1 Samuel 16 - Ohiatonhseratokénti

¹ Ne Roiá꞉ner wahawénhase ne Samuel, “Tohá꞉kwa nikarí꞉wes tsi entsationniónhkwen ne Saul? Ní꞉i rikenronníhon nahonontí꞉ioke ne NIsraerʼronónhke. Ne í꞉senanh ne katshénen aonakarakénʼen ne iakenʼiewá꞉tha kénhie tánon tho iahá꞉se, Ní꞉i kwáh ienkoniaténieʼte tsi thénhteron ne Jesse ne ne Bethlehemró꞉non, asèken ní꞉i neh wakathaterakwénhni ne iatetsiá꞉ti ne ahotinontí꞉ioke ne sakohiohokónʼahs.”

² Ne Samuel wahén꞉ron, “Onhní꞉ioht tsi thóh iá꞉ke? Tó꞉ka ne Saul aharihwáronhke, ne raón꞉a kwáh kiʼ enhakenonwarhiákhon.” Tánon ne Roiá꞉ner wahén꞉ron, “Iatsaténhaf tionhnónskwaron owí꞉ra, tánon ensí꞉ron, ‘Tá꞉ke nahiʼiateskóntʼthase ne Roiá꞉ner.’

³ Entionken꞉ron ne Jesse ne tsi tewatéskonte iá꞉re, tánon ní꞉i kwáh enkonhnatón꞉hase tsi nahó꞉ten ní꞉se tsi nénhshieʼre; tánon ní꞉se kwáh entieʼienároh nakeriwá꞉ke tsi niká꞉ien enhináton ne shonháke.”

⁴ Ne Samuel thóh kiʼ nahá꞉iere tsi kiʼ nahó꞉ten ne Roiá꞉ner wahó꞉nhane, tánon iaháre Bethlehem. Ne rotikstonhonkónhas ne kanatowanénhke tahónhne ne tahontátken ne rahón꞉ha rotiʼiatitsónhkwahne, tánon wahonhníron, “Ní꞉se tsi kénʼen tá꞉se skénnon kén saháwi?”

⁵ Ne raónha wahén꞉ron, “Skénnonk í꞉ken; Ne aorí꞉wa tsi kénʼen tá꞉ke ne nahiʼiateskóntʼtase ne Roiá꞉ner; sasewatonnakanónhni niaʼtesewahía꞉tis tánon káts í꞉tewe tsi tewatéskonʼte.” Tánon sahotonhnakanónhni ne Jesse ó꞉ni ne sakoioʼokónʼahs tánon washakohónkaron iahón꞉ne tsi tewatéskonte.

⁶ Nó꞉nenh shiahónhnewe, watotʼkáneren Eliab tánon wahanontónhnionwe, “Oriwiʼiohónwe ne Roiá꞉ner ne roiatarákwen tsi ó꞉nenh raohén꞉ton ne Roiá꞉ner í꞉res.”

⁷ Ók kiʼ ne Roiá꞉ner wahawénhase ne Samuel, “Tó꞉sa ne tetsiatʼkáneren tsi nihatʼkatotieróten khéhs tonahaʼneniésonhke, tsioríhwa tsi ní꞉i rikenronníhon; asèken ne Roiá꞉ner iáh ne eh thoʼtèiot tsi tehatʼkáthos tsi ní꞉ioht nonkweʼókons tsi iontkáthos; neh ne eh teiekánereh nátste nó꞉kwah tsi niʼiehiatóten, ók ne Roiá꞉ner awé꞉ri ne tehakánere.”

⁸ Eʼthóhne Jesse iahó꞉nonhke Abinadab, tánon wahahónhnien thóh ratóhetst raohén꞉ton ne Samuel. Wahén꞉ron, “Iáh nonʼné꞉eh ne Roiá꞉ner neh tehoiahtarákwen kí꞉ken.”

⁹ Eʼthó꞉ne ne Jesse wahahónhnien ne Shammah nahatóhetste. Tánon wahén꞉ron, “Iáh nonné꞉eh ne Roiá꞉ner tehohiatarákwen kí꞉ken.”

¹⁰ Ne Jesse washakahónhnien ne tsá꞉ta niháti sakoiohʼokónhas thóh rontóhetst raohén꞉ton ne Samuel, tánon ne Samuel wahawénhase ne Jesse, “Ne Roiá꞉ner iáh ón꞉ka tesakoiatarákwen kí꞉ken tsi ní꞉hati.”

¹¹ Ne Samuel wahawénhase ne Jesse, “Ratikwékon kén ne sanekenterontsherashón꞉ahs kén꞉en rón꞉nes?” Tánon ne Jesse wahén꞉ron, “Shé꞉kon ne thóh tsiatótʼte nakatenishó꞉kwah, ók ne raón꞉ʼa ne ne sakonikónrare teiotinakarontón꞉ʼa.” Tánon ne Samuel wahawénhase ne Jesse, “Ónkak ionsasheiaʼténiet nahonsahonwenhnónksa; asèken iáh tahiakwatiénton tsi niʼió꞉re kénʼen énraʼwe.”

¹² Káti ne Jesse iasakoténieʼte nahonsahonwenhnónkʼsa tánon tahonwahiatínionhte. Nón꞉wa ne raón꞉ʼa tsi nihashokwí꞉io tánon rotakaríhte, tánon tehakarí꞉ios, tánon ranekénteron. Ne Roiá꞉ner wahén꞉ron, “Téstann tánon tieíenároh; asèken neh kí꞉ken.”

¹³ Eʼthó꞉ne ne Samuel iahát꞉rakwe ne onákare ne wenhienáre, tánon waawehienáro raotihén꞉ton ne sakotsiʼokónʼahs; tánon ne raonikonratokénti ne Roiá꞉ner ónwe tehiotenonhianitonhá꞉tie tsi wahorahne ne Táwit nètho siwenhniserátekwe iahontásawen. Ne Samuel eʼthóhʼne ionsahaténti tánon thóh nón꞉we niahá꞉re Ramah.

¹⁴ Nón꞉wa ne raoʼnikonratokénti ne Roiá꞉ner éhʼren sawehte rahón꞉hake ne Saul, tánon kanikonrahét꞉ken tahaténiete ne Roiá꞉ner neh nahoronhiákente ne rahón꞉ʼa.

¹⁵ Tánon ne Saul raonhatserashón꞉ʼahs wahonwénhase, “Sát꞉kato ó꞉nenh, ne kanikonrahetʼkénsera tahaténieʼte ne Ní꞉io ne nahiaronhiákente.

¹⁶ Áhnionh kiʼ ó꞉nenh nonkwahiá꞉ner sakó꞉nhan ne raoʼnhatsherashón꞉ʼahs tsi ronónha teiesarihwásnieʼse nahonnonhkwetísahke ón꞉kak ne rorenhnáhon ahaterenhnó꞉ten ne iehonrawátsta; tánon nó꞉nenh ne kanikonrahetkénsera ne toteniéton Ní꞉io enshatiénhase, ne rahón꞉ha kwáh kiʼ enhaterenhnóten, tánon ní꞉se kwáh kí enshonní꞉ione.”

¹⁷ Káti ne Saul wahawénhaʼse ne raonhá꞉tshera, “Tsiaʼtatʼtsénhri ne rón꞉kwe ne raónha raterenhnót꞉tha kwáh rorenhná꞉hon, tánon tatsiaʼténhaf nakonháke.”

¹⁸ Saiá꞉ta ne kén nithoʼiónha wathariwaserá꞉ko, “Satahón꞉satat, í꞉i kwáh rí꞉ken ne roién꞉ha ne Jesse thóh tsitkanátahien ne Bethlehem, raón꞉ʼa ne rorenhná꞉hon nahaterenhnó꞉ten. Ne raón꞉ʼa kwáh nón꞉ne eh ronikonratʼtsáni tánon ranekénteron, rashotarí꞉io, tánon ratenikonratʼtókha tsi ní꞉ioht tsi rathátis; tánon ne Roiá꞉ner kwáh nikwé꞉kon ne raón꞉ʼa.”

¹⁹ Káti ne Jesse iasakoténiete ne ratirihwakarénies tsi thénteron ne Jesse, tánon nahonníron, “Tatsá꞉ró꞉ri ne tshién꞉ʼa Táwit ne teiotinakarontón꞉ʼa sakonikónraʼre.”

²⁰ Ne Jesse iahénhnonke tewahón꞉tes ne wahatreniakéthate kanatá꞉ro, tánon ne kanéhonk watʼnekarákwa otsí꞉tsa, ó꞉ni kaiatáhkeras owí꞉ra, tánon ne iashakohiaténhawe ne roién꞉a Táwit tsitʼthénteron ne Saul.

²¹ Tánon ne Táwit iahá꞉rahwe tsi thénhteron ne Saul, iahatáhwehiaʼte tsi thoʼhioténhstha. Ne Saul kwáh í꞉ken tsi wahonó꞉ronhkwe, tánon ne wahaterihónten nahaháseke ne rateriʼiosthákwas.

²² Ne Saul ionsahoteriwaniéten ne Jesse, ratón꞉nions, “Ahtserí꞉on ne Táwit kénʼen aréhsehke tsi niwatsioténstha, asèken wahatʼtsénhri ne kaiathaterítsera nakʼkénton.”

²³ Tánon ne nó꞉nen ne kahnikonrahetʼkénsera enthaténiete ne Ní꞉io nenhó꞉rahne ne Saul, Ne Táwit iathenhanó꞉wakwe tánon enhaterenhnóten ne énratste ratshanáke, tánon ne Saul kwáh ensotʼrákwahse tánon ensronhní꞉ione, tánon ne kanikonrahetʼkénsera kwáh kíʼéhren énsewete ne rahonháke.