2 Samuel 10 - Ohiatonhseratokénti

Ne Ammonró꞉nons Tánon Ne Aramró꞉nons Tsi Ronwatisénhnion

¹ Kwáh kenhná꞉he shiʼtiotohétston, ne ronwahnontí꞉io ne Ammonró꞉nons warénheie, tánon ne ne roién꞉ha Hanun thonsahonatʼtákwen.

² Ne Táwit wahén꞉ron, “Ní꞉i kwáh neh enkaterihwathéntiaʼte karihwatóken tsi nòkwah ne Hanun ne ne roién꞉ha ne Nahash, kwáh kíʼ tsi nihoriwatókenʼne ne roní꞉ha nakonhá꞉ke.” Káti ne Táwit iashakoténiete ne ronaterihóntons ne tahathítaren raón꞉ha ne aorihwáke tsi nòkwah ne roní꞉ha. Nónen ne Táwit raonhatserashón꞉ahs iahontonhontsórenhne tsi tononhóntsaien ne Ammonró꞉nons,

³ Ne ronaterihóntons ne Ammonró꞉nons wahonwénhaʼse ne raotiʼiá꞉ner Hanun, “Kwáh kén tokénʼen tsi nisanontón꞉nions nètho Táwit tsi rokwenienstonhátie ne ianí꞉ha kwáh nék tsi tasakoténiete ne ratiriwakarénies neh tsi aiesanikonranírate? Iáh kén ne Táwit tetesakoteniéton ne ratirihwakarénies ne shonháke ne ne tahontʼkatónhnionwe ne kanatowanénhke, ne nahonteriwatórate, tánon nakonwasénhni?”

⁴ Káti ne Hanun washakoienénhaton ne Táwit raonkwetashón꞉ahs ratiriwakarénies, washakohkonstonrhiakón satiʼkonsakaratísons khók nokwatíson ne satiʼiatátʼtions, taroharakwahniónko ne raonatʼtserónhniat ratiʼhíiake khók niʼióre, tánon shasakotèkwate.

⁵ Nó꞉nen sahonwaró꞉ri ne Táwit, iasakoteriwaniéten ne ratiriwakarénies ne tahontátʼke, asèken ne ronnónkwe teiotenonhianíton tsi nihontéhenskwe. Ne ronnontí꞉io wahén꞉ron, “Thóh tasewenterón꞉tat Jericho tsi ní꞉iore tentsisewakonstonréshane, tánon ehthóhʼne tontásewe.”

⁶ Nó꞉nen ne Ammonró꞉nons sahónt꞉toke tsi ronwaná꞉kwase ne Táwit, ne Ammonró꞉nons ronaterihón꞉tons iaʼsakoténiete tánon ne ahonwathí꞉nhane Aramró꞉nons ne Beth-rehob nón꞉we tánon ne Aramró꞉nons ne Zobah, tewáhsen tehonhnenhniawehetseráhsen nihá꞉ti ne thaʼkésons tsi ní꞉iot tsi ronterí꞉ios, aioiánerenhne ó꞉ni ne ronnontí꞉io ne Maacah nahahiatará꞉ke, énska ne tehonhnenhniawehetseráhsen nihá꞉ti, tánon ne ronnónkwe ne Tob nón꞉we, tekeniʼiawénre natehonhnenniawehetseráhsen nihá꞉ti.

⁷ Nó꞉nen ne Táwit sahariwáronhke, Joab iahotóri ó꞉ni ratiʼkwé꞉kon ne ronterí꞉io ahónhne ne ronterí꞉ios.

⁸ Ne Ammonró꞉nons tahatiʼiákenʼne wahontateweienʼnénhtane naonterí꞉io thóh wathatítane tsi ieiontawaiatáhkwa tsi iotenhenrakáronte; ók ne Aramró꞉nons ne Zobahró꞉nons ó꞉ni ne Rehobró꞉nons, tánon ne ronhnónkwe ne Tobró꞉nons ó꞉ni ne Maacahró꞉nons, rononhatsíwakok thikènʼne ne kahentatʼtóntses.

⁹ Nó꞉nen ne Joab sahát꞉toke nètho ateriʼiósera tsi enthotsatónhti thóh rashón꞉ne ó꞉ni raohén꞉ton, ne washakoiatará꞉ko ne kwáh rotirenhná꞉hon nahonterí꞉io NʼIsraerʼronónke, tánon washakonenhraʼserónhni niahonwanatiaʼtónhti ne Aramró꞉nons;

¹⁰ ne roná꞉tsiakes ronnón꞉kwe ne ne wahotiéten ne entesakoniarotaró꞉ke ne iathatekénha Abishai, tánon raón꞉ha washakoweienénhtane niasakonatiatónhti ne Ammonró꞉nons.

¹¹ Wahén꞉ron, “Tó꞉ka ne Aramró꞉nons shó꞉tsi ratishástste nakeriwá꞉ke, ehʼthó꞉hʼne kíʼ ní꞉se enseksniénon; ók tó꞉ka ne Ammonró꞉nons shó꞉tsi ratishástste ne sarihwá꞉ke, ehʼthóhʼne kíʼ thóh ién꞉ke tánon enkonsniénon.

¹² Sesháststet, tánon áhnion ionkenihnikonrhatsanitónhak ne raotiriwá꞉ke akénhake nontionkwetaʼshón꞉ahs, tánon ne raotirihwá꞉ke akénhake ne raonatowanenhshón꞉ahs nònkwah Ní꞉io; tánon aiáwenhs ne Roiá꞉ner thóh nahá꞉iere tsi nahó꞉ten akénhake ioiá꞉ner ne raoriwá꞉ke.”

¹³ Káti ne Joab tánon nonkweshón꞉ahs tsi nihá꞉ti ne raónha ratikwekonhátieskwe ohén꞉ton niahón꞉ne nahonterí꞉io niahonwanatiatónti ne Aramró꞉nons; tánon sahontèko thóh raohén꞉ton.

¹⁴ Nó꞉nenh ne Ammonró꞉nons sahonwatíken ne Aramró꞉nons wahontèko, kwáh nonʼné꞉e thóh nahatí꞉iere ne ronón꞉ha sahontèko raohén꞉ton ne Abishai, tánon iahatinatárane ne kanatowá꞉kenke. Ehʼthóhʼne ne Joab thóh nionsá꞉re ateriʼioseráke nahonterí꞉io ne Ammonró꞉nons, tánon iahá꞉rawe Jerusalemke.

¹⁵ Ók nó꞉nenh ne Aramró꞉nons sahóntoke ne roʼnón꞉ha tsi Israerʼró꞉non ronwatisénhnion, wahonhnitsiokwahróroʼke roʼnonháhakhók skát꞉ne wahónton.

¹⁶ Ronnontí꞉io Hadadezer iasakoténiete ratiriwakarénies nahonwatinónksa ne Aramró꞉nons í꞉se nakaniatará꞉ti ne Euphrates tónhneskwe; tánon thóh nón꞉we Helam iahónhnewe, ne ratikwekonhátie ne Shobach ne ratsiokwahkwení꞉io ne ronterí꞉io raotsió꞉kwah ne Hadadezer raónha ne onóntsi í꞉ken.

¹⁷ Nó꞉nenh ne ne sahonwaró꞉ri ne Táwit, ne raónha wasakoiataróhroke ratikwé꞉kon NʼIsraeró꞉nons iatónhtieste, tánon wathatiʼiáhiake ne Jordan kaniataratátie, tánon thóh iahónhnewe Helemke. Ne Aramró꞉nons wahonthateweienénhtaʼne niahonwatiaʼtónhti ne Táwit tánon raónha ahonterí꞉io.

¹⁸ Ne Aramró꞉nons wahontèko raotihén꞉ton NʼIsraeró꞉nons; tánon ne Táwit wasakononwarhiakhónhnion ne Aramró꞉nons tsá꞉ta tewenhniáwe nikaseretákes notsiónkwahs ne ne tioianátʼtions kosáhtens iotiʼiaténtons, tánon kaiéri tehonhnenhniawehetseráhsens nihá꞉ti ne kosáhtens rotisáhtens, tánon wahonwakaréhwaʼte ne Shobach ne rateriʼioserakweʼní꞉io ne raotitsió꞉kwa ronterí꞉ios, káti thóh nón꞉we ne raónha narénheʼie.

¹⁹ Nó꞉nenh ratikwé꞉kon ne rontinontí꞉ios ne ronón꞉ha ronwahiótenhse ne Hadadezer wahát꞉toke ne ronón꞉ha tsi Israerʼró꞉nons ronwatisénhnion, skénnon sahonhnón꞉ni skátne NʼIsraeró꞉nons, tánon ne ronón꞉ha Israerʼró꞉nons ne wahontonkwetaráko. Káti ne Aramró꞉nons wahatitsánike tsi iashé꞉kon tahonsahonwatiʼiénawase ne Ammonró꞉nons.