1 Samuel 13 - Ohiatonhseratokénti

Ne Saul Iáh Teoriwaiéntakwe Nasakotsatatʼtsaháhte Katʼtshénen

¹ Saul áhsen-niwá꞉sen satehaoseriʼiá꞉kon sahatenontí꞉ioste; tánon kaiéri niwá꞉sen-tékeni niʼioseráke ronnontí꞉iokwe nIsraerʼronónke.

² Ne Saul áhsen-tewenhniawehetsherásen nihá꞉ti wasakoiataráko thóh nón꞉we Israerʼronónke; tékeni tewenhniawehetsherásen nihá꞉ti Saul ratikwekonhátiesʼkwe ne Michmash nón꞉we tánon ne tsi ionhniarónhnion kanakeraseráien ne Bethel, tánon énska tewenhniawehetsherásen nihá꞉ti ne ne ratikwekonhá꞉tiesʼkwe ne roién꞉ha Jonathan thóh nón꞉we Gibeah ne ne Benjamin ahotonhwenhtsáke; ne ronátiakes nonkweʼshón꞉ʼahs ionshasakotóri tsi tonathatoserótons niahonsahón꞉ne.

³ Jonathan washaʼkosénhni ne ronwanahtsatontaʼkwénhni ne Philistine ne thóh nón꞉we nihatiterónhtaʼkwe Geba; tánon ne Philistine wahatirihwáronhke. Tánon ne Saul wahahonráwate kwáh tsi niwatenáskwa ne tsi ionhontsá꞉ien, ratonhá꞉kwe, “Kwáh ronatʼtónhten ne Hebrews!”

⁴ Nó꞉nenh ratikwé꞉kon nIsraerʼronónke saonahthónhtene nètho Saul tsi sakosénhnion ne ronwanahtsatonhtakwénhni ne Philistine, tánon kwáh ó꞉ni nètho Israerʼró꞉nons wahonwatíshon ne Philistine, nonkweʼshón꞉áhs tahonwatínonke nahonwatiá꞉taraʼse ne Saul thóh nón꞉we Gilgal.

⁵ Ne Philistine wahonnitiokónhni ne nahonterí꞉io NʼIsraerʼró꞉nons, áhsen niwáhsen tewenhniawehatserásen nikaseréhtakes otsiónkwas, tánon iáh-iak tewenhniawehetserásen nihá꞉ti ne kosátens rotisátens tsi ronterí꞉ios, tánon ne ronterí꞉ios kentió꞉kwas kwáh thóh níhonatiókwa tsi natekanesaronkótaron ne kaniatarakhekówa atsaktóntie; tahón꞉ne tánon watʼkonwahonwarón꞉ni ne Michmash, ne ne tsikʼkarakwínekens nokwáhti ne Beth-aven.

⁶ Nó꞉nen ne NʼIsraerʼró꞉nons shasakotíken tsi ronanikonrokʼtáon (asèken ne ronterí꞉ios kwáh í꞉ken tsi ioní꞉ron tsi nahonterí꞉io), nonkwé꞉okon wahontashetánion tsi iostenrakarónhtons ó꞉ni tsi ioshonwéhnions tánon nostenrákes kassonhionniá꞉nions ó꞉ni ohontsokónsons tánon tsi nón꞉we nihatiʼnekará꞉kwa.

⁷ Otiá꞉kes ne Hebrews iatatiʼiáiaʼke ne Jordan kaniaʼtaratátie thóh niahónhne tsi tiohontsáien ne Gad tánon Gilead. Ne Saul shékon nén꞉en neʼe Gilgal nón꞉we níresʼkwe, tánon ratikwé꞉kon nonkweʼókons ronwanonterátieʼne rotiʼiatishónkwaʼne.

⁸ Tsá꞉ta niwenhniserá꞉ke wahateráraʼte, thóh nikaríwes nihorihwíson ne Samuel; ók ne Samuel iáh nenʼnéʼe tiehawé꞉non ne Gilgal, tánon nonkweʼókon tahiontásawen sahonwatsiaʼtontákwase ne Saul.

⁹ Káti ne Saul wahén꞉ron, “Taietsihiaténhaf ne kontitshénens kénʼen akʼkénton nakheʼiatsiatatʼtsaháhte, tánon ne ahontakaiéstonʼke natakaritétsera.” Tánon raón꞉ha wasakotsatatʼtsaháhte.

¹⁰ Kwáh tsi niʼiostó꞉re wahá꞉sa tsi rotenatskwatsaʼáhtón꞉ne, Ne Samuel wàrawe; tánon ne Saul thóh niahá꞉re iatoterá꞉te tánon wathonónweron.

¹¹ Ne Samuel wahén꞉ron, “Onnasátieʼre?” Ne Saul watarihwaserá꞉ko, “Nó꞉nen sakhéken nonkweʼókon tsi saionkatiatonʼtákwaʼse, tánon ní꞉se tsi iáh tethisénon tsi nisenhniserará꞉kwenhne, tánon ne Philistine thonitsiokwaʼserónhniskwe ne Michmash nón꞉we,

¹² Wakí꞉ron, ‘Ó꞉nenh kiʼ ne Philistine kwáh entionkatsiaʼtónti neh Gilgal nón꞉we, tánon arèkok siwakesákon ne raononwetiéra ne Roiá꞉ner’; káti wakaʼtatré꞉ke, tánon wakatenaskwaʼtsahatánion.”

¹³ Ne Samuel wahawénhaʼse ne Saul, “Teiotenonwaroríhtonhte tsi nashá꞉tiere; iáh tesatienawáston ne raorihwatátʼtshera ne Roiá꞉ner Saní꞉io, ne tsi nihiaʼnáhon. Ne Roiá꞉ner aorihwakwatá꞉kwen ne sanontiʼiotiéra thóh nón꞉we Israeronónke ne ne tsi nénhwe aʼkénhake,

¹⁴ ók ó꞉nenh ne sanontiʼiótshéra kwáh iáh tsahontasón꞉terake; ne Roiá꞉ner roiatatʼtsénhrion ne rónkwe kwáh tsi niʼionkwetó꞉ken tehotonhontsó꞉ni; tánon ne Roiá꞉ner roiatarákwen nasakokʼkó꞉raste ne raonkwetashón꞉ʼahs, tsioríhwa ní꞉se tsi iáh tesatienawáston tsi nahó꞉ten ne Roiá꞉ner ianhá꞉onkwe.”

¹⁵ Tánon ne Samuel éhren shá꞉rehte tánon wahakthaíta tsi nontáre ne Gilgal nón꞉we. Ne roná꞉tiakes nonkweʼókons Saul neh wahonwásere tsi iashakotiatárahse ne ronterí꞉ios; iahón꞉newe Gilgal thóh ionsahonténhti Gibeah nón꞉we iathonnóiaʼke ne ne tsi tewatonhontsáien ne Benjamin. Ne Saul wasakó꞉sehte nonkweʼókons tsi nihá꞉ti ne rahón꞉ha ratikwekonhátie, káknon ne iá꞉iaʼk tewenhniá꞉we nihá꞉tikwe.

Rontateweieʼnénhtas Nahonterí꞉io

¹⁶ Saul tánon ne roién꞉ha Jonathan, tánon nonkweʼókons ne rahón꞉ha ratikwekonhátiesʼkwe thóh wahontatíteron ne Geba ne ne tsi watonhón꞉tsaien ne Benjamin; ók ne Philistine thóh ne nón꞉we Michmash thonanáhtaièn.

¹⁷ Tánon ne ratinahtakárias tahatiʼiákenhne ne tsi ronanáhtaien ne Philistines áhsen natonnihtiokwí꞉iakon; skentió꞉kwa thóh ne nó꞉kwati niahatiʼiérate ne Ophrah, tsi tiohontsá꞉ien ne Shual,

¹⁸ nó꞉ia kentió꞉kwa thóh neh nòkwahti niahatiʼiérate ne ne Beth-horon, tánon nó꞉ia kentió꞉kwa thóhʼne nó꞉kwati niahatiʼiérate ne ne tsi tionontáhere nétho ieióken nahonráhkwakon ne Zeboim tsi nieiawénon ne iahontsawenténhaʼke.

¹⁹ Nón꞉wa neh thóh nón꞉we iahón꞉ka thahonwahiatatsén꞉ri ne rawisthón꞉ni kwáh tsi niʼiohóntsa ne Israeronónke; ahsèken ne Philistine ró꞉nen, “Ne Hebrews kwáh iáh tahonhnón꞉ni nasarekówa khéhs nahshikwáras ne raotiriwá꞉ke”;

²⁰ káti ratikwé꞉kon ne Israerʼró꞉nons thóh niahón꞉ne tsi taʼtíterons ne Philistines ne nahonwatiʼiotí꞉ionse ne raotitarakarát꞉tostha ahotsiweiónta, oweiónta, ató꞉kens, khéhs iontkwiriákstha;

²¹ Tsi nasakotinatónkwen tékeni kowánens kwé꞉nis tsi enhatiʼiothí꞉ie ne ietarakarahthóstha ahotsiweiónta, ók noweiónta énska niwá꞉ha kwé꞉nis, tánon énska niwá꞉ha kwé꞉nis tsi enhatiʼiothí꞉ie nató꞉kens tánon tsi ensathitakwarísi neiotsiweiotontí꞉io.

²² Káti neh thóh wenhniserátekwe nateriʼiósera kák niká꞉ièn asarehkó꞉wa ó꞉ni nashí꞉kwara iáh teshotitsénhrion nahatiháwake ne tsikʼón꞉ka nonkweʼshón꞉ʼahs ne ratikwekónkwe ne Saul ó꞉ni ne Jonathan; ók Saul tánon roién꞉ha Jonathan nihá꞉wakwe.

²³ Nón꞉wa ne raotitió꞉kwas ne ronterí꞉ios ne Philistines iehonatʼthaʼhíten tsi niehiotohétston ne Michmash.