2 Samuel 17 - Ohiatonhseratokénti

¹ Iáh tekaríwes tsi nitsotohétston Ahithophel wahawénhase ne Absalom, “Takerí꞉on akheiataráko tékeni tewenhniawehetseráhsen niháti rónnonhkwe, tánon thóh iénhke ó꞉ni enhí꞉sere ne Táwit enhió꞉karawe.

² Kwáh thó꞉ne ienhiʼiatsiatónhti ne nó꞉nenh kwáh tenhowisenhé꞉ionke tánon ronikonroktáhon, tánon thenhiʼionhnaríkʼkhon; tánon ratikwé꞉kon ne ratikwekonhátie ne raónha kwáh kíʼ enhontèko. Kwáh nék khók enhinonwarhiákon ne ronnontí꞉io.

³ Tánon kwáh thentekheiaténhawe ratikwé꞉kon nonkweʼókons shonháke tsi ní꞉iot ne onwák khók ioniá꞉kon ionshón꞉we tsi rénteron ne ró꞉ne. Kwáh Táwit khók ehtsiatísaks, tánon ratikwé꞉kon nonkweʼókons kwáh skénnonk thenshón꞉ton.”

⁴ Tsi nahathenikonrotási ne Ahithophel wahanónhwene ne Absalom ó꞉ni ratikwé꞉kon ne thotí꞉ions NÍsraerʼronónke.

⁵ Ehʼthóhʼne Absalom wahén꞉ron, “Iatsínonk Hushai ne Archró꞉non, tánon áhnion ionkwatón꞉tenn tsi nahó꞉ten enhén꞉ron.”

⁶ Nó꞉nenh ne Hushai wáhraʼwe rahonhá꞉ke ne Absalom wahawénhase, “Kén kíʼ nihá꞉wenh ne Ahithophel; Tó꞉ken nahitewáiere tsi nihatenikonráwis? Tó꞉ka iáh, í꞉se takwahró꞉ri.”

⁷ Ehʼthóhʼne ne Hushai wahawénhase ne Absalom, “Nón꞉wa tsi nihatenikonrá꞉wis ne Ahithophel tsi iáh teioiá꞉nere.”

⁸ Ne Hushai iahatashón꞉teren, “Sateriéntare ne ianíha ó꞉ni ne raonkweʼtashón꞉ahs ne ronterí꞉ios, tsi rotinhakwénhen, kwáh ne ne okwári konwawirákwen thóh kahentáke. Tsieská꞉te, ne iá꞉niha tsi rorenhná꞉hon nateriʼioseráke; ne raónha kwáh iáh thóh tahasontiʼiá꞉ke skat꞉ne ne ronterí꞉ios.

⁹ Shé꞉kon nón꞉wa rotasehtonhá꞉ties ne tsi ioshonióntons, khehs aktésons nonwésons. Tánon nó꞉nenh nón꞉kak nontionkwé꞉ta ronterí꞉ios ienhatiʼiá꞉tenhne nenhtewatsiérenhte ienhonwanatsiatónhti, ónka kí꞉iok ahonátonhtene kwáh enhonhníron, ‘nètho tionkwé꞉ta tsi ronwatisénhnion ne ronwanonhteráhtieskwe Absalom.’

¹⁰ Ehʼthóhʼne shé꞉kon ne kwáh ronikonratsáni raterí꞉ios, thóh nihawerhiá꞉shote tsi ní꞉iot ne kénreks, kwáh í꞉ken tsi enhotitsiʼióhaʼne; asèken akwé꞉kon Israerʼronónke iakoteriéntare nètho ne ianíha tsi raterí꞉ios nahahiatóten, tánon tsi nikáien ne ratikwekonháties kwáh kíʼ rotinikonratsáni tsi ronterí꞉io nahatiʼiatóten.

¹¹ Ók kíʼ tsi nikatenikonrá꞉wis ratikwé꞉kon nʼIsraerʼró꞉nons ronhnitsiokwarórok shonháke, thóh tewatásawen Dan tsi nióre ne Beer-sheba, kwáh ne ne onesarón꞉kwah natsiatʼtónhtse ne kaniatarakhekówane tsi nètho nahonatsió꞉kwaske, tánon thóh iaháse tsi tewaterí꞉io ní꞉se.

¹² Káti kwáh ientsitewahiató꞉renhne kwáh tsi nón꞉we nahonwahiatattsénri, tánon hiatsitewatsiatónhti tsi ní꞉iot tsi iohawehiástha nonhontsá꞉ke; tánon kwáh iáh tharónnheke.

¹³ Tó꞉ka kanátakon niahonsáre, ehʼthóhʼne kíʼ akwékon NIsraerʼronónke kwáh enthatisiriʼieténhawe nètho kanatowahnénhke, tánon entewatatisere thóhh nientewáhawe ahwenhrá꞉kwakon, tsi niʼió꞉re iáh ne skanénhia tsatahonsahiothaténhronke nètho nón꞉we.”

¹⁴ Ne Absalom tánon ratikwé꞉kon ne ronnónkwe NIsraerʼronónke wahonhní꞉ron, “Tsi nahatenikonráieste ne Hushai ne Archró꞉non sénha ioiá꞉nere tsi ní꞉iot ne Ahithophel.” Asèken ne Roiá꞉ner roriwahniráton neh tó꞉sa ne hahatísehre ne ioiá꞉nere tsi nihothenikonráwi ne Ahithophel, káti ne nètho Roiá꞉ner nontsiérent neh enhohérase nahokarónhni Absalom.

Ne Hushai Wahoronhkáten Ne Táwit Nahaniákenhne

¹⁵ Ehʼthóhʼne ne Hushai wahawénhase ne ratsihénstatsi Zadok tánon ne Abiathar, “Tsiakariwakénhniate thóh nonʼné꞉e ne Ahithophel nihotenikonráwi ne Absalom ó꞉ni ne rotitstenokón꞉ahs ne Israerʼronónke; ó꞉ni tsiakariwakénhniate káti í꞉i ó꞉ni wakatenikonrá꞉wi.

¹⁶ Tánon nón꞉wa iasateriwániet iostó꞉ren tánon sró꞉ri ne Táwit, ‘Tó꞉sa thorasonhtí꞉ia tsi iateiehiaiátstha ne Jordan, ók ó꞉nenk tehaiáiak; nó꞉ia nahiotón꞉hake ne ronnontí꞉io ó꞉ni ratikwé꞉kon nonkweʼókons ne ratikwekonhátie ne rahónha kwáh kíʼ enhonwaná꞉tonhte.’”

¹⁷ Ne Jonathan ó꞉ni ne Ahimaaz thototirá꞉rekwe En-rogel nón꞉we; ienhá꞉tshera ieksá꞉a sés thonienhénhʼien tánon enhonwatiró꞉ri, tánon thóh nienhén꞉ne enhonwaró꞉ri ne Ronnontí꞉io Táwit; asèken iáh tené꞉reh ne tahontaiawénhstsi tsi ianinatá꞉rane kanatowanénhke.

¹⁸ Ók raksá꞉a wasakóken, tánon iahoróri Absalom; káti tenitsáron iostó꞉re éhren sáneʼte, tánon iahá꞉newe rónhkwe thoʼnón꞉shote ne Bahurim nón꞉we, ne raónha roknáweroʼte ne raotenhén꞉rakon; tánon thoʼnón꞉we iaiátsnenhte.

¹⁹ Ne rónkwe ró꞉ne watewá꞉kwe ne waterohróksthe, tánon watkatakwárite éhʼneken tsi ionáwerote, tánon onátsia watewaré꞉niate éhʼneken ne wateroroʼkátha ne tsi ionáwerohʼte; tánon iáh knahótenk teiakoterientará꞉on.

²⁰ Nó꞉nenh ne Absalom raonhá꞉tseras iakonwahiató꞉renhne ne iónkwe tsi tsionónshote, waní꞉ron, “Kanón꞉we ní꞉nes ne Ahimaaz tánon ne Jonathan?” Ne iónkwe wahakawénhase, “Tehotiʼhiaiá꞉kon tsitkaionhatátsie nenékanos.” Tánon nó꞉nenh shahonwatihiatíshake tánon iáh tehotikwékon nahonwatiʼhiatatʼtsénrion, Thóh nionsáhne Jerusalem.

²¹ Nó꞉nenh shiʼshonaténhtion, ne tenón꞉kwe thontahiatitáko nonhawerákon, tánon iahá꞉ne wahonwaró꞉ri ne Ronnontí꞉io Táwit. Wahonwénhase ne Táwit, “Wáhs tánon tetiá꞉hiat ne tsi kaniatarathá꞉tsie iostó꞉ren; asèken tiakariwakénhniaʼte tánon káti Ahithophel rotenikonraiéston niahiatsatónhti.”

²² Káti ne Táwit ó꞉ni ratikwé꞉kon nonkweókons ne ratikwekonhá꞉tiene iahón꞉ne tánon wathatiʼiá꞉iake ne tsi kaniatarathátsie ne Jordan; tsi niʼió꞉re iatsiostʼwá꞉thene noronkéne iáh ne tionkwé꞉ta teshotaténhronhkwe ne iáh thatahohiahiáʼkon ne Jordan.

²³ Nó꞉nenh ne Ahithophel sahatkátho nètho tsi nihotenikonráwi tsi iáh tehotíseron, wahokweniáren ne raotsénen tehahóntes tánon thóh nionsáre tsi thohʼnón꞉shote ne raohónʼa raonatowanénhken. Wahakwatá꞉ko ne raoriwashón꞉ahs, tánon wahatatniáterenhke; warénheʼie tánon thóh nón꞉we nahonwahiatá꞉ta ne roʼníha rotstenhrakáronhte.

²⁴ Ehʼthóhʼne ne Táwit iahá꞉rawe thoʼnón꞉we Mahanaim, tsi ná꞉he nenhʼné꞉e ne Absalom tánon ne ratikwé꞉kon nʼIsraerʼró꞉nons ronhnónkwe ne ratikwekonhá꞉tiene wathatiʼiá꞉iake ne Jordan.

²⁵ Nón꞉wa ne Absalom ne shahorihón꞉ten ne Amasa tsi ratitsió꞉kwaien ronterí꞉ios ne tonsahonaktákwen ne Joab, Ne Amasa ne ne roní꞉ha ne Ithra ronwáiats ne ne Ishmaelró꞉non ne nenhʼné꞉e rotiniá꞉konhne Abigail ne ne Nahash sakoiénha, ne iatenhosènha ne Zeruiah, ne ne Joab ronisténha.

²⁶ Ne Israerʼró꞉nons ó꞉ni ne Absalom thóh wahontathoserontónhnion tsi ionhontsáien ne Gilead.

²⁷ Nó꞉nen ne Táwit shiahárawe ne Mahanaim, Shobi ne roní꞉ha ne ne Nahash thóh neh nón꞉we nihanákerekwe ne kanatowanénhke Rabbah ne ne Ammonró꞉nons raononhontsáke, tánon ne Machir ne ne roní꞉ha ne Ammiel thóh neh nón꞉we nihanákerehkwe ne Lo-debar, tánon ne Barzillai ne ne Gileadró꞉non Rogelim ne nón꞉we nihanákerehkwe,

²⁸ ne tahatiháseron kanáktes, iontawensthákwah kaná꞉kons, tánon ne ohtarasónhas katʼtsesónhas, onátsias, teiotikonstón꞉res, oteshé꞉ras, watenatióntes, osahé꞉tas tánon nosahétas ne niateiotitsiókwakes,

²⁹ otsinakontakwáne otsikhétas óni ne kawistoseró꞉kwen, teiotinakarontónʼahs, tánon ne kawistoseronhniáton ne tionhnónskwaron aotinón꞉tha, asèken ne ne Táwit tánon nonkweshón꞉ahs ne ratikwekonhátie enhón꞉neke; asèken wahonhní꞉ron, “Ne ronterí꞉ios rontonkárhiaks tánon teotiwisenhéion tánon rotiniatátʼtens thóh nón꞉we iahonwenhtsiatʼténhake.”