Rm 6 - Meta’

Tɨ̀ fə kwɨ dè ɨnû rɨbɔ̀ŋ əne tɨ wɨ ɨkǎ

¹ Tɨ̀ kɨə wo gha ni yè ə? Tɨ̀ wa wo ɨmbì ghɨ̀ ɨnû rɨbɔ̀ŋ ɨmbə̀ʼ ɨ̀chɔ̀m Ŋwiə̀ nɔʼ ə?

² Chə̂! Mba mbe nɨ fə kwɨ dè ɨnû rɨbɔ̀ŋ kɨə kɨrɨ wò ɨmbì ghɨ̀ ɨnû rɨbɔ̀ŋ ɨmbə̀ʼ ə yè ə?

³ Chəi mbə̀ kyerɨ ni mba mɨjìm mbe nɨ nyaʼa nɨŋ mɨnib ənɨ ɨkum Kristo Yeso nyaʼa bə̀ kwɨ mbɨ məd ɨchî nɨ tɨ̀ nyaʼa nɨŋ mɨnib ə?

⁴ Əne tɨ̀ nyaʼa fə kwɨ mbɨ tweŋ əwa mbɨ məd ɨchî nɨ tɨ̀ nyaʼa nɨŋ mɨnib, ɨmbə̀ʼ ɨchî nɨ mbɨ nyaʼa zwemnɨ ə Kristo ənjìm ɨwumnɨ Mbǎʼ, əne bə̂ tɨ̀ bɨrɨ bɨ yen ɨŋga ɨ̀tènɨ̀ fi.

⁵ À mɨ yeʼ nɨ tɨ̀ fə fɔtɨ mbɨ məd ɨchî nɨ tɨ̀ kwɨ mbɨ məd, əne bə̂ tɨ̀ bɨrɨ bɨ fɔtɨ mbɨ məd ɨchî nɨ wɨ̀ nyaʼa zwemə.

⁶ Tɨ̀ kyerɨ ni mbɨ nyaʼa fə kòmbɨ̀ à nyamnyod ənun əzed ə baʼnɨ mbɨ məd, ɨmbə̀ʼ nimnɨ nyamnyod ɨnû rɨbɔ̀ŋ. Əne chəi ənɨ tɨ̀ rɨ̀ wɨrɨ chub ənɨ ɨ̀bòʼò əton ɨnû rɨbɔ̀ŋ,

⁷ ɨmbə̀ʼ ɨghəm nɨ chəi ɨnû rɨbɔ̀ŋ wɨrɨ berɨ ɨka nɨ tumbɨ wə̀d we nɨ fə kwɨ.

⁸ Ɨchî nɨ tɨ̀ fə kwɨ mbɨ Kristo, tɨ̀ bə ben ni tɨ̀ bɨrɨ bɨ chub ɨkǎ mbɨ məd.

⁹ Tɨ̀ kyerɨ ni ɨchî nɨ Ŋwìə̀ nyaʼa fə zwemnɨ ə Kristo, ka wɨ̀ bɨrɨ nɔ wɨrɨ kwɨ i. Chəi ɨvɨ wɨrɨ berɨ ɨka ɨgwɨ məd.

¹⁰ Ɨvɨ we nɨ wɨ̀ nyaʼa kwɨ, wɨ̀ nyaʼa kwɨ ɨmbə̀ʼ ɨnû rɨbɔ̀ŋ fən ɨghəm mɔʼ. Ɨchî nɨ wɨ̀ yeʼ ɨkǎ, wɨ̀ yɨ ɨkǎ ɨmbə̀ʼ ə bə̂d wumnɨ ə Ŋwiə̀.

¹¹ Mbə̀ bə nɨŋ ni mbə fə kwɨ dè ɨnû rɨbɔ̀ŋ, àyɨə mbə mbɨ ɨkǎ ɨmbə̀ʼ wumnɨ ə Ŋwiə̀ ənjìm ə Kristo Yeso.

¹² Əne tɨ mbə̀ ben ə ni ɨnû rɨbɔ̀ŋ tumbɨ tə nyamnyod te nɨə kwɨə, əne ghɨ̀ mbə̀ zuunɨ ɨnû rɨbɔ̀ŋ mbe nɨ tə nyamnyod ə feenɨə.

¹³ Tɨ mbə̀ ben ə ni mbə ɨsɨ ɨnyod mɔʼɔ ghɨ ɨnû rɨbɔ̀ŋ. Əze ə bɨrɨ yeʼ ɨghabɨ ɨghɨ ə̀fàʼì nɨ mbə̀ə ghɨ̀ ɨnû ɨzɨg əŋgu. Àyɨə mbə̀ ben ni ə ɨnyod yeʼ əmbɨ ə Ŋwiə̀ ɨghabɨ ə bə̂d nɨ fə kwɨ wɨrɨ yeʼ ɨkǎ. Mbə̀ ben ni mbə ɨsɨ ɨnyod yeʼ əmbɨ ə Ŋwiə̀ ənɨ ɨghɨ ə̀fàʼì nɨ kùʼnɨ̀.

¹⁴ Chəi ɨnû rɨbɔ̀ŋ wɨrɨ berɨ ɨka ɨgwɨ nən, ɨmbə̀ʼ ɨghəm nɨ chəi əwən əton rɨkə. Mbə mbɨ əton ɨ̀chɔ̀m Ŋwiə̀.

Mbə̀ yeʼ ɨ̀bòʼò əmbɨ ɨnû nɨ təm kùʼnɨ̀

¹⁵ À kɨ ənû ə ye ə? Tɨ̀ wa ghɨ ɨnû rɨbɔ̀ŋ ɨmbə̀ʼ ɨghəm nɨ tɨ̀ yeʼ əton ɨ̀chɔ̀m Ŋwiə̀, kaʼi əton rɨkə ə? Chə̂!

¹⁶ Chəi mbə̀ kyerɨ ni mbə mɨ nàʼ ə ɨnyod əmbɨ ə wə̀d mɔʼɔ ɨghabɨ ɨ̀bòʼò nɨə zuunɨə, əne mbə yɨ sɨ ɨ̀bòʼò əmbɨ ə wə̀d we nɨ mbə̀ə zuunɨ əməd ə? Əne yɨ ɨ̀bòʼò əmbɨ ɨnû rɨbɔ̀ŋ mbe nɨə ghɨ̀ ni bə̂d kwɨ, kɨ̀ ɨ̀bòʼò əmbɨ ɨzuunɨ we nɨə ghɨ̀ ni bə̂d təm kùʼnɨ̀ ɨfě Ŋwiə̀.

¹⁷ Àyɨə mə wɨə nàʼə̀ məben-əwe əmbɨ ə Ŋwiə̀ ni mbə̀n mbe nɨ nyaʼa kweʼ ben ɨ̀bòʼò əmbɨ ɨnû rɨbɔ̀ŋ, fə bèŋ tə fîŋ rɨjìm sɨə zuunɨ ɨnû mbe nɨ Ŋwìə̀ ə chwi ɨ nən.

¹⁸ Chəi ɨnû rɨbɔ̀ŋ wɨrɨ berɨ ənû nɨ ghɨ mbɨ nən, əne mbə yɨə sɨ ɨ̀bòʼò əmbɨ ɨnû nɨ təm kùʼnɨ̀.

¹⁹ Mə wɨə ghàm ənɨ ɨŋgam bə̂d mɨ̀sɔŋɨchù, ɨmbə̀ʼ ɨghəm nɨ mbə kɨrɨ bɔd. Ɨchî nɨ mbə̀ nyaʼa kweʼ nàʼ mbə ɨsɨ ɨnyod ənɨ ɨ̀bòʼò əmbɨ ɨnyɔɔnɨ-ɨnû bə̀ fɔrɨ əmbɨ ɨnû rɨbɔ̀ŋ nɔnɔʼ, əne tɨ̀nîn mbə̀ naʼ mbə ɨsɨ ɨnyod ənɨ ɨ̀bòʼò əmbɨ ɨnû nɨ təm kùʼnɨ̀, ɨmbə̀ʼ mbə̀ yeʼ bə̂d nɨ zeŋɨ.

²⁰ Ənɨ mbə̀ nyaʼa ɨ̀bòʼò əmbɨ ɨnû rɨbɔ̀ŋ, chəi mbə̀ nyaʼa berɨ ənû ə mɔʼɔ nɨ ghɨ̀ mbɨ ənû nɨ təm kùʼnɨ̀.

²¹ Mbə nyaʼa jɨg ye tɨ ənɨ ɨnû mbe nɨ mbə ɨtu ə nìd ɨmbə̀ʼ mbɨwən tɨ̀nîn ə? Ɨnwǐ rɨ ənɨ ɨnû mbe yɨ ɨvɨ.

²² Tɨ̀nîn nɨ chəi ɨnû rɨbɔ̀ŋ wɨrɨ berɨ ənû ə mɔʼɔ nɨ ghɨ mbɨ nən, mbə̀ yɨ sɨ ɨ̀bòʼò əmbɨ ə Ŋwiə̀. Əghɨ ze nɨ mbə̀ bɨrɨ jɨg yɨ ɨzeŋɨ zeŋɨ, əne ɨnwǐ yɨ ɨ̀tènɨ̀ rɨ mì,

²³ ɨmbə̀ʼ ɨghəm nɨ ɨchwɨ rɨ ənɨ ɨnû rɨbɔ̀ŋ yɨ ɨvɨ, àyɨə ɨneʼe we nɨ Ŋwìə̀ ə nàʼə̀ yɨ ɨ̀tènɨ̀ rɨ mì ɨchî nɨ tɨ̀ yeʼ ənɨ ɨfɔtɨ mbɨ Kristo Yeso a Ə̀nùŋɨ̀sɨg.