tó꞉ka ne Absalom arónnheke tánon iakwahkwékon ahionkwenhé꞉ion nón꞉wa wenhniserá꞉te, kwáh kíʼ ní꞉se aeserientiʼióhon.

⁷ Káti wáhs kwáh ónenk iatiá꞉ken tánon sheʼtáras kanoronhkwahtserákon roʼnónhake ne sanhatserashón꞉ʼahs; asèken keriwanírats rahonhá꞉ke ne Roiá꞉ner, tó꞉ka iáh éhʼthoh tiá꞉se, iáh ne saiá꞉ta ne kwáh tahonsahiarískote nón꞉wa okará꞉sa; tánon ne kí꞉ken ne kwáh tewahét꞉ken ne sariwá꞉ke tsi ní꞉ióht ne kariwahetkénhsera ne nonwénhton aesahiatoréhon ne shisekʼsá꞉a tsi niʼióre nón꞉wa.”

⁸ Ehʼthóhʼne ne ronnontí꞉io wathá꞉tane tánon thóh iahá꞉tsien tsi iotenhenrakáronhte. Ne ronterí꞉ios ratikwé꞉kon wahonwatiʼró꞉ri, “Sewatkátho, ne ronnontí꞉io thóh iehenskó꞉te tsi iotenhenrakáronte”; tánon ratikwé꞉kon ne ronterí꞉ios iahónhne tsi thenskwáhere ne ronnontí꞉io.

Ne Táwit Jerusalem Nionsá꞉re

⁹ Ratikwé꞉kon nonkweʼókons tehotiriwakénen kwáh ratikwé꞉kon tsi niateotitá꞉rakes NIsraerʼronónke, rontónhnions, “Ne ronnontí꞉io shashonkwahiatotarísi tsi nòkwah ne ionkísons, tánon shashonkwanónsthate tsi nòkwah ne Philistines; tánon ó꞉nen wahatèko ne tsi ionwenhtsá꞉ien ne raoríhwa Absalom.

¹⁰ Ók ne Absalom, tsi raónha tsi tewahiatará꞉kwen, rawenhé꞉ion ateriʼioseráke. Nón꞉wa ne kariwaientákwen onontsiéren tsi iáh othènon tesewáton tsi nòkwah ne tahontatsitewaiathénhawe ne ronnontí꞉io ne kénʼen?”

¹¹ Ne Ronnontí꞉io Táwit iashakoteriwaniétase ne tenitsihénstatsi Zadok ó꞉ni ne Abiathar, “Ietsiʼiénhas ne rotikstenokónhas ne Judah nón꞉we, ‘Onhnontiéren tsi í꞉se nonáken ahiʼtsiʼionniate ne ronnontí꞉io tahontáre tsi rononshó꞉te? Tsi niʼiakótharon ratikwé꞉kon NIsraerʼronónke nón꞉wa rahonhá꞉ke ne ronnontí꞉io.

¹² Í꞉se ne tewataténons, í꞉se nastsienshónhas í꞉ken ó꞉ni nakewáron; onhnontsiéren kíʼ tsi í꞉se nonàken ahitiónhniaʼte ne tahontatsisewahiaténhawe ne ronnontí꞉io kén꞉en?’

¹³ Tánon tsi sewénhas ne Amasa, ‘Ní꞉se iáh kén í꞉i tetiaʼtaténon? Káti aiá꞉wens ne Ní꞉io thóh nahatiérase, ó꞉ni sénha ishiʼnón, tó꞉ka ní꞉se iáh ó꞉nen í꞉se thatesheseniarotárion nakitsió꞉kwa ronterí꞉ios ne kénʼen ienwatásawen, ne raonaktáke Joab.’”

¹⁴ Amasa waʼtesakonikonrakénhni ratikwé꞉kon nonkweʼókons ne Judah nón꞉we kwáh sakanikónrat wahonhnón꞉ni, tánon iahonwatewenhnateniéten ne ronnontí꞉io, “Thontá꞉se, sewakwé꞉kon ó꞉ni ratikwé꞉kon ne sanhatierashón꞉ahs.”

¹⁵ Káti ne ronnontí꞉io ionshá꞉rawe ne Jordan kaniataratátsie; tánon ne Judahró꞉nons thóh neh nón꞉we iehó꞉ti Gilgal ne ne tahonwahiáhiakʼte ne Jordan kaniataratátsie.

¹⁶ Ne Shimei ne ne roiénha ne Gera, ne ne Benjaminró꞉non, Bahurim nón꞉we nihanákere, wathosterí꞉hen skát꞉ne nahontahón꞉ne ne Judahró꞉nons niatahonwáterate Ronnontí꞉io Táwit;

¹⁷ ne Shimei ne ne ratikweʼkonhátie enskatehonhnienhniawehetseráhsen nihá꞉ti ronhnón꞉kwe ne ne Benjaminró꞉nons. Ó꞉ni Ziba, ne ranhatserakénʼne tsi ronónshate ne Saul, skát꞉ne ne wísk iaʼwénre niháti raonekenteronhtserashón꞉ahs ó꞉ni ne tewáhsen nihá꞉ti ratinhá꞉tseras, iatʼthonskénhni tsi tkaniataratátie ne Jordan ronónha tahontié꞉rente iaʼhón꞉newe tsi ní꞉iot ne ronnontí꞉io,

¹⁸ tsi nikaríwes teotihiaiakonhátie, tsi tashakotihiáiakʼte ne ronnontí꞉io raowátsire, tánon thóh nahatí꞉iere tsi nitʼtaskáneks. Shimei ne roiénha ne Gera iahahiatiénenhne ohontsà꞉ke raohénton ne raohenrononhtí꞉io nó꞉nen shataʼahiaiake ne Jordan

Ne Táwit Waréneste Tsi Nontaorihwaiérite Ne Shimei

¹⁹ tánon wahawénhase ne ronnontí꞉io, “Aiá꞉wenhs natiá꞉ner tó꞉sa ahakenontánake khéhs nahonsarehiá꞉rane ne sanhá꞉tshera tsi nateoterientawenhré꞉on ne shiʼwenhniserátekwe natiá꞉ner ne ronnontí꞉io nahé꞉ren sárete Jerusalem; aiá꞉wenhs ne ronnontí꞉io ne tó꞉sa ne ahanontonniónseke.

²⁰ Asèken ni꞉i roteriéntare nètho tsi wakeriwanerenhátston; ne aoríhwa, satkátho, kénʼen nontáke nón꞉wa wenhniseráte, ne thontserénhtakwe ne tsi ronónshote ne Só꞉se kenʼen tahiá꞉kwe ne ne taiakwatát꞉ken natiá꞉ner ne ne ronnontí꞉io.”

²¹ Abishai ne ne roiénha ne Zeruiah watariwaserá꞉ko, “Kwáh onhtèken iáh ne Shimei tahonwanonwarhiá꞉khon ne ne kí꞉ken akariónhʼni, tsioríhwa tsi roʼkenrenserónhniʼon ne Roiá꞉ner ratiatarákwen naonkenontí꞉ione?”

²² Ók ne Táwit wahén꞉ron, “Ónhʼní꞉se nakonhierá꞉se, Í꞉se ne raonekenteronhtserashón꞉ahs ne Zeruiah, nètho ní꞉se tsi kwáh ákte nòkwahti tentisewáthane nakonhá꞉ke? Kwáh kénk ónhkak ahiontatenonwarhiá꞉kkhon ne Israerʼronónke nón꞉wa senhniserá꞉te? Asèken ní꞉i kwáh iáh tewakateriéntare nón꞉wa wenhniserá꞉te tsi í꞉i wakenontí꞉io NIsraerʼronónke?”

²³ Ne ronnontí꞉io wahawénhase ne Shimei, “Kwáh ní꞉se iáh thashíheie.” Tánon ne ronnontí꞉io tahá꞉wen ne raoteriwanirátʼtsera.

Táwit Tánon Ne Mephibosheth Watʼiatátken

²⁴ Ne Mephibosheth ne roteré꞉ʼa ne Saul tá꞉re ne tahiatátken ne ronnontí꞉io; iáh nenhʼné꞉e teorashiʼtóhare, khéhs nahotkonstonhrhiákon, khéhs nahotenoháreke ne raotserónhniat, thóh tsiotásawe ne tewenhniserá꞉tekwe ne ronnontí꞉io éhren sárete tsi niʼió꞉re né wenhniserá꞉tekwe shonsárawe kwáh skénnonk thí꞉ken.

²⁵ Nó꞉nenh Jerusalem shontáre ne tahiatát꞉ken ronnontí꞉io, ne ronnontí꞉io wahaswénhase, “Nontsiéren ní꞉se tsi iáh teionkené꞉non, Mephibosheth?”

²⁶ Watharihwaserá꞉ko, “Atiá꞉ner, Ó Sanontí꞉io, nekenhátsera wahakenikonrá꞉ten; asèken ne sanhatsé꞉ra wahawénhase, ‘Toh í꞉i ítren ne iakoshatensthákwa raiá꞉take ne tewahóntes, ne káti nahónton ne ahontsháten ne tewahóntes tánon ne ahiaterósen ne ronnontí꞉io.’ Asèken ne sanhátsera roshiʼnakenhé꞉ion.

²⁷ Wahakanowénhten raonhá꞉ke natiá꞉ner ronnontí꞉io. Ók natiá꞉ner ronnontí꞉io kwáh ne teshiatiéren ne raoronhiakeró꞉non Ní꞉io; thóh nátiere tsi nahó꞉ten ne tkariwaiéri akénhake ne sariwá꞉ke.

²⁸ Asèken ratikwé꞉kon ne rakení꞉ha raowátsire tehonaténhtion nahonwatinonwarhiá꞉khon raohén꞉ton natiá꞉ner ronnontí꞉io; ók thóh kiskwáren skát꞉ne tsi nihá꞉ti ne thóh teonatskáhon satekhwárane. Onhnahiotónhake ne sénha ahontianerenhseraién꞉take, nék, nahiʼianiténhtase ne ronnontí꞉io”

²⁹ Ne ronnontí꞉io wahawénhase, “Onhnonhtiéren tsi sénha ishiʼnónwe nasatá꞉ti ne sarihwashón꞉ahs? Tewatiatorénton: í꞉se tánon ne Ziba kwáh tensenihiá꞉ke nohón꞉tsa.”

³⁰ Ne Mephibosheth wahawénhase ne ronnontí꞉io, “Rahónha akwé꞉kon raterá꞉ko, tsík sénhak natiá꞉ner ronnontí꞉io sárawe kwáh skénnok.”

Táwit Taorihwaiéritʼtse Ne Barzillai

³¹ Nón꞉wa ne Barzillai ne ne Gileadró꞉non thóh nón꞉we nithawénon Rogelim; skát꞉ne ne ronnontí꞉io tsi watnihiáhiake ne Jordan kaniataratátsie.

³² Ne Barzillai kwáh í꞉ken tsi thoʼiónkwe, shá꞉tekon niwáhsen natehahoseriʼiákonkwe. Ne rokwahnóntenskwe ne ronnontí꞉io tsi nikarí꞉wes thóh renterón꞉takwe Mahanaim, asèken kwáh í꞉ken tsi rokwáhtsene.

³³ Ne ronnontí꞉io wahawénhase ne Barzillai, “Káts í꞉i í꞉tene Jerusalem kwáh í꞉i tenkonriwásniese.”

³⁴ Ók ne Barzillai wahawénhase ne ronnontí꞉io, “Tóh꞉shé꞉kon niʼioseráke ahonsakónnheke, iáh neh takarihónhni nahí꞉tene Jerusalem?

³⁵ Nón꞉wa wenhniserá꞉te ó꞉nenh shatékon niwakoserásen; akʼkwéni kén niakeriwá꞉ken tsi nahó꞉ten ahonkonwéskwen tánon nahó꞉ten ne iáh? Iáh tetsawehkonhontserá꞉ien tsi nahó꞉ten í꞉keks ó꞉ni tsi nikʼnekí꞉ra? Akʼkwéni kén ne shé꞉kon ahonsakatahónsatate ne raotiwenhnaókons tsi natehatiriwá꞉kwa ne ronhnón꞉kwe ó꞉ni ne konhnón꞉kwe tekontiriwá꞉kwas? Onh nontiéren káti tsi sénha ahirienhnastéten natiá꞉ner ronnontí꞉io?

³⁶ Kénk niʼió꞉re nienhén꞉ke ne tsikʼkaniataratátsie ne Jordan skát꞉ne ne ronnontí꞉io. Iáh thatewakaténtion neh thoʼniióre tsi taháshsniene ne ronnontí꞉io?

³⁷ Ánion takerí꞉hon skaténhti, ne káti nahón꞉ton thóh nón꞉we nakíheie akená꞉takon, raonattsatonkwák꞉ta ne rakeníha ó꞉ni nakenisténʼa. Ók kén꞉en í꞉kes Chimham; tseríhon ne í꞉ne natiá꞉ner ronnontí꞉io; tánon ne thóh nihá꞉ier tsi niteshenónhwes.”

³⁸ Ne ronnontí꞉io wahthariʼwaserá꞉ko, “Ne Chimham kwáh kíʼ ne enhiákene, tánon thóh nenhiʼiatiérase tsi natesatonhón꞉tiohni; tánon akwé꞉kon tsi nisaská꞉neks ní꞉i thóh nenhkoniá꞉tierase.”

³⁹ Eʼthó꞉ne kíʼ ó꞉nenh kwáh kanenhrakwékon wathatiniatarí꞉iake ne Jordan, ó꞉ni ne ronnontí꞉io wathaiáhiake; ne ronnontí꞉io wathonoronhkwánion ne Barzillai tánon wahoiatatériste, tánon thóh nionsáre tsi thonónshoʼte.

⁴⁰ Ne ronnontí꞉io thóh ne nón꞉we niahá꞉re Gilgal, tánon Chimham wahiateró꞉sen; ratikwé꞉kon ne Judahró꞉nons ó꞉ni ne satekanenhrí꞉en NIsraerʼronónke, wahonteró꞉sen ne ronnontí꞉io.

⁴¹ Eʼthóhʼne ratikwé꞉kon nonkweʼókons NIsraerʼronónke ronnontí꞉ioke niahónhne, tánon wahonwénhase, “Onhnón꞉tiere ne iakwatatekénʼahs ne Judahró꞉nons tsi éhren wahesaiatenhá꞉wite nontionhá꞉ke, tánon tahonwahiaténhawe ne ronnontí꞉io ó꞉ni ne raowátsire wathonwahiaiát꞉te ne Jordan kaniataratátsie, tánon ratikwé꞉kon ne Táwit raonkweʼtashón꞉ahs?”

⁴² Ratikwé꞉kon ne Judahró꞉nons wathonwatirihwaserákwase nʼIsraerʼró꞉nons, “Tsioríhwa ne ronnontí꞉io tsi kwáh ákta tsi iakwahtatekénʼa. Onhnontiéren káti tsi nisewahnakwénhen ne kí꞉ken aoriwá꞉ke? Kwáh kén ne thé꞉nenh ahionkwèkon ne ronnontí꞉io ahotkarónhnion? Khéhs ne knahótenk ashonkwáhwi athatawí꞉tsera?”

⁴³ Ók nʼIsraerʼró꞉nons watonwatiriwaserá꞉kwase ne Judahró꞉nons, “Oiéri niʼiorihwáke sénha í꞉i ionkwariwaien ne raonhá꞉ke ne ronnontí꞉io. Ne nònhne sá꞉ka ne Táwit sénha tsi ní꞉iot ní꞉se. Onhnontiéren káti tsi waskwakénron ní꞉i? Iáh kén í꞉i tetionkwatierénton tsi wahakwénron tentetsiʼtewahiaténhawe ne ronnontí꞉io?” Ók ne raotiwenhnaókons ne Judahró꞉nons sénha ne iateononniáton ne raotiwenhnaókons tsi ní꞉iot nʼIsraerʼró꞉nons.