1 Samuel 17 - Ohiatonhseratokénti

¹ Ó꞉nenh ne Philistines sakotiʼiataró꞉ron ne raotiʼtsió꞉kwas ronterí꞉ios nahontirí꞉io; thóh nón꞉we nihonatsataró꞉ron ne Socoh, ne ne raoná꞉wenk ne Judah, tánon wahonthatosehrotónhnion tsi natetsá꞉tere ne Socoh tánon ne Azekah, thóh nón꞉we ne Ephesdammim.

² Ne Saul tánon NʼIsraerʼró꞉nons wahontsataróhroʼke tánon wahonthatoserotónhnion thóh ahonrákwahkon ne Elah, wahontenenhraserón꞉ni niaʼsakonatsatónhti ne Philistines.

³ Ne Philistines tho wathatínaʼne tsi ionontáhereh ne ská꞉ti nokwáhti tánon NʼIsraerʼró꞉nons í꞉se neh nahonontáʼti nontahatítahne, ne ne tsi natetsiá꞉tereh norón꞉wahkon.

⁴ Tánon thóh tahatiʼiákenʼne tsi niwatohserótons ne Philistines ne ne raronhonkwénhawe ne ne Goliath ronwá꞉iats, ne Gath nón꞉we, ne rahón꞉ʼa tió꞉ton niwashí꞉tahke tánon tió꞉ton nihionká꞉rahke nihanénhies.

⁵ Ne rononwaró꞉ron ne iononwarotseraníron notsínekwar nikaristóten, tánon ne rotieronniáton ne tekaristaiéston; enskatewenhniáwe tewáhsen wísk nikakontseráke niʼiókste ne raoʼtserón꞉nia.

⁶ Tánon ne rostahwinorókons ne notsínekwar nikaristótens í꞉ken, tánon ne raoiénhkwire ne notsínekwar nikaristóten ionhniá꞉ton thóh iorénton tsi natehatnensáterehs.

⁷ Tánon ne kániah ne raoién꞉kwireh thóh niká꞉tens kwáh ne ne tewahieʼwanonwaʼienwáhtha aorón꞉tah, tánon ne tsi iehionontsistóhareh ne raoién꞉kwireh káknonh ne wísk niwáhsen nikakontseráke niʼiókstʼte kwáh oristóskon; tánon ne rá꞉has ne raówenk teioniatasthá꞉kwah raohénton nieréhtha.

⁸ Wahthá꞉tahne tánon iathoʼhénrehte tsi nihotinenhraserónhni NʼIsraeró꞉non, “Onhniʼiotiéren tsi tesé꞉we nahisewateriʼioserakétsko? Iáh kén ní꞉i Philistiaró꞉non tetiaʼtóten, tánon iáh kén ní꞉se Saul tetsisewatenaskonniátons? Tsi sewahiatará꞉ko rón꞉kwe ne iatesewahiátis, tánon áhnion akón꞉hake nítreh.

⁹ Tó꞉ka kén roʼkwénion nahiatiaʼterí꞉io tánon nahakenonwarhiá꞉khon, eʼthó꞉hʼne kiʼ kwáh í꞉se enkwahió꞉tenhse; ók tó꞉ka í꞉i enkatʼkwéni tsi enhiatiaʼterí꞉io tánon enhiʼnonwarhiá꞉khon, eʼthóhʼne kiʼ kwáh ní꞉se enkwatenatserón꞉niate tánon enskwahió꞉tenhse.”

¹⁰ Tánon ne Philistiaró꞉non wahén꞉ron, “Ónwa wenhniseráte wakhenenrót꞉thase NʼIsraerʼró꞉nons! Tationkwéton, ne nahón꞉ton skát꞉ne tsi ahiʼtewaterí꞉io.”

¹¹ Nó꞉nen ne Saul tánon ratiʼkwé꞉kon NʼIsraerʼró꞉nons wahonatʼthóntene kí꞉ken raowenhnahó꞉kons ne Philistiaró꞉non, kwáh í꞉ken tsi wahonhnikonrók꞉ten tánon kwáh í꞉ken tsi wahotíteronhne.

¹² Nón꞉wa ne Táwit ne roniʼkénʼen ne Ephrathite ne Bethlehemró꞉non ne ne Judah nón꞉we, Jesse ronwaiáts, ne raónha shaʼtékon nionekenterontseraien꞉takwe. Thóh tsi nihotenhniseraténionskwe ne Saul ne ne rón꞉kwe ó꞉nenk shiʼoksténha tánon kwáh thóh tsi nihahoserákwen.

¹³ Ne áhsen nihá꞉ti thoʼtiksténhas ne raoʼnekenteronhtserashón꞉ʼahs ne Jesse wahonwanoterátie ne Saul tsi ateriʼioseráke niahá꞉reh; tsi nihotiʼsenhnoténsons ne áhsen nihá꞉ti raonekenterontserashón꞉ʼahs ne ne ronón꞉ha ateriʼioseráke niahónhne ne ne Eliab ne ne tioʼtsierénhton rawenhnakeráton, tánon nó꞉ia ne ne Abinadab, tánon nasénhaʼton niérate ne ne Shammah.

¹⁴ Táwit ne kenhnierá꞉ʼa; ne áhsen nihá꞉ti thoʼtí꞉ions wahonwanonterátie ne Saul,

¹⁵ ók ne Táwit tehateratánions nenhʼné꞉eh tsi nón꞉we nihénteron ne Saul ne nasakó꞉nonte ne roʼníha raotshenenhókons teiotinakarontón꞉ʼa ne Bethlehem nón꞉we.

¹⁶ Aséken kaiériʼniwenhniseráke ne Philistiaró꞉non thorátahkwe tánon thóh tenhá꞉tane, oronkéne tánon nokarasnéha.

¹⁷ Ne Jesse wahawénhaʼse ne roién꞉ha Táwit, “Iashehawítens ne sewathatekenʼó꞉kon꞉ʼahs satekawiʼnotseríhen ne kí꞉ken watenenhón꞉te tánon kí꞉ken oiéri nikanatahrákes, tánon tesasterí꞉hen iahásaf tsi tonathatohseróhte ne sheʼtsiʼokón꞉ahs;

¹⁸ kwáh ó꞉ni iatsawítaf kiʼ oiéri níkon kakwetarón꞉kwen kanontíson ne rateriʼioserakweʼní꞉io ne oiéri tewenhniáʼwe ehtseráhse. Satkátho onhniʼiohtonhátie ne sheʼtsiʼokónʼahs, tánon knahó꞉tenk tonhtásaf ne rononháke nahontáhwe.”

¹⁹ Nón꞉wa ne Saul, tánon ne roʼnónha, tánon ratikwékon NʼIsraeronónhke, thóh rónhneskwe ahonrahkwáhkon ne Elah, ne ronaterí꞉io ne Philistine.

²⁰ Ne Táwit oronhkéstsi wahatkétsko, ne wahorihónten asakotenhnikonrá꞉ren ne teiotinakarontón꞉ʼa ne ó꞉ia ranónh꞉ne, iahatenatserénhawe, tánon thóh niahá꞉reh tsi kiʼ ne Jesse tsi nihoríhonte. Iahá꞉rawe tsi tewatoseró꞉tons kwáh ó꞉nenh ne ronterí꞉ios thóh niahonenonhátie tsi tewaterí꞉io tekanenhríson, tehotihenréhtha nateriʼiósera tsi nihatiwenhnó꞉te.

²¹ Ne Israerʼró꞉nons tánon ne Philistiaró꞉nons wathontatkáneren nahonterí꞉io, niahonwanatsatónti ne ronterí꞉ios.

²² Ne Táwit ne ne wahohotiéten nahatenhnikonráhren tsi nikáien ne ranikónrahreh tsi nihonstasónhas, iatahráhthaʼte tsi tónhnes ne ronterí꞉ios, tánon thóh niahá꞉reh watesakonón꞉wehron ne ronthatekenʼokón꞉ahs.

²³ Tsi natehotiʼtháhreh ne ronónha, ne raronhonkwénhawe, ne ne Philistiaró꞉non ne Gath nón꞉we nihanákereh, Goliath ronwáiats, thontahanenhrót꞉kawe tsi rónhnes ne ronterí꞉ios Philistiaró꞉nons, tánon kwáh éhʼthoh ní꞉ioht tsi sahatáti tsi ní꞉ioht ne tiotserénhton. Tánon ne Táwit wahothóntene.

²⁴ Ratikwé꞉kon NʼIsraerʼró꞉nons nó꞉nenh saonwáken ne rón꞉kwe, wahonwatékwahse tánon kwáh í꞉ken tsi wahotíteronhne.

²⁵ NʼIsraerʼró꞉nons wahonníron, “Etʼtsisewáken kén kí꞉ken rón꞉kwe tsi thawénon? Oriwiʼiohónwe tsi tahwénon ne nasakonenhrók꞉thase NʼIsraerʼró꞉nons. Ne ronnontí꞉io kwáh í꞉ken tsi teiotenonhianíton tsi enhokwatsésten ne rón꞉kwe nón꞉ka enhononhwarhiákon, tánon kwáh iensakótʼkaʼwe ne sakoién꞉a ne tsonatʼthonwisen ne ahotíniake ne rahón꞉ʼa tánon ne ensakahónhnien ne raowáhtsireh nahontatewenhní꞉ioke NʼIsraerʼronónke.”

²⁶ Ne Táwit wahawénhase ne rón꞉kwe ne raiaták꞉ta rátahkwe, “Ónh nahonwatiérase ne rón꞉kwe nón꞉ka ahononhwarhiákhon kí꞉ken Philistiaró꞉non, tánon éhren ahaháwite natehénsera NÍsraerʼronónke? Asèken ónhka kí꞉ken ne iáh tehotewarahkwétaron Philistiaró꞉non ne ne rahón꞉ʼa asakonenrók꞉thaʼse ne ronwaterí꞉iose ne ronnheʼónwe Ní꞉io?”

²⁷ Nonkweʼó꞉kons watonwariwaserákwahse ne ne kwáh ne saoríhwa, “Káti kwáh entonwarihwaiéritʼtse ne ónhka ne rón꞉kwe nenhononwarhiá꞉kon.”

²⁸ Ne thoksʼténha rotsíha Eliab wahothónhtene tsi tehotíthahre ne rón꞉kwe; tánon ne Eliab kanakwáhtshera tahkatsiró꞉ten tsi nó꞉kwah ne Táwit. Wahén꞉ron, “Onh nonhtiéren tsi kénʼen nontáse? Ónka washeiatiéten ne thí꞉ken thohʼkárah nikónton teiotinakarontón꞉ʼahs ne thóh iahonwenhtsiaʼthénhake tkón꞉nes? Wakateriéntahreh tsi nisatátʼthareh (tsi kenekerotsotáhrok nashiatóten) tánon tsi niserhiasákʼsen; asèken ní꞉se tsi táhse nék khók nasatʼkátho nateriʼiósera.”

²⁹ Ne Táwit wahén꞉ron, “Ónh naká꞉tiereh nón꞉wa? Nék khók tsi wakeriwanón꞉ton.”

³⁰ Ne raón꞉ʼa watatkaraténi éh꞉ren sárehte tsi nón꞉we níres ó꞉ia iatonhsanithá꞉ren kwáh ne saoríhwa; tánon nonkweʼó꞉kons shé꞉kon kwáh thóh ní꞉ioht tsi tonsahonwarihwaserákwahse tsi ní꞉ioht ne tsioʼtierénton.

³¹ Nó꞉nen nowenhnaʼó꞉kons nètho Táwit rothatíhon wahakothónhtene, ne ronónha kwáh thóh ní꞉ioht tsi tonhtahontnanétha raohénton ne Saul; tánon iahó꞉nonke.

³² Ne Táwit wahawénhaʼse ne Saul, “Áhnion tó꞉sa ónhka nahionhnikonrókten ne rahón꞉ha aharihónhni; takerí꞉hon i꞉i thoiéke tánon naiatiaterí꞉io kí꞉ken Philistiaró꞉non.”

³³ Ne Saul wahawénhaʼse ne Táwit, “Ní꞉se iáh taskwénhni niatsaʼtiatónhti kí꞉ken Philistiaró꞉non nahitsaterí꞉io rahón꞉ʼa; asèken ní꞉se seksá꞉ha khók, tánon ne raónha kénk shiʼthoiónha nènhne eh shiʼhaterí꞉io.”

³⁴ Ók ne Táwit wahawénhaʼse ne Saul, “I꞉i wakerenhnáhon tsi khenikonráhraʼkwe ne rakení꞉ha raotsenenʼó꞉kons teiotinakaronhtón꞉a; tánon kát꞉ke ne kénreks khéhs nokwáhri wahón꞉newe, tánon enhsakotiʼiaténhaʼwe ne teiotinakarontón꞉ʼa owí꞉ra tsi nón꞉we nihiotitiokwínes,

³⁵ entkhésereh tánon ienhkatiaʼtónhti, enskeniákenhte ne teiotinakarontón꞉ʼa owí꞉ra ne tsi kasakáronhte; tánon tó꞉ka entewakatsiatónhti, kwáh kiʼ ientiéna ne karhió꞉tsake, entkón꞉rehke tánon enkenonwarhiá꞉kon.

³⁶ I꞉i kwáh kekononhwarhiákhon tetsá꞉ron ne kénreks ó꞉ni nokwáhri; tánon kí꞉ken ne iáh teotewarakwétaron Philistiaró꞉non kwáh nonhnéʼeh tho nenhoiátawe tsi kíʼne eh nihotiʼiatawénhʼen ne ró꞉nonha, neh tsi sakosenhnakʼsáton ne raotió꞉kwas ronterí꞉ios ne ronhnheʼón꞉we Ní꞉io,”

³⁷ Ne Táwit wahén꞉ron, “Ne Roiá꞉ner, tsi raón꞉ha sakenonsthá꞉ton ne washitáhke ne kénreks tánon ne rashitákes ne okwáhri, kwáh kiʼ enhakenónsthate tsi nó꞉kwah ne ratsanáke ne kí꞉ken Philistiaró꞉non.” Káti ne Saul wahawénhase ne Táwit, “Wáhs, tánon aiá꞉wens ne Roiá꞉ner ahiʼsenikwekónhake!”

³⁸ Ne Saul ne wahoserónhniate ne Táwit ne rahón꞉ha raotserónhniat rateriʼiostáhkwah; ne wahanonwaróhroʼke ne otsínekwar nikaristóten iononwarotsheraníron tánon ne wahatiáʼtahwite ne tekaristaiéston.

³⁹ Ne Táwit wahawahnerénkʼkhon ne Saul raosarehkó꞉wah éhʼneken ne raotsheronhniákwahke, tánon tsi nahateniénten netahatekháhaʼkwe, asèken iáh teorenhnáhonhne ne ne áratste. Eʼthóhʼne ne Táwit wahawénhaʼse ne Saul, “Iáh tatkwéni tahkatekhá꞉hakwe tsi ne kí꞉ken wakatstánion; asèken iáh kiʼ tewakerenhnáhon.” Káti ne Táwit saharishiónhko.

⁴⁰ Eʼthóhʼne kí ó꞉nen iahát꞉rakwe ne rahó꞉nia wahatʼtháwa, tánon wathanenʼiaiestáhsi wísk ní꞉kons ne teionenhiastarátʼtes tsi nón꞉we ne ieiostéhon ne kahionhatáhtiene, tánon raohiará꞉kon wahatáron, thóh tsi ionatahtiéronʼte; ne ieʼhonenhiontietáhkwah rahá꞉we, tánon thóh niahá꞉re rahiaták꞉ta ne Philistiaró꞉non.

⁴¹ Ne Philistiaró꞉non táhre tánon raiaták꞉tah ne Táwit niahá꞉re, ne ráhas ne tehaniatastáhkwah raohénton í꞉rate:

⁴² Nó꞉nen ne Philistiaró꞉non watatkatónhnionkwe tánon wahó꞉ken Táwit, tsi nahokénron, asèken kénk nithoʼiónha í꞉ken, tehotenokwéntaronʼte tánon tsi nihatkatotserí꞉io tsi nihsahiatóten.

⁴³ Ne Philistiaró꞉non wahawenhá꞉se ne Táwit, “Érhar ken natiatóten, nètho ní꞉se tsi tá꞉se nakonháke kwáh tashenienháwi?” Tánon ne Philistiaró꞉non tsi nahokenrenhserónhni ne Táwit thóh raotisenhná꞉kons ne Philistiaró꞉non raoniʼioʼókons.

⁴⁴ Ne Philistiaró꞉non wahawénhaʼse ne Táwit, “Káts tiatákʼta nontáse, tánon ní꞉i kwáh ne tsi sónnhe otsitenʼokón꞉ahs ne tsi ioweráhre enkhé꞉nonte tánon ne kontírhios kontitshénens ne kahentahkésons kónhnes.”

⁴⁵ Ók ne Táwit wahawénhase ne Philistiaró꞉non, “Ní꞉se akonhá꞉ke nontáhse sasharenháwi tánon kaiénkwireh ó꞉ni ne iesahniontsethákwa; ók kiʼ ní꞉i shonháke nontáhke thóh raosenhná꞉kon ne Sakoiá꞉ner ne ratironhiakeró꞉nons, ne ne sakoNí꞉io í꞉ken ne ronterí꞉ios NʼIsraerʼronónke, tsi nikáien ní꞉se entsenhnaksáton.

⁴⁶ Kwáh nón꞉wa wenhniseráte ne Roiá꞉ner kwáh entʼiátʼkawe thóh katiá꞉nake, tánon ní꞉i kwáh enkonhiatiénenhte tánon enkonhnontsístsiaʼke; tánon kwáh ne entekhéhion notsitenhó꞉kons ne tsi ioweráhre kontítses ne ronenhé꞉ions raonenheiónhtas ne Philistiaró꞉nons ronterí꞉ios ne ne kwáh nón꞉wa wenhniseráte ó꞉ni ne kontírios kontitshénen ne tsi ionwenhtsá꞉te, ne ká꞉ti nohontsakwékon aiá꞉wens ahonateriéntahrane thóh nón꞉we Israeronónke tsi Rotiniʼioseraiénhse,

⁴⁷ tánon nètho ratikwé꞉kon ne kiʼkénʼen ronatsataróhron aiá꞉wenhs ahonateriéntaraʼne nètho Roiá꞉ner tsi iáh neh asahrehkó꞉wah khéhs ne kaiénkwireh tehátstha nashakonónsthate; asèken nateriʼiósera Roiá꞉ner sehʼné꞉eh raówenk tánon kwáh ní꞉se entʼiát꞉kawe iakwahtshanákes nenhtèseh.”

⁴⁸ Nó꞉nen ne Philistiaró꞉non ákta wàrehte ne tahiatátʼken ne Táwit, Ne Táwit iatharáhthate watosterí꞉hen iahá꞉reh nateriʼioseráke tsi tkaʼnenhró꞉te ne tahiatátʼken ne Philistiaró꞉non.

⁴⁹ Ne Táwit iahanenhtsá꞉tha raoiaráhkon, wahatáko onénhia, iahonenhiónti, tánon rakwenhká꞉rahke nón꞉we nathókwahte ne Philistiaró꞉non; nó꞉nen iatsahosérenhne ne rakwenhráhke, tánon wahahiatiénenhne kwáh tsahakonshó꞉tahne ohontsáke.

⁵⁰ Káti ne Táwit wahosénhni ne Philistiaró꞉non ne wáratste ne iehiakonenhiontsetáhkwah tánon nonénhia, wahohiatsiénenhte ne Philistiaró꞉non tánon wahononwarhiá꞉khon; kwáh iáh tehasarenhá꞉wakwe ne Táwit.

⁵¹ Eʼthóhʼne ne Táwit iatharátahte tánon thóh wathátahne rahiatákʼta ne Philistiaró꞉non; wahaiéna ne raoshá꞉re, tarotsate ne tsi wathethahásta, tánon wahononwarhiá꞉kon; eʼthóhʼne ó꞉nen wahonontsístsake ne warátste.

⁵² Ne konwaterí꞉iose Israeronónke ó꞉ni ne Judah tontahatítahne tsi nathotihénrehte tánon wahonwatísehre ne Philistiaró꞉nons kwáh tsi niʼió꞉re ne Gath tánon ne tsi tsiotenhenrakaróntons ne Ekron, káti nèthoh ne ronatʼkaréhwatons ne Philistiaró꞉nons wahatiʼiatsenénhseron tsi nihiohá꞉hes thóh tontáhsawen Shaaraimʼke kwáh tsi niʼió꞉re ne Gath ó꞉ni Ekron.

⁵³ Ne Israerʼró꞉nons tontahón꞉kete tsi sakotíserehne ne Philistiaró꞉nons, tánon wasakotinenskwenháton tsi ronahnataién꞉takwe.

⁵⁴ Ne Táwit watʼrákwe ne raonón꞉tsi ne Philistiaró꞉non tánon thóh niaháhaʼwe Jerusalem; ók ne raotserón꞉nia ne rateriʼiostáhkwah raotohserákon ne iahá꞉ien.

⁵⁵ Nó꞉nen ne Saul sahó꞉ken ne Táwit iahahiákenhne niahotiatónhti ne Philistiaró꞉non, ne raón꞉ʼa wahawénhase ne Abner, ne ne rateriʼioserakweʼní꞉io ne raotsió꞉kwah ronterí꞉ios, “Ne Abner ónhka ronhwahʼién꞉a kí꞉ken kén nithoiónha?” Ne Abner wahén꞉ron, “Ne satónnhets tsi nihión꞉nhe, Ó Sanontí꞉io, Iáh tewakateriéntare.”

⁵⁶ Ne ronnontí꞉io wahén꞉ron, “Seriwísak ónhka ronwaién꞉a kí꞉ken ranekenterón꞉ha.”

⁵⁷ Ne Táwit tsi shonsárahwe tsi iahononwarhiákhon ne Philistiaró꞉non, Abner iahohiaténhawe tánon tho iathotáste raohénton ne Saul, ráhawe ne raonón꞉tsi ne Philistiaró꞉non.

⁵⁸ Ne Saul wahawénhase, “Ónhka ní꞉se iesaién꞉ha, nitisahiónha?” Tánon ne Táwit watharihwaseráko, “Ne ratién꞉ha ne sanhá꞉tshera Jesse ne ne Bethlehemró꞉non.”