2 Samuel 15 - Ohiatonhseratokénti

Ne Absalom Tontahanóntonse Ne Kanontiʼiótsera

¹ Ehʼthóhʼne ó꞉nen ne Absalom tahatáshaʼwenh ne wahohonwiseréhson notsiónkwa káseres tánon kosáhtens wakontirónhten, tánon wísk-niwáhsen niháti ronhnón꞉kwe ne tahonrá꞉tate raohén꞉ton.

² Ne Absalom oronkéstsi sés ratkétskwas tánon thóh tenhá꞉tane ohwahák꞉ta tsi iotenhenrakáronhte; tánon nó꞉nenh nón꞉ka ne thènen kaianerenhserá꞉ke nieniéhawe ne raohén꞉ton ne ronnontí꞉io nakarihwénhton, Ne Absalom kwáh iatenhohénrehte tánon enhén꞉ron, “Onhnakanatowánenhne nón꞉we nitisénon?” Nó꞉nenh nón꞉kwe enhiaiéron, “Ne ni꞉i thóh nón꞉we nithewakénon—tánon kén nahotaró꞉ten—NIsraeronónke,”

³ Ne Absalom kwáh enhén꞉ron, “Satkátho, ne sarihwashónhas ioiánere tánon tkariwaiéri; ók iáh ónhka ne roteriwatsterítstá꞉se ne ronnontí꞉io naiatahónsathaʼte.”

⁴ Ne Absalom tsi nahén꞉ron sénha ishiʼnón꞉we, “Tó꞉ka nék khók ne í꞉i akerihwénhthake ne tsi ionwenhtsiá꞉ien! Ehʼthóhʼne ratikwé꞉kon ne raotirihwashónhas khés tsi natehonhanikónrareh nontiérenk akonhá꞉ke nenhtónhne, tánon í꞉ih entekhéion ne karihwakwahrihshióntsera.”

⁵ Ne nó꞉nenh nónkwe ákta enhién꞉te aiéneste kakwenienstá꞉tsera ne raonhá꞉ke, iathenhatiá꞉tate tánon ienhsakoiéna, tánon thensakonoronhkwáhnion.

⁶ Tsiakariwakénhniate ne Absalom kwáh kíʼ thóh nasakoiérase kwáh ratikwé꞉kon nʼIsraerʼró꞉nons tsi nihá꞉ti ronnontí꞉ioke niahón꞉ne nahonwatirihwéntase; káti ne Absalom watesakonikonrakwéhni nʼIsraerʼró꞉nons nahontahonwétakwe.

⁷ Tsi iahontók꞉ten ne kaiéri niʼioserá꞉ke ne Absalom wahawénhase ne ronnontí꞉io, “Asatthóntate takerí꞉hon ne iá꞉ke thóh nón꞉we Hebron tánon aká꞉rhiake tsi niwakarharátston rahonhá꞉ke ne Roiá꞉ner.

⁸ Asèken i꞉i waʼkararátston tsi náhe thóh nón꞉we tkenákerehkwe Geshur thóh nón꞉we Aramke: Tó꞉ka ne Roiá꞉ner kwáh oriwiʼiohónwe ienshatiaténhawe Jerusalemke, ehʼthóhʼne kíʼ kwáh enhisénhnaien ne Roiá꞉ner thóh nón꞉we Hebron.”

⁹ Ne ronnontí꞉io wahawénhase, “Wáhs kwáh skénnonk nionsá꞉se.” Káti wathá꞉tane, tánon Hebron nionsá꞉re.

¹⁰ Ók ne Absalom iasakoténiete ne ronatʼtsistokwaséhtons akwé꞉kon nahontahónhnete tsi ratitsió꞉kwaiens nʼIsraerʼró꞉nons, rontónnions, “Kwáh tsi niʼiostó꞉re ensewathón꞉tene nahonterenhnó꞉ten ne iehonrawátsta, ehʼthóhʼne tesewahén꞉ret: Absalom wahonontí꞉ione ne Hebron!”

¹¹ Tekeniʼtehonhnenhniá꞉we nihá꞉ti Jerusalem nón꞉we tahonténti ne wahón꞉ne Absalom; ne ne kahonkaráwi, tsi niahón꞉ne kwáh raotinikonrótskonk thíken, iáh othènon tehathiriwaientéri tsi niʼioterihwatsiéren.

¹² Tsi nikarí꞉wes ne Absalom ne wahateriwathéntsiaʼte wahatenaskwaʼtsahatá꞉nion, Ahithophel Giloró꞉non ne sahotiéten ne iahá꞉sa, ne roʼtenikonráwiskwe ne Táwit, thóh nón꞉we nithawénon raonatowanénhke Giloh. Ne kariwaséhton ontehiá꞉ron wakasháststenhne, tánon nonkweʼókons iakotsiokowanenhonhátie ne Absalom raoriwá꞉ke.

Ne Táwit Sahatèko Ne Jerusalem Nón꞉we

¹³ Rarihwakarénies wahoronkáten ne Táwit, “Ne Israerʼró꞉nons ronwararatsténhnis tsi enhotiriwatokénhake rahonháke ne Absalom!”

¹⁴ Ehʼthóhʼne ne Táwit wasakawénhase ratikwé꞉kon ne raonhatseraókons tsi nihá꞉ti ne ronwanonterátieskwe ne Jerusalem. “Tesewá꞉tan! Áhnion tewatèko, khés iáh kanèka thahonsónton nahonshatsitewahniákenhse ne Absalom. Tesewasterí꞉hen, khéhs kwáh iostó꞉re enshonkwanonhtérane, tánon ne enshonkwahérase ne kariwahetkénhsera nontionhá꞉ke, tánon ienhatsatónhti ne kanatowanénhke ne énratste ne iosahrothíʼie.”

¹⁵ Ne ronnontí꞉io rahonkwerashón꞉ahs wahonwénhase ne ronnontí꞉io, “Ne sanhatserashón꞉ahs kwáh ronatateweiennenhtáhon ne thóh nahatíiere tsi nahó꞉ten ne Onkwahiá꞉ner ne ronnontí꞉io iatenhoriwaién꞉tase.”

¹⁶ Káti ne Táwit tonsahattháhakwe, ronwanonterá꞉tie ne raowátsire, nek khók ne oiéri nikónti ne tehatiʼterón꞉takwe thóh neh tasakótʼkaʼwe ne nakontenhnikonrá꞉ren tsi ronónshoʼte.

¹⁷ Ne ronnontí꞉io tonsahatʼtáhakwe, ronwanonterátie nonkweʼókons; tánon iathatítaʼne nonàken ieskanónshoʼte.

¹⁸ Ratikwé꞉kon ne raonkwetashón꞉ahs ne ronaterihóntons wahonwatohétsten; tánon ratikwé꞉kon ne ronhwahiataʼnonhná꞉kwe, tánon ratikwé꞉kon ne iáh-iak tehonhnenhniá꞉we nihátikwe Gitró꞉nons ne ronhnónha tonhwásheron ne Gath nón꞉we, wahontóhetste raohénton ne ronnontí꞉io.

¹⁹ Ehʼthó꞉ne ne ronnontí꞉io wahawénhase ne Ittai raónha sakohéntense ne Gitró꞉nons, “Onhnontsiéren ní꞉se tsi ó꞉ni tewakwekonhátsie? Shasháket, tánon ne tsiatóntʼtas ne ronnontí꞉io; asèken ní꞉se thishonhontsáte, tánon kwáh ó꞉ni tsesanakerakwáhton ne sanakeraserá꞉kon.

²⁰ Ní꞉se ónkwak khók theténhre í꞉soh, tánon kwáh kén ní꞉ih akonrí꞉hon ne skát꞉ne tahitewahtá꞉wehre nonkwáhtiakes, akwé iáh tewakateriéntare kanón꞉we niahonkenonhá꞉tie. Wáhs sashá꞉ket, ionsasheiaténhaf ne shonkwetaʼshón꞉ahs; tánon aiáwens ne Roiá꞉ner aréhneste ioriwató꞉ken kanoronhkwáhtsera ó꞉ni kariwatokentítsera ne shonháke.”

²¹ Ók ne Ittai watoriwaserá꞉kwahse ne ronnontí꞉io, “Tsi nironnheónwe ne Roiá꞉ner, tánon tsi nirónhne natiá꞉ner ronnontí꞉io, tsi nón꞉we natiá꞉ner naréhseke, khés ne kenheiát꞉ne khéhs tsi nirónnhe, thó nón꞉we nenhkéhseke.”

²² Ne Táwit wahawénhase ne Ittai, “Wáhs kiʼ, iasenenhraserónhni,” Káti ne Ittai ne Gitró꞉non wahanenhraserónhni, skát꞉ne ne ronnónkwe tánon ratikwé꞉kon ne kenʼnihonhnásas ratitsaokónhas ne raónha ratikwekonhátiesʼkwe.

²³ Kwáh kanakeraserakwékon tsi watsionséntʼtho kwáh rotiwènte ne nó꞉nenh onkwetaʼkwé꞉kon sahontóhetste; ne ronnontí꞉io iatharonhí꞉iake ne Kidron, tánon ratikwé꞉kon nonkweʼókons iahontsatʼténhake niahónhne.

²⁴ Ne Abiathar tá꞉re, ó꞉ni ne Zadok, ratikweʼkonhátie ne Levites, ratihá꞉wi noneró꞉kwah ne raoteriwaseronniátsera Ní꞉io. Ehʼtàke wahatí꞉ien ne raoneró꞉kwah Ní꞉io, tsi niʼió꞉re nonkweʼókons wahontóhetste ne kanatowanénhke.

²⁵ Ehʼthóhʼne ne ronnontí꞉io wahawénhase ne Zadok, “Í꞉saf ne raonoró꞉kwah ne Ní꞉io kanatowanénhke nionsásʼsaf. Tó꞉ka enhatiatatériste ne Roiá꞉ner, thetatsiaʼténhawe tánon enhakerí꞉on nakatkátho tetsá꞉ron tánon tsi nón꞉we nenhkaiéntake.

²⁶ Ók tó꞉ka enhénron, ‘Iáh othènon tewakonweséntha ne shonháke,’ kén꞉en í꞉kes thóh natatiéras tsi ní꞉rehre ioiá꞉nere ne raonhá꞉ke.”

²⁷ Ne ronnontí꞉io wahawénhase ne ratsihénstatsi Zadok, “Satkátho, wáhs thóh nionsá꞉se kanatowanénhke kwáh skénnonk thiʼkénhak, í꞉se tánon ne Abiathar, skát꞉ne ne teniʼiá꞉se sanekenteronhtserashón꞉ahs, ne ne Ahimaaz etsiénʼa tánon ne Jonathan ne ne roiénha ne Abiathar.

²⁸ Satkátho, kwáh enkaterárahte tsi nón꞉we ne iáh teionhó꞉tes thóh ahonwenhtsat꞉ténhake tsi niʼió꞉re nowénhna iénwahwe niʼsèke nón꞉we nénhtewe tsi ensetʼronhkáten,”

²⁹ Káti ne Zadok ó꞉ni Abiathar nihawí꞉ne raoneró꞉kwah ne Ní꞉io ionsahseníhaf Jerusalem, tánon thóh nón꞉we tkaién꞉tak.

³⁰ Ók ne Táwit iahanontárane tsi ionón꞉te ne Olives, tehasentʼtóhsere tsi niaháre, rotenontsistóron tánon tehaskawethó꞉tatse; tánon onkwetaʼkwé꞉kon ne ronwanónteratse ronatenontsistóron tánon wahatinontáraʼne, tehonséntʼthos tsi niahónhne.

³¹ Táwit wahonwaró꞉ri nètho Ahithophel tsi raiatará꞉kwe ne ratiriwahetkéntha skát꞉ne ne Absalom. Tánon ne Táwit wahénron, “Ó Saiá꞉ner, koniaterenhnaién꞉ni, teskaraténi tsi nisakotenikonráwis ne Ahithophel ne shón꞉nia ononwaroríta.”

Hushai Ne Wahá꞉ton Ne Táwit Roteriwaʼtoratsténhni

³² Nó꞉nen ne Táwit iahanontawénhrate, tsi nón꞉we ne Ní꞉io nihonwasenhnaʼientákwah, Hushai ne ne Archró꞉non tá꞉re ne tahiatát꞉ken ne raotsiátawi ioterátion tánon roʼkénrare ne ranontsíne.

³³ Táwit wahawénhase, “Tó꞉ka ahiʼtiateró꞉sen ní꞉i, ní꞉se kwáh enskerienhnastá꞉ten.

³⁴ Ók tó꞉ka thóh ienshése kanatowanénhke tánon entsienhá꞉se ne Absalom, ‘Í꞉i ne sanhátsera enká꞉ton, Ó sanontí꞉io; í꞉i ne ianíha raonhatserakénʼen tsi nitsiotohétston, káti ó꞉nen kwáh í꞉i enská꞉ton,’ ehʼthóhʼne ní꞉se kwáh entietʼkénten nakeriwáke tsi nihatenikonrá꞉wis ne Ahithophel.

³⁵ Ne ratsihénstatsi Zadok ó꞉ni ne Abiathar kwáh ensewakwékʼkhane ní꞉se neh nón꞉we. Káti tsi nahó꞉ten asáronhke tsi nahontá꞉we tsi roʼnónshoʼte ne ronnontí꞉io, sheʼró꞉ri ne tenitsihénstatsi Zadok ó꞉ni ne Abiathar.

³⁶ Ne tenihiáse raotinekenteronhtserashón꞉ahs ratikwé꞉kon neh nón꞉we, Zadok roiénha Ahimaaz ó꞉ni ne Abiathar roiénha Jonathan; tánon tsi roʼnón꞉ha ní꞉se kwáh ensekróri oriwakwé꞉kon tsi nenhsáronhke.”

³⁷ Káti ne Hushai, ne ne Táwit roʼnaténro, tá꞉re tsi kanatowanénhke, kwáh ne Absalom tsi nihanahtará꞉sere ne Jerusalem.