1 Samuel 6 - Ohiatonhseratokénti

Noneró꞉kwa Ionsón꞉we Israerʼronónke

¹ Ne raoneró꞉kwa ne Roiá꞉ner thóh kaiéntaʼkwe raoʼtinakeraserákon ne Philistine tsá꞉ta niwenhní꞉take.

² Eʼthóhʼne ne Philistine iashakotínonhke ne ratiʼtsihénstatsis ó꞉ni ne iehatiʼriwá꞉kens tánon wahonní꞉ron, “Ónhnahitewá꞉iere ki raoneró꞉kwa ne Roiá꞉ner? Takwahró꞉ri nahó꞉ten tsi skátne tsi ieniakwaténiete tsi nón꞉we tionákte.”

³ Waʼhonní꞉ron, “Tó꞉ka ietsisewaténieʼte ne raoneró꞉kwa ne sakoʼNí꞉io Nisraerʼró꞉non, tó꞉sa onerokʼkóskon kénʼhak, ók akwé꞉kon tsi nikéntons ionshatsisewateniéten ne kaní꞉kon tekariwaserakwáhtha. Eʼthóhʼne ní꞉se kwáh entsisewaʼiewénhtaʼne tánon entsisewatsiatotaríshi; tánon kwáh ensewatókense tsonhá꞉ke nontiéren tsi niʼtsisewaniakatsʼténhnis?”

⁴ Tánon wahonní꞉ron, “Nahó꞉ten nenhnéʼe ne kaní꞉kon teieriwaserakwátha nètho ne kwáh iahonsetewaténieʼte ne raonháke?” Waʼthatirihwaserá꞉ko, “Wísk ní꞉kons ohwistanó꞉rons takwahá꞉sons tánon wísk ní꞉kons ohwistanó꞉rons ohtsiʼnionká꞉rons, ne enhioianénhaʼwe tsi nihá꞉ti ne rotiʼiá꞉ners ne Philistines; asèken kwáh ne shaʼkánra tsi sewaʼkwé꞉kon wesewahiatórenhne tánon waʼohtiʼiatórenhne ne sewaiá꞉ners.

⁵ Káti ó꞉nenk tsi ensewatsiaʼtonhniseronniáhnion niwásas tahonsakaierontárake tsi wesewatkarotakwarontáseron sewatsiatonhniseronniá꞉nion otsinionká꞉ron nètho waʼhatihétʼkente nohón꞉tsa, tánon taʼtsítson kaiatanerakwátshera ne sakoʼNí꞉io NʼIsraerʼró꞉nons; tokaʼnón꞉wa iáh thaʼtahonsahotsanátsʼteke ne tsonhá꞉ke ó꞉ni ne sewaní꞉ios tánon ne tsonhontsáke.

⁶ Onnontié꞉ren ní꞉se tsi ahisewatʼterhiaʼsanírate tsi neh ní꞉iot ne Egyptró꞉nons tánon ne Pharaoh wahonteriasahní꞉rate? Ne nó꞉nen ne Ní꞉io shahshakononhwaroriʼtón꞉ni, iáh kénh tehonwahnatkáwen nonkweʼókon, tánon éhren waʼhónneʼte?

⁷ Ó꞉nenʼkiʼ, sewawehiennnéntahn kahserétase wenʼhní꞉seres tánon tekení꞉iase ne ne onwák ionahtewí꞉raien tiohnónhskwaron ne ne iáh nonwénhton tekonwatiʼientá꞉nien, tánon teietsiʼienhtá꞉niak thóh wenʼhnísereske ietsiʼiataniʼiónten, ók iahetsiʼiaténhaf ne akotihiohokónʼa, teietsikhá꞉shon.

⁸ Iasewáhaf ne raoʼneró꞉kwa ne Roiá꞉ner tánon thóh iasewá꞉ta wenhní꞉seresʼke, tánon kaʼnerókwakon sewatáron ietsiʼiatokerón꞉tat ne kaiatonhnisónhas nowistanó꞉rons í꞉ken, ne tsi ionshaʼtsisewateniéten ne ne kanhí꞉tshera tsi iekatá꞉ton. Eʼthó꞉ne iashesewaténiet, tánon háo tionhnónskwaron tiatirónten tsi nienhén꞉we.

⁹ Tánon sewatenhnikonráren; tó꞉ka kén thóh nienhénseʼwe tsi tsiohontsáien, thóh nón꞉we Beth Shemesh, ne kiʼ neh kwáh raónha thóh nisonkwasenhé꞉ni kí꞉ken teiotenonhianí꞉ton kakaronʼniá꞉tshera; ók tó꞉ka iáh, eʼthóhʼne kiʼ enionkwateriéntaraʼne nètho tsi iáh raónha ratshaʼnáke teionkwaién꞉ton; tsi naonkwaiátawen atérasʼwa í꞉ken.”

¹⁰ Ne ronnón꞉kwe thóh kiʼ nahatí꞉iere; iasakotiʼiaténhawe ne tekení꞉iase ne ionatewí꞉raien tiohnhónskwarons tánon wahkonwatiʼientániake thóh kaseretáke ne wenhnísereske, tánon wahshakotiʼnhó꞉ton ne ionatewí꞉raien tsi iakenekenraienthákwa.

¹¹ Waʼhonnéta ne raoʼneró꞉kwa ne Roiá꞉ner thóh kaseré꞉takon wenhní꞉seresʼke, tánon noneró꞉kwa ne watá꞉ron nowistanó꞉rons ohtsiʼnionkáʼnons tánon ne tetewatenienténston tsi nihonatʼkwarotakwáronhte.

¹² Ne tiohnhónskwarons iatʼtiatakwaríshiaʼte tsi nieiotʼtahínon ne Beth Shemesh tsi wahohátaʼtse ne iohahówahne, tekeniʼniakwakáhrehre tsi niahákene; kwáh iáh thatetsiatʼkarateníʼons ne skeniweientetá꞉kwen khók ne skeʼnihnekwá꞉ti, tánon ne rotiʼiá꞉ners ne Philistines wakonwaʼtísere tsi nió꞉re ne tsikʼkaristaʼtátie ne Beth Shemesh.

¹³ Nón꞉wa nonkweʼókons ne Beth Shemesh raʼtinatsíʼiatskwe thó ahonrá꞉kwakon. Nó꞉nen sahontarakétsko tánon waʼhontʼkátho noneró꞉kwa, iaʼhón꞉ne tsi nihonaʼtonhnáhere ne iaʼtakonwáteraʼte.

¹⁴ Ne wenhní꞉seres káhsere iaón꞉we tsi roʼthentá꞉ien ne Joshua ne Beth Shemesh nón꞉we, tánon thóh nón꞉we natká꞉taʼne ákta tsi nón꞉we nikaʼnenhiáʼien kaneniowá꞉nen; sók kiʼ waʼthatiswenhkarorénhseron neh kaʼsereonhniáton kiʼ wenhní꞉seres neh waʼhontʼtsenhónhniaʼte tánon wahkonwatinonwarhiákon kiʼ tionhónskwaron ne waʼhonwátatʼtse ne Roiá꞉ner tsi wakowanatsatátʼtsahʼahte.

¹⁵ Ne Levites tahón꞉sente ne raoʼneró꞉kwa ne Roiá꞉ner tánon ne oneró꞉kwa ne ákta kaiéntaʼkwe, ne ne thóh watá꞉rion nowitanoronʼshón꞉ʼa, tánon thóh iahaʼtíren kaʼnenhiowanénhne. Eʼthóhʼne nonkweʼshón꞉ʼahs ne Beth Shemesh tahatí꞉ieste naʼhonteskontá꞉ke ó꞉ni ne waʼhonteriwaténtsiaʼte nahonteskontánion nètho wenhniserá꞉te raohén꞉ton ne Roiá꞉ner.

¹⁶ Nó꞉nen ne wísk nihotinontiʼiotserákes ne Philistine sahontʼkátho, ne sahennísera Ekron nionsahón꞉ne.

¹⁷ Neh kí꞉ken nowistanó꞉rons ne iotaʼkwarontónhnions, tsi niká꞉ien ne Philistines ieshotíha ne ne kaʼní꞉kon iehotiʼtáton raoʼhén꞉ton ne Roiá꞉ner: Skanatátʼtshons ahotiriwá꞉ke ne ne Ashdod, Gaza, Ashkelon, Gath, Ekron;

¹⁸ ne ó꞉ni nowistanó꞉rons otsiniónkarons, ne entiohianénhaʼwe akwé tsi niʼkanátakes ne kanatowánens ne Philistines nón꞉we ne ne raoná꞉wenk ne wísk nihatinontiʼioserákes, tetsá꞉ron ne ne tekanatanákʼkons kanatowá꞉nenhs ó꞉ni iáh tewatenhénraiens ne ken nikaʼnatásas. Ne kaʼnenhiowá꞉nen, ákta tsi nón꞉we naʼhatí꞉ien ne raoʼneró꞉kwa ne Roiá꞉ner, neh kaʼriwanírats shé꞉kon nón꞉wa wenhniseráte thóh raohén꞉take ne Joshua ne ne Beth Shemesh nón꞉we.

¹⁹ Tsi nithotwatsirí꞉non ne Jeconiah kwáh iáh skátne tehonaʼtonnáhere nónkweʼókons ne Beth Shemesh nó꞉nenh tenhontátken tánon washaʼkononwaʼrhiákon tó꞉ka ní꞉hati nonkweʼókons ne Beth Shemesh, tsioríwa tsi iahontkehtó꞉ten raoʼneró꞉kwakon ne Roiá꞉ner; tánon waʼshakononwarhiákon wísk niwáhsen niwenhniawehetsherásen tánon tsá꞉ta niwáhsen niháti ronhnón꞉kwe. Nonkweʼókons wahontsónnion tsioríwa ne Roiá꞉ner tsi naʼthatenonhianíton washakowéntho nonkweʼókons.

²⁰ Eʼthóhʼne nokweʼókons ne Beth Shemesh wahonní꞉ron, “Ónka ahaʼkwé꞉ni tahátaʼne raoʼhén꞉ton ne Roiá꞉ner, kí꞉ken roiataʼtokénhti Ní꞉io? Ónka ne thóh iá꞉re ne káti nahón꞉ton éh꞉ren atsitewahiaʼtenháwiʼte?”

²¹ Káti ne iahonwaʼténieʼte rarihwakarénies tsi thatinákeʼre ne Kiriath-jearim, rontón꞉nions, “Ne Philistine tethotíha ne raoneró꞉kwa ne Roiá꞉ner. Kénʼen nontséwe tánon ionsasewá꞉haf.”