1 Samuel 7 - Ohiatonhseratokénti

¹ Tánon nonkweʼókons ne Kiriath-jearim, taʼhón꞉ne tánon waʼthón꞉neʼkwe ne raoʼneró꞉kwa ne Roiá꞉ner, tánon iaʼhatíhawe tsi thohʼnón꞉shote ne Abinadab tsi tionhniá꞉here. Waʼhonwaiatatokénhtisʼte ne roiénha, Eleazar, ne ahatenhnikonrá꞉ren ne raoʼnerokwaʼtokénti Roiá꞉ner.

² Neʼthóh tewenniseráteʼkwe nètho oneró꞉kwa shiaʼhatí꞉ien ne Kiriath-jearim, ó꞉nen kaʼríhwes tsi ná꞉he tsiotohétsʼton, kákʼnon ne tewáhsen niʼioseráke tsi ná꞉he tkènhne, tánon tsi nikanonsákes NÍsraerʼronónke saʼionská꞉neke naʼonsahonwásere ne Roiá꞉ner.

Samuel Rarí꞉wenhta Waʼhá꞉ton

³ Eʼthóhʼne ne Samuel waʼsakawénhase kwáh tsi niaʼtekanonsákes NʼIsraerʼronónke, “Tó꞉ka thóh nionshesewenonhátie raʼhonháke ne Roiá꞉ner kwáh tisewerhiasáhaton, kwáh káti í꞉se iasewá꞉ti ne thiʼkaniʼioseráte í꞉ken ó꞉ni ne Astartes ne tsionhá꞉ke. Tesewatókenk ne sawé꞉ri raonháke ne Roiá꞉ner, tánon tsi sewaiótens rahón꞉ha khók kénhak, tánon rahón꞉ha kwáh entsetsisewaʼiatotarísi ne rontsaʼnákes ne Philistine.”

⁴ Káti ne Israerʼró꞉nons í꞉si iahonáti ne Baals ó꞉ni ne Astartes, tánon nek khók sahonwahiótenʼse Roiá꞉ner.

⁵ Eʼthóhʼne Samuel wahén꞉ron, “Ietsiʼiataró꞉rok raʼtikwé꞉kon NʼIsraerʼró꞉nons ne Mizpah nón꞉we, tánon kwáh enkaterénnaien raonhá꞉ke ne Roiá꞉ner sewariwá꞉ke.”

⁶ Káti waʼhonnitiokwaró꞉roke ne Mizpah nón꞉we, tánon iahatiʼnekó꞉tsenʼte tánon tahatiʼneká꞉weron raoʼhén꞉ton ne Roiá꞉ner. Tánon wahonentontié꞉te nétho wenhniserá꞉te, tánon wahonníron, “Ionkwarihwáneren tsi nòkwah ne Roiá꞉ner.” Tánon ne Samuel watehshakoiaʼtó꞉rehte NʼIsraerʼró꞉nons thó nón꞉we Mizpah.

⁷ Nó꞉nen ne Philistiaró꞉nons sahatiʼriwáronke nètho Israerʼró꞉nons tsi ronanitsiokwaró꞉ron ne Mizpah nón꞉we, ne Philistines rotiʼnontí꞉ios iahón꞉ne iashakonatiatónhti NʼIsraerʼró꞉nons. Tánon nó꞉nen NʼIsraerʼró꞉nons shahatiʼrihwáronke wasakotitsániʼke ne Philistines,

⁸ tánon wahonwénhaʼse ne Samuel, “Tó꞉sa téstann tsi iesaterénnaien rahonhá꞉ke ne Roiá꞉ner ne nón꞉kwa Ní꞉io í꞉ken, tánon saterénnaien nètho rahón꞉ha nontiérenk enshonkwanónsthaʼte tsi nó꞉kwa ne Philistine rontsaná꞉kes.”

⁹ Káti ne Samuel iahoiaténhaʼwe ne ne shé꞉kon nihanónkera teonakarontónha owí꞉ra tánon ne iahá꞉taʼte raiatakwékon waotsatá꞉tshaʼahte ne wahotátʼtse Roiá꞉ner; Samuel wathaséntho rahonháke ne Roiá꞉ner ne raotiʼrí꞉wake NʼIsraerʼró꞉nons, tánon ne Roiá꞉ner watoriwaʼserákwaʼse.

¹⁰ Ne Samuel tsi nioteriwaʼthentiáton tsi rotenaskwaʼtsahʼáhton ne thoiéston, ne Philistines ákta waʼhón꞉nete niaʼsakonatsatónhti NʼIsraerʼró꞉nons; nok ne Roiá꞉ner wathohénrehte karonhiáke nontáwe kwáh ne ne waʼká꞉wereh nètho shiʼwenhniseráteʼkwe tsi iashakotiatónhti ne Philistines tánon neh watonnahniʼtonhniáten; tánon sahontèko raotiʼhén꞉ton NʼIsraerʼró꞉nons.

¹¹ Tánon ne ronhnón꞉kwe NʼÍsraerʼronónke sahatiʼiákenhne ne Mizpah tánon wahonwatísere ne Philistines tánon wahonwatiʼnonwarhiakhónnion kwáh tsi ní꞉iore ne iehiotohétston ne Beth-car.

¹² Eʼthóhʼne ne Samuel iahanenhiénhawe thóh wahanenhióten tsi naʼtetiátere ne Mizpah tánon ne Jeshanah, tánon ne wahanátonkwe Ebenezer, asèken wahén꞉ron, “Tiaʼkarihwaʼkén꞉niaʼte tsi ní꞉iore nón꞉wa Roiá꞉ner shéh washonwaʼié꞉nawase.”

¹³ Káti ne Philistines ronwatiʼsénhnion tánon iáh shé꞉kon tieshotiratáhon ne raotiʼnakeraserákon ne Israerʼró꞉nons; ne Roiá꞉ner kwáh í꞉ken tsi wasakoʼtehniakahtsʼtátʼtie ne Philistines kwáh tsi niaʼtewenniseráke enrónhnheʼke ne Samuel.

¹⁴ Ne kanatowá꞉nenhs nètho Philistines ronwaʼtíkwen ne Israerʼró꞉nons Roiá꞉ner thontaʼsakáwen NʼIsraerʼró꞉nons, thóh tontá꞉sawen Ekron iaʼhón꞉we ne Gath; tánon ne Israerʼró꞉nons sahatiʼiéna ne raotiʼnakerá꞉sera thonsahonwatiʼshiotarísi ne Philistines. Kwáh kiʼ skénnon shón꞉ton tsi natehón꞉tere ne Israerʼró꞉nons tánon ne Amorʼró꞉nons.

¹⁵ Ne Samuel sakorihwenhtákwen NʼIsraerʼró꞉nons kwáh tsi nikaʼríwesʼkwe rónnheʼkwe.

¹⁶ Ienʼhakwatóseron tsi iatenhakwátase iateioserá꞉ke thóh nonwéson Bethel, Gilgal, tánon Mizpah; tánon ensakorihwénhtaʼse Israerʼró꞉nons akwé꞉kon kí꞉ken tsi kanataién꞉tons.

¹⁷ Eʼthó꞉hʼne énsraʼwe ne Ramah, asèken thóh nón꞉we nihononshótaʼkwe; rahón꞉ha sakohkó꞉rakwe NʼIsraerʼró꞉nons neh nón꞉we, tánon wahahónhnien ietsenharákwa ne Roiá꞉ner.