1 Samuel 23 - Ohiatonhseratokénti

Táwit Wahanónsthate Ne Kanatowanénke Ne Keilah

¹ Ó꞉nenh waonwahró꞉ri ne Táwit, “Ne Philistiaró꞉nons ronaterí꞉io iekonwahtsiatónhtion Keilah, tánon ratinahtsanenskwenhátons ne tsi iethetáhkwah kénskaron.”

² Ne Táwit wahorihwanóntonhse ne Roiá꞉ner, “Kwáh kén iá꞉ke tánon iakheiaʼtiatónhti kí꞉ken Philistiaró꞉nons?” Ne Roiá꞉ner wahawénhaʼse ne Táwit, “Wáhs tánon iasehiaʼtiatónhti ne Philistiaró꞉nons tánon sehnónstat ne Keilah.”

³ Ók ne Táwit raonkweʼtashón꞉ʼahs wahonwénhase, “Satkátho, ionkwáhterons kiʼkénʼen Judah nón꞉we; tóh ní꞉ioht tsi sénha tó꞉kaʼ thóh ieniákwe Keilah naiakhiʼiatkónhten ne ronterí꞉ios ne Philistiaró꞉nons?”

⁴ Eʼthóhʼne kiʼ ne Táwit shé꞉kon sahoriwahnóntonse ne Roiá꞉ner. Ne Roiá꞉ner watorihwaserákwahse, “Hén, wáhs thóh iahá꞉se Keilah; asèken ne Philistiaró꞉nons thóh shasanáhke iekheiát꞉kaʼwe.”

⁵ Káti ne Táwit tánon ne raonkweʼtahshón꞉ahs iahón꞉ne Keilah, wahonterí꞉io ne Philistiaró꞉nons, tashakotiʼiatenháseron ne raotiʼtshenenhókons, tánon thóh nahonwahtiʼiérase ne kwáh í꞉ken tsi wahonwatisénhni. Thó꞉ne kiʼ ne Táwit shasakoniákente ne Keilah nón꞉we nihatináhkere.

⁶ Nó꞉nenh ne Abiathar ne ne roní꞉ha ne Ahimelech iehoniakénhen tsi tenterón ne Táwit thóh nón꞉we Keilah, tsi iahá꞉rawe neh rahá꞉wine nateniʼiónhta.

⁷ Nón꞉wa ó꞉nen shiʼonwaró꞉ri ne Saul nètho Táwit tsi í꞉ro Keilah. Tánon ne Saul wahén꞉ron, “Ne Ní꞉io thóh rotkáwen kahtshanáhke; asèken thóh rothatenó꞉ton tsi niahanahtárane ne ne iotenhenrakaróntons tánon tekaristarenhwáhnions”

⁸ Ne Saul iasakonónkʼkhon ratikwé꞉kon nonkweʼó꞉kons nahón꞉terí꞉io, thóh niahón꞉ne Keilah, ne nahonwaiéna Táwit tánon ne raonkweʼtashón꞉ʼahs.

⁹ Nó꞉nenh ne Táwit saharihwáronhke nètho Saul tsi roteristahientáhtsies ne karihwahetkénhsera tsi nó꞉kwah ne raón꞉ha, wahawénhase ne ratsihénstatsi Abiathar, “Tasáf tí꞉ken ateniʼiónta kénʼen.”

¹⁰ Ne Táwit wahén꞉ron, “Ó Saiá꞉ner, ne Sení꞉io ne Israeronónke, ii wakathontèhon nètho Saul ratenikonrón꞉nis ne thoiare ne Keilah, ne nahá꞉tonte ne kanatowanénhke ní꞉i akerihónhni.

¹¹ Tánon ó꞉nenh kwáh, kwáh ne ronhnón꞉kwe ienhionkatiakwahríhsi ne rontsanáke? Kwáh ken ne Saul éntʼre tsi niwakhathonteon? Ó Saiá꞉ner, ne Sení꞉io Israeronónke, Wakonianiténhtase, sró꞉ri ne sanhá꞉tsera.” Ne Roiá꞉ner wahén꞉ron, “Ne raónha kwáh éntʼre.”

¹² Eʼthó꞉ne ne Táwit wahén꞉ron, “Kwáh kén ne ronnón꞉kwe ne Keilah enhionkatiakwarísi ó꞉ni nakonkwetashón꞉ʼahs thóh rahtshanáke ne Saul?” Ne Roiá꞉ner wahén꞉ron, “Kwáh ní꞉se enieshatsakwahrísi.”

¹³ Eʼthóhʼne ne Táwit wasakawénhase ne raonkwetashón꞉ʼah, ne ne kák꞉non ne iáh-iak tewenhniá꞉we niháti, óksak éhren sahón꞉nete ne Keilah nón꞉we; wahotinatenhawí꞉son kwáh tsi nón꞉we nenhwá꞉ton niahón꞉ne. Nó꞉nen ne Saul shahoró꞉ri ne Táwit tsi shoniakénʼen ne Keilah, wahanikonrók꞉ten nahó꞉sehre.

¹⁴ Ne Táwit thóh wahatahtíteron tsi ionhniarón꞉nion kanakeraseráien ne iahonwentsathénhake thóh nón꞉we ne Ziph. Ne Saul kwáh niaʼtewenhniseráke tsi wahoiatisáke, ók ne Roiá꞉ner iáh kíʼnenh néʼeh thethó꞉wi ne ratshaʼnàke.

¹⁵ Ne Táwit thóh neh renhterón꞉tahkwe ne iahonwenhtsathénhaʼke ne Ziph nón꞉we ákta ne Horesh nó꞉nenh saharihwáronhke nètho Saul tsi thawénon réhsaks ne tsi rónnhe.

¹⁶ Tánon ne Jonathan ne ne Saul roiénha, wathá꞉tahne, tánon thóh wárete tsi thonón꞉shote ne Táwit ne ne Horesh nón꞉we, tánon thóh nón꞉we iahonikonráhreke ne tsi wahashátstenhne ne rahwetakwáhtshera raonháke ne Ní꞉io.

¹⁷ Ne Jonathan wahawénhase, “Tó꞉sa saterón꞉sek; asèken ne rakení꞉ha Saul kwáh ne iáh tsatahianiʼsnónsaren kwáh iáh tahiaiatatshénri; ní꞉se kwáh kiʼ ensatenontí꞉ioste NÍsraerʼronónke, tánon í꞉i ne tekení꞉haton tsi nenhtewakakʼtsenhnáteke ne shón꞉hake; ne rakení꞉ha Saul kwáh ó꞉ni roteriéntare kí꞉ken tsi tho ní꞉ioht.”

¹⁸ Eʼthóhʼne kiʼ tenitsá꞉ron wahiatsanerenhserísa raosén꞉nakon ne Roiá꞉ner; Ne Táwit thóh nenhné꞉ʼeh rahná꞉kerehkwe ne Horesh nón꞉we, ók ne Jonathan sahaténhti nenhʼnéʼeh.

¹⁹ Eʼthóhʼne thóh kaʼniháti ne Ziphró꞉nons hiahónhne tsi tonón꞉shote ne Saul ne ne Gibeah nón꞉we tánon wahonníron, “Ne Táwit rotashetonháties tsi nón꞉we nihiakwahná꞉kere thóh tsi iahonwenhtsathénhake ne Horesh nón꞉we, thóh tsi ionhnontahrónhnions ne Hachilah, ne ne entié꞉ne nokwáhti ne Jeshimon.

²⁰ Ó꞉nenh sanontí꞉io, kát꞉kek tsi nensaská꞉neke nahontáhse kénʼen, thóh kiʼ niʼiá꞉wenh; tánon ní꞉i tsi nenhiakwáhieʼre iensakwahtsakwarísi rahonháke ne ronnontí꞉io.”

²¹ Ne Saul wahén꞉ron, “Aiá꞉wenhs ní꞉se ahiaiathatériste ne Roiá꞉nerne tsi washé꞉neste tsi wateskahró꞉ton!

²² Wáhs tánon kwáh shé꞉kon ioriwí꞉iok sashón꞉ʼni; sheriwí꞉sak naioriwí꞉ioke kanón꞉we ní꞉res, tánon ón꞉ka ahonwákenhke neh nón꞉we; asèken iontʼró꞉ri tsi kwáh í꞉ken raʼnikonraweién꞉honh ne thènen ahatenikonrón꞉ni.

²³ Tesatkathónhnionf tánon saterientáhrak akwé꞉kon tsi nonwésons nihatahsehtá꞉kwah, tánon tontáhse akonháke ne ne kwáh oriwí꞉io asehrihwenháwi. Eʼthóhʼne í꞉se skát꞉ne nienhén꞉tene; tánon tohkáha thóh í꞉res kanakeraserákon, kwáh í꞉ih enhihiatísake tsi ienákere ne tewenhniawehetserásen nihiá꞉kon ne Judah nón꞉we.”

²⁴ Káti tahontáhsawen thóh nionsahón꞉ne Ziph ne ohén꞉ton rónhne tsi ní꞉ioht ne Saul. Ne Táwit tánon ne raonkwetashón꞉ʼahs thóh ne nón꞉we nihón꞉neskwe tsi iahontsawénhthake ne Maon, tho nón꞉we ne Arabah ne nenhtié꞉ne nokwáhti ne Jeshimon.

²⁵ Ne Saul tánon ne raonkwetashón꞉ahs iahón꞉ne nahonwahiatisákha, Nó꞉nenh ne Táwit sahonwahró꞉ri, otstenró꞉kon iahatoró꞉ke tánon thóh wahatierónhniate tsi iahonwentsathénhake ne Maon. Nó꞉nen ne Saul sahariwáronke nètho, wahó꞉sehre ne Táwit tsi iahonwentsiatʼthenke ne Maon.

²⁶ Ne Saul tsionontahkaráti neh nokwáhti niahá꞉re, tánon ne Táwit tánon ne raonkwetashón꞉ʼahs í꞉seh neh nahonontáhti nokwáhti niahónhne. Ne Táwit tehosteríhens nahotèkwahse ne Saul, thóh neh ná꞉he ne Saul tánon ne raonkwetashón꞉ʼahs ákta ronetonhátsie tsi nón꞉we ní꞉res ne Táwit tánon ne raonkwetashón꞉ʼahs neh nahonwahiéna.

²⁷ Ehthóhʼne rariwakakéʼnies wahoiatórenhne ne Saul, ratón꞉nions, “Tesasterí꞉hen tánon tá꞉se; asèken ne Philistiaró꞉nons wahatinénhrenhte tsi kanakerasehráien.”

²⁸ Káti ne Saul wahát꞉kawe tsi roseré꞉ne ne Táwit, tánon iasakotiatónhti ne Philistiaró꞉nons; káti neh thóh nón꞉we ne konwasenhnáwi Teionontahkháshion.

²⁹ Ne Táwit eʼthóhʼne ó꞉nenh thóh nón꞉we niahá꞉re tsi tewatonhón꞉tsaien En-gedi.