1 Timothy 2 - Ohiatonhseratokénti

Tsi Ionterénnaiens Nononsatokentíke

¹ Ne tiotierentákwen, nekáti, wák꞉re nètho kariwahnonthóntsheras, aterénnaient, tsi nathehionkwatonwentió꞉ni, ó꞉ni ne kanonwehratóntsera Rawenniʼióke ietewátat nonkwetaʼkwékon akoriwáhke;

² ne rontinontiʼiósons tánon ratikwékon tsi niháti ne rohnaterihónton, neh꞉ne kwáh skénnon tsi aihtiónnheke tsewahkwékon naterénnaient rahonháke ne Rawenni꞉io tánon kwáh tkariwaiéri tsi naitewáhtiere.

³ Ne kí꞉ken ioiánere ó꞉ni rawehrientiʼióstha ne Ní꞉io Sonkwaiatákwen,

⁴ Neh tehotonwentió꞉ni niaʼtehionkwétake ahieniákenʼne tánon naieientéraʼne ne oriwihioʼónwe.

⁵ Asèken saiátak ne Ní꞉io, tánon kwáh saiátak skátʼke sakahónʼnis ne Ní꞉io tánon nonkwesónhas, nètho rónkwe neh꞉ne Kerístos Ié꞉sos,

⁶ iehothatatkáwen nahonsashakoniákenthe neh kwáh kentiokwaʼkwékon tsi niaʼteienekwésakes nonkwesónha. Kwáh tahiothoʼkéntaʼne neh iorihwaniráthon neh Ní꞉io tehothonwentió꞉ni kwáh niaʼtehionkwétake aieniákenʼne,

⁷ tánon neh aoríhwa iehionkatheniéton tsi kateriwanótʼtha ó꞉ni kheʼrihonniénni ne iáh tehatisitaerónon, nahkateriwanóten ne tewetákwen ó꞉ni norihwí꞉io. Iáh tekanowéntha; Orihwí꞉io tsi nahóten katróris!

⁸ Kwáh tsi nihioriwáhke nononsatokentíke enhionterénnaien tewahkatonwentió꞉ni ne ronnónkwe nahonterénnaien, ronnónkwe neh꞉ne rotirihwatóken tsi nòkwa ne Ní꞉io tánon ahatikwéni nahonnenstiakétsko nen honterénnaien ne tóhsa ahotinakwenʼénhake tóhsa ó꞉ni tahotiriwahkéhnen.

⁹ Tánon ó꞉ni tewahkathonwentió꞉ni ne tsionatʼthonwísen nakontatʼkweniénstake tánon tkariwaiérik tsi ní꞉ioht tsi akontʼtserónni; tóhsa nahiotikotsihióseke tóhsa ó꞉ni nowistanoronsónhas tóhkaʼ ó꞉ni nonekóras tóhkaʼ ó꞉ni ne kwáh wahtsatawitseranórons ahionátsʼton,

¹⁰ nók neh꞉ne kahiotenserí꞉ios, neh tkariwahiéri ne tionatʼthonwísen nakonníron iotiriwiʼióston.

¹¹ Tiotʼthonwísen tehiothonwentióʼon nahontéweienste. Tathahiothóteke ó꞉ni skennonhakenhake tsi nahe iotahonsate.

¹² Iáh thekheriwáhwis nahiakotirihónnien tóhkaʼ ó꞉ni ne thènen ahontahonwatiniarotaroke tsi nòkwa ne ronnónkwe; ónenk tsi tathenʼhionatótheke.

¹³ Asèken Á꞉ton thoʼtierénton ronwahiatónni ehthóhʼne ónen Eve.

¹⁴ Tánon iáh kíʼ Á꞉ton tehonwanikonrothákwen tánon tahohiákon ne Rawenni꞉io rahohianerénsera.

¹⁵ Nók kíʼ ne tiotʼthonwísen neh entsioniákenthe tsi enhiowiraiéntaʼne, tóhkaʼ ienwahtashóntenre ne tehwetákwen ó꞉ni ne kanoronkwátsera tánon nahioriwiʼiostónhake, kwáh ahontatʼkweniénstahke.