1 Samuel 30 - Ohiatonhseratokénti

¹ Nó꞉nen ne Táwit tánon ne raonkwetashón꞉ʼahs iahón꞉newe ne Ziklag nasénhaton siweniserátekwe, ne Amalekró꞉nons kowánenh tsi sakotinenrénton ne Negeb ó꞉ni ne Ziklag nón꞉we. Iekonwatsatónhtion ne Ziklag, Ronatenatatékʼton,

² ó꞉ni konwatiʼié꞉nen ne konhnón꞉kwes ó꞉ni ratikwé꞉kon nètho nón꞉we niʼienákereʼkwe, tetsá꞉ron kennaiesénhnaskwe ó꞉ni naiesenhnowanénhke; iáh nenhʼné꞉eh tesakotiʼnonwarhiákhon, ók iashakotiʼiaténhawe, tánon wathontáhakwe.

³ Nó꞉nen ne Táwit tánon ne raonkwetashón꞉ʼahs iahón꞉newe ne kanatowanénhke, wahontkátho watenatatékʼkhon, tánon ne rotiniák꞉khons konnónkwe tánon ne raotiʼnekenteraʼshón꞉ʼahs ó꞉ni ne sakotiʼiohokón꞉ahs tsionatthonwísens iekonwatiʼiaténha.

⁴ Ehʼthóhʼne ne Táwit tánon nonkweʼshón꞉ʼahs ne ratikweʼkonhátie wahthotihénrete tánon wathonséntho, tsi niió꞉re iahontesatʼtenserók꞉ten tsi tehonséntʼthos.

⁵ Ne Táwit tekeniiá꞉se rotiʼiá꞉kon kwáh nonʼné꞉eh iekonwatiʼiaténha tsi konwatiʼiénen, ne ne Ahinoam ne ne Jezreelró꞉non, tánon ne Abigail ne ne ronekenʼen ne Nabal ne ne Carmelró꞉non.

⁶ Ne Táwit tsi teiotenonʼianíton tehothatenikónrahre; asèken nonkweókon iakotharákwen ahonwahnenhióiaʼke tsi ahonwanonwahrhiá꞉kon, tsió꞉riwa tsi onkweʼtakwé꞉kon tsi iakonakwénhen ne tsi wahakótonhse nakonekenterashón꞉ʼahs ó꞉ni ne sakotiʼiohokón꞉has tsionatthonwísens. Ók ne Táwit sahathaʼteshatsténseron thóh raonháke ne Roiá꞉ner Raoní꞉io.

⁷ Ne Táwit wahawénhase ne ratsihénstatsi Abiathar ne ne roién꞉ha ne Ahimelech, “Táskon thí꞉ken ionthenkweʼnorók꞉ta.” Káti ne Abiathar tahá꞉hawe ne ionthenskweʼnoróktha tahá꞉wen ne Táwit.

⁸ Ne Táwit wahorihwaʼnóntonhse ne Roiá꞉ner, “Kwáh kén akhésehre kí꞉ken ratinenhrakárias? Kwáh kén iakhenontérane tánon kwáh kén oriwihiohónwe tsi ahonsakheniá꞉kente.”

⁹ Káti ne Táwit iahá꞉re, tánon ne iáh-iak tewenhniáwe nihá꞉ti ronón꞉kwe ne skát꞉ne rónhne ne raón꞉ha, tánon iahón꞉newe tsitkaionhatátse ne Besor, thóh nón꞉we otiá꞉kes nahonthatíteron.

¹⁰ Ók kiʼ ne Táwit iahakóntakwe nenhʼné꞉eh tsi wasakó꞉sehre, raón꞉ha tánon ne kaié꞉ri tehonhnenhniáwe nihá꞉ti; tékeni tewenhniáwe nihá꞉ti onàken wahonónhniate. Só꞉tsi ronahtahkenró꞉kwenhni ne tahatiʼionhí꞉iake ne Wadi Besor.

¹¹ Thóh nón꞉we kahentáke wahonwahiatattsénri Egyptró꞉non, tánon iahonwahiaténhawe tsítres ne Táwit. Wahonwahkwáhnonte tánon watatskáon, ó꞉ni wahonwaʼnékanonte;

¹² kwáh ó꞉ni tahón꞉ion kén ní꞉wa ne tsioʼnionhwarontonhaʼkówa ká꞉ret tánon tékeni ne ionenrhiokwénton onénhare. Nó꞉nenh sharáke, sahataʼsastenhserakwahtáhko; asèken iáh thatehokskáon ne náhsen nón꞉ta niʼkaríweskwe tánon áhsen nihiokaratsheráke.

¹³ Ehʼthóhʼne ne Táwit wahawénhase, “Ón꞉ka níse akahonkwéta í꞉ken? Kaʼnón꞉we nitiséhnon?” Wahén꞉ron, “Í꞉i ne kén nitewatiónha ne Egyptró꞉non, néh rihió꞉tenhse ne Amalekró꞉non. Neh ratiatakweʼní꞉io ékʼthon thahakákʼkawe tsioríhwa tsi onkenonwák꞉ten áhsen nón꞉ta tsi ná꞉he tkènhne.

¹⁴ Iakhiʼnenhrenténhni tsi ratiʼnakeraserá꞉ien ne Cherethites ne ne entié꞉ne nokwáhti í꞉ken ne Judah tánon tsi kanakeraserá꞉ien tsi ratiʼtárá꞉ien ne Caleb, ó꞉ni wahakwatenathéntahwe ne Ziklag.”

¹⁵ Ne Táwit wahawénhase, “Kwáh iastiaʼténhaf thóh nón꞉we thí꞉ken ratinataká꞉rias kentsió꞉kwa?” Wahénron, “Takeriwanírats rahonháke ne Ní꞉io nètho ní꞉se tsi iáh taskenonwarhiá꞉khon, khéhs niaʼskatiakwahrísi rahonháke ne ratiatakweʼní꞉io, tánon kwáh kiʼ ienkonhiaténhawe tsi tón꞉nes.”

¹⁶ Nó꞉nen shiaʼhohiáthiwe, ne ratinataká꞉rias tehatihiaʼtotáhron ohontsáke, tehonatskáon tánon rotiʼnekí꞉ren tánon teotinonniákwen, tsioríhwa tsi nihiotonhiowánens rotinenskwenhá꞉tons thóh tí꞉has ne raononhontsákes ne Philistines ó꞉ni ne raononhontsákes ne Judah.

¹⁷ Ne Táwit iasakotsiatónti kwáh satontahioswát꞉thene noronkéne kwáh tsaókarawe ne thóh siwenhniserátekwe. Iáh ne sahiá꞉ta teshoniakénʼen, nék khók ne kaié꞉ri tehonhnenhniáwe niháti kén nitotiʼiónsa, ne ronónha iotiʼniakwáhere ne wahotisáten tánon wahontèko.

¹⁸ Ne Táwit akwé꞉kon saharóhroke nètho Amalekró꞉nons iohotíhahne; ó꞉ni ne Táwit shasakoniákente ne tekeniʼiá꞉se rontiniákons.

¹⁹ Iáh ohthènen tetsioʼtóktahkwe, tokàken kénk naiesénhnaske khéhs naiesenhnowanénhke, raotinenhkenterontserashón꞉ʼahs ó꞉ni ne sakotiʼiohokón꞉ahs tsionatthonwísens, nakanénskwen khéhs noiá꞉sons nahoténsons ne iekahásehron; ne Táwit akwé꞉kon thontahahásehron.

²⁰ Ne Táwit ratikwé꞉kon sashakoienenháton ne kén nikanaskwá꞉sas ó꞉ni ne kanaskowánenhs, ne ne onón꞉ha ó꞉henton wakonwanatorihá꞉tsie nonátsiakes tionnónskwarons; nonkweʼókons wahonnirónhnion, “Ne kí꞉ken ne Táwit ronenskwenhá꞉tons.”

²¹ Ehʼthóhʼne ne Táwit iasakoiatórenhne ne tekenitewenhniáwe niháti ronnón꞉kwe tsi nikáien ne shó꞉tsi teohtiwisenhéionkwe nahonwásehron ne Táwit, tánon ne ne ronónha thóh thonwanatkáwenh ne Wadi Besor. Iahónhne ne ne tahontát꞉ken ne Táwit ó꞉ni ne tahontát꞉ken nonkweʼó꞉kons tsi nikáien ne ratikweʼkonhátie ne rahón꞉ha. Nó꞉nenh ne Táwit ákta sárehte ratiʼiatákʼtion nonkweʼó꞉kons wateshakonónweron.

²² Ehʼthóhʼne ratikwé꞉kon ne ratinikonrahét꞉ken ó꞉ni ne iáh othènon tehatirihwásthas ronnón꞉kwes ne skát꞉ne rónhnes ne ronnón꞉kwes tsi niká꞉ien ronwáseron Táwit wahonní꞉ron, “Ne wakarihónhni tsi iáh í꞉i teionkwé꞉non, ní꞉i kwáh kiʼ iáh tahontahiakhíion ne kanenhskwehá꞉tons tsi nitionkwaienáon, nék khók satiʼiatáhtions ne ronnón꞉kwe enwáton niasakotiʼiaténhawe ne rotiʼniák꞉khons konhnón꞉kwe ó꞉ni ne sakotiʼioʼokón꞉ahs, tánon éhnrenh rónhnet.”

²³ Ók Táwit wahén꞉ron, “Ní꞉se kwáh iáh teiówenk neh nahisehwá꞉iereh, tewathatékens, tsi nahó꞉tens ne Roiá꞉ner teshonkwá꞉wi; raón꞉ha shonkwaiatanónsthaton tánon shonkwatiakwarishiénhni ne ratinataká꞉rias nètho tionkhiʼiatsatónhtion.

²⁴ Ón꞉ka ónh꞉te eniesatahón꞉sathate kiʼ ken naorihhóten? Asèken ne sathaʼitsawénhke tsi niká꞉ien ne thóh ién꞉henre nahaterihiósera kwáh kíʼsathenhiotónhake tsi sathentsawénhke tsi nikáien nón꞉ka ne thóh rénhteron ákta tsi iontenhninónhtha; kwáh kiʼ satenhonáwenhke.”

²⁵ Thóh wenhniseráte tsiotásawe wahaianerenhserónhni tánon tsi nenhotiʼrihoténhake NʼIsraerʼró꞉nons; shé꞉kon thóh nikarihóten nón꞉wa wenhniseráte.

²⁶ Nó꞉nen ne Táwit shiahárawe thóh nón꞉we Ziklag, iasakoteniéten wateshakokháshiaʼse ne kanenhskwenháton ne raoteroserashón꞉ʼahs, ne ne thotí꞉ions ne Judah, “Ratón꞉nions kén í꞉ken nathatawítseras sewarihwáke thóh nitsiawʼénon ne rotinenhskwenháton ne ronwasóns Roiá꞉ner”;

²⁷ ne ne ronón꞉ha thóh nón꞉we nihatinákere Bethel, thóh nón꞉we Ramoth ne ne Negeb nón꞉we, thóh nón꞉we Jattir,

²⁸ thóh nón꞉we Aroer, thóh nón꞉we Siphmoth, thóh nón꞉we Eshtemoa,

²⁹ thóh nón꞉we Racal, thóhh kanátakons ne Jerahmeelites, thóh kanátakons ne Kenites,

³⁰ thóh nón꞉we Hormah, thóh nón꞉we Athach,

³¹ thóh nón꞉we Hebron, atenathakwékons tsi nonwésons ne Táwit tánon ne raonkweʼtashón꞉ʼahs teonatstikáfen.