2 Samuel 1 - Ohiatonhseratokénti

Ne Táwit Wahotiónhnionhse Ne Saul ó꞉ni Ne Jonathan

¹ Sarénheʼie ne Saul, nó꞉nen ne Táwit shís꞉roh tsi iesakoʼsénhnion ne Amalekró꞉nons, ne Táwit thóh iehenterónhtakwe tewenhniseráke ne Ziklag nón꞉we.

² Nasénhaton siwenhniseraʼkéhaton, rón꞉kwe wá꞉rawe thóh nontáre ne Saul tsi thotahtó꞉serote, neh raoʼtserón꞉nia ioteratiónkwen tánon rokenrá꞉reh ranontsíne. Nó꞉nen shiaoiatórenhne ne Táwit, ohontsáke iahaiatiénenhne tánon wathatentʼtsóten.

³ Ne Táwit wahawénhase, “Kanón꞉we nontáhse?” Wahawénhase, “Tahkeniá꞉kenhne tsi tonathatoserótons NʼIsraerʼró꞉nons.”

⁴ Ne Táwit wahawénhase, “Onhniʼiotonhátsie noriwashón꞉ahs? Takró꞉ri!” Watharihwaseráko, “Ne ronterí꞉ios ronatékwen ne tsi waterí꞉io, ók kíʼ ó꞉ni ronatsiokowánen ne ronterí꞉ios rotiʼiatsenénhen tánon ronenhé꞉ion; ó꞉ni ne Saul tánon ne roién꞉ha Jonathan ronenhé꞉ion nonhʼné꞉eh.”

⁵ Eʼthóhʼne ne Táwit wahoriwanóntonhse ne kennithoiónha tsi rahón꞉ha roriorhiánions, “Onh ní꞉ioht tsi sateriénhtare nètho Saul ó꞉ni ne roién꞉ha Jonathan tsi ronenhé꞉ion?”

⁶ Ne kennithoiónha ne rorioriánions wahén꞉ron, “Tsi nahá꞉wenhne thóh í꞉keskwe tsi Ionón꞉te ne Gilboa; tánon thóh nón꞉we ne Saul ne rotenhnitserotakwen ne raoshí꞉kwara, iáh tehiahonhnisèhon ne otsiónkwas káseres ó꞉ni ne rotisátens rahiatákʼta wahón꞉nehte.

⁷ Nó꞉nen rashón꞉ne shionsahatkátho, wahák꞉ken, tánon tahakenáton. Watiriwasehrákwahse, ‘Kén꞉en shénʼshion.’

⁸ Tánon wahakénhase, ‘Ónka ní꞉se?’ Watiriwasehrákwase, ‘Í꞉i ne Amalekró꞉non natiatóten.’

⁹ Wahakénhase, ‘Káts, tahkerá꞉tan tánon takenonwariá꞉kon; asèken aiakosenakerhste iontsiéna, tánon nek kíʼ sá꞉ka shé꞉kon nikón꞉nhe.’

¹⁰ Káti wahirátahne tánon wahinonwarhiá꞉khon, asèken wakateriéntare tsi iáh tahrón꞉nheke tsi nihohiatsiénenhen. Wahiʼianonwarohrók꞉si tánon natenenhtsá꞉na ne rotenenhtshá꞉nenhne, tánon kén꞉en takhá꞉we raohén꞉ton natiá꞉ner.”

¹¹ Eʼthóhʼne ne Táwit wahoseronhniá꞉shion tánon waharatiónko; tánon ratikwé꞉kon ne ronnón꞉kwe ne ratikwekónhne thóh nahatíiere.

¹² Wahontiónhnion tánon wathonséntʼtho, tánon wahonenhtónhtsiete kwáh tsahokárawe ne ne Saul tánon ne roiénha Jonathan raotirihwáke, tánon ne ronwaterí꞉iose ne Roiá꞉ner ó꞉ni tsi ratiwatsiratátsie Israerʼró꞉nons, tsioríhwa tsi ne rotiʼiatsenénhton nasarehkó꞉wa.

¹³ Tánon ne Táwit wahawénhase ne kén nithoiónha tsi niká꞉ien ne roróhri, “Kaʼnón꞉we ní꞉se nithiséhnon?” Tánon ne raón꞉ha watharihwaseráko, “Í꞉i ratién꞉ha ne rowahéston, ne ne Amalekró꞉non.”

¹⁴ Ne Táwit wahawénhase, “Ní꞉se iáh kén tesáteronskwe naʼontahsatshanakaráthaʼte natsiá꞉tonte ne Roiá꞉ner roiatahrá꞉kwen?”

¹⁵ Ehʼthóhʼne ne Táwit iahó꞉nonke saiá꞉ta ne kén nithoiónha tánon wahén꞉ron, “Káts kén꞉en tánon ehtsenonwahrhiákhon.” Káti wahokónrehke tsi wahohiatsénenhte tánon wahononwarhiákhon tánon warénheie.

¹⁶ Ne Táwit wahawénhase, “Ní꞉se sanekwénhsareh senontsíne; asèken kwáh í꞉se tsi tsakáronhte wahkarihwanírate wesatkónten, satón꞉nions, ‘Wahinonwarhiákhon ne Roiá꞉ner roiatahrá꞉kwen.’”

¹⁷ Ne Táwit watahrihwaʼkwáhnion kí꞉ken kanikonraksénhtshera ne ne Saul raorihwáke tánon ne roién꞉ha Jonathan.

¹⁸ (Wahaténhnaʼne nètho Karénhna ne Ahén꞉na nahonwatiʼrihónhnien nonkweʼókons ne Judah nón꞉we; thóh nón꞉we nikaiá꞉ton Kaiatonhserákon ne Jashar.) Wahén꞉ron:

¹⁹ Ne saiataneraʼkwáhtshera, Ó Israel, thóh káien iawenhé꞉ion thóh káhere éhʼneken ne sáwenk tsiotenáktahtes! Tsi niʼiohtahtiténhrat ne ratisháststes rotiʼiatsenénhen!

²⁰ Tó꞉sa thóh nón꞉we iaserihhówahnat ne Gath nón꞉we, tó꞉sa serihʼhówahnat ne tsi tekanatokénserons ne Ashkelon; khéhs tó꞉sa sehrí꞉on nakoioʼokónʼahs ne Philistines nakontsenhnón꞉ni, ne sakotiʼioʼó꞉kons ne iáh tehonaʼtewarakwátarons kwáh enhontsenhnakaráthaʼte.

²¹ Í꞉se ne tsi ionontarónhnions ne Gilboa, kwáh tó꞉sa othènon aioháweiaste khéhs nahisakénhnore, khéhs nahonsahiokwátston ne kahentákes! Asèken thóh nón꞉we ne ratrenostákwah ne roshaststenserowánen naʼtekentiónston, ne ratrenostáhkwah ne Saul, iáh shé꞉kon tahonsawenhiená꞉ronke nonwénhton.

²² Thóh nitsiawénon ne raoʼtinekwénhsa ne ronwanawénkʼton, thóh nitsiawénhnon tsi nihonarésenskwe ne ratisháststeskwe, ne raohén꞉na ne Jonathan iáh thaʼtetsiókton, khéhs ne raosarehkó꞉wa ne Saul thaʼtetsiókton ne iáh othènen tahiorihontákwen.

²³ Ne Saul tánon ne Jonathan kwáh í꞉ken tsi ronwatinorónhkwahkwe ó꞉ni ronwahtikweniénstahkwe! Tsi ninónnhekwe ó꞉ni ne kenheiát꞉ne iáh kiʼ tatehonwatikháshion; ronhnón꞉ha sén꞉ha teotikhá꞉kwe tsi ní꞉ioht nakweskówa, ronhnónha sén꞉ha tenishástekwe tsi ní꞉ioht ne kénreks.

²⁴ Ó naothonwisénhtseras NʼIsraerʼronónke, tetsisewasént꞉thos ne Saul, raón꞉ha tsi sewasheronhniáton ne onekwénhtara sewatserón꞉nias, ne iókwats, raón꞉ha tsi sewatsténhni ne atnió꞉tas ne owistanó꞉rons í꞉kens ne sewatʼtseronhniakwáhkes.

²⁵ Tsi nihotiʼiatsienénhʼen ne ratisháststes thóh tsi waterí꞉io! Ne Jonathan thóh raiátaien ronwanonwarhiákhon tsi nón꞉we ne éhʼnekens tsiotenatʼthates sewáwenk.

²⁶ Wakenikonráksens ne sarihwáke, tiaʼtatèken Jonathan; kanoronkwahtserowánen kén ne ní꞉se nakerihwáke; ne sanoronhkwáhtsera tsi nòkwah ní꞉i tsi niʼionerakwátonne, sén꞉ha isiʼnónwe nikènʼne tsi ní꞉ioht ne konnón꞉kwe.

²⁷ Tsi nihotiʼiatsenénhen ne ratisháststekwe, tánon ne ionteriʼiostákwa iotón꞉on!