1 Samuel 25 - Ohiatonhseratokénti

Tsi Warénheʼie Ne Samuel

¹ Ó꞉nen ne Samuel warénheʼie; tánon kanahkeraserakwéʼkon Israerʼronónke wahonnitsowahróhroʼke tánon wahonwatiónhnionhse ne raón꞉ha. Wahontsáhate ne raoierón꞉ta thóh raononsatʼta ne Ramah nón꞉we.

² Thóh nón꞉we ne Maon rón꞉kwe nihanákerehkwe, thóh neh nón꞉we thahontsaién꞉tahkwe ne Carmel nón꞉we. Nètho rón꞉kwe kwáh í꞉ken tsi rokwahtsekwe; áhsen tewenhniawehetseráhsen ronaskwaién꞉tahkwe teiotinakarontón꞉ʼa ó꞉ni kaiatákeras. Shakohʼnonwé꞉riakskwe ne teiotinakarontón꞉ʼa thóh nón꞉we Carmel.

³ Nón꞉wa tsi nihoʼsenhnóten kí꞉ken rón꞉kwe ne ne Nabal, tánon tsi nihiakoʼsenhnóten ne ró꞉ne Abigail. Nètho iónkwe kwáh í꞉ken tsi watenikonratʼtókha tánon watkatoʼtserí꞉io, ók ne rón꞉kwe kwáh neh í꞉ken tsi ratonkweténtoʼre tánon raniakátste; ne raónha ne ne Calebite nahahiatóten.

⁴ Ne Táwit iaharihwáronke thóh iahonwenhtsatténhake nètho Nabal tsi sakononwéraks ne raotshenenhó꞉kons teiotinakarontón꞉ʼa.

⁵ Káti ne Táwit iasakoténiete oié꞉ri nihá꞉ti nithotiʼiósha; tánon ne Táwit wahshakawénhase ne kén nithotiʼiósha, “Wáhs thóh iahá꞉sewe Carmel, tánon thóh iahá꞉sewe tsi thénteron ne Nabal, tánon tetsisewanón꞉weron í꞉ih aksén꞉nakon.

⁶ Ní꞉se kwáh tetsenenhtsakarénhron: ‘Skénnon kénhak ne shonháke, ó꞉ni ne sanónskon, ó꞉ni kwáh skénnon kénʼhak kwáh akwé꞉kon tsi nisá꞉ien.

⁷ Wakerihwáhronhke ní꞉se tsi ietsiniakwé꞉niaks ne tiʼiotinakarontón꞉ʼas; kiʼ ne shonkwetaʼshón꞉ʼahs sakontinikónrareh tsi skát꞉ne iákwesʼkwe, tánon iáh kiʼ othènon teiakhikarehwáton, tánon iáh othènon tethonatokʼtáhni, tsi nikaríweskwe Carmel iehónneskwe.

⁸ Sheʼriwanóntons ne kén nithotiʼiónsa, tánon kwáh eniesaró꞉ri. Ne káti aoríhwa ietsirí꞉hon nakonkweʼtashón꞉ʼahs kén nithotiʼiónshas nahotiʼianerenhseriʼióhake ne sahén꞉ton; asèken tsi wahákwahwe kwáh í꞉ken tsi wenhniserí꞉io nonkwahriwáke. Ahshathóntahte tashé꞉ion tsi nahisaién꞉tahke ne sanhatsheraʼókons ó꞉ni ne etʼtshièn꞉ʼa Táwit.’”

⁹ Nó꞉nenh ne Táwit raonkwetashón꞉ʼahs kén nithotiʼiónsas wahón꞉newe, akwé꞉kon kí꞉ken wahonwaró꞉ri ne Nabal thóh raosénhnakon ne Táwit; tánon ehʼthóhʼne ó꞉nenh wahonterárahte.

¹⁰ Ók ne Nabal watesakoriwaserákwahse ne Táwit raonkweʼtashón꞉ʼahs, “Ónhka nènhne ne Táwit? Ónhka ne ne roién꞉ha ne Jesse? Kwáh í꞉ken tsi ronatiokowánen ne ratinhá꞉tsheras nón꞉wa wenhniseraténion ró꞉nonha ne sakonatsá꞉tonhtakwenhnis ne rowatiiá꞉takwení꞉ios.

¹¹ Kwáh kiʼ iénkhawe nakenátaro ó꞉ni naknéka ó꞉ni nowáron nètho khehiasóhons ne sakotiʼniakwériaks raotirihwáke, tánon ne entekhéion ne ronhnón꞉kwe ne ró꞉ti ne iáh tewakateriéntareh kanón꞉we nithoʼnénon?”

¹² Káti ne Táwit raonkweʼtashón꞉ahs kén nithotiʼiónsas tonsahontkarahténi, tánon tontahonhkéte ó꞉ni sahonwaró꞉ri akwékon kí꞉ken.

¹³ Ne Táwit wasakawénhase ne raonkweʼtashón꞉ʼahs, “Kwáh tsi nihá꞉ti ne ronnón꞉kwe rontsiatának ne raonasarehkó꞉wa!” Tánon kwáh kiʼ tsi niaʼteionkwétake tsi neh wahontsatanákʼkon ne raonasarehkó꞉wa; Táwit ó꞉ni ne wahatsatáhnake ne raosarehkówa; tánon kák nón꞉ne kaié꞉ri tehonhnénhniawe wahón꞉ne ne Táwit, ók tekeni tehonhnénhniawe niháti wahonathátere nahontenhnikonráhren ne raotiriéna.

¹⁴ Ók saiáta ne kenhnithoniónha wahaʼró꞉ri ne Abigail, ne ne Nabal ró꞉ne, “Ne Táwit iashakotóri ratirihwakarénies thóh nontahónhne iahonwenhtsatʼténhake ne ne tahonwanenhtsaʼkarénhron ne shonkwahiatakweʼní꞉io; tánon ne raónha wathohénrehte tsi nasakokenrenhserónhni ne ró꞉nonha.

¹⁵ Tseská꞉te ne ronnónkwe tsi niʼioiá꞉nere tsi nahonkhiʼiatiérase, tánon iáh othènon tehionkwatkarehwáton, tánon kwáh iáh othènon tetsionkwatók꞉tahni nó꞉nen kahentáhke sehiákwes, tsi nikaríwes ne ronónha iakwahkwekonhátieskwe;

¹⁶ ronón꞉ha nonkwasónhtha wahonthatónhni ne tsi niwasón꞉teskwe ó꞉ni ne tsi niwenhnísereskwe, kwáh thóh ná꞉he iakhinikonráhraʼkwe ne teiotinakarontón꞉ʼa.

¹⁷ Ó꞉nen kiʼ thóh nón꞉we naisateréntahrak kí꞉ken tánon tetsatóret onkwanáshiere; asèken ne kariwahét꞉ken teioiatoréhton tsi nòkwah ne shonkwaiataʼkwení꞉io tánon tsi nòkwah nakwé꞉kon tsi rononshó꞉tons; ne raónha tsi nironkweʼtahétken nètho iáh ónka tewátons ne tanitháren.”

¹⁸ Eʼthó꞉ne ne Abigail watsiosterí꞉hen tánon iakanatarénhawe tékeni tewenhniáwe nikanatahrá꞉kes, tekatshétahkes otsítsa, wísk nikontiʼiá꞉tahkes teiotinakarontón꞉ʼa ne ne ó꞉nenh konwahnatsóhon, tekawinotsheráke ne wathenénhonte, énska tewenhniáwe ní꞉kons ne ionorhiokwentónhnions onénharas, tánon tékeniʼtewenhniáwe nikanatará꞉kes ne watenatahrón꞉tes tsionionwarontonhakówa. Thóh wahakorieʼniónhnien ratiʼiá꞉tahkes ne teonhóntons

¹⁹ tánon wahawenhá꞉se ne kén nithoʼiónha ranhá꞉tshera, “Wáhs akʼkénton niaháse; Í꞉i enkón꞉sehre,” Ók iáh neh tehoró꞉ri ne ró꞉ne Nabal.

²⁰ Tsi niahosáten ne tehahóntes tánon iahonhnontástsnenhte nahonráhkwahkon tsi ionontáhere, tánon thóh nonʼné꞉e ne Táwit tánon ne raokwetaʼshón꞉ahs tahonahnontasnentonhátie tsi nonhtahiawenonhátie; tánon nahón꞉ha watonhtérahne ne ronón꞉ha.

²¹ Nón꞉wa ne Táwit rá꞉wen, “Oriwiʼiohónwe tsi kwáh sèh iáh othènon tekéntonskwe nètho tsi wakenónsthaton akwé꞉kon nètho kí꞉ken rón꞉kwe raoientáhtseras thóh tsi iahonwenhtsaténhake, káti kwáh iáh othénon tehiotónhon akwé꞉kon tsi nahowénhake ne raónha; ók ne raónha ne ne sahatkarhiákʼten ne karihwahetkénsera tsi ní꞉ioht nahioiá꞉nerehke.

²² Ne Ní꞉io thóh nisakoiéras ne Táwit ronwásons tánon kwáh ó꞉ni í꞉sinonh tsi nahiáwenhne, tó꞉kaʼ tsi ieniórenhne iahón꞉kenhʼre thóh nahonahtsió꞉kwasʼke tsi ní꞉ioht ne tionkwé꞉ta ne ratikwé꞉kon ne rotiskenrakéte ne raónha raonkwetashón꞉ahs.”

²³ Nó꞉nen ne Abigail sahonwáhken ne Táwit, wahtiosteríhen tánon shóntsnenhte tsi iosaténhtsiene ne tewahóntes, raohén꞉ton wakaiatahiéntahne ne Táwit tsakakonshótane, tewattsatʼtenhátons ohontsá꞉ke.

²⁴ Rashitáke iakahiatié꞉nenhne tánon wakénron, “Taskéras akonwáhakhok, atiá꞉ner, ne kaní꞉kon; satón꞉tak sheríhon ne sanhá꞉tshera wathá꞉ti ne shonháke, tánon satahón꞉satat naowenhnaókons ne sanhá꞉tshera.

²⁵ Atiá꞉ner tó꞉sa tatseriwásnies kí꞉ken ranikonrahét꞉ken saoiéren rón꞉kwe, Nabal; asèken tsi nihosenhnóten, thóh kiʼ niʼionkweʼtóten; tánon tehotenonwaroríhtonte; ók ní꞉i, ne sanhá꞉tshera, iáh tehí꞉ken ne kén nithoiónha ne Natiá꞉ner raonkwé꞉ta, tsi rahón꞉ʼa ietsiatórion.

²⁶ Nón꞉was eʼthóhʼne, atiá꞉ner, tsi kiʼ nirón꞉nhe ne Roiá꞉ner, ó꞉ni ní꞉se tsi nishón꞉nhe, tsiksén꞉hak ne Roiá꞉ner wahiá꞉nese ní꞉se ne tó꞉sa ahisánike tsi ashenekwátʼte tánon tsi ahonsatskárhiake ne kwáh ní꞉se shatshanáke, ó꞉nenh kiʼ sheríhon ne iesáshons ó꞉ni tsi nihiá꞉kon ne ne ronhnésaks ne karihwahét꞉ken tsi nahonwatiérase natiá꞉ner kwáh tsi ní꞉ioht ne Nabal.

²⁷ Tánon nón꞉wa sheríhon ne kénʼen sanhá꞉tshera ne tahohawíten natiá꞉ner neh kiʼ thón꞉ion ne kén nithoʼiónha rónkwe tsi niʼkáien rononteráhtie natiá꞉ner.

²⁸ Ahsatthontátʼtsheke shasanikónren tsi natahioterenhtawehriéhon ne sanhá꞉tshera; asèken ne Roiá꞉ner kwáh oriwihiohónwe tsi enhianontí꞉ioste ní꞉se, ó꞉ni tsi waswatsiratátie, asèken í꞉se saterí꞉io ne raoterihiósera; tánon ne kariwahatkénsera iáh tahkattsiénronhke ne shonháke kwáh tsi nikarí꞉wes enshón꞉nheke.

²⁹ Tó꞉ka ónhka shí꞉ken tahontahiétahne naiesá꞉sehre tánon nahonnésake ne tsi shón꞉nhe, ne tsi rón꞉nhe natiá꞉ner kwáh kiʼ enkawánerenhke ne ostó꞉kwah tsi ronón꞉nhe ne enhatenhnikonráhren ne Roiá꞉ner Saní꞉io; ók ne tsi ronón꞉nhe ne iesáswens ne raónha kwáh kiʼ iensakoiatónhti sén꞉ha enhiosháststeke tsi ní꞉ioht ne iehiakonenhʼietiontáhkwah.

³⁰ Nó꞉nen ne Roiá꞉ner tho nihoiéren tsi nòkwah natiá꞉ner ne tahioianénhawe akwé꞉kon ne ioiá꞉nere nètho tsi nihothátiʼon ní꞉se sarihwá꞉ke, tánon í꞉se iahiatahráhkwen nasenhéntense Israerʼronónke,

³¹ natiá꞉ner kwáh iáh othènon takarihónhni nahonikonrák꞉sen, khéhs ne tahowehestá꞉nion rawerhiá꞉ne, ne tsi wahanékwah ne iáh othènon tetsiorihonhníhon khéhs ne tsi shotahteniakénton ne iatehahiáti. Tánon nó꞉nen ioiá꞉nereh tsi teoriwásnieʼse natiá꞉ner, ehʼthóhʼne kiʼ satseiá꞉rah ne sanhá꞉tshera.”

³² Ne Táwit warénhaʼse ne Abigail, “Tehonwanonweráton ne Roiá꞉ner ne sakoʼNí꞉io Nisraerʼronónke, tsi raón꞉ha se taiató꞉ri ne tahitsatátʼken nón꞉wa wenhniseráte!

³³ Tehinonwerá꞉tons ne Ní꞉io ní꞉se sarihwáke ó꞉ni tsi niwatʼtokhatserí꞉io ní꞉se washotási, raón꞉ha wahatiatanónsthate nón꞉wa wenhniseráte tsi nòkwah ne karihwáksen sewateriwahtewáton ó꞉ni tó꞉sa í꞉i akathatenikonraʼiériʼte ne í꞉i katshanáke ákatste!

³⁴ Asèken tsi niʼioriwí꞉io ne Roiá꞉ner ne sakoʼNí꞉io NÍsraerʼronónke tsi nirón꞉nhe, raón꞉ha watát꞉taste ní꞉i nakonkaréwate, nék khók tokàken watisasteríhen ne tahiʼtiatátʼken, oriwí꞉io tsi nienhió꞉renhne kwáh iáh ne saiá꞉ta roskenrakéte tsatahonsahontonkwetaʼténhronke ne Nabal.”

³⁵ Eʼthóhʼne kiʼ ne Táwit wahaiéna tsi nontaháwen nathatawítshera ne thohawiténhni; warénhase, “Tsi tisanón꞉shote nionsáse kwáh skénnonk tiʼkénhak; satkátho, wakatahonsatáte ne sawenhnaókon, tánon thóh nenhtié꞉re tsi kiʼ niserihwanóntons.”

³⁶ Ne Abigail iahón꞉we tsi thohʼnón꞉shote ne Nabal; thóh kakennió꞉tahkwe ne tsi ronhnón꞉shote, tsi shí꞉ken ní꞉ioht ne ronnontí꞉io rotenhniote. Ne Nabal tsi nahawerientí꞉io, asèken kwáh í꞉ken tsi ronekátahkwe; káti kwáh iáh othènon tehoró꞉ri tsit iahó꞉renhne.

³⁷ Shiʼioronhkéne, nó꞉nenh ne Nabal notsítsa shiʼshotnekokéwen, ne ró꞉ne wahoró꞉ri kiʼ ken oriwashón꞉ʼahs, tánon raweriá꞉ne watókwahte; thóh nahoiátahwen tsi ní꞉ioht nonénhʼia.

³⁸ Kakʼnón ne oié꞉ri nón꞉ta onakénhke ne Roiá꞉ner wahononwariá꞉khon ne Nabal.

³⁹ Nó꞉nen ne Táwit saharihwáronke nètho Nabal tsi rawenhé꞉ion, wahén꞉ron. “Tehonwanonweráton ne Roiá꞉ner tsi raónha seh ionshahárehke ne kanikonrakarewátshera tsi niwatienáon ne thóh ratshanáke ne Nabal, tánon ní꞉i éhren wahatiatenháwiʼte tsi nòkwah ne kariwahetkénseraʼne Roiá꞉ner tonsahakarahténi ne kariwahetkénsera tsi nihoieránion ne Nabal ne iatehaiáti.” Eʼthóhʼne ó꞉nen ne Táwit iahaténiete tánon washakótatʼtse ne Abigail, nahotíniaʼke.

⁴⁰ Nó꞉nen ne Táwit raonhatserasónhas iakonwaiatórenhne ne Abigail ne Carmel nón꞉we, wakonwénhase, “Ne Táwit shonkwatorihátie nisèke niahonsakwaiaténhawe ní꞉se ne nahiseníniake.”

⁴¹ Wakʼkátahne tánon watewatiá꞉kete, tiakakonshó꞉tahne nohontsáke, tánon wakén꞉ron, “Ne sanhá꞉tsera kwáh kanáskwah í꞉ken ne naiakositóhare ne raonhatserashón꞉ʼahs natiá꞉ner.”

⁴² Abigail watkátahne kasterí꞉henke tánon tewahóntes wahosáten tsi niaháhe; wísk nikón꞉ti nahonhatserasón꞉has konwahiatahnonʼnátie. Ne iakononteráhtie ne Táwit ronwarihwakareniénhnis tánon ne ró꞉ne iahón꞉ton.

⁴³ Ne Táwit kwáh nón꞉ne eh wahotíniake ne Ahinoam ne ne Jezreelró꞉non; tekenitsá꞉ron raón꞉ha wahotíniake.

⁴⁴ Ne Saul ieshakokʼkáwen ne sakoién꞉ha Michal, ne ne Táwit rotiniákonhne, ne sahotíniake ne Palti ne ne roʼníha ne Laish, ne ne Gallimró꞉non.