1 Samuel 12 - Ohiatonhseratokénti

Samuel Tonshaʼsakonón꞉weron Tsi Éhren Énsrehte Ne Nón꞉we

¹ Ne Samuel wasakawénhaʼse ratiʼkwé꞉kon NʼIsraerʼró꞉nons, “Kwáh kwatahonsatáton ní꞉se tsi niskwaró꞉ri, tánon rí꞉teron ne ronnontí꞉io nahontatsiʼsewaniaró꞉taroke.

² Sewatkátho, ó꞉nense ronnontí꞉io tsiʼsewahentenhsehá꞉tie; ó꞉nen ní꞉i onkeksʼténhaʼne tánon onkenhʼrá꞉tenhne, ók akenekenterontserá꞉shón꞉ʼahs sewakwé꞉kon. Kwáh kwenʼentenshehátiesʼkwe kwáh sitewatiónhaʼkwe tsi ní꞉iore nón꞉wa wenhniseráte.

³ Kénʼen í꞉kes; serihwanírat naskatʼkónten raoʼhén꞉ton ne Roiá꞉ner tánon raoʼhén꞉ton ne roʼiatarákwen. Ónhka raoʼtshé꞉nen ne teonákares tionhnhónskwaron iehiʼiaténha? Khéhs ónka raoʼtshénen tehahóntes iehiʼiaténha? Khéhs ónhka ahinikonraténhni? Ónhka ahironhiakénton? Khéhs ónhka ratsanáke nón꞉we nahontónkʼkha tsi tahionkhetsiketároʼse ne ne tsiaʼtahonkateronwékon? Seriwaní꞉rat naskatʼkónten tánon kwáh kiʼténtʼtion tsi nahó꞉ten ne iahónkʼkhake.”

⁴ Wahonhní꞉ron, “Ní꞉se iáh teskwanénskwen khéhs ó꞉ni naʼskwaronhiaʼkénton khéhs niaʼhisáhake nón꞉kak iontsanáke khéhs nón꞉kak akó꞉ren akénhake.”

⁵ Wasakawénhase, “Ne Roiá꞉ner raʼriwaní꞉rats tsi tsisewák꞉konte, tánon ne roʼiatarákwen ne raʼriwaní꞉rats nón꞉wa wenhniseráte, nʼèthoh ní꞉se tsi iáh othènen tesewakʼtsénrion ne kaʼtsaná꞉ke.” Tánon wahonhní꞉ron, “Raónha kiʼ rariwaní꞉rats.”

⁶ Samuel wasakawénhase nonkweʼókons, “Ne Roiá꞉ner ne roʼriwaniráton, tsi raónha saʼkoiatarákwen ne Mahís ó꞉ni ne Aaron tánon theʼtesakoiaʼtínekenʼen ne sewashotʼtseraokonhkénʼen tsi tewatonhón꞉tsaien ne Egypt.

⁷ Nón꞉wa sathotási, neh nahón꞉ton akonriwénhtase raohén꞉ton ne Roiá꞉ner, tánon kwáh enkonrihowanáhten akwé꞉kon ne raoʼnonstá꞉tshera ne Roiá꞉ner tsi nioʼtierá꞉nion ne sariwá꞉ke ó꞉ni ne seshotʼtonkonkénʼen.

⁸ Nó꞉nen ne Jacob tánon ne raoʼwátsire thóhʼnón꞉we niaʼhónhne Egypt tánon ne Egyptró꞉non wahonwatiʼronhiákente, eʼthóhʼne ne sewashotʼtseraokonhkénʼen iatonséntʼtho rahonhá꞉ke ne Roiá꞉ner tánon ne Roiá꞉ner ne iaʼshakoténieʼte Mahís tánon Aaron, roʼnón꞉ha kiʼ thontasakotiʼhiatínekenʼwe ne sewashotʼtserokonhkénʼen ne Egypt nón꞉we, tánon kén nón꞉we niwahtonhóntsaʼien nahonwatíteron tsi nón꞉wa nón꞉we nítewas.

⁹ Ók iáh othènen karí꞉wa tehonhiónhni ne Roiá꞉ner Raotiní꞉io; tánon ne Roiá꞉ner iashakotsakwarísi thóh tánon wasakórion áhsen nihá꞉ti niahonwanatsiatónti né꞉ne Sisera ne ranenrakwení꞉iokwe ne ronterí꞉ios ne Hazor, tánon ne Philistines, tánon ronontí꞉io ne Moab.

¹⁰ Eʼthó꞉ne iathonséntʼtho rahonhá꞉ke ne Roiá꞉ner, tánon wahonhní꞉ron, ‘Ionkwarihwanerenhákskon, tsioríhwa tsi entsitewaʼtewenhthéton ne Roiá꞉ner, tánon ne waeʼthiʼió꞉tense ne Baal tánon ne Astartes; ók ó꞉nenh kiʼ saskwaniá꞉kenk ne rontsanákes ne ionkíswens, tánon í꞉se enskwaiótenʼse.’

¹¹ Tánon ne Roiá꞉ner neh iesakoteniéton ne Jerubbaal tánon ne Barak, tánon Jephthah, tánon Samson, tánon ne saietshiniá꞉kente tsi tonsahonwatishiotarísi ne ietsíswenhs tsi naʼteietsiʼiakwatasé꞉ton; tánon ní꞉se iáh teiówenk nahisewaterónhseʼke.

¹² Ók nó꞉nen satsisewá꞉ken ne Ronnontí꞉io Nahash ne ne Ammonró꞉non tsi atsisewahtʼkón꞉ten, waskwenhá꞉se, ‘Iáh, ók ronnontí꞉io enteshonkwaniarotaró꞉ke,’ awerohátien tsi Roiá꞉ner sewaní꞉io raón꞉ha sewanontí꞉io í꞉ken.

¹³ Sewatʼkátho, ne kí꞉ken ne ronnontí꞉io tsi niká꞉ien tsisewaiatará꞉kwen, asèken raón꞉ha tsisewariwanónton; sewatʼkátho, ne Roiá꞉ner wahó꞉teron ne ronnontí꞉io raón꞉ha atsisewanontí꞉ioke.

¹⁴ Tó꞉ka entsisewaʼkweniénstaʼke ne Roiá꞉ner tánon tentsisewarihwásnieʼse tánon ensewatahón꞉satate ne raowenhnaókon tánon iáh tahisewatewenhnarákwahne ensewatʼkón꞉ten ne raorihwatátʼtsheras ne Roiá꞉ner, tánon tó꞉ka tesenitsáron, í꞉se tánon ne ronnontí꞉io tsi raón꞉ha tniaʼniaró꞉taron kwáh entsehsení꞉sere ne Roiá꞉ner Sewaní꞉io, kwáh kiʼ enʼioianeréhake;

¹⁵ ók tó꞉ka ní꞉se kwáh iáh tasatahónsataʼte ne raowénhna ne Roiá꞉ner, ók tenserihóroʼke ensatkónten ne raorihwatátʼtsheras ne Roiá꞉ner, eʼthó꞉ne ne ratsanáke ne Roiá꞉ner kwáh kiʼ ensatkónhten ó꞉ni ne sanontí꞉io.

¹⁶ Nón꞉wa ne kiʼ aorí꞉wa satotá꞉si tánon satkátho kí꞉ken ioriowá꞉nenh nétho ne Roiá꞉ner tsi nenhá꞉iere ne sahén꞉ton tsi nateská꞉nere.

¹⁷ Iáh kén ná꞉ʼa tsi niʼieientkwákwas noná꞉tsa nón꞉wa wenhniseráte? Í꞉i kwáh ienhináton ne Roiá꞉ner, neh nahontahaténieʼte nakawéh꞉re ó꞉ni aiokenhnó꞉re; tánon ní꞉se kwáh ensewateriéntaraʼne tánon ensewatkátho tsi niʼioriwatsáni nètho ní꞉se tsi nishewatiéren raohén꞉ton ne Roiá꞉ner, ne tsi nisewarihwanónton naʼisewanontiʼiotseraiéntaʼne.”

¹⁸ Káti ne Samuel iahonáton ne Roiá꞉ner, tánon ne Roiá꞉ner tahaténieʼte ne owèrha tánon nokenhnoréhsera nètho wenhniserá꞉tekwe; tánon onkweʼtakwé꞉kon teiotenonianíton tsi nahonwakwéniensʼte ne Roiá꞉ner ó꞉ni ne Samuel.

¹⁹ Onkwetakwé꞉kon wahonwénhaʼse ne Samuel, “Iasaterénnaien rahonhá꞉ke ne Roiá꞉ner Saní꞉io ne ne sanhatseraókons raotirihwáke, ne káti ne tó꞉sa ahitewénheʼie; asèken iehionkwaiéston nonkwarihwaneraháktsheras ne iorihwatsáni tsi ionkwarihwanónton nahionkwanontiʼiotseraién꞉tane niatetewaiá꞉ti.”

²⁰ Tánon ne Samuel wasakawénhase nonkweʼókon, “Tó꞉sa sewaterónsek; ní꞉se thóh akwé꞉kon nisewaiéren kiʼ ioriwatsáni, tó꞉sa sewatiaʼtonhtáko tsi tsisewanonterátie ne Roiá꞉ner, ók tetsisewarihwásnies ne Roiá꞉ner kwáh sewehrhiaʼsakwékon kénhak;

²¹ tánon tó꞉sa sewatkwátonf ne ne ahisewá꞉sereh ne iáh othènon tekariwasthaténions nètho iáh takaʼkwé꞉ni nahisewaiénawaʼse khéhs ahisewanónstaʼte, asèken iáh kiʼ othenènen tekaʼrihwástha.

²² Asèken ne Roiá꞉ner iáh kiʼ tasakokkénrate ne raonkwetashón꞉ʼahs, ne raosennakó꞉wa akarihónhni, tsioríhwa tsi ronikonriʼió꞉on ne Roiá꞉ner ne nón꞉kwe atsitiónhni ne iatehaiá꞉ti raoriwá꞉ke.

²³ Sénha isiʼnónwe nakeriwá꞉ke í꞉ken, ahí꞉non nikénhak nakeriwá꞉ke nètho ne kwáh akeriwanerá꞉ke tsi nókwah ne Roiá꞉ner tsi akatʼkáwe tsi koniaterennaién꞉ni; tánon kwáh enkonrihón꞉nien thohʼnónhwe ne ioiá꞉nere tánon ne tkariwaié꞉ri.

²⁴ Nek khók tsi tskweniénsták ne Roiá꞉ner, tánon tetieriwásnies sariwatokénhak kwáh serhiasakwékon kénhak; asèken tetiatóret tsi nahoténsons ne iorihowá꞉nens tsi niʼiatieráse.

²⁵ Ók tó꞉ka shé꞉kon ensewariwanerakʼhák꞉seke, ní꞉se kwáh kiʼ Ní꞉io ienhiónhewe, tesenitiaʼron í꞉se tánon ne sanontí꞉io.”