1 Samuel 19 - Ohiatonhseratokénti

¹ Ne Saul wahotháhrase ne roién꞉ha Jonathan tánon ratikwé꞉kon ne raonhatsherashón꞉ʼahs ne aorihwá꞉ke nahonwanonwarhiákhon ne Táwit. Ók kiʼ ne Saul roién꞉ha Jonathan kwáh néh í꞉ken tsi ronón꞉weskwe ne Táwit.

² Ne Jonathan wahoronkáten ne Táwit, “Ne rakení꞉ha Saul í꞉rehre naianonwarhiákhon; ne kiʼ aorí꞉wah sathatenikonráhrat noronhkéne; thóh shé꞉sek tsi nón꞉we nihiotaséhton tánon sathatiatásek.

³ Ní꞉i kwáh thóh ièn꞉ke tánon thóh tenkʼtáhne raiatákʼta ne rakení꞉ha thóh kahentáhke tsi nón꞉we ní꞉se ní꞉ses, tánon tenhiakenithá꞉ren ne rakení꞉ha ní꞉se sariwá꞉ke; tó꞉ka thènon enkeriwatsén꞉ri kwáh kiʼ enkonró꞉ri.”

⁴ Nó꞉ia sahiórenhne Jonathan watononwehráton ne Táwit rahohén꞉ton ne roní꞉ha Saul, tánon wahawénhase, “Áhnion tó꞉sa ne ronnontí꞉io rahrihwánerak tsi nòkwah ne raonhá꞉tshera Táwit; tsioríhwa tsi iáh neh tehorihwáneren tsi nó꞉kwah ní꞉se, tánon neh aoríhwa ne raohioténhseras tsi niʼioiá꞉nereh tsi nihiahiótenhse ní꞉se;

⁵ asèken thóh wahathatonhnáren ratsanáhke nó꞉nen shiaʼhotiatónhti ne Philistiaró꞉non, tánon ne Roiá꞉ner tahá꞉hawe kowánen atesenhniétshera nakwé꞉kon akorihwáke NʼIsraerʼronónke. Ní꞉se satʼkáton, tánon satonhnaráhon; onhnontiéren ká꞉ti tsi asherihwánerake tsi nòkwah ne iáh tehoníkon rón꞉kwe ne tsi atieʼnonhwarhiákon Táwit ne kwáh iáh othènon teiorihonhníhon?”

⁶ Ne Saul wahatahonsatháte ne raowenhnaókons ne Jonathan; ne Saul waharihwanírate, “Tsi nironnheón꞉we ne Roiá꞉ner, ne raónha kwáh kiʼ iáh tahonwanonwahrhiákhon.”

⁷ Káti ne Jonathan iahó꞉nonhke ne Táwit tánon orihwakwékon wahorihókʼtahse. Ethò꞉ne ne Jonathan iahohiaténhawe ne Táwit raohénton ne Saul, tánon ne Táwit wathorihwásnieʼse ne Saul tsi kiʼ niʼiotónhne ne tsiotierénhton.

⁸ Shé꞉kon sonteriʼioseraién꞉taʼne, tánon ne Táwit iahá꞉re nahonterí꞉io ne Philistiaró꞉nons. Ne raónha ne wahakétsko ne iókste tsi iasakotiatónhti, ne wakarihónhni sahontèko ne rahohénton.

⁹ Eʼthóhne kanikonrahét꞉ken tahaténieʼte ne Roiá꞉ner ne wahó꞉rahne Saul, tsi nihenskó꞉te raonónskon rahá꞉we ne raosí꞉kwahra; tsi neh nikaríwes ne Táwit roterenʼnhó꞉tes.

¹⁰ Ne Saul wahateniénten nahó꞉hase ne Táwit ne áhratste ne raosí꞉kwahra; ók kiʼ ne Táwit wahaninhowáien, káti nasí꞉kwahra iatewashontáweheste. Ne Táwit sahatèko tánon sahaniákenhne nètho wasonthátekwe.

¹¹ Ne Saul iasakoténiete ratiriwakarénies tsi thóh nonshó꞉te ne Táwit nahonwatenhnikonráhren, tsi ratenikonrón꞉nis nahonhnonwarhiákon tsi ientsórenhne. Ne Táwit ró꞉ne Michal wahoró꞉ri, “Tó꞉ka iáh tashenónsthate tsi sónnhe nenhió꞉karawe, noronkéne kwáh kíʼeniesanonwarhiá꞉kon.”

¹² Káti ne Michal ne Táwit thóh waohiatóhetste tsi iononstonkwahkáronhte tánon iahohiatátsnenhte; ne raónha wahatèko tánon sahaniákenhne.

¹³ Ne Michal iahatéwakwe kaiatónhni teraphim tánon thóh wakáh꞉ren kanakʼtáhke tánon atkón꞉sera; tánon ne wakarorótste atserón꞉nia. Tánon thóh ranontsíne waká꞉ren kaiatákeras onón꞉kwis.

¹⁴ Nó꞉nen ne Saul shiashakoténiete ne rateriwakarénies nahontahonwaiaténhawe ne Táwit, ne ró꞉ne wakénron, “Rononwákʼtahni.”

¹⁵ Eʼthó꞉ne ne Saul ionshasakoténieʼte ne raterihwakarénies ne kwáh ronón꞉ha ahonwakkénserah ne Táwit. Wahen꞉ron, “Tahtsisewaiaténhaf kanaktáhke rahiatiónhnik, ne nètho nahón꞉ton ahinonwarhiákhon.”

¹⁶ Nó꞉nenh ne ratirihwakarénies iahontáhweiaʼte, ne kaiatónhni thóh káhere kanaktáhke, kwáh iokwá꞉son tánon natkónsera ne kaiatákeras onónkwis nahó꞉ten ionhniáton neh iotkónsere.

¹⁷ Ne Saul warénhase ne Michal, “Ónh niʼiotiéren tsi kiʼ thóh ní꞉ioht tsi waskenikonráhten, tánon watserí꞉hon ne rátsons nahatèko, káti sahaniákenhne?” Ne Michal tsi watorihwaserákwahse ne Saul, “Wahakénhase, ‘Ahnion tahkatékwat; onh nontiéren ní꞉se tsi akonhnonwarhiákhon?’”

¹⁸ Nón꞉wa ne Táwit rotèkwen tánon roniakénʼen; iatʼiatátken ne Samuel ne Ramah nón꞉we, tánon akwé꞉kon wahorihóktase nètho Saul tsi nihoiérahse. Ne raón꞉ʼa tánon ne Samuel iahá꞉ne tánon thóh nón꞉we iahiatenáhtaien Naioth.

¹⁹ Ne Saul iahonwaronhkáten, “Ne Táwit Naioth nón꞉we iéhres ne ne Ramah nón꞉we.”

²⁰ Eʼthó꞉ne ne Saul iashakoténiete ratirihwaróroks nahonwenhnónksa ne Táwit. Nó꞉nenh shasakótiken ne kenhtsió꞉kwas ne rotitó꞉kenhse tsi tiatehononhnarihénʼen, ne ne Samuel tesakoniaró꞉taron! Ne ronónha, ne raonikonrí꞉ioston ne Ní꞉io wahotírahne ne raonkweʼtashón꞉ʼahs ne Saul, tánon ronónha ó꞉ni tsitʼtsahatiʼieráhnion tsi iahatirihwakénhseron tiatehononhnarihénʼen.

²¹ Nó꞉nenh ne Saul saonwaronkáten, ó꞉ia ratiriwakaréhnies ionshasakoténiente, tánon kwáh ó꞉ni ronónha tiathononhnaríkʼkon. Ne Saul shé꞉kon thihátite ratirihwakarénies ionshasakoténieʼte ó꞉nenh ne ne ahsénhaton niahontératste, tánon ronónha ó꞉ni watonnonhnaríkʼkhon.

²² Eʼthóhʼne ó꞉nenh kwáh raónha thóh wárehte Ramah, Shiaárahwe ne kowánen tsonáhwerote ne thóh nón꞉we Secu; thóh nón꞉we nihionáwerote ne iethetá꞉kwah kaswenhkarenhkwénhtaron thóh tsi onontóskon tsi ionhniáhere wahariwanónton, “Kahnón꞉we nhínes ne Samuel tánon ne Táwit?” Tánon ónkak wahé꞉ronh, “Thóh nón꞉we iéhnes Naioth ne ne Ramah nón꞉we.”

²³ Eʼthohʼnón꞉we niahá꞉re, iatʼróiake ne Naioth ne ne Ramah nón꞉we; tánon ne raonikonriʼiósera ne Ní꞉io wahó꞉rahne. Tsi niahawenonhátieʼne, ne wahó꞉rahne niaharihwáken tsi wathahonnaríkʼkhon, tsi niʼió꞉re iahá꞉rahwe ne Naioth ne ne Ramah nón꞉we.

²⁴ Raónha ó꞉ni wahatʼtieronhniási ne raotsherón꞉nia, tánon raónha ó꞉ni ne waórahne tsi watahonnaríkʼkhon raohénton ne Samuel. Rahiatiónhni raonotstóskon kontatiekó꞉wa nètho wenhniserátekwe ó꞉ni asontahkwekónkwe. Ne káti tsi nahonhníron, “Ne Saul kwáh kén nonhnéʼeh ratikwé꞉kon ne rotiʼtokénhse?”