Rm 7 - Meta’

Ɨnɔpɨ rɨ ənɨ ɨnamɨ

¹ Mbɨ bɔŋgɔb, mə wɨə ghàm əmbɨ ə mbə̀n mbe nɨ kyerɨ rɨkə. Chəi mbə̀ kyerɨ ni tɨkə tɨə yimə wə̀d àmei ənɨ ə nyùmə̀ we nɨ wɨ̀ yeʼ ɨkǎ ə?

² Tɨkə tɨə yim əyi namɨ mbɨ i nom ənɨ ɨnom we kɨrɨ i ɨkǎ. Àyɨə ɨnom we mɨ fə kwɨ, chəi tɨkə te wɨrɨ yim əməd.

³ Mbɨ bɨrɨ tɔŋ əməd ənɨ əyi nɨə niirɨə mbaŋə̀ ənɨ wɨ̀ chubɨ mbɨ ə mbaŋə̀ cherə ənɨ ɨnom məd kɨrɨ i ɨkǎ. Àyɨə ɨnom məd mɨ fə kwɨ, chəi tɨkə te wɨrɨ yim əməd. Wɨ̀ mɨ nam ɨnom cherə, ka məd yɨ i əyi nɨə niirɨə mbaŋə̀.

⁴ Mbɨ bɔŋgɔb, à yɨ əndəŋ əndəŋ ni chəi tɨkə wɨrɨ berɨ ənû ə mɔʼɔ nɨ ghɨ mbɨ nən ənjìm ə nyamnyod Kristo, ɨmbə̀ʼ mbə̀ yeʼ bə̂d wə̀d cherə. Mbə yɨə bə̂d wə̀d we nɨ Ŋwìə̀ nyaʼa zwemnɨ. Tɨ̀ yɨə bə̂d məd ɨmbə̀ʼ tɨ̀ faʼ əmbɨ ə Ŋwiə̀ ɨchî nɨ kuʼnɨ.

⁵ Ənɨ tɨ̀ nyaʼə ghɨ̀ ɨnû rɨbɔ̀ŋ, tɨfeenɨ ɨnû rɨbɔ̀ŋ te nɨ nyaʼa ɨŋga na, nɨ tɨkə nyaʼə nɔ̀ɔ̀rɨ̀ə̀, tɨə nyaʼə fàʼ ɨŋga ta nyamnyod ɨ ghɨ ni tɨ̀ kwɨ.

⁶ Àyɨə tɨ̀nîn, Ŋwìə̀ fə chɨ̀ əwa rɨ əton rɨkə, ɨmbə̀ʼ ɨghəm nɨ tɨ̀ fə kwɨ əmbɨ ɨghɨ mbe nɨ nyaʼə yim əwa ənɨ ə bə̂d ndəŋ. Əne yɨ ɨmbə̀ʼ tɨ̀ faʼ ənɨ ɨnə̂njɨ̀ fi we nɨ tɨ̀ berɨ ənjìm Əzwî, nɨ kaʼi əton tɨkə ənun te nɨ mbɨ nyaʼa ŋwaʼnɨ.

Tɨkə tɨə ghɨ̀ ni bə̂d ghɨ ɨnû rɨbɔ̀ŋ

⁷ Tɨ̀ kɨə wo gha ni yè ə? Ni tɨkə yɨ ənû rɨbɔ̀ŋ ə? Chə̂! À kɨ nɨ chə nyaʼa i rɨkə, njɨ chəi mə̀ nyaʼa kyerɨ ənû rɨbɔ̀ŋ. Njɨ chəi mə̀ nyaʼa kyerɨ ənû nɨ feenɨ ɨghɨ wə̀d cherə ənɨ chəi nyaʼa i ɨŋga rɨkə ni, “Tɨrə̀ feenɨ e ɨghɨ wə̀d cherə.”

⁸ Àyɨə ənû rɨbɔ̀ŋ ə nyaʼa zə əpan chè ənjìm ɨkə we nɨ gha ni tɨ wə̀d feenɨ i ɨghɨ wə̀d cherə, əne ghɨ̀ ni mə berɨ tɨkwɨrɨ ɨchî jìm nɨ feenɨ ɨghɨ bə̂d. À mɨ yeʼ nɨ chəi rɨkə, njɨ ɨnû rɨbɔ̀ŋ fə bə̀ kwɨ.

⁹ Mə nyaʼa kweʼ chub ɨkǎ ənɨ chəi nyaʼa i rɨkə. Àyɨə ənɨ rɨkə nyaʼa yeʼe, ɨnû rɨbɔ̀ŋ nyaʼa wɨrɨ nɔʼ,

¹⁰ əne mə nyaʼa kwɨ. Ɨkə we nɨ nyaʼa kaʼ ɨ̀tènɨ̀, nyaʼa chwi ɨ num ni tə yɨ ɨvɨ,

¹¹ ɨmbə̀ʼ ɨghəm nɨ ɨnû rɨbɔ̀ŋ nyaʼa zə əpan chè ənjìm ɨkə we, tambɨ əmɨ bə̀ zwiirɨ əmɨ.

¹² Əne tɨkə ə zeŋ, ənû ze nɨ Ŋwìə̀ nyaʼa sob ə bə̀ zeŋ. Zɨə təm kùʼnɨ̀ bə̀ bɔ̀ŋ.

¹³ Əghɨ ze nɨ nyaʼa bɔŋ ə wa nyaʼa yeʼe ɨmbə̀ʼ zwiirɨ əmɨ ə? Chə̂! À yɨ ɨnû rɨbɔ̀ŋ nyaʼa ghɨ ni mə̀ che ənjìm ɨnû mbe nɨ nyaʼa bɔŋɨ ghɨ̀ mbe nɨ tɨ̀ mbɨ zwiirɨ əmɨ. Əne tɨ̀ we tɨ̀ rɨ̀ zə ni ɨnû rɨbɔ̀ŋ yɨ ɨnû rɨbɔ̀ŋ, bə̀ zə ni ənjìm rɨkə, ɨnû rɨbɔ̀ŋ wɨrɨ bə chè əbɔ.

Ɨbid we nɨə màʼ ɨŋga wə̀d

¹⁴ Tɨ̀ kyerɨ ni tɨkə yɨ rɨ əmbɨ Əzwî, àyɨə chəi əzwî ɨŋga num. Mbɨ fə fen əmɨ ənɨ ə̀bòʼò əmbɨ ɨnû rɨbɔ̀ŋ.

¹⁵ Chəi mɨ ətu ə kɨrɨ zeŋ ɨmbə̀ʼ ɨnû mbe nɨ mɨə ghɨ̀ə̀, ɨmbə̀ʼ ɨghəm nɨ chəi mɨə ghɨ̀ ɨnû mbe nɨ mə kə̀bɨ. Mə wɨə ghɨ̀ yeʼ mbe nɨ mə̀ banɨ.

¹⁶ Mə mɨ yeʼə ghɨ̀ ɨnû mbe nɨ chəi mə̀ kəbɨ nɨ ghɨ̀, njɨ mə fə ben ni tɨkə ə bɔ̀ŋ.

¹⁷ Ɨchî nɨ zɨə yeʼ əne, kaʼi mɔ̌ ə wɨrɨə ghɨ̀ ɨnû mbɔ̂. À yɨ ɨnû rɨbɔ̀ŋ mbe nɨ yeʼ ɨŋga num ə ghɨ̀ə̀.

¹⁸ Mə kyerɨ ni chəi ənû ə chɔ̀m ə mɔʼɔ ɨŋga num, əne yɨ ɨŋga mɨ ɨnyod. Mə wɨə kàŋə̀ kə̀b nɨ ghɨ ɨ̀chɔ̀m, àyɨə chəi ənɨ tɨ̀ mə ghɨ̀.

¹⁹ Chəi mɨə ghɨ̀ ɨ̀chɔ̀m we nɨ mə kə̀b nɨ ghɨ̀, àyɨə ɨbə we nɨ chəi mə̀ kəb nɨ ghɨ̀ yɨ wɨwən we nɨ mɨə ghɨ̀ə̀.

²⁰ Mə mɨ yeʼə ghɨ̀ ɨnû mbe nɨ chəi mə̀ kəb nɨ ghɨ̀, əne yɨ ni kaʼi mɔ̌ ə wɨrɨə ghɨ̀ə̀. À yɨ ɨnû rɨbɔ̀ŋ mbe nɨ yeʼ ɨŋga num ə ghɨ̀ə̀.

²¹ Əne mə fə zə ni ɨkə mɔʼɔ wɨ əŋgu ni mə mɨ kə̀b ghɨ ɨ̀chɔ̀m, à yɨ ɨbə ə yeʼe.

²² Mə kàŋ ghaʼ tɨkə rɨ Ŋwiə̀ ənɨ mɨ fîŋ jìm,

²³ àyɨə mə zə ɨkə cherə ɨŋga mbɨ ɨsɨ ɨnyod nɨə màʼə̀ bid mbɨ ɨkə we nɨ yeʼ ɨŋga mɨ fîŋ. Ɨkə we wɨə ghɨ̀ ni mə ben ə̀bòʼò əmbɨ ɨnû rɨbɔ̀ŋ mbe nɨ yeʼ ɨŋga mbɨ ɨsɨ ɨnyod.

²⁴ Mə yɨə kaŋə wə̀d ŋgəʼ! À kɨə we bɨrɨ fe əmɨ rɨ ənɨ ə nyamnyod zɔ̂ nɨə ghɨ̀ ni mə̀ kwɨ ə?

²⁵ Mə wɨə nàʼə̀ məben-əwe əmbɨ ə Ŋwiə̀ ənjìm ə Yeso Kristo a Ə̀nùŋɨ̀sɨg! Ɨŋga mɨ fîŋ, mɔ̌ yɨ ə̀bòʼò əmbɨ tɨkə rɨ Ŋwiə̀, àyɨə əmbɨ mɨ nyamnyod, mɔ̌ yɨə ə̀bòʼò əmbɨ rɨkə te nɨə ghɨ̀ ni wə̀d ghɨ ɨnû rɨbɔ̀ŋ.