1 Samuel 10 - Ohiatonhseratokénti

¹ Samuel wahtatʼtshétaʼkwe ne wateienará꞉kwa tánon ranontsíne ne Saul tareienáweron, tánon watonoronkwánion; wahén꞉ron, “Ne Roiá꞉ner wahiaʼiataráko nashehéntenhse raonkwetaʼshón꞉ʼahs Israerʼró꞉nons. Í꞉se kwáh ensheʼiateriwatsʼterístase ne raonkwetaʼshón꞉áhs ne Roiá꞉ner tánon í꞉se kwáh enshenónsthate tsi nòkwah ne rontsanákes ne ronwatíswenhs natʼtatsesónhas ratinakeréhnion. Nón꞉wa neh kí꞉ken nenhshenréstaʼkwe nètho Roiá꞉ner tsi í꞉se iahíaʼtarákwen nasheʼiateriwatsʼterístaʼse ne raonkwetaʼshón꞉ʼahs Israerʼró꞉non. Í꞉se kwáh iahiaʼtaráhkwen—nasheʼiateriwatsʼterístaʼse neh kwáh raón꞉ha rahonkwetaʼshón꞉ʼahs:

² Nó꞉nen thentsiʼtsiaʼtekhási nón꞉wa wenhniseráte ní꞉se kwáh tensewatát꞉ken teniʼiáse tehnón꞉kwe ákta ne Rachel tsi tkaiá꞉ta thóh ahotonhwenhtsá꞉ke ne Benjamin thóh nón꞉we Zelzah; enhieʼsén꞉hase, ‘Ne tekonhón꞉tes nètho sheʼiatísaksʼkwe shonwahtiʼhiatatʼtsénhrion, tánon kiʼ ó꞉nenh ne ianhí꞉ha rotʼkáwenh tsi tehothatenikonráhrakwe ne ahotiriwáhke tánon í꞉se teshothatenikónrahre, ratónhnions: Óh ónhte nátiere tsi nòkwah ne riʼién꞉ha?’

³ Eʼthóhʼne ní꞉se kwáh èhʼthoh ienʼseshaténhti kwáh kén niió꞉re nienhénse tánon iénsewe tsi tsorónhtote ne kahrí꞉ton ne Tabor nón꞉we; áhsen niháti roʼnónhkwe Ní꞉io wahonwahsénhnaienʼne ne ne Bethel nón꞉we kwáh thóh nón꞉we iatenhsewatát꞉ken, saiá꞉ta áhsen niháti kaiatákeras owí꞉ra sakoiatenháwi, nó꞉ia ne ne rahawíhne áhsen nikanatarákes, tánon nó꞉ia ne ne rahawíhne ne otsítsa watʼnekarákwah ne ne kané꞉honk iotsatawíton.

⁴ Ne roʼnónha kwáh tenhieʼsanónhweron tánon entiéshon tekanátarake, ní꞉se kwáh kiʼ enshié꞉na.

⁵ Eʼthóhʼne ó꞉nen ní꞉se kwáh thóh iénseʼwe ne Gibeath-elohim, èhʼthoh nón꞉we ne Philistines raoʼtitió꞉kwa ronterí꞉ios nihatíteron; èhʼthoh nón꞉we, tsi iesehnatáraʼne, ní꞉se tensewatátʼken skentió꞉kwah rotiʼtókense tahonahnontasnenhtonhátie tsi tionʼterenhnaientákwa ratihawinóntie oʼnhowaʼkó꞉wa, niwá꞉a ienakwahékʼta, ohoró꞉ta ionterennoʼtákwa, tánon ne oieri nikarenhsotarókʼkon ionterenhnoʼtákwa raoʼtihén꞉ton ronaterénhnoʼte; kwáh èhʼtho nenhotiʼiátawen tsík tshieiawé꞉nhon tsi iehatiriwaʼkénseron.

⁶ Eʼthóhʼne ne raoʼnikonratokentítshera ne Roiá꞉ner tenhiotenonʼianitónhake tsi ensatiaʼtakwení꞉ioste, tánon ní꞉se kwáh èhʼthoh nenhsaʼiátawen tsi tsheʼiawé꞉nhon tsi ienseriwáken tánon ronón꞉ha enseiatiáʼtarase tánon ó꞉ia nenshonʼkweʼtó꞉tenhne.

⁷ Nón꞉wa nó꞉nen kí꞉ken waʼtenientensʼtánions ensatʼkathóseron, thóh nátier tsi nisatʼkáthos ne tkaʼriwaié꞉ri, asèken Ní꞉io ní꞉se senikwé꞉kon.

⁸ Tánon ní꞉se kwáh èhʼthoh niaʼháse Gilgal í꞉se sénhtet tsi ní꞉iot ní꞉i; ehʼthóhʼne thóh iénʼkewe tsi téhses ne ne akateriwaʼténtsiaʼte akaʼtenaskwátʼtsahate tánon ne ahontátiesʼte ne wateskóntes neh natakaritétsheras. Tsá꞉ta nón꞉ta ensaterá꞉rate tsi ní꞉iore ienʼkoniatórenhne tánon nakonhnatónhase tsi nénhshieʼre.”

⁹ Tsi natonsahatʼkaraténi ne Saul ne tahonsahiaʼtekhási ne Samuel, Ne Ní꞉io tontaháwen ne Saul á꞉se nonsaronhnáwenhne; tánon kí꞉ken ne kaienteresʼtákwen akwé꞉kon wakaʼná꞉nen neh siwenhniʼseráte.

¹⁰ Nó꞉nen ne Saul tánon ne raonhá꞉tshera shahá꞉newe Gibeah, shotiʼtiókwa ne rotiʼtókense wathonʼtátken. Thonʼtaiawénhstsi ne raoʼnikonriʼiósera ne Ní꞉io wahotsiénhase, tánon wasakotiaʼthá꞉rase tsi tsahatiʼieránion tsi wathaʼtinónhniaʼkwe ó꞉ni teotihenré꞉tha.

¹¹ Nónen ratiʼkwé꞉kon nohén꞉ton thonwahientériʼkwe sahontká꞉tho tsi ní꞉iot tsi iaharíwaken skátne ne ronátiakes rotiʼtohkén꞉se, nonkweʼókons watonʼtaténhase, “Óh nahoiátawen ne Kish roʼiénha? Ne Saul ó꞉nenh kénh non꞉néʼe rotóhkenʼse wahá꞉ton?”

¹² Rónkwe thók tatehatáties wahariwaʼnón꞉ton, “Ó꞉nka ne ronwaní꞉ha?” Ne aorí꞉wa tekariwakentón꞉kwen ónton, “Kwáh kén ó꞉ni ne Saul rotokén꞉se rotón꞉ʼon?”

¹³ Nó꞉nen ne Saul sahá꞉sa ne tsík tsheʼiawénhen tsi teonionhniákwen tánon tehohenrétha, tsi ietsienharákwa niahá꞉re thóh tsi tionhniáhere.

¹⁴ Saul rononhá꞉ʼa wahawénhaʼse ó꞉ni ne raksá꞉ʼa, “Kanón꞉we iésheʼnesʼkwe?” Tánon watariwaserá꞉ko, “Iakhiʼiatisákʼkhonhne tekonhóntes; tánon nó꞉nenh iáh tetsakhiʼiatatʼtsénhrion, Samuelʼke niahá꞉kene.”

¹⁵ Ne Saul rononhá꞉ʼa wahénron, “Takʼró꞉ri nahó꞉ten ne Samuel wahiaró꞉ri.”

¹⁶ Saul wahawénhase ne rononhá꞉ʼa, “Washonkeniʼró꞉ri nètho tekonhóntes tsi skonwatiʼiatatʼtshénhrion.” Ók nahoriwaʼshón꞉ʼahs ne kanontiʼiótshera, ne tsi nihotharákwenhne ne Samuel, iáh thaʼhóten tehoró꞉ri.

Saul Wahonwariʼhó꞉wanaʼte Tsi Ronontí꞉io

¹⁷ Samuel iasakonónkʼkon nonkweʼókons skátʼne ahón꞉ton ne ne kariwiʼiostónhtsera tsi ahonhnitioʼkwarórohke ne Mizpah nón꞉we.

¹⁸ Tánon wasakawénhase, NʼIsraeró꞉nons, “Asèken ráton ne Roiá꞉ner, ne sakoʼNí꞉io NÍsraerʼronónke, ‘Tekwahiaʼtínekenʼen ne Egypt, tánon wakwaniákenʼte tsi nó꞉kwah ne rontsaʼnákes ne Egyptró꞉nons tánon tsi nòkwah ne rontsaʼnákes akwé꞉kon ne tsi kanontiʼiotseraʼkérons nètho ietsironhiaʼkénton.’

¹⁹ Ók ón꞉wa wenhniseráte waʼtsisewakénron ne SewaʼNí꞉io, raʼón꞉ha tsi sewanónstats tsi nókwah ne kakaronniátsheras ó꞉ni kanikonratʼséntsheras; tánon wesewénhron, ‘Iáh! Ók takwanontiʼiótseʼron.’ Ó꞉nen oriwiʼioʼónwe thóh tesewátann raoʼhén꞉ton ne Roiá꞉ner ne ne tsi nisewentiokó꞉tens ó꞉ni tsi nisewenhtaró꞉tens.”

²⁰ Eʼthóhʼne ne Samuel kwáh shatiʼtiokwátʼtshons NʼIsraerʼronónke tsi wasakotsiowaserónhni, tánon ne ne Benjamin nahotiʼtaró꞉ten wahonwatiʼiatará꞉ko.

²¹ Eʼthóhʼne ne Samuel wahariwásere ne raoʼtiwátsires ó꞉ni ne raoʼtarashón꞉ʼahs ne Matrites ákta nahontahónhne tánon ne ne raoʼtitá꞉ras ne Matrites wahonwatiʼiataráko, tánon Saul ne wahonwaiaʼtaráko ne roní꞉ha ne ne Kish. Ók nó꞉nen sahonwahiatisákʼke iáh tehiotón꞉ʼon nahonwahiaʼtatʼtsénrion.

²² Sók kiʼ á꞉re shé꞉kon sahonwariwaʼnóntonhse ne Roiá꞉ner, “Nètho rón꞉kwe kénʼen kénh nithaʼwénon?” Tánon ne Roiá꞉ner wahén꞉ron, “Sewatʼkátho, iehotatiataséh꞉ton tsi nón꞉we nihionthaʼkweniaientákwa ne ionteriʼiosthákwas.”

²³ Eʼthóhʼne iatonʼrátaʼte tánon tontahonwaiaʼténhaʼwe. Tsi ó꞉nen thóh wathátaʼne raotiʼnenhrí꞉hen nonkweʼókons, kwáh ratiʼkwé꞉kon nieʼsakonenhiaʼkénhnion.

²⁴ Samuel wahshakawénhaʼse nonkwetaʼkwé꞉kon, “Tsiʼsehwákens ken tsi nikáien ne Roiá꞉ner roʼiatarákwen? Kwáh iáh ónhka thóh tehaiató꞉ken tsi nítsion.” Tánon onhkweʼtakwé꞉kon watohtihénrethe, “Karí꞉wes arónhnheʼke ne ronontí꞉io!”

²⁵ Samuel washakoró꞉ri nonkweʼó꞉kons ne raioianerénseras ó꞉ni tsi niʼioterihwaiénhni ne kanontiʼiótshera; tánon kahiatonhserá꞉kon wahaiá꞉ton tánon thóh wahá꞉ien raoʼhén꞉ton ne Roiá꞉ner. Nèthoh nón꞉we iahatakweʼniaien tsi nón꞉we niʼiotokénti. Eʼthó꞉ne ó꞉nenh washaʼkoró꞉ri tsi thotiʼnonsó꞉ton niaʼhonsahón꞉ne.

²⁶ Saul ó꞉ni sahaténti tsi thóh nónshoʼte ne Gibeah nionshá꞉re, tánon ne skátne nionsahónhne ne ronterí꞉ios tsi nihá꞉ti ne Ní꞉io washakonikonrá꞉reke nahonwatiátarase.

²⁷ Ók ótiakes ne iáh ohthé꞉nen tehatirihwásthas wahonní꞉ron, “Ónh ní꞉iot tsi ahakwéni kí꞉ken rón꞉kwe nashonkwanónstaʼte?” Wahonwaʼkén꞉ron tánon iáh ohthé꞉nen tethonwaʼhawiʼtén꞉ni nahón꞉ion. Ók ne raón꞉ha skénnonk thahataʼtónhni.