2 Samuel 12 - Ohiatonhseratokénti

¹ tánon ne Roiá꞉ner Nathan iahoténiete tsi thénteron ne Táwit. Tsi iahá꞉rawe ne tsi thénteron, tánon wahawénhase, “Thóh nón꞉we tenonkwétake ninákerehkwe ne kanatatóken kanatowanénke, ne saiá꞉ta rokwátshekwe tánon ne saiá꞉ta roʼtèntene nenʼné꞉e.

² Ne roʼkwátse wé꞉so ronaskwaién꞉takwe tsionhnónskwarons tánon teiotinakaronhtónhʼa;

³ ók ne róʼten iáh ne othenènon teoiéntakwe nek khók ne ken nihiá꞉ka teiotinakarontónhʼa onhétien owí꞉ra, ne ne roʼnaskwahnínon. Raónha warehʼhiá꞉ron, tánon rahón꞉ha wahotehiarónhase ó꞉ni ne sakoioʼokónhas; nes iónnhekwe ne rahón꞉ha raókhwa, tánon ne kanikenrá꞉thakwe ne raótie teiotʼnekontákwa, tánon thóh kaʼiatará꞉kare renskweʼná꞉ke, tánon thosní꞉iot kwáh ne ne raóha sakoién꞉a í꞉ken.

⁴ Khàreh ó꞉nenh thóh wáraʼwe tehatstikáffas tsi roʼnónshote ne roʼkwátshe, tánon ne raónha tahotkénrate ne iahenhnón꞉kon ne raónha raotshénen tsionhnónskwaron kheks ne teionakaronhtón꞉a nahoʼkwatákwase ne tehaststikáffas tsi nahohiatórenhne, ók ne iahénhnonʼke ne roʼtenstsíʼen raotshénenh teionakarontónʼa owí꞉ra, tánon ne wahokwatákwahse nètho roʼnatarehnáwi.”

⁵ Ehʼthóhʼne ne Táwit raonhakwáhtshera tehiotenonhianíton tsi waʼkatsiró꞉ten niahotiatónti ne rónhkwe. Wahawénhase ne Nathan, “Ne Roiá꞉ner tsi nirónhne, ne rónhkwe ne kíʼ thóh nihoiéren tehothénhtion narénheʼie;

⁶ ne raónha kwáh ó꞉ia enshonáskon kaiéri natenkaʼiaseráke, tsió꞉ri tsi thóh kí꞉ken nahá꞉iere, tánon ne aoríhwa tsi iáh teotaʼniténhron.”

⁷ Ne Nathan wahawénhase ne Táwit, “I꞉se nètho rón꞉kwe! Tiakariwakenhniá꞉te ráton ne Roiá꞉ner, ne Sakoní꞉io ne Israerʼró꞉nons: Í꞉i koniatará꞉kwen tsi sanontí꞉io í꞉ken nètho nón꞉we Israerʼronónke, tánon Í꞉i skonhniakénton ne ratshanáke Saul;

⁸ Í꞉i koniáwi ne Saul raonontiʼiósera, ó꞉ni ne ró꞉ne; Í꞉i wakonhnontí꞉ioste nètho nón꞉we Israerʼronónke tánon ne Judah; tánon tó꞉ka shó꞉tsi kénk ní꞉kon kènhne, Ní꞉i kwáh kíʼ iahonstiéstonhke ne thóh shé꞉kon nakonhá꞉ke.

⁹ Onhniʼiotséren tsi iáh karíhwa tesón꞉ni ne raowénhna Roiá꞉ner, tsi ne thonáshere ne karihwahetkénsera ne raohén꞉ton? Í꞉se watienonwarhiákhon ne Uriah ne Hitró꞉non ne washástste ne raonasharehkówa Ammonró꞉nons.

¹⁰ Nón꞉wa ne kariwaientákwen ne asarehkó꞉wa kwáh iáh nonwénton éhren taká꞉hawiton ne tsi sanonshó꞉te, asèken ní꞉se wasekʼkenron, tánon iashiá꞉tenhawe ne ró꞉nekwe Uriah ne Hitró꞉non neh setstenha ahonsón꞉ton.

¹¹ Tiakariwakenhniá꞉te ráton ne Roiá꞉ner: Í꞉i kwáh kíʼ entʼkétsko ne tekanikonrará꞉tsera niahisatsiatónhti ne kwáh í꞉se sanónhskon; tánon ientsiaténhawe ne seksténha kwáh tsi nateskánerahke, tánon neh ienshí꞉ion ne tetianonsanéken, tánon ne raónha kwáh skontiʼiatátʼtions tsi skát꞉ne enhonrát꞉tseke ne sathateniakténhnine thóh ohénton ne kénʼen tsi nón꞉wa nateioswát꞉the nón꞉wa wenhniseráte.

¹² Asèken ní꞉se nashiá꞉tiere athaséhtonke; ók kíʼ ní꞉i kwáh thóh nénhtiere kiʼ nahorihóten akohénton NʼIsraeró꞉nons, tánon ohénton tsi kará꞉kwahre.”

¹³ Táwit wahawénhase ne Nathan, “Wakeriwáneren tsi nòkwah ne Roiá꞉ner.” Nathan wahawénhase ne Táwit, “Ó꞉nenh ne Roiá꞉ner shianikonrénhse ne sarihwanerahákʼtsera; ní꞉se kwáh kíʼ iáh thashí꞉heʼie.

¹⁴ Ók tsoríhwa tsi naséhneste tsi nío꞉re tsi iáh tetiewenhnará꞉kwen ne Roiá꞉ner tsi thóh kíʼ náshiere, ne sakʼsháta kwáh kíʼ enrénheie.”

¹⁵ Ehʼthóhʼne ne Nathan tsi thohʼnónshoʼte nionsá꞉re. Ne Roiá꞉ner kwáh í꞉ken tsi wahononwakʼtáthen naoksá꞉ta nètho Uriah ró꞉neʼkwe ne ne Táwit rotiwiraientáhon.

Bathsheba Roién꞉ha Warénheʼie

¹⁶ Ne Táwit wahoniténtʼtase ne Roiá꞉ner ne raksáʼa raoriwá꞉ke; Ne Táwit wahawenhtón꞉tiete, iahatáwehiate tánon asontakwé꞉kon ohontsáke rahiatiónhni.

¹⁷ Ne rotikstenokón꞉ahs ne tsi ronónshote rahiaták꞉ta wahthatítane, ronwaretiárons ne tahontaʼhatkétsko nonhontsáke; ók iáh tehathóntats, khéhs ó꞉ni ne skát꞉ne tahontón꞉te.

¹⁸ Ne tsatákhaton shiʼwenhniserakéhaton tsi ná꞉he thononwatʼtaníhon ne raksáha warénheie. Tánon ne raonhatseraókons ne Táwit ratitsá꞉niskwe nahonwaró꞉ri nètho raksáha tsi rawenhé꞉ion; asèken wahonníron, “Tsi ná꞉he rónnhekwe ne raksáha teionkwatá꞉rakwe ne Táwit, tánon iáh kíʼ teshonkwatahonsatáton; onká꞉ti ní꞉iot tsi atsitewaró꞉ri ne raksáha tsi rawenhé꞉ion? Ne rahón꞉ha nontserenk enhatatkaréwate.”

¹⁹ Ók nó꞉nenh ne Táwit shasakóken ne raonhatserashón꞉ahs tsi otsiahonskwáhkon skát꞉ne í꞉ken, tsiaháhewe nètho raksá꞉a tsi rawenhé꞉ion; tánon ne Táwit washakawénhase ne raonhatserashón꞉ahs, “Neh raksáha rawenhé꞉ion kén?” Wahonní꞉ron, “Rawenhé꞉ion.”

²⁰ Ehʼthóhʼne ne Táwit thontahá꞉tane nonhontsáke, wahatáwenh, wahatsiatakónhonste, tánon thonsahatathakwénion. Raothoserákon ne Roiá꞉ner iahatáwehiate, tánon wahaterénhnaien; ehʼthóhʼne tsi thohʼnónshoʼte nionsáre; tánon nó꞉nenh sahariwanónton, wahonwakwahérase tánon watatská꞉on.

²¹ Ehʼthó꞉hʼne ne raonhatserashón꞉ahs wahonwénhase, “Onhnahó꞉ten kí꞉ken tsi nahishatiérenhke? Wesentónhtiete tánon watetsiasénthose ne raksáha tsi ná꞉he shiʼrónnhekwe; ók nó꞉nenh ne raksáha sarénheie, watésnane tánon wateshastskáon.”

²² Wahén꞉ron, “Tsi ná꞉he rónnhekwe ne raksáha, onkentón꞉tiete tánon watkaséntho; asèken wakiron, ‘Ónhka iakoteriéntare? Ne Roiá꞉ner nontsérek entorihwaiérike nakonhá꞉ke, tánon ne raksáha nontsérek enrónhnheke.’

²³ Ók ó꞉nenh rawenhé꞉ion; nontséren tsi ahonkentón꞉tiete? Akʼkwéni kén ne tahontahiʼiaténhawe shé꞉kon? Ní꞉i ónenk tsi rahonháke niénke, ók ne raónha iáh akonhá꞉ke thatahontáre.”

Solomon Warenhná꞉kerate

²⁴ Ehʼthóhʼne꞉ne ne Táwit wasakonikonranírate ne ró꞉ne Bathsheba, tánon ahonhá꞉ke niahá꞉re, tánon skát꞉ne wahiará꞉te; tánon waowiraién꞉tane raksáha, tánon ne raónha Solomon wahosénhnon. Ne Roiá꞉ner ronhnorón꞉kwa,

²⁵ tánon iahaʼterihwániete ne ne rotokénhse Nathan iaharihwénhawe; káti ne raónha Jedidiah wahoná꞉tonhkwe, tsioríhwa ne Roiá꞉ner tsi ronnorónhkwa.

Ne Ammonró꞉nons Wathonwanaskwásenhron

²⁶ Nón꞉wa ne Joab iahaʼtashón꞉teren wahonterí꞉io ne Rabbah, Ammonró꞉nons ne ne raotinatakweni꞉io íken, tánon wahatiénawaste ne kanontiʼiótsera aonatowanénhke.

²⁷ Ne Joab iahoterihwaniétase ne Táwit, tánon wahénron, “Iontiateriʼióʼon ne Rabbah; sénha ishiʼnónwe, watienáhon nonékanos kanatowanénhke.

²⁸ Ó꞉nenh kíʼ, èhʼthoh, shehiatarórok ne ronátsiakes nonkweʼókons skát꞉ne, tánon tesheiehonwarónhni ne kanatowanénke, tánon satiénawasts; khéhs iatetsiá꞉ti enkatiénawaste ne kanatowanénke, tánon ne enkonwaiát꞉tseke tsi niwaksenhnóten.”

²⁹ Káti ne Táwit washakoiataróhroke ratikwé꞉kon nonkweʼókons skát꞉ne tánon thóh iahónhne Rabbah, tánon ne wahonterí꞉io tánon wahontkwéni.

³⁰ Iahá꞉hawe ne rahonónwarore ne Milcom tsi wahononwarorók꞉si; kakʼnón ne tsáta niwáhsen-wísk nikakontseráke niʼiókste owistaróron í꞉ken; tánon owistanoronhsónhas iohrókʼkons. Tánon ne sahonwanonwarohró꞉ke Táwit. Ne raónha kwáh ó꞉ni tahahá꞉seron ne kanenskwenhátons ne kanatowanénhke, kwáh í꞉ken tsi wé꞉so í꞉ken.

³¹ Ne raónha tasakoiatínekenʼwe nonkweókons neh thóh nón꞉we nihónhneskwe, tánon wasakohiótenste tashakosarawíhon tánon ne karístatsis oweiónhtas tánon ne karístatsis ató꞉kens, khéhs ne washakoioténhseron ne tahatitstenhró꞉tas. Tsiakariwakénhniate ètho naháiere kwáh tsi niaʼtekanátakes ne raotinatowánenhs ne Ammonró꞉nons. Ehʼthóhʼne ne Táwit tánon ratikwé꞉kon ne onkweshón꞉ahs thóh nionsahónhne Jerusalem.