1 Samuel 1 - Ohiatonhseratokénti

Samuel Wahrenhnákeraʼte Tánon Wahonwatonʼnahéraʼse

¹ Tho nón꞉we ronkwetaʼtóken ranákerehkwe ne ne Ramathaim-zophim, ne ne tsi ionhniarónhnion kanakeraseráien ne Ephraimke, Elkanah ronwáiatsʼkwe ne roní꞉ha ne ne Jeroham, ne roshót꞉tha ne ne Elihu, Tohu tsi tahawatsiraʼtátie, ne ne Zuph naohtaró꞉then, Ephraimró꞉non.

² Tekeniʼiáhse teoniá꞉konhne; Tieiáta Hannah iontátsiats, nó꞉ia Peninnah neh iontátsiats. Ne Peninnah iakowiraʼiéntakwe, ók ne Hannah iáh neh othènen teiakowíraien.

³ Nón꞉wa kí꞉ken rón꞉kwe tshiaʼteiohserá꞉ke raoná꞉takon enthaténti ne nahosennaʼiénhna tánon katshénen enhoteskóntaʼse ne Sakoiá꞉ner ratironhiakeró꞉nons thóh nón꞉we Shiloh, tsi thóh nón꞉we ne teniiáhse Eli sakohioʼokónahs, ne ne Hophni tánon Phinehas, ne ne Roiá꞉ner raoʼtsihénstaʼtsis.

⁴ Ne thóh wenhniserátekwe nó꞉nen ne Elkanah roteskón꞉taʼkwe, kwáh tó꞉ken tsi ní꞉kon ensakowaránonte ne ró꞉ne Peninnah tánon rathiʼkwékon nakohioʼokónahs ó꞉ni nakohioʼokónahs tsionatʼthonwísens;

⁵ ók ne Hannah kwáh ne watahiá꞉sheren tsi tashakáwen, tioríhwa tsi nishakonorón꞉khwa, iaweronhátien ne Roiá꞉ner tsi ronhó꞉ton nahonháke tsi nón꞉we nihiontonniátha nowirá꞉ha.

⁶ Ne Peninnah kwáh sés eniakotsirón꞉nien, neh naiaʼkonakónhni, tsioríhwa ne Roiá꞉ner tsi ronhonónhtonh tsi nón꞉we niʼiontonniátha nowirá꞉ʼa.

⁷ Káti thóh niʼiotonhátieʼne thó꞉ka niʼioseráke niahá꞉he; kwáh tsi niiotʼkáte thóh nienhén꞉ien raononsaʼtokentíke ne Roiá꞉ner, ne Peninnah tsió꞉konte enhiakonakónhni. Ne kiʼ aorí꞉wa ne Hannah thenhionsént꞉tho tánon iáh thataionská꞉on.

⁸ Ne ró꞉ne Elkanah washaʼkawénhaʼse, “Hannah, nontiéren tsi tesashén꞉tos? Nontiéren tsi iáh thaʼteshatskáʼons? Onhniʼiotiéren tsi thiʼsanikonrénhen? Iáh kén sén꞉ha í꞉i thaʼtekonhiaʼteriéntare tsi ní꞉iot nʼoiéri nahiʼsawiraʼién꞉take?”

⁹ Nó꞉nenh sahathiʼkwénhtaʼne tánon sahathiʼnikirénhsi thóh nón꞉we Shiloh, Hannah watiétaʼne tánon thóh watiétaʼne raohén꞉ton ne Roiá꞉ner. Nón꞉wa ne Eli ne ne ratsihénstatsi thóh renskwáhereh ákta tsi kanonkáronhte kanawahátote raoʼnonsatokentikó꞉waʼne ne Roiá꞉ner.

¹⁰ Né Hannah kwáh í꞉ken tsi iakawerhiaʼsanónwaks tánon iahonterénhnaian raonhá꞉ke ne Roiá꞉ner, tánon wationsént꞉tho otsitòwa.

¹¹ Nakaónha kén ní꞉iot tsi wahonráhratsʼte: “Ó Sheiá꞉ner ne ronterí꞉ios ratironhiakerónons, tó꞉ka ní꞉se kwáh asheiatkátho tsi niʼiakonhnátsen ne sanhá꞉tshera, tánon aonshaskeiá꞉rahne, tánon tó꞉sa sheʼiatanikónren ne sanhá꞉tshera, ók enteshé꞉ion ne sanhá꞉tshera roskerakéte owirá꞉a, eʼthóhʼne kiʼ enhí꞉teron sahén꞉ton kwáh ne ne nazirite kwáh tsenshatonhnók꞉ten. Iáh thahanekiráke notsítsa khés niakononwahratóntha, eʼthóhʼne kwáh kíʼenthí꞉ion Roiá꞉ner kwáh tsi nikarí꞉wes enrón꞉nheke tánon iáh tsaʼkaiéna ne ionthatenonkarhiákstha ne ranontsíne.”

¹² Tsi ieiaʼkokonʼtákwen iakoterénhnaièn raohén꞉ton ne Roiá꞉ner, ne Eli tsi iesakáronhte tehakáneraʼkwe.

¹³ Ne Hannah tsi iakoterénhnaien kwáh sakʼthí꞉ken; ieritsàke khók iotorhiáneron, ók iáh thaʼiontatewénhnaronhke; neh kiʼ aoríhwa ne Eli wárehre iakonèka.

¹⁴ Sók kiʼné Eli wasakawénhaʼse, “Tóh nikaríhwes ní꞉se ne enshón꞉niaʼte tsi nisanéka aiesakénhseke? Wáhs sasatnekókef.”

¹⁵ Ók ne Hannah watierihwaseráko, “Iáh, Atiá꞉ner, Í꞉i neh sewakatʼthonwísen kwáh í꞉ken tsi tewakanikón꞉rare; iáh tewatʼnekíren notsítsa khéhs ne ionekaní꞉ron, ók thóh iewatserá꞉ton nakatón꞉nhets raohén꞉ton ne Roiá꞉ner.

¹⁶ Tóh꞉sa thóh ní꞉ioht tsi tesheiatkáneren ne sanhá꞉tshera tsi iáh othènon taierihwasthátonʼke tsaʼkoktonwísen, asèken tsi nitʼkewenhníneʼkens ne tsi naʼtewakanikón꞉rahre tánon waktsironhniháties tió꞉konte.”

¹⁷ Eʼthóhʼne ne Eli watharihwaseráko, “Wáhs skénnonk sashaʼténhti; ne Sakoní꞉io NʼIsraerʼró꞉non ahontáhion tsi nahó꞉ten watserihwanóntonhse.”

¹⁸ Tánon ne Hannah wahéron, “Sheʼríhon ne sanhá꞉tsera aietʼtsénri nahontesariwaiériʼke tsi naʼteskánereh.” Eʼthóhʼne ne iónkwe tsi tewanonwétstha nionsáhwe, waʼtewatsʼkáhon tánon wakanekíra skátne ne ró꞉ne, tánon ne kakonsàke iáh ó꞉nenh tewé꞉ne nahonsaionikonraksénhseke.

¹⁹ Oronkétsʼtsi wahontkétsko tánon wahonwasénhnaien ne Roiá꞉ner; eʼthóhʼne ó꞉nenh tsi thoʼtinónshoʼte nionsahón꞉ne thóh nón꞉we Ramah. Ne Elkanah sakoientériʼkwe ne ró꞉ne Hannah, tánon ne Roiá꞉ner shaʼrehiáraʼne.

²⁰ Kháreh ó꞉nenh iakáhewe ne Hannah onthá꞉wa tánon wahonákeratsʼte ne roʼién꞉a. Samuel washonatonkwe, asèken, wakénron, “Neh ririhwanonhtón꞉ni ne Roiá꞉ner.”

²¹ Ne rón꞉kwe Elkanah tánon rathí꞉kwe ne raoʼnóns꞉kon rathí꞉teron iahón꞉ne nahonwawenhní꞉iosʼte ne Roiá꞉ner; ne niaʼteioseráke rateskón꞉thaʼkwe, tánon nahakárhiaʼke tsi nihorahrátsʼton.

²² Ók ne Hannah iáh ne tseiawénon, asèken waoró꞉ri ne ró꞉ne, “Kwáh tsi niʼiostóre ne raksá꞉a enhátsʼtarontáko, enthiʼiaténhawe, ne raónha ahón꞉ton nahaténesʼte raohén꞉ton ne Roiá꞉ner, tánon thóh aréh꞉seke tsi nénhwe akénhake; kwáh enhiwenhní꞉ioste tsi ní꞉iot ne nazirite ne ne tsókonte enkénhake.”

²³ Ne shaʼkoksténha Elkanah wasakawénhase, “Thóh nátsier tsi nahó꞉ten akénhake ioiá꞉ner ne sarihwáke, saterá꞉rat kiʼ tsi niʼió꞉re enstarontáko; nekʼkhók—aiá꞉wens ne Roiá꞉ner ahariwaníraʼte ne raoʼwénhna.” Káti ne iónkwe thóh onthatí꞉teron tánon wahostarónhten ne roiénha, tsi nió꞉re iahostarontáko.

²⁴ Nó꞉nen sahostarontáko, aón꞉ha iahoiaténhaʼwe, skát꞉ke ne áhsen naʼtehaosheriʼiákon tsonónskwaron rátsinn, tánon skaʼiára othésera, tánon otsítsa skatshéta. Thóh niaʼohiaténhaʼwe raoʼnonsatokentíke ne Roiá꞉ner ne ne Shiloh nón꞉we; tánon ne raksá꞉a kénk shiʼthóion.

²⁵ Eʼthóhʼne wahonwárhio ne tsonónskwaron rátsinn, tánon ne raksá꞉a raonháke ne Eli niaʼhonwaiaténhaʼwe.

²⁶ Tánon wakén꞉ron ne Hannah, “Ó, Atiá꞉ner, tsi nishón꞉nhe, Atiá꞉ner, Í꞉i ne kón꞉kwe ne kén꞉en ít꞉tawe sahén꞉ton, wakaterenhnaién꞉taʼkwe rahonháke ne Roiá꞉ner.

²⁷ Asèken ne kí꞉ken ne raksá꞉a wakaterennaién꞉taʼkwe; tánon ne Roiá꞉ner tahá꞉kon tsi nahó꞉ten rihrihwanontónhni.

²⁸ Káti wahiwenhní꞉ioste ne raksaha raonháke ne Roiá꞉ner, kwáh tsi nenronhnesonke ne raksaha.” Tánon wahonwasénhnaien ne Roiá꞉ner neh nón꞉we.