2 Samuel 14 - Ohiatonhseratokénti

Absalom Jerusalem Nionsá꞉re

¹ Nón꞉wa ne Joab ne roiénha ne Zeruiah tieoteriéntare nètho ronnontí꞉io tsi Absalom ronontónnions.

² Joab Tekoa nón꞉we iahateriwaniéte thóh nón꞉we nahontakonwahiaténhawe ne ionikonrowánen iónkwe. Warénhase, “Ne sathatónhni naisatʼtionhniónkwen; ne satʼtierónhniat ne iontionhniónkwa, tó꞉sa kénʼie satatókaf, ók thóh náʼtser tsi shí꞉ken ní꞉iot ne thó꞉ka nón꞉ta ó꞉nen shiʼsatʼtiónhnion tsi rawenhé꞉ion.

³ Wáhs ronnontí꞉ioke niahá꞉se tánon tesenithá꞉ren kén nahó꞉ten enshí꞉ron.” Tánon ne Joab waharó꞉ri tsi nahó꞉ten akénronh.

⁴ Nó꞉nen ne iónkwe ne Tekoaró꞉non iahón꞉we ronnontí꞉ioke, wakaiatiénenhne tiaʼkakonshó꞉tane ohontsá꞉ke tánon ne nawéneste kakwenienstátsera, tánon wakénron, “Tatiehnawas, Ó sanontí꞉io!”

⁵ Ne ronnontí꞉io wahariwanóntonse, “Nahó꞉ten tesanikónrare?” Watkariwaserá꞉ko, “Kén ní꞉iot, wakateréhons; ne riksténha rawenhé꞉ion.

⁶ Ne sanhátsera tékeni teionekenteronhtseráien, wahiaterí꞉io thóh kahentá꞉ke; tánon iáh ónhka thóh téienskwe ne tahonsahonwathikʼkháshionke, tánon ne saiáta wahó꞉iente tánon wahononwarhiákhon.

⁷ Ó꞉nenh kawatsiraʼkwé꞉kon takonwatiatónhti ne sanhátsera. Rónton, ‘Tatʼtsiátkaf ne tsiénha ne roʼién꞉ton iatatekénʼa, káti ne nahónton ahonwanonwarhiákhon neh tsi roʼnonwarhiákon ne iatatekénʼa, iekaníhare tó꞉ka asakwátonte ne raienásere ne kaientátsera ó꞉ni.’ Tsiakariwakénhniaʼte ne roʼnón꞉ha enhonteniathanáweste.”

⁸ Ehʼthóhʼne ne ronnontí꞉io warénhase ne iónkwe, “Wáhs tsi sanónshote nionsáhse, tánon í꞉ih enkateriwathéntiaʼte ne sariwashón꞉ʼahs.”

⁹ Ne iónkwe ne Tekoaró꞉non wahawénhase ne ronnontí꞉io, “Í꞉i enwák꞉rane ne kanítsera, natiá꞉ner ne ronnontí꞉io, tánon ne rakeníha raonónskon; áhnion ne ronnontí꞉io tánon ne kanontiʼiótsera kawátsire tó꞉sa othènon rotinitseraién꞉tan.”

¹⁰ Ne ronnontí꞉io wahén꞉ron, “Tó꞉ka ónka thènen aiesawenhnáhraʼne, tatsiaʼténhaf akonhá꞉ke, tánon iáh shé꞉kon nonwénhton tsiahonsahiaiéna.”

¹¹ Ehʼthóhʼne wakénron, “Ahsatthóntate, iasaterénhnaien rahonhá꞉ke ne Roiá꞉ner Saní꞉io, káti nètho nahonsahatiʼkárhiatʼte nonewénhsa nahónton tó꞉sa shé꞉kon ahonshasakotiʼnonwarhiákhon, tánon ne riʼiénha tó꞉sa ahonwáthonʼte,” Wahén꞉ron ne ronnontí꞉io, “Tsi nirónnhe ne Roiá꞉ner, iáh ne skanonkwísera ne tsién꞉a raonónhkwis tsiakaién꞉tane nonhontsá꞉ke.”

¹² Ehʼthóhʼne ne iónkwe sakénron, “Ahsatʼtónhtate serí꞉hon ne sanhátsera shé꞉kon ahonsahiwénhnarane natiá꞉ner ronnontí꞉io.” Wahén꞉ron “Satá꞉ti.”

¹³ Ne iónkwe wakén꞉ron, “Onkáti nontiéren tsi satenikonrónhni neh nikarióten nasehiatʼkónten ne raonkweʼtashón꞉ahs ne Ní꞉io? Asèken tsi thisatkáwenh kí꞉ken tsi niatesariwaién꞉tase ne ronnontí꞉io wahatatiéntereʼne raonhatsíwa khók, kwáh kíʼ tsi ní꞉iot ne ronnontí꞉io tsi iáh ské꞉kon thatahohiaténhaʼwe ne ronakerakwáhton.

¹⁴ Ónenk tsi tewakwé꞉kon entewénheʼie; kwáh thóh nitewahiatóten tsi ní꞉iot niʼionekaweronhtáon ohontsá꞉ke, tsi iáh thahón꞉ton nahonshaienekaróroke. Ók ne Ní꞉io kwáh iáh éhren tahahá꞉wite natónnhets; ne raónha kwáh enhatenikonrónhni káti tó꞉sa ne átste iehonwatiʼiatónhtion ne iahontkóntakwe tsi éhren ahónhnete ne raohén꞉ton.

¹⁵ Nón꞉wa kénʼen nontáke ne kí꞉ken ahiró꞉ri natiá꞉ner ne ronnontí꞉io tsioríwa ne onkweʼshón꞉ahs ne wahonhkónnien nahontʼteronhníhake; ne sanhátshera wahé꞉re, ‘Í꞉i tenʼiakenithá꞉ren ne ronnontí꞉io; nontsiérenk nètho ronnontí꞉io neh enhateriwathéntiaʼte tsi niʼierihwanékʼkha ne raonhátsera.

¹⁶ Wáʼkere ní꞉se ó꞉nenk tsi enskatahónsathaʼte tánon enskenónsthaʼte tsi niká꞉ien ne rateniéntʼtha nèren ashonkenihiathenháwiʼte ne riienha tsi ionhontsá꞉ien ne Ní꞉io teshakówi ne raonkwetaʼshón꞉ahs.’

¹⁷ Ne sanhátsera wahé꞉re, ‘Ne raowénhna Natiá꞉ner ne ne ronnontí꞉io kwáh enhakateriswénhtoseʼ; asèken natiá꞉ner ne ne ronnontí꞉io kwáh neh teshiatié꞉ren ne raoronhiakeró꞉non Ní꞉io, ieharíhwakens ne ioiá꞉nere tánon ne kariwahét꞉ken. Ne Roiá꞉ner Saní꞉io kwáh senikweʼkónhak!’”

¹⁸ Ehʼthóhʼne ne ronnontí꞉io watariwaserá꞉kwase ne iónkwe, “Tó꞉sa othènon takeriwaséhten tsi nahó꞉ten enkonriwanóntonhse.” Ne iónkwe wakénron, “Áhnion natiá꞉ner ne ronnontí꞉io ratáti.”

¹⁹ Ne ronnontí꞉io wahén꞉ron, “Joab ontèken wahiaró꞉ri neh ne kí꞉ken ashiʼrónhnion?” Ne iónkwe wakʼkariwaserá꞉ko tánon wakén꞉ron, “Tsi niʼioriwí꞉io tsi nisón꞉nhe, natiá꞉ner ne ronnontí꞉io, iáh ónka taiekwéni ne tahonsaiekaraténi ne thènen nètho natiá꞉ner ne ronnontí꞉io ahawénhke. Asèken í꞉se sanhátsera Joab raónha rakenhá꞉hon; kwáh raónha róthen akwé꞉kon kíʼ owenhnaókons thóh tsik sakáronhte.

²⁰ Ne nahiontónhon tahonsontáton nahonsonttátonke noriwasónhas ne ne í꞉i Joab thóh ná꞉tiere. Ók natiá꞉ner ronikonrowánen kwáh tsi nihonikonrowánen ne raoronhiakeró꞉non ne Ní꞉io tsi roteriéntare oriwakwé꞉kon tsi ní꞉iot nonwenhtsá꞉ke.”

²¹ Ehʼthóhʼne ne ronnontí꞉io wahawénhase ne Joab, “Kwáh ioiá꞉nere, enkathóntate kí꞉ken; wáhs, thontatiaʼténhaf ne kenhnithoiónha Absalom.”

²² Ne Joab wahatatsiaʼtiénente kwáh tiaʼʼhakonshótane nonhontsá꞉ke tánon tsi nahá꞉iere ne ne kakwenienstátsera, Ní꞉io iahiatatérist; tánon ne Joab wahén꞉ron, “Ónh꞉wa wenhniseráte waketsénri ne kaiataterítsera ne sahén꞉ton, natiá꞉ner ne ronnontí꞉io, éhʼthoh ne ronnontí꞉io wahathóntate tsi nikeriwanóntons ne kenhátsera.”

²³ Káti Joab watatʼtáhakwe, Geshur niahá꞉re, tánon thontahohiaténhawe ne Absalom thóh Jerusalem.

²⁴ Ne ronnontí꞉io wahén꞉ron, “Tserí꞉hon thóh iésreh tsi thóh nonshó꞉te; iáh tèkereh nahí꞉ken.” Káti ne Absalom tsi thohnónshoʼte nionsá꞉re, tánon iáh tiehawénon raohén꞉ton ne ronnontí꞉io.

Ne Táwit Sahonikónrense Ne Absalom

²⁵ Nón꞉wa tsi niwatenáskwa ne Israerʼronónke iáh ónhka eh tehanekénteron tsi ní꞉iot ne Absalom; ranontsíne tsi niʼió꞉re ne rashitáke kwáh iáh othènon teorá꞉kware.

²⁶ Nó꞉nenh enhatatenónkare ne ranontsí꞉ne (nienwatoserók꞉ten ne niaʼteioserá꞉ke enhá꞉hiake; nó꞉nenh enhiókstene ne ranontsí꞉ne, enhahiá꞉ke) enhakontseriháren ne raonónhkwís, wísk nikakontserá꞉ke niʼiókste neh rátsta ne kanontiʼiótsera raonahtenienténtsera.

²⁷ Ne Absalom áse nionekenteronhtseraién꞉takwe, tánon tseiá꞉ta tsakotonwí꞉sen Tamar iontátsiats; kwáh í꞉ken tsi iontʼkatotserí꞉io iakón꞉kwe.

²⁸ Káti ne Absalom kwáh kaʼnánon ne teioserá꞉ke Jerusalem nón꞉we nihanákereʼkwe, iáh nonwénton tiehawénon raohén꞉ton ne ronnontí꞉io.

²⁹ Ehʼthóhʼne ne Absalom ónkak iasakotóri nahonwenhnónk꞉sa Joab ne niahoténiete ronnontí꞉ioke; ók ne Joab iáh nethothontáton nahontáre raonháke. Sók shé꞉kon ó꞉nenh ne kí꞉ken teioriwakehá꞉ton tsi iehónonks, ók ne Joab kwáh kíʼ iáh tèrehre nahontá꞉re.

³⁰ Ehʼthóhʼne wahawénhase ne raonhá꞉tsera, “Satkátho, ne Joab raohénta kwáh neh tetsiateranéken nakʼkénta, tánon iáh tehiotkáte thóh thères; wáhs tánon stsiró꞉ten.” Káti ne Absalom raonhá꞉tsera wahathenténtaʼwe.

³¹ Ehʼthóhʼne ne Joab wathá꞉tane tánon thóh wárehte ne Absalom tsi thohnónshoʼte, tánon wahawénhase, “Onhniʼiotsiéren ne sanhá꞉tsera tsi wahakatʼtenhténhtase?”

³² Ne Absalom watoriwaserá꞉kwahse ne Joab, “Shaʼsehiáran, iekoniateriwaʼnieténhni: kénʼen nahontá꞉se, neh nahónton iakoniaténiete ronnontí꞉ioke natserihwanónhtonhse, ‘Onhnontiéren tsi Geshur nón꞉we nitewakénon? Kwáh aioianerénhen shé꞉kon ní꞉i thóh nón꞉we nahontakiterónhtake.’ Ó꞉nenh kíʼ takeríhon thóh iéke ne ronnontí꞉io raohén꞉ton; tó꞉ka ní꞉i ahonkení꞉kon, Tserí꞉hon kíʼ nahakenonwarhiákhon!”

³³ Ehʼthóhʼne ne Joab ronnontí꞉ioʼke niaháre tánon wahoró꞉ri; tánon iahó꞉nonke ne Absalom. Káti iahá꞉rawe ronnontí꞉ioke tánon wahatatsiatiénenhte tsiahakonshótane ohontsá꞉ke raohén꞉ton ne ronnontí꞉io; tánon ne ronnontí꞉io watonoronkwáhnion Absalom.