2 Samuel 13 - Ohiatonhseratokénti

Amnon Tánon Ne Tamar

¹ Kwáh éhʼtho tsi ná꞉he shitsiotohétston. Ne Táwit roién꞉ha Absalom tsi niʼiotkathotserí꞉io rotenosénhtakwe Tamar iontátsiatsʼkwe; tánon ne Táwit roién꞉ha Amnon kwáh í꞉ken tsi nasakonó꞉ronhkwe.

² Ne Amnon thóh nió꞉re tsi wasakonóronhkwe kwáh wahatatetʼrón꞉nien ne wakarihónhni ne iatenosénha Tamar, asèken nahón꞉ha shé꞉kon niʼiewí꞉non tánon thóh ní꞉iot tsi wahénehne tsi niwenhtó꞉reh ne Ammon neh thènnen nasakoiéraʼse.

³ Ók ne Amnon rothorosénhtakwe Jonadab ronwáiatsʼkwe, ne ne roién꞉ha ne Táwit iatatekénʼa Shimeah; tánon ne Jonadab kwáh i꞉ken tsi ratenikonratʼtòkha rónkwe.

⁴ Wahawénhaʼse, “Ó iaʼién꞉ha ronnontí꞉io, onihiotsiéren tsi niaʼteioronhketserá꞉ke tisanikonrénhen? Kwáh kén iáh tasekró꞉ri?” Ne Amnon wahawénhaʼse, “Khenorón꞉kwa ne Tamar, ne iatiatatekénʼa Absalom iatenosénha.”

⁵ Jonadab wahawénhase, “Satsiatsiónhnit sanaktáke, tánon satenonwák꞉tat; tánon nó꞉nenh ne ianí꞉ha entʼiatʼkénhsera, tseró꞉ri, ‘Sheʼríhon ne iatsiatenosénha Tamar í꞉tsien tánon tiónkon knahótenk ákeke, tánon ionkhekwasheʼrónhnien akʼkénton, ne káti nahónton akatkátho tánon áhʼkehke thóh iontshanáke tsi iáhawe.’”

⁶ Káti ne Ammon wahatsiatiónhnite, tánon wahatenonwák꞉tate; tánon nó꞉nenh ne ronnontí꞉io wáhrawe tsi rotkénhsere, ne Amnon wahawénhase ne ronnontí꞉io, “Asatʼthónhtate sheʼríhon ne iatsiatenosénha Tamar nahontá꞉ien tánon tòhka nikaʼkarehtseráke ahiontenatarónhten akénhton, káti ne nahónton thóh iontshanáke tsi iehkaretserénhawe ákehke.”

⁷ Ehʼthóhʼne ne Táwit iashaʼkoteriwaniéten ne Tamar thóh kanontiʼiotserákon, “Wáhs tiaʼtatekenʼkéha iaháse tsi thohʼnónshoʼte ne Amnon, tánon etʼtiekwaserónhnien.”

⁸ Káti ne Tamar thóh niahá꞉hen ne iatenosénha Amnon tsi thohʼnónshoʼte, thóh nón꞉we thaʼhiatiónhni. Iahetheserénhawe, watsesherakwénteste, wahontenahtahrakeríhtawe raohénton, tánon wahontʼkarehtserónhten.

⁹ Tánon waheraʼwenháton ne onták꞉ne tánon waherónhnion raohénton nará꞉ke, ók iáh tehothontáton nahawékon. Ne Amnon wahénron, “Sasheiatínekenf ratikwé꞉kon natʼkenton.” Káti ratikwé꞉kon sahatiiá꞉kenhne.

¹⁰ Ehʼthóhʼne ne Amnon washakawénhase ne Tamar, “Tásaf kèntho thí꞉ken kanahtarakerí꞉ton akenak꞉take tánon í꞉se takénont.” Káti ne Tamar iahehá꞉we ne kanahtarakeríhton ne akahónha iakotanahtaʼrónhte, tánon thóh iahéhawe tsi thahiatiónhni ne Amnon iatenosénha.

¹¹ Ók nó꞉nen shiaʼhéhawe ne rahiatákʼta ne ará꞉ke, tashakoiénah, tánon wasakawénhase, “Káts, tsiá꞉rat, tiatenosénha.”

¹² Wathonwarihwaserá꞉kwahse, “Iáh, tiaʼtenósenh, tó꞉sa thontaskanóntons; asèken neh naorihó꞉ten iáh thóh teiáwens NIsraerʼronónke; tó꞉sa othènon thóh nátiere neh nihioterihwatéha!

¹³ Ní꞉i, kaʼnón꞉we nakʼkhawíson nakatehénsera? Tánon ní꞉se, ratikwé꞉kon NIsraerʼronónke eniesahrihwakenrónhnike tsi nisatehénsera tsi nashiá꞉tiere. Nónwa ne aorihwá꞉ke, wakonhnéken, tesenithá꞉ren ne ronnontí꞉io; asèken ne raónha kwáh kíʼ iáh thahakénese naionhkeníhniake.”

¹⁴ Ók iáh kíʼ tasakotahónsathate; tánon tsi rahónha sénha rashástste si ní꞉iot nahónha, tasakonóntonhse skát꞉ne wahiáraʼte.

¹⁵ Ehʼthóhʼne ne Amnon ne wahoiéna ne kwáh í꞉ken teiotenonhiaʼníton kaswénhsera nakorihwá꞉ke; ne raoswénhsera tsi sénha teiotenonhianíton tsi ní꞉iot tsi sakoskánekskwe tsi nihatʼtókaskwe nakorihwá꞉ke. Ne Amnon wasakawénhase, “Wáhs shatsákenk!”

¹⁶ Ók wahonwénhase, “Iáh, tsiatenósen; asèken kí꞉ken wahét꞉ken tsi sheskatekwáhtha tsi sénha teiotenonhiaʼníton ne ó꞉ia nètho ní꞉se tsi nistséraʼse.” Ók iáh kíʼ tasakotahónshaʼtate.

¹⁷ Iahó꞉nonhke ne kén nithoiónha ne teorihwasnieséhakwe tánon wahén꞉ron, “Éhʼren tsatiatenhá꞉wit kí꞉ken tsiothonwísen nakkénton, tánon teseristarénho ne tsi kanonkáronhte nó꞉nenh ieskaiákenhne.”

¹⁸ (Nón꞉wa ne iotʼtseronhniáton ne wakóses ne ne tekanentʼtióntons; sèken thóh kíʼ niʼiothónhne tsi kontserónhniskwe ne kontiwí꞉nons ne tsionatʼthonwísens sakohioʼokónhʼahs ne ronnontí꞉io ne thóh shonʼtakaháwiskwe.) Káti ne raonhá꞉tsera shahaiatínekenhwe, tánon watharistarénho shonsakaʼiákenhne.

¹⁹ Ók ne Tamar wakenrontákwen okénra onthatahtakenrá꞉roh ne kanontsíne, tánon wakaratiónko ne wakóses ne iostón꞉ne; Kanontsíne watewahtshaʼnáren, tánon éhren sáwehte, tewasentʼthósere iowènhte tsi nionsá꞉he.

²⁰ Ne iatenosénha Absalom warénhaʼse, “Ne tiaʼtenosénha Ammon watʼhianikonrárenh kén? Sák thasatanónhni niá꞉rehkwe, tiatenósen; tiaʼtenosénha nètho; tó꞉sa tesathatenikonrá꞉ren.” Káti ne Tamar kanónskon wahonthatíteron, thóh tsi ronónshoʼte ne iatenosénha Absalom.

²¹ Nó꞉nen ne ronnontí꞉io sahá꞉ronhke ki nahorihoténsons, kwáh í꞉ken tsi wahonákwen, ók iáh kíʼ tehorehwáton ne roiénha Ammon, tsioríhwa tsi nihonorónkwa, asèken neh thotierénton ronakerá꞉ton.

²² Ók ne Absalom wahowenhnáraʼne ne Ammon ahontakariwaiérike khéhs nahonhetkéntake; asèken ne Absalom róshonskwe ne Amnon, tsioríhwa tsi thontashakonóntonhse ne iatenosénha Tamar.

Ne Absalom Sahaʼnenhrotáko Ne Iatenosénha Akorihwáke

²³ Sontóhetste ne teioserá꞉ke ne Absalom iesakononwehrhiáskwe ne teiotinakarontón꞉a ne Baal-hazor nón꞉we, ne ne ákta ne Ephraim, tánon ne Absalom wasakohónkaron ratiʼkwé꞉kon ne ronnontí꞉io raonekenterontserashón꞉ahs.

²⁴ Ne Absalom ronnontí꞉ioke niaháre, tánon wahénron, “Ní꞉i khekonhwé꞉rhiaskwe ne teiotinakaronhtón꞉a; ne ronnontí꞉io tánon ne raonhatserashón꞉ahs asatthontátseke ne aiakwaterósen?”

²⁵ Ók ne ronnontí꞉io wahawénhase ne Absalom, “Iáh, konién꞉ha, áhnion tó꞉sa tewakwé꞉kon éhʼthoh iétewe, khéhs á꞉re kwáh enkwarieniastéten ní꞉se.” Ne raónha sénhak iahakónhtakwe, ók ronnontí꞉io iáh ne tiehawénon ók kíʼ wahoteráskwen.

²⁶ Ehʼthó꞉hʼne ne Absalom wahénron, “Tòkaʼ iáh, tieríhon kíʼne iatiatatekénʼa Amnon nahiá꞉kwe.” Ne ronnontí꞉io wahawénhase, “Onhnontiéren tsi ó꞉nek tsi kwáh raónha ahí꞉sewe?”

²⁷ Ók ne Absalom iehokontákwen tsi nió꞉re ne Amnon tánon ratikwé꞉kon ne ronnontí꞉io raonekenteronhtserashónʼahs ne raónha ahónhne. Ne Absalom wahatenhnió꞉ten kwáh tsi ní꞉iot ne ronnontí꞉io tsi ratenhniót꞉tha.

²⁸ Ehʼthóhʼne ne Absalom wasakónhane ne raonhatseraókons, “Sewatenhnikonrá꞉ren nó꞉nenh ne Absalom kwáh í꞉ken wé꞉so tsi ronekíren notsítsa, tánon nó꞉nenh enkwaró꞉ri, ‘tsi sewáient ne Amnon,’ ehʼthóhʼne tsi sewanonwarhiá꞉khon. Tó꞉sa sewatsá꞉nik; iáh kén í꞉i tekwanhá꞉on? Sewanikonratsanihtónhak tánon sewashátstet.”

²⁹ Káti ne Absalom raonhatserashón꞉ahs thóh nahonwaiérase ne Amnon ne Amnon tsi nisakonháhon. Ehʼthóhʼne ratikwé꞉kon ne ronnontí꞉io raonekenteronhtserashón꞉ahs wathatítane, tánon satihiatátʼtions wahotisháten ne raotitsenenhókon tewahón꞉tes tánon wahontèko.

³⁰ Tsi ná꞉he rontáhiʼne, ónhkak wahonwaró꞉ri ne Táwit nètho Absalom sakononwarhiakhónhnion ne ronnontí꞉io raonekenteronhtserashón꞉ahs, tánon iáh ne saiá꞉ta tsateshotaténron.

³¹ Ne ronnontí꞉io thontahá꞉tane, waharatiónko ne raotserónhniat, tánon ohontsáke wahatsatiónhnite; tánon ratikwé꞉kon ne raonhatseraókons ne thóh ratitakwe wahatirationko ne raonatseronhnia.

³² Ók ne Jonadab, ne roiénha ne Táwit iatatekénʼha Shimeah, wahénron, “Ahnion ne ratiá꞉ner rehrák nètho ronwatinonwarhiákhon ratikwé꞉kon ne kén nithotiʼiónsa ne ronnontí꞉io raonekenteronhtserashónʼahs; Nek khók ne Amnon rawenhéion. Kí꞉ken thó꞉ne niateiorihwaientáhon ne Absalom shontasakonónhtonhse ne iatenosénha Tamar.

³³ Nón꞉wa kén nón꞉we, tó꞉sa tseríhon ne ratiá꞉ner ne ronnontí꞉io nahontashé꞉takwe, tsi shí꞉ken ní꞉iot ratikwé꞉kon ne ronnontí꞉io raonekenteronhtserashón꞉ahs rohnenhé꞉ion; asèken nek khók ne Amnon rawenhé꞉ion.”

³⁴ Ók Absalom rotèkwen. Nó꞉nenh ne kenʼnithotiʼiónsa ronnónkwe ne ratinikonrá꞉rahkwe wahontarakétsko, washakóken iakotiokowánen thóh nontahiakawenonhátie ne Horonaim iohatátie ne nonontákʼtha.

³⁵ Ne Jonadab wahawénhase ne ronnontí꞉io, “Shé꞉ken, ne ronnontí꞉io raonekenteronhtserashón꞉ahs tsi nontahonenonhátie; tsi kíʼ niwá꞉ken, káti thóh nahá꞉wenhne.”

³⁶ Kwáh tsi niʼiostóre wahá꞉sa tsi nihotharátie, ne ronnontí꞉io raonekenteronhtserashón꞉ahs wahón꞉newe, tánon wahontewenhnakétsko tánon wathonséntʼtho; tánon ne ronnontí꞉io ó꞉ni ne raonhatseraʼókons kwáh nonʼné꞉e otsitòwah tsi watonhséntho.

³⁷ Ók ne Absalom rotèkwen, tánon tsi thénteron ne Talmai niahá꞉re ne ne roién꞉ha ne Ammihud, ne ronnontí꞉io ne Geshur nón꞉we. Ne Táwit wahotsiónhnionhse ne roiénha tsi niwenhniseraʼténion.

³⁸ Ne Absalom, tsi niehotékwen thóh nón꞉we Geshur, thóh nón꞉we iehenterónhtakwe ásen niʼioserá꞉ke.

³⁹ Tánon ne Táwit tsi nihohiatísaks ne Absalom; asèken ó꞉nenh iatharénhnate tsi rawenhé꞉ion ne Amnon.