2 Corinthians 1 - Ohiatonhseratokénti

Tiotahsawáhkwen

¹ Kór ki tánon natateʼkénsera Timothy non nitiohaʼwiton, iateriwahnótha, ronwateriʼwanothani ne Ié꞉sos Kerístos, ne tsi eh tho nithoʼnikonhriió꞉ʼon ne Rawenni꞉io. Tánon tsi niiá꞉kon ne tiakawehtákwen thó꞉non ne Corinth, rohnatiaʼtarò꞉ron ronwahsén꞉naiens ne Rawenni꞉io, tánon ó꞉ni tsi niiá꞉kon ne Rawenni꞉io raonkweʼtashón꞉ʼas tsi watonhontsá꞉ien ne Achaia.

² Aiáwens ne Rawenni꞉io sonkwaníha ó꞉ni ne Roiá꞉ner Ié꞉sos Kerístos ahtsítsion kenténrat ó꞉ni skénnen.

Kó꞉r Waʼthatenonhwerá꞉ton

³ Ahonwahsén꞉naien Rawenni꞉io, ne roién꞉ʼa ne Shonkwaiá꞉ner Ié꞉sos Kerístos! Ne Kaʼníhsera kwáh se rotennitenrátskon ne Rawenni꞉io, tsi niká꞉ien tió꞉konte tehshonkwá꞉wis ne kaʼnikonhraʼniráhthsera.

⁴ Shonkwaʼnikonhraʼní꞉rats nó꞉nen thé꞉nen teionkwaʼnikónhrhare, eh káti naióhton tsi aonsaiethiʼnikonhraʼní꞉rate ne otiaʼkéhshon nó꞉nen thé꞉nen tehonaʼnikónhrhare.

⁵ Ionkwatiá꞉tare tsi nateiotenonhianíhton tsi ní꞉ioht tsi roronhiá꞉kenʼen ne Kerístos, nok ne káti á꞉re tsi niiorihwanéhrakwat tsi ní꞉ioht tsi sehshonkwaʼnikonhraieʼwén꞉thos.

⁶ Ionkwaronhiá꞉ken tsi niiakwaská꞉neks ní꞉se ne aiesewaʼnikonhrén꞉taʼne, ó꞉ni ne aiesewaʼniá꞉kenʼne. Tsi ní꞉ʼi niionkhiʼnikonhraieʼwén꞉thos, í꞉se ó꞉ni tho ní꞉ioht tsi aiesewaʼnikonhriió꞉hake, tsi kwáh skén꞉nen tsi aiesewahkátsteke tsi ní꞉ʼi ní꞉ioht ne onkwatiaʼkéhshon.

⁷ Iáh nowén꞉ton teskwarahiaʼtáhkwen. Eh nisewaronhiakén꞉ʼen tsi ní: ní꞉ioht, ó꞉ni ki ionkwaterién꞉tare tsi eh ní꞉ioht tsi entsehtshiʼnikonhraieʼwénthohte tsi ki ní꞉ʼi niiá꞉wenʼen.

⁸ Tewatenroʼshón꞉ʼa, tewakatonhontsó꞉ni ne akwahronká꞉ten tsi naʼakwaiéhsa tho nón: ne Asia. Nonkwaronhiakénhsera kwáh ísi nón꞉we tsi niiotterón꞉tonʼne kwahs iáh tetsakwatkwénies, káti ákta iaʼakwakwá꞉tho naionkwenhé꞉ion.

⁹ Kwáh se eh tho ní꞉ioht tsi iakwattókaskwe tsi eniakwénheie. Waʼkakwé꞉ni tsi waʼakwatká꞉we tsi í꞉ʼi iakwatateniahé꞉sen nok taiakwatáhsawen Rawenni꞉io sahshakwaniáhese, tsi niká꞉ien ne sehshakaónhnhets ne iakawenhé꞉ion.

¹⁰ Rawenni꞉io sahshonkwaiá꞉tako tsi ní꞉ioht tsi teionkwatenharenʼronhkwén꞉ni ne kenhé꞉iat, ó꞉ni kwáh orihwí꞉io waʼatión꞉ni tsi shé꞉kon eh nenhsáh꞉iere.

¹¹ Enseshonkwanián꞉kenʼte tiorí꞉wa tsi ne takwaienawá꞉se tsi takwaterennaiénnis. Tsi neniawén꞉ne, iakotiohkowá꞉nen tenhonwanonhwerá꞉ton ne Rawenni꞉io tiorí꞉wa iakotiohkowá꞉nen iakoterennaiéntahkwe nonkwaiaʼtanonhstahtshera ó꞉ni teioterihwaserákwen.

Kó꞉r Tonsahatá꞉ton Ne Orihwaʼshón꞉ʼa Tsi Ni Thorihwíson

¹² Enwá꞉ton ne aiakwatená꞉ieste tsi niwé꞉ne ne onkwerienʼtiióhtshera. Tiotkonhón꞉we iotkwénies ó꞉ni tkarihwaié꞉ri tsi ní꞉ioht tsi ionkwatenhniseraténion, kwáh sénha nó꞉nen í꞉se skátne tewakwekonhatiéskwe. Ó꞉ni ne ionkwaiaʼtanonhnhatiéskwe ne iorihwanéhrakwa Rawenni꞉io raonoronhkhwáhtshera, iáh ki tho té꞉ioht tsi ní꞉ioht ne kén ionhontsá꞉te aorihonnienníhtshera.

¹³ Iáh ne té꞉ken tsi iekwahiatón꞉ni tóka ken iáh thaiesewakwé꞉ni ne aiesewawennahnó꞉ton tánon iáh thaiesewaʼnikonhraién꞉taʼne. Aiá꞉wens ki kwáh tokén꞉ʼen tsi aiesewaʼnikonhraién꞉taʼne.

¹⁴ Kwáh káti ó꞉nen ostónha takwaʼnikonhraién꞉tas. Ne káti nó꞉nen ne Shonkwaiá꞉ner Ié꞉sos ténthre, kwáh eh tho ní꞉ioht tsi ahskwahsennakará꞉tate tsi ní꞉ʼi nikwatierá꞉se.

¹⁵ Kwáh se orihwí꞉io wakonní꞉ne tsi takwakweniénstha, eh ní꞉ioht tsi kateʼnikonhrón꞉niskwe í꞉se tentisewáhente ne iaonsakwanataʼrenáhse. Ók ná꞉ʼa nen né꞉ʼe teiorí꞉wake iesewaiaʼtateríston tsi ienkwanataʼrenáhse.

¹⁶ Énska tsi niewaké꞉non ne Macedonia tánon shé꞉kon tsi naʼtetewaké꞉non ne tho nón꞉we. Eh thó꞉ne enwá꞉ton ne Judea nón꞉we iaonsaskwatenniéhte.

¹⁷ Káton ken ísewehre iáh tewá꞉tons ne iaʼtaonkerihwaién꞉taʼse oh naká꞉tiere? Káton ken ne testiatié꞉ren ne ónhka ne khók ne ión꞉ton “Hen káton Iáh” kwáh ne khók ne aontahonwatiʼnikonhraié꞉rite ne akohrén꞉shon?

¹⁸ Rawenni꞉io iotón꞉ʼon nahonwaniáhese, í꞉ʼi ó꞉ni, nó꞉nen enkí꞉ron tsi ní꞉kon tekwarihwaserakwén꞉ni tió꞉konte “Hen niehé꞉ken iáh nowén꞉ton tóka ken ne Iáh akénhake.”

¹⁹ Ne Ié꞉sos Kerístos Rawenni꞉io roién꞉ʼa tiotkonhón꞉we “rotateweiennén꞉taʼon ó꞉ni iáh nowén꞉ton tehoterihwaiesáhton.” Ó꞉ni raónha ne Silas, Timothy, tánon ní꞉ʼi tsi kwahró꞉ri.

²⁰ Kerístos akwé꞉kon “Hen” niehé꞉ken tsi ní꞉kon rohrharátston ne Rawenni꞉io. Ne aorì꞉wa raónha ne Kerístos sonkwahró꞉ris “Eh tho neniá꞉wen.” Nok ní꞉ʼi entewèn꞉ron tho raoiaʼtanehrakwáhtshera ne Rawenni꞉io.

²¹ Ne káti aorì꞉wa ne Rawenni꞉io eh niwatié꞉sen tsi skátne tehshonkwatáhstha ne Kerístos kwáh aiorihwahnirón꞉hake. Rawenni꞉io se wáhi shonkwaiaʼtarákwas.

²² Ó꞉ni ró꞉ton ne Raoʼnikonratokénhti nonkweriahnéhshon ne aweʼnéston tsi raónha se raonkweʼtaʼshón꞉ʼa.

²³ Rawenni꞉io se wahakerihwahnirátshe watháktaste tsi iáh thiewaké꞉non ne Corinth, né꞉ne tóhsa sótsi akwateʼniakatstháhse.

²⁴ Iáh í꞉ʼi teiakwaiaʼtakweʼní꞉ios ne akwahró꞉ri nahò꞉ten aontesewehtáhkwe. Nok skátne ionkwaióʼte oh naiá꞉wenʼne ne aiesewatonhnhá꞉rake, ne tsi sewariʼwahní꞉ron tsi tisewehtáhkwen.