1 Samuel 22 - Ohiatonhseratokénti

¹ Ne Táwit éhʼren tontáhrehte neh nón꞉we tánon thóh nón꞉we iahatekwáhsen tsi tsostenrakáronte ne Adullam; nó꞉nen ne sakotsihokónʼahs tánon ratikwé꞉kon ne roní꞉ha raonónskon sahatirihwaronkánion, thóh niahón꞉ne tsítres.

² Onhkweʼtakwé꞉kon ne teiakonikónrahre, ó꞉ni ne iakotkarótons, tánon onhkwetahkwékon ne iáh konnáksen wahonnitsokwahróhroʼke rahiatákʼta; tánon raónha washakohéntenhse. Tsi niʼiá꞉kon ne wahatikwé꞉khahne kák꞉non ne kaiè꞉ri tewenhniá꞉we ní꞉hati.

³ Ne Táwit thóh nón꞉we tahaténhnti Mizpeh niaʼháre ne ne Moab nón꞉we. Ne raónha wahawénhase ne thóh nontí꞉io ne Moab, “Ahsatontáhtsheke sheríhon ne rakeníha ó꞉ni nakenistén꞉ha nahontáhne shonháke, tsi niʼió꞉re ienwakateriéntarahne onhnahó꞉ten ne Ní꞉io ónh kwáh nenhá꞉iere nakerihwáke.”

⁴ Toktahsakótʼká꞉we skát꞉ne ne ronnontí꞉io ne Moab, tánon thóh ratiʼterónhtahkwe skát꞉ne ne raónha kwáh tsi nikaríwes ne Táwit thóh ienhenterónhtahkwe tsi tsostenrakáronte.

⁵ Eʼthóhʼne ne rotó꞉kense Gad wahawénhase ne Táwit, “Tó꞉sa kénʼen tsi otstenrakáronhte tsiterón꞉tak; shaʼtiákenk, tánon thóh niaʼháse tsi tsohontsáien ne Judah.” Káti ne Táwit éhren sárehte, tánon thóh iathaʼterawéheste ne Hereth nón꞉we.

⁶ Nón꞉wa ne Saul wahothóntene nètho Táwit tsi wahonwarihwatsénhri, ó꞉ni ne ronhnón꞉kwe ne ratikwekonhátieskwe ne raón꞉á. Ne Saul thóh renskó꞉tahkwe ne Gibeah nón꞉we, ná꞉kon tsi iorón꞉tote ne Tamarisk oh notoharahkéniaʼte tsi ionhniá꞉here, ne rahá꞉we ne raoshí꞉kwahra, tánon ratikwé꞉kon ne raonhatserashón꞉ahs ronhnéton rahiatákʼta.

⁷ Ne Saul washakawénhase ne raonhatseraʼshón꞉ʼahs ne thóh ronhnéton rahiatákʼta, “Sewatahón꞉satat káti ó꞉nenh, í꞉se ne Benjaminró꞉nons nisewahiaʼtótens; kwáh kén ne roién꞉ha ne Jesse entetsítions ne tsi sewahiatátʼtsions ne kahéntas ó꞉ni ne kanenharahientʼthóserons, kwáh kén rahón꞉a ne entsitiónhni sewakwé꞉kon aiatsiʼiasaríhne ne wé꞉so wenhniawehetserásens ó꞉ni ne tewenhniawehé꞉kons nihá꞉ti ronterí꞉ios?

⁸ Neh káti kén aorí꞉wa sewakwé꞉kon wesewateristakéron naskwatʼkónten? Kwáh iáh ón꞉ka tehionkró꞉ris nó꞉nen ne riʼién꞉a entíaʼténroʼwe skát꞉ne ne roʼiénha Jesse, iáh ónka tsi nítsion nahiʼsewathateriwastaníheʼke nakerihwáke khéhs nahionkanontónhnionwe nètho riʼién꞉a tsi washaʼkotsirónhnien nakehatseraʼókons nahionkatkónten, nahontsatahkéron ahonteráhraʼte, tsi kiʼ nón꞉wa nihoierenhátie nón꞉wa wenhniseráte.”

⁹ Doeg ne ne Edomró꞉non, raónha tesakoniarotahrónhne ne Saul raonhatserashón꞉ahs, tsi watharihwaseráko, “Rí꞉ken ne roʼiénha Jesse tsi nontahawenonhátiene ne Nob nón꞉we, thóh niahawenonhátie tsi thénhteron ne Ahimelech ne ne roní꞉ha ne Ahitub;

¹⁰ ne Ahimelech wahoriwanóntonhse ne Roiá꞉ner ne Táwit raorihwáke, wahokwáhnonte, tánon tahá꞉wenh ne raosarekówah ne Goliath ne Philistiaró꞉non.”

¹¹ Ne ronnontí꞉io iahó꞉nonhke ne ratsihénstatsi Ahimelech ne ne roní꞉ha ne Ahitub tánon ratikwé꞉kon ne raoʼnónskon ne roní꞉ha, ne ratiʼtsihénstatsis ne thóh nón꞉we rónhneskwe ne Nob; tánon ratikwé꞉kon tahón꞉ne tsi ronónshoʼte ne ronnontí꞉io.

¹² Saul wahén꞉ron, “Satahón꞉satat ó꞉nenh, ne iaién꞉ha Ahitub.” Ne raónha watahriwaserá꞉ko, “Kénʼen í꞉kes, Atiá꞉ner.”

¹³ Ne Saul wahawénhaʼse, “Nontiéren ní꞉se tsi takaterístaiens naskatkónten, í꞉se tánon ne Jesse roʼiénha, ne tsi táhtsion ne kanátahro ó꞉ni nasarehkó꞉wa, tánon tsi watserihwaién꞉hase ne Ní꞉io raorihwáke, káti nètho tsi wahakatkónhten, tsi wahtatrakwénhtaroh tsi wahaterárate, tsi kiʼ nón꞉wa nahá꞉iere nón꞉wah wenhniseráte?”

¹⁴ Eʼthó꞉ne kiʼ ne Ahimelech watorihwaʼserákwahse ne ronnontí꞉io, “Ónh꞉ka ne ratiʼkwé꞉kon tsi nihá꞉ti shonkwétaien thóh nahorihwatokénhake tsi ní꞉ioht ne Táwit? Raónha ne ronnontí꞉io rawenónhsa í꞉ken, tánon iostó꞉reh tsi watatkarahténi ne ne ahaterihwaténtiaʼte taiaién꞉hase, tánon tsi nihonwakweniénsta ne sanónskon.

¹⁵ Ón꞉wa kénk wenhniseráte nètho ahirihwanontón꞉se ne Ní꞉io ne raónha raoriwáke? Kwáh iáh othènon! Tó꞉sa tserí꞉hon ne ronnontí꞉io ne thènen ahontahakerá꞉se khéhs ne ónkak ne ratiʼiátahre ne rakeʼníha raonónskon; asèken nii iáh othènen tewakaterientárakwe norihwaʼkwékon kí꞉kens, ne naiawetowahnénhke khéhs kénk nahkonhá꞉ke.”

¹⁶ Ne ronnontí꞉io wahén꞉ron, “Ní꞉se kwáh oriwiʼiohónwe tsi ensí꞉heʼie, Ahimelech, í꞉se tánon ratikwé꞉kon ne ianí꞉ha raonónskon ratíteron.”

¹⁷ Ne ronnontí꞉io wahawénhaʼse ne roiatanónhne ne raiatákʼta í꞉reskwe, “Tesatkarahténi tánon sehnonwahriakhónhnion ne raotsihénstatsis ne Roiá꞉ner, tsioríhwa tsi Táwit nòkwahti thotirihwaʼrákwen; ronateriéntahraʼkwe nètho tsi rotékwen, tánon iáh tehiontʼróri.” Ók ne ratinhá꞉tseras iáh teonanenhtsakétskwen niahonwahnatsaʼtónhti ne raotsihénstatsis ne Roiá꞉ner.

¹⁸ Eʼthóhʼne ne ronnontí꞉io wahawénhase ne Doeg, “Ní꞉se, Doeg, tesatʼkaraténi tánon iasehiatsaʼtónhti ne ratitsihénstatsis.” Ne Doeg ne ne Edomró꞉non watatkaraténi tánon iashaʼkotsatónhti ne ratitsihénstatsis; ne thóh wenhniserátekwe washaʼkononwariakhónhnion shatèkon niwáhsen-wísk niháti neh ratirihwahientéris nahatíhawe ne waniatarí꞉io ateniʼiónta í꞉ken.

¹⁹ Nob ne ne kanatowanénhke thóh ratiterón꞉takwe ne ratiʼtsihénstatsis, washákononwariakhónhnion; ronnón꞉kwe ó꞉ni ne konnón꞉kwe, ratiksaʼokónhas tánon ne owiráha, teotinákares tionnónskwarons, tewahón꞉tes, ó꞉ni teiotinakarón꞉tonʼa, tsi washakononwaʼrhiakhónnion.

²⁰ Ók saiá꞉ta ne roʼiénha ne Ahimelech ne ne roní꞉ha ne Ahitub, ne ne ronwáiats Abiathar, wahaniákenhne tánon ne wahó꞉sere Táwit.

²¹ Abiathar wahoró꞉ri ne Táwit nètho Saul tsi shakononwarhiakhónhnion ne raotsihénstatsis ne Roiá꞉ner.

²² Ne Táwit wahawénhaʼse ne Abiathar, “Wakaterientahrá꞉kwen ne thóh wenhniserátekwe, nó꞉nenh ne Doeg ne ne Edomró꞉non tsi thóh í꞉reskwe, nètho tsi kwáh oriwiʼiohónwekwe tsi enhoró꞉ri ne Saul. Tsi Í꞉i entahkerá꞉se ne tsi nihonnónhnheke ne ratikwé꞉kon ne ianí꞉ha raonónskon.

²³ Kénʼen séh꞉sek skátne ní꞉i, tánon tó꞉sa saterón꞉sek; asèken tsi nikáien ne rehsaks tsi nikónnhe résaks ki nonʼnéʼeh tsi shón꞉nhe; ní꞉se kwáh kiʼ skénnonk thenkénhake skát꞉ne ní꞉i.”