1 Kings 3 - Ohiatonhseratokénti

Ne Solomon Wahaterénhnaien Tsi Nòkwah Naʼtenikonratʼthokhátsera Íken

¹ Ne Solomon waʼthiaterihwáiesʼte ne ronhnonhtí꞉io ne Egypt ne tsi wahotíniake ne sakoiénha. Tashakohiathénhaʼwe ne thóh nónhwe ne Táwit rahonáthakon nónhwe naienákereke tsi nióre iahanonhshí꞉sa ne rahononhtiʼiótsera kanónh꞉sa, ó꞉ni Nononhsatokentiʼkówa, tánon wahathenhenróten tsi wathanatánaʼke ne Jerusalem.

² Nononhsatokentiʼkówa iaharèko tehonwanonhsonhniénhni ne Roiá꞉ner, tánon káti nonhkweshón꞉has shé꞉kon kíʼ tsikʼnonhwésons ne ietsienharákwakes nikonhwanateskónhtʼtha ne konhtitshénens.

³ Ne Solomon kwáh íken tsi roʼnorónhkwah ne Roiá꞉ner tánon rarihwásehre ne rohníha Táwit tsi nihorihwíson, ók kíʼ ó꞉ni ionatsokowánen sakowènthon ne konhtitshéns tsi sakotéskonhte ne tsikʼnonhwésons nikaiéntons ne ietienharákwahkes.

⁴ Iehioterátston ó꞉ni Gibeon nónhwe iéresʼkwe niahateskónhten tsioríhwa tsi thóh nónhwe ne kwáh tkasenhnowánenhne ne ietienharákwah tkaiénthaʼkwe. Tó꞉ka tewenhniáwe nikónhti konhtitshénens thóh nónhwe nisakotéskonhte ne tsi nitsawénhnon.

⁵ Né sihiokarasné꞉ha ne Roiá꞉ner atetʼtsenhserákon tsi wahothotháshiaʼse tánon wahorihwanónhtonhse, “Ónh nahó꞉ten tesathonhontsóni ní꞉i akónhion?”

⁶ Solomon watharihwasehráko, “Tiókonte sés kowánen kanoronhkwáhtsera senéston tsi nòkwah ne rakeʼníha Táwit, ne sanhátsera, tánon thorihwaiérihkwe, rorihwató꞉kenhne, tánon roʼrihwakwahríhshonhne tsi naʼtetsaterihwasónhteraʼkwe. Tánon kíʼ iaskónhthaʼkwe waʼtsenathónhase ne kowánen iorihwató꞉ken kanoronhkwáhtsera tsi thá꞉tion wahonekenteronhtseraʼiéntaʼne tsi rahónha nónhwa wenhniseráte rotkoráston ne rahonákʼthaʼke.

⁷ Ó Saiá꞉ner Sewenní꞉io, waskeríhon né tahonsahiʼnakʼthákwen ne rakeʼníha tsi rononhtí꞉iokwe, iawerohátien tsi kénk niʼtewatiónha tánon iáh tewakateriéntare onhʼní꞉ioht tsi akatʼkórasʼthe.

⁸ Kénʼen skát꞉ke iakwahnákere nonhkweshón꞉as né sehiatarákwen ne kwáh í꞉se ahishonkwetaʼsónhake akénhake, né nonhkweshón꞉as ne sóh꞉tsi ronatsiokowánen iáh thahónton nahonwanásehte.

⁹ Káti táskon ne atenikonhratʼthokhátsera ne tewakathonhontsóni nakhehiatʼkórasʼthe ne shonkwetaʼshónhas né꞉ne kaiáneren tánon nahonkateriéntaraʼke tsi naʼtetʼtsatʼthíhen ne ioiánereh tánon ne karihwáksenh. Tó꞉ka iáh, ónh ní꞉ioht tsi akʼkwéni nakhehiatkórasʼthe kíʼ eh nihonatsókwah shonkwetaʼshónhas?”

¹⁰ Ne Roiá꞉ner wahawerientí꞉io nètho Solomon tsi thóh ní꞉ioht tsi waharihwanónton,

¹¹ tánon káti wahawénhaʼse, “Né enhkarihónhni tsi atenikonhratʼthokhátsera wasehrihwanónhton né nahonthakarihwaiérike tsi asatʼkórasthe, tsi ní꞉ioht nashonnhésonhke khés ne kakwahtsésheras khés nahonhníheʼie ne tesehwatátʼtions,

¹² kwáh kíʼ thóh nénhtiere tsi nasehrihwanónhton. Kwáh sénha iawethowánen nathokhátsera entkónhion tánon ne kanikonhraienthátsera tsi ní꞉ioht nónhka akóren tsi nitsawénon tánon iáh shé꞉kon nónhka nakóren thóh tahonhsahiothónhake.

¹³ Kwáh ó꞉ni entkónhion tsi nahó꞉ten ne iáh tesarihwanónhton: tsi nisónhnhes tsi ensakwátieke ó꞉ni thenserénhsaronhke, sénha iawethowánen tsi ní꞉ioht nakóren thóh tiʼnonhtí꞉iokwe.

¹⁴ Tánon tó꞉ka enskewénhnarakwahke tánon enshatiénawasʼthe natianerénhseras ó꞉ni nakerihwatátʼtseras, tsi né niʼiohʼtónhne ne ianikénhen Táwit, kwáh entkónhion ne karíhwes ashón꞉nheke.”

¹⁵ Ne Solomon sahá꞉ie tánon wahát꞉thoke ne Rawenni꞉io tsi atetʼtsenhsehrákon tsi wahotháraʼse. Ethòne kíʼ Jerusalem niaháre tánon ohénton waʼthátaʼne ne tsi kanerókwahien ne Roiá꞉ner rahoterihwasehronhniátsera í꞉wa tánon né wahaterihwathénhtsaʼte katʼtshénen wahoteskónhten tánon ne skaríhwa íken wahótatsʼtse ne Roiá꞉ner. Ethòne ónen ratikwékon ne rahonkwetashón꞉ʼas ne ratirihwakweʼní꞉ios washaʼkhokwahéraʼse.

Ne Solomon Kwáh í꞉ken Tsi Ioríhwatsʼte Tsi Ní꞉ioht Tsi Wathahiató꞉reʼte Noríhwa

¹⁶ Énska wenhniserátekwe tekenihiá꞉se iotihiathatónhon iahá꞉kene rahohénton watkeníthaʼne ne Ronhnonhtí꞉io Solomon.

¹⁷ Skahiáta wahkénron, “Sanonhtí꞉io, kí꞉ken iónhkwe tánon ní꞉i né sakanonhsátke iakeníteron, tánon roskenrakéte onhkerihraiénhtaʼne tsi ná꞉he thóh kenhterónhthaʼkwe.

¹⁸ Tewenhniseráke onakènhke shiʼtawenhnakeráton ne riʼiénha, ahónha ó꞉ni wahowiraiéntaʼne. Onhkenonhwahatʼkok thóh iakeniterónhthaʼkwe ne kanónskon—iáh ónhka nakóren thóh téienskwe.

¹⁹ Ethòne énska tsi niwasónhtes iáh tehionikonhrónhni onhtsatakarátʼtho tánon waʼthohiatoráhrake ne roiénha tanon wahathonhrhiókʼten.

²⁰ Ontʼkètsko ne tsi niwasónhtes, waʼthohiáthakwe ne riʼiénha ne tiatákʼtha tsi nikaríhwes wakítasʼkwe, tánon ahonákʼthake niahohiaténhaʼwe; ethòne ne rawenhéion raksáha akenátʼthake wahohiatiónhniʼte.

²¹ Tsi wahó꞉renhne, shá꞉tie ne tahís꞉niene nakewíra, wakatʼkátho tsi rawenhéion. Sénha kíʼ ákta tsi wahíikenhénhion tánon wakatʼkátho tsi iáh í꞉i tehiʼiénha.”

²² Ók nó꞉ia hiónhkwe wakénronh, “Iáh! Né꞉ne rónhnhe í꞉i rihiénha íken, tánon ne rawenhéion í꞉se nènhne ehʼtshiénha!” Ne tiotserénhton iónhkwe thotakarihwasehráko, “Iáh! Né rawenhéion raksáha í꞉se ehʼtshiénha íken, tánon ne rónnhe í꞉i nènhne riʼiénha íken!” Tánon kíʼ rahohénton ne ronhnonhtí꞉io watʼkenirihwakéna.

²³ Ethòne ne Ronhnonhtí꞉io Solomon wahénron, “Tesehnitsá꞉ron tsáton tsi í꞉se tsi sehniʼiénha íken tsi nikáien ne rónhnhe tánon ne rawennhéion tsaton ne nó꞉ia iónhkwe roiénha íken.”

²⁴ Ashareʼkówa wahariwanónhton, tánon ne sonhtahatíhaʼwe,

²⁵ wahénron, “Thetsisewahiátsak ne raksáha ne shé꞉kon nirónhnhe tánon asénhnon taietʼtsihiawíhon ne skeʼnihiatátsons.”

²⁶ Tsi nikáien ne kwáh ronisténha íken, kwáh akwerhiasakwékon tsi ronorónhkwah ne roiénha, wahawénhaʼse ne ronhnonhtí꞉io, “Asatʼthontátʼtseke, Sanonhtí꞉io, tó꞉sa tsenonhwarhiákon ne raksáha! Ahónha rotsánawas!” Ók nó꞉ia iónhkwe wakénronh nenhné꞉e, “Tó꞉sa ónhka ne tehiakenihiáse shaʼtsatsénawast; wáhs kíʼ thetsiátsiak.”

²⁷ Ethòne né Solomon wahénron, “Tó꞉sa tsisewanonhwarhiákon ne raksáha! Né sonhwatsénawast ne tsiakohénton iakónhkwe—akahónha ne kwáh kanisténhsera íken.”

²⁸ Nó꞉nen nonhkweshón꞉as Nisraerʼró꞉nonke saherihwáronhke tsi natehohiatoréton ne Solomon, kwáh ratikwékon wahatiʼhiathánaʼne tsi nahonwakwéniensʼthe, tsioríhwa ronateriénhtare tsi Rawenni꞉io thó꞉wi ne atenikonhratʼthokhátsera naharihwakwahtáko nahioianeréhake nahó꞉ten ne tekanikónhrare.