1 Samuel 5 - Ohiatonhseratokénti

Ne Philistine Tánon Ne Oneró꞉kwah

¹ Nó꞉nen ne Philistine sahatiʼié꞉na ne raoʼneró꞉kwa ne Ní꞉io, Ebenezer nón꞉we tahatíhaʼwe tsi niahón꞉ne Ashdod;

² iaʼhatíhawe iahatí꞉ionte raononsatokentiʼkówaʼne ne raoʼtiní꞉io Dagon, tánon thóh wahatí꞉ien kaiatonniserák꞉ta.

³ Ohronhkéstsi tsi saióhrhenʼne nonkweʼókons ne Ashdod waʼhontkátho nètho kaiatón꞉ni Dagon ioreniénhen kwáh tsekakonsó꞉te ohontsá꞉ke ohén꞉ton ne raoneró꞉kwa ne Roiá꞉ner Raoʼteriwaseronhniátshera oneró꞉kwa. Sók kiʼ tonsahónhnekwe tánon sakonwanaktaserónhnien.

⁴ Nók shonsaontkétsko nó꞉ia saióhrhenʼne, Dagon tsioreniénhhen tsekakónshoʼte ohontsá꞉ke ohén꞉ton ne raoʼneró꞉kwa ne Roiá꞉ner, tánon tsi roʼnontsistóhare ne Dagon ó꞉ni tetsá꞉ron ne ratsanáke thóh ká꞉ien kaiá꞉kon tsi tekanoháronhwe; ne khók ne raiakaráke ne Dagon iaʼtetsotatén꞉ron.

⁵ Ne kí꞉ken aorí꞉wa ne raoʼtsihénstatsis ne Dagon tánon ratiʼkwé꞉kon nón꞉ka iehontá꞉weiaʼte raoʼnónskon ne Dagon iáh tsaierátaʼne tsi tekanoháronkwe ne Ashdod shé꞉kon nón꞉wa wenhniserá꞉te.

⁶ Ne Roiá꞉ner wahshakoteʼniakátsʼtatshe nonkweʼó꞉kons ne Ashdod nón꞉we, tánon waʼshakoteronkwenhniónhaʼse ó꞉ni waʼshakóienʼte ne takwaʼáhson, tetsá꞉ron thóh nón꞉we Ashdod tánon ne tsi waʼtonhontsá꞉ien.

⁷ Tánon nó꞉nen ne ienákere ne Ashdod waʼhontʼkátho tsi niʼiotonhátie, waʼhonní꞉ron, “Ne raoʼneró꞉kwa ne sakoʼNí꞉io Israerʼró꞉nons iáh teiówenk ní꞉i ahitewatiénawasʼte; asèken wahshonkwateniakátsʼtatshe tánon rahonhá꞉ke nonkwaʼní꞉io Dagon.”

⁸ Káti iahonwanaténieʼte tánon ashakotiʼiataró꞉rohke ratikwé꞉kon ne Roʼtiiá꞉ners ne Philistines, tánon wahonní꞉ron, “Ó꞉kwa nahitewá꞉iere ne raoneró꞉kwa ne sakoʼNí꞉io NʼIsraerʼró꞉nons?” Ne Gath nón꞉we nihatinákere wathatiriwaserá꞉ko, “Há꞉ʼo ne raoneró꞉kwa ne Ní꞉io kénʼen niekahá꞉hak tsi tewaná꞉kere.” Sók kiʼ ne raoneró꞉kwa ne sakoʼNí꞉io NʼIsraerʼró꞉nons Gath niahatíhawe.

⁹ Nok ó꞉nen shiaʼhónwe thóh nón꞉we Gath, ne raotsá꞉na ne Roiá꞉ner tsi nahatʼkónten ne kanatowanénke, ne waʼkarihónhni teiotenonianíton tsi waʼthonnonhnaríkhon; ne waʼshakoiénʼte ne ienaʼkerón꞉nion ne kanatowá꞉kenʼke, kwáh ratiʼkwé꞉kon kenʼnithotiʼiónsas ó꞉ni ne thotí꞉ions, káti nètho takwahá꞉son waʼtewaréni ne waʼotinonwakʼtháten.

¹⁰ Káti Ekron nón꞉we iahonténieʼte ne raoneró꞉kwa ne sakoʼNí꞉io NʼIsraerʼró꞉nons. Ók nó꞉nen ne raoneró꞉kwa ne Ní꞉io iahón꞉we Ekron, nonkweʼókons ne Ekron kwáh watsiakohénrete, “Nontiéren tsi ontsónhake nontahatíhawe ne raoneró꞉kwa ne sakoʼNí꞉io NʼIsraerʼró꞉nons ne kén naionkhinonwarhiákhon ó꞉ni nontsonkwetaʼókons?”

¹¹ Eʼthóhʼne iahonwahnaténieʼte tánon nashakotiʼiataróhroʼke skát꞉ne ratiʼkwé꞉kon ne Rotiʼiá꞉ners ne Philistine, tánon wahonní꞉ron, “Ionsaʼsewaténiet ne raoʼneró꞉kwa ne sakoʼNí꞉io NʼIsraerʼró꞉nons, tánon thóh ieskaʼiéntak tsi nón꞉we tionákte, nètho ne ne tó꞉sa aón꞉ton naionkwanonwahrhiákhon ó꞉ni nontsonkwetaʼókons.” Asèken ne ne kenhéiat tsi ní꞉iot tsi wahtsiaʼkaonhnarík꞉khon kwáh kaʼnatakwékon nontáweʼte ne kanatowahnénhke. Ne ratsanáke ne Ní꞉io kwáh í꞉ken tsi washakoteniakátsʼtatʼtshe neh nón꞉we.

¹² Tsi niʼiá꞉kon ne iáh teiakawenhé꞉ion ne waʼhotiʼiatórenhne takwaʼáhshon, tánon tsi nontsaró꞉ko ne kanatowanénhke iahontharátate tsik kaʼronhiáte.