Rm 4 - Meta’

Ɨbenɨ Abràham yɨ əmɨgɨ

¹ À kɨə ye nɨ tɨ̀ rɨ̀ ghà ni Abràham, a mbǎʼ rəŋwe, nyaʼa berɨ ɨchî nɨ wɨ̀ nyaʼa nuŋ fîŋ ɨgun ə Ŋwiə̀ ə?

² À mɨ yeʼ nɨ Ŋwìə̀ nyaʼa ben ni Abràham nyaʼa təm kùʼnɨ̀ ɨmbə̀ʼ ɨnû mbe nɨ wɨ̀ nyaʼə ghɨ̀ə̀, njɨ wɨ̀ berɨ ənû ə mɔʼɔ nɨ goŋ ɨgɔ̂ ɨmbə̀ʼ əzɨ əwən, àyɨə kaʼi ɨfě Ŋwiə̀.

³ Zɨə kɨ ɨŋga Ə̀ŋwàʼnɨ̀ ə Ŋwiə̀ ni yè ə? Ə zɨ ɨŋga ni, “Abràham nyaʼa nùŋ i fîŋ ɨgun ə Ŋwiə̀, əne Ŋwìə̀ nyaʼa ben ni məd ə təm kùʼnɨ̀.”

⁴ Ka ɨchwɨ wə̀d ə̀fàʼì yɨ ɨneʼe. Ɨchwɨ məd yɨ əghɨ ze nɨ wɨ̀ berɨ nɨŋ ɨmbə̀ʼ ə̀fàʼì ze nɨ wɨ̀ faʼi.

⁵ Ŋwìə̀ wɨə nɨŋ ə wə̀d we nɨ chəi wɨə fàʼ ɨ bɔ ɨghabɨ ni wɨ̀ fə təm kùʼnɨ̀, ɨmbə̀ʼ ɨghəm nɨ wə̀d we ə nuŋ i fîŋ ɨgun ə Ŋwiə̀ we nɨə nɨŋə ni bə̂d mbe nɨ chəi mbɨə wumnɨ əməd fə təm kùʼnɨ̀.

⁶ Dèvîd nyaʼa bə̀ ghà ɨmbə̀ʼ ɨchî nɨ Ŋwìə̀ bɨrɨ zɨ əbɔrəbɔd ɨgun ə wə̀d we nɨ təm kùʼnɨ̀. Chəi Ŋwìə̀ bɨrɨ ghɨ̀ əne ɨmbə̀ʼ ɨghəm nɨ wə̀d we ghɨ ənû ə mɔʼɔ. Dèvîd nyaʼa ŋwàʼnɨ̀ ni:

⁷ “Ŋwìə̀ zɨ əbɔrəbɔd ɨgun ə bə̂d mbe nɨ wɨ̀ fə waʼ tɨ̀gurɨ-ɨnû mɨ̀mə̌d, nɨ wɨ̀ fə bə nimnɨ ɨnû rɨbɔ̀ŋ mɨ̀mə̌d.

⁸ Ŋwìə̀ zɨ əbɔrəbɔd ɨgun ə wə̀d we nɨ chəi wɨ̀ wɨrɨ ŋwàʼnɨ̀ ɨnû rɨbɔ̀ŋ mbe nɨ wɨ̀ ghɨ̌ ənɨ ɨkum məd.”

⁹ Ŋwìə̀ wa nyaʼa zɨ əbɔrəbɔd zɔ̂ àmei ɨgun ə bə̂d mbe nɨ mbɨ nyaʼa ne mɨ̀mə̌d, kɨ̀ wɨ̀ wa nyaʼa bə̀ zɨ̀ fɔrɨ ɨgun mbe nɨ chəi mbɨ nyaʼa ne mɨ̀mə̌d ə? Tɨ̀ wɨə ghàə̀ ni, Ŋwìə̀ nyaʼa ben ni Abràham nyaʼa təm kùʼnɨ̀ ɨmbə̀ʼ ɨbenɨ məd.

¹⁰ Ŋwìə̀ nyaʼa ben ni məd ə təm kùʼnɨ̀ əwù zi ə? À kɨ bɔŋ mbɨ nyaʼa sɨə ne əməd kɨ̀ ənɨ mbɨ nyaʼa fə ne əməd ə? Ŋwìə̀ nyaʼa bè ben əməd bɔŋ mbɨ nyaʼa sɨə ne əməd.

¹¹ Abràham nyaʼa nɨŋ ənû nɨ mbɨ nyaʼa ne əməd ɨghabɨ ənweenɨ ni wɨ̀ nyaʼa fə bè təm kùʼnɨ̀. Wɨ̀ nyaʼa ghɨ̀ əne ənjìm ɨchî nɨ wɨ̀ nyaʼa benɨ nɨ chəi mbɨ nyaʼa kɨrɨ ne əməd. À yɨ əton nɨ Abràham yɨə mbǎʼ kyeŋ əmbɨ ə bə̂d mbe nɨ nuŋ fîŋ ɨgun ə Ŋwiə̀ àyɨə chəi mbɨ kɨrɨ ne mɨ̀mə̌d. Ŋwìə̀ fə ghɨ̀ ni mbɨ təm kùʼnɨ̀ ənjìm ɨbenɨ.

¹² Abràham yɨə bə̀ ə mbǎʼ kyeŋ əmbɨ ə bə̂d mbe nɨ mbɨ ne mɨ̀mə̌d. Ka àmei ni mbɨ fə ne mɨ̀mə̌d, à yɨə bə̂ ni ɨ mbɨə beenɨ əbɔʼ ɨbenɨ we nɨ a mbǎʼ kyeŋ Abràham nyaʼa berɨ bɔŋ mbɨ nyaʼa sɨə ne əməd.

Bə̂d bɨrɨ berɨ ɨnû mbe nɨ Ŋwìə̀ kàʼi ənjìm ɨbenɨ

¹³ Chəi ənû ze nɨ Ŋwìə̀ nyaʼa kàʼi əmbɨ Abràham fɔrɨ əmbɨ ə bə̂d tɨ ənɨ əghaŋ əməd ni mbɨ bɨrɨ nɨ jɨg ɨsɨg nyaʼa yeʼe ənjìm rɨkə. Zɨə nyaʼa yeʼe ənjìm ɨbenɨ we nɨ nyaʼa ghɨ ni wɨ̀ təm kùʼnɨ̀.

¹⁴ À mɨ yeʼ ni à yɨə bə̂d mbe nɨə nùŋ rɨkə bɨrɨ jɨg ɨsɨg, njɨ ɨbenɨ yɨ ətu ə̀kǒ, ɨnû mbe nɨ Ŋwìə̀ kaʼi bə̀ chè ətu ə̀kǒ,

¹⁵ ɨmbə̀ʼ ɨghəm nɨ tɨkə tɨə ghɨ̀ ni Ŋwìə̀ sə ɨtəm. Mbə̀ kyerɨ ə ni əsɨ ze nɨ chəi rɨkə əŋgu, chə bə̀ i ɨgu-ənû əŋgu.

¹⁶ Ŋwìə̀ nyaʼa kàʼ ɨghɨ ənjìm ɨbenɨ, ɨmbə̀ʼ ənjìm ɨ̀chɔ̀m məd, bɔn mɨjìm tɨ ənɨ əghaŋ ə Abràham mbe tɨ̀ mbɨ jɨg ɨghɨ mbe nɨ wɨ̀ nyaʼa kàʼi. Ka ɨghɨ mbe nɨ wɨ̀ nyaʼa kàʼi nyaʼa àmei əmbɨ ə bə̂d mbe nɨə nùŋə̀ rɨkə, ɨ mbɨə nyaʼa bə̂ əmbɨ mbe nɨ nyaʼa benɨ ɨchî nɨ Abràham nyaʼa bə benɨ. Abràham yɨə mbǎʼ ɨgwɨ mbà mɨjìm.

¹⁷ Ə zɨ ɨŋga Ə̀ŋwàʼnɨ̀ ə Ŋwiə̀ ni Ŋwìə̀ nyaʼa ghà əmbɨ Abràham ni, “Mə fə ghɨ̀ e ənɨ ə mbǎʼ ɨgwɨ ɨbeŋ nɔnɔʼ.” Abràham yɨ a mbǎʼ ɨfě Ŋwiə̀ we nɨ wɨ̀ nyaʼa nuŋ fîŋ ɨgwɨ məd. Məd yɨə Ŋwìə̀ we nɨə nàʼ ɨ̀tènɨ̀ əmbɨ ɨvɨ bə̂d. Məd wɨə bə̀ ghàə̀ ni ɨghɨ mbe nɨ chə nyaʼa i mbɨ yeʼ əŋgu.

¹⁸ Abràham nyaʼa ben əne nùŋ ɨkɔndɨ wòm, ka à be yeʼi ni chəi wɨ̀ nyaʼa berɨ əton nɨ nuŋ ɨkɔndɨ ni tə bɨrɨ yeʼ ə “Mbǎʼ ɨgwɨ ɨbeŋ nɔnɔʼ.” Ŋwìə̀ nyaʼa kaʼ əməd ni, “Bɔn tɨ ənɨ e əghaŋ bɨrɨ kaŋ nɔʼ.”

¹⁹ Chəi ɨbenɨ məd nyaʼa bɔd ənɨ wɨ̀ nyaʼa neŋ ni i nyamnyod nyaʼa fə sɨ i ɨghabɨ əvɨ əghɨ. Wɨ̀ nyaʼa fə sɨ i ɨghabɨ ɨghəm ɨwu ɨkɨ fibɨ̀ ənɨ ə nyùmə̀ we. Chəi ɨbenɨ məd nyaʼa bə bɔd ɨchî nɨ wɨ̀ nyaʼə nèŋə̀ ni chəi i ɨwi, Sèra, nyaʼa kɨrɨ gywɨ.

²⁰ Chəi ənû ə mɔʼɔ nɨ tɨ̀ zɨə nyaʼa kwepɨ ɨbenɨ məd, əne chəi wɨ̀ bid ənû ze nɨ Ŋwìə̀ nyaʼa kaʼi. Ɨbenɨ fîŋ məd nyaʼa kàànɨ̀, əne wɨ̀ nyaʼa yiirɨ ə Ŋwiə̀.

²¹ Wɨ̀ nyaʼa kàŋ ben ɨŋga i fîŋ ni Ŋwiə̀ we tɨ̀ wɨ̀ ghɨ̀ ənû ze nɨ wɨ̀ nyaʼa kaʼi.

²² À yɨ ɨmbə̀ʼ ɨbenɨ məd nɨ, “Ŋwìə̀ nyaʼa ben ni məd ə təm kùʼnɨ̀.”

²³ Chəi mbɨ nyaʼa ŋwaʼnɨ ɨŋgam we ni, “Ŋwìə̀ nyaʼa ben ni məd ə təm kùʼnɨ̀,” àmei ɨmbə̀ʼ ɨghəm məd rə̀zìʼ.

²⁴ Mbɨ nyaʼa bə̀ ŋwàʼnɨ̀ ɨmbə̀ʼ a ɨghəm. Ŋwìə̀ bɨrɨ ben ni tɨ̀ fə təm kùʼnɨ̀ ənjìm ɨchî nɨ tɨ̀ ben əməd we nɨ nyaʼa zwemnɨ ə Yeso a Ə̀nùŋɨ̀sɨg.

²⁵ Ŋwiə̀ nyaʼa nàʼ əməd ni mbɨ zwiirɨ ɨmbə̀ʼ mba ɨnû rɨbɔ̀ŋ. Wɨ̀ nyaʼa bə̀ zwemnɨ əməd ɨmbə̀ʼ tɨ̀ təm kùʼnɨ̀.