1 Timothy 1 - Ohiatonhseratokénti

¹ Kór nón nitiawénon, rohteriwahnotáni ne Ié꞉sos Kerístos tsi nihonháʼon ne Rawenni꞉io Sonkwaiathákwen ó꞉ni Kerístos Ié꞉sos nonkwarahrátʼtshera—

² Ne Timothy, ne kwáh riʼiénha ehʼnónwe ne tewetákwen: Aiáwens ne Ní꞉io Kaníhsera ó꞉ni Kerístos Ié꞉sos Sonkwaiáner nahontáhion ne kenténrat, ataniténron, ó꞉ni skénnon.

Ronwanaronkaténʼnis Ne Rotinówens Sakotirihonniénnis

³ Tewahkatonwentióni ne Ephesus nónwe nasiteróntake, kwáh tsi ní꞉ioht tsi konretiarónʼon ne Macedonia shahonkenonhátieʼne. Rohnátsiakes ne nónwe onówen nahóten sakotirihonniénnis, tánon ónenk tsi ensehiónʼnien nahontkáh꞉we.

⁴ Sheʼróri nahontiakwarísi nètho okarakáions tánon ne karawistésons ratisennarónʼnion ne kashótʼtsheras, kwáh ne kheʼkhók karihontákwas ne taierihwakénasʼte; iáh né tehioʼiótens ne Rawenni꞉io rahohioténsera, tsi né kaienteresthákwen ne tewetákwen.

⁵ Nahoriwáhke kíʼ tsi nikonríhonthe né꞉ne asehiáron ne kanoronkwátsera tsi nón nitewétha ne weriasí꞉io, onikonróskon, ó꞉ni ne iorihwatóken tewetákwen.

⁶ Ótiakes tesshonakʼkarahthénion tsi nòkwa kí꞉kens tánon wahotihiatáthonte tsi naʼtehiotenonwahroríthonʼte tsi ní꞉ioht tsi tehatithára.

⁷ Rón꞉nereh nasakotirihonʼnienníseke ne Rawenni꞉io rahohianerénsera, nók akwékon iáh tehotinikonraiéntas ne rahotiwennasónhas tóhka ó꞉ni nahorihoténsons tsi nióre tsi rotinikonraníron.

⁸ Ionkwateriéntare ne kaianerénsera tsi ioiánereh tóhkaʼ thóh ní꞉ioht tsi enkwáston tsi natehiothonwentióʼon.

⁹ Ónenk tsi enwehiárake, kwáh kíʼ nèn꞉ne, tsi kahsahánions ne kaianerénseras, iáh né꞉ne tionkwetaiéris tehiakoriwáhke, nók né꞉ne thehatí꞉iaks ne kaianerénseras ó꞉ni ne sohnateriwahtheʼwáton, neh꞉ne iáh tehotinihioseráien ó꞉ni rohtiriwáhneren, asèken tsi nihiákon ne iáh tehiakoriwiʼiostontseráien tóhka ó꞉ni iáh tehiakoriwiʼióston, nónka nenhononwahrhiákon ne rohníha tóka ó꞉ni ne sakotinisténha, rohnónha ne sakohnashé꞉tha,

¹⁰ Né ioteriwahtéha, né kentétsera ratinikonrátha, ne ratiwirahnénskwas, tsi niháti ne ronnowéntha ó꞉ni ronnowéntha ne thènen ahontʼróri tóhka ó꞉ni nónkak ne kwáh ó꞉ia ní꞉ioht tsi ahontróri tsi nòkwa ne kwáh tóhkenske íken noriwahshónha.

¹¹ Ne thóh karihonniennítshera ne kariwí꞉ios nónwe nikatʼtsénrion né꞉ne ionkeniahesáʼon nakerihówahnathe, ne kariwí꞉io tsi nitiawénon raonháke ne rohiatanerákwat ó꞉ni rahohiatanerahkwátshera ne Rawenni꞉io.

Tahionthenonweráton Ne Rawenni꞉io Raoténrat

¹² Tehinonwerátons ne Kerístos Ié꞉sos Sonkwaiáner, raónha takáwi ne kasatsʼténsera tsi nòkwa natioténsera. Tehinonwerátons tsi rahkanonthónnionse nakeriwastáton tánon ratiatarákwen nahiʼiótense,

¹³ iawerohátsien ne tiothohétston kariwáksen tsi ní꞉ioht tsi rihiatátiase ó꞉ni rihronhiakénton tánon rihnikonraksáton. Nók ne Rawenni꞉io kwáh wahakhìtenre tsoríwa tsi iáh arèkok sitewahketákwen tánon káti iáh tewahkateriéntarahkwe tsi nikatiérahkwe.

¹⁴ Tánon ne Sonkwaiáner iawehtatʼtsáni tahákon ne kenténrat ó꞉ni tahákon ne tewehtákwen ó꞉ni neh kanoronkwátsera tsi í꞉i onhkwáwenk ne tsi tehionkwateriwahsóntere ne Kerístos Ié꞉sos.

¹⁵ Ne kí꞉ken ne kwáh tóhʼkenske tsi niwáhton, ne kwáh iahiokontakwénhake ahiontiénawasthe ó꞉ni nahontahiakéthakwe: Kerístos Ié꞉sos tawéhnon tsi ionwentsiáte nasakoniákenthe ne iakoriwáhneren. Í꞉i nèn꞉ne ne kwáh tewahkenonkwísen tsi niháti,

¹⁶ ónk Rawenni꞉io kwáh wahakhìtenre eh nahontáwe ne Kerístos Ié꞉sos nontiérenk ahréh꞉nesthe tsi kwáh rohnikonkátsʼthe tsi nihatiérase, né꞉ne kwáh tewahkenonkwísen sénha tsi ní꞉ioht ne kwáh rotiriwáhneren, tewathenienthénston tsi niháti nonakènke entʼthonwétakwe tánon enhatiʼiéna ne ionnheʼónwe atónnhets.

¹⁷ Raonháke ne ronnheʼónwe Ronontí꞉io, tsi nénwe tánon iáh tehohiatáken, raonhatsíwa ne Ní꞉io—raónha tahonwarénsaron ó꞉ni kahiatanerakwátsera tsi nenwe! Éhthoh naiáwen꞉ne.

¹⁸ Timothy, akheksátha, Í꞉se wahkonniáhese kí꞉ken ahontaseniarótarohke, tsi teskaieróntare nowennasónhas neh iekariwáken tsi nikataráh꞉kwen tsi nòkwa níse. Í꞉sas thíken owennasónhas nahioianeréhake nasatherí꞉iosʼte,

¹⁹ tánon sateweiénton tsi tisetákwen ó꞉ni kwáh sanikonróskon kénhak. Ótiakes iáh tehonatahonsatháton tsi nahóten ronnonthónnionsʼkwe tánon wahatikarónni tsi ní꞉ioht tsi thonetákwen.

²⁰ Thóh nihiátare ne Hymenaeus ó꞉ni ne Alexander, tsi kerewáthon hiakehiátʼkhaʼwe thóh rahosatsʼtenserákon ne Ótkon; neh enhothirihónnien nahiátʼkaʼwe tsi nirihwaiesátha.