Rm 15 - Meta’

Mbə̀ ghɨ ni fîŋ rɨ bə̂d cherə bɔŋ ə, kaʼ àmei tən

¹ Mba mbe nɨ a ɨbenɨ kaanɨ berɨ yim fîŋ mbɨ mbe nɨ ɨbenɨ mɨ̀mə̌d kɨrɨ bɔd. Tɨ rɨ̀ ghɨ a àmei ɨnû mbe nɨ bɨrɨ ghɨ ni ta fîŋ bɔŋ ə.

² Wə̀d mɔʼ mɔʼ rəbɔʼ na zə ni fîŋ aŋgɔb məd bɔŋ ɨmbə̀ʼ wɨ̀ chub ɨchî chɔ̀m. Wɨ̀ bə̀ ghɨ̀ ni ɨbenɨ məd kaanə.

³ Chəi Kristo nyaʼa ghɨ̀ ni àmei i fîŋ bɔŋ ə. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mɨzɔ̂m bə̂d mbe nɨ zɔm əwe fə feŋ ɨgwɨ num.”

⁴ Ɨŋgam wɔ̂ yɨ ɨmbə̀ʼ ɨghəm nɨ ɨnû mbe nɨ mbɨ nyaʼa ŋwaʼnɨ rəŋwe, mbɨ nyaʼa ŋwàʼnɨ̀ ɨmbə̀ʼ kəərɨ əwa. Mbɨ nyaʼa ŋwaʼnɨ ɨmbə̀ʼ ɨghəm nɨ ənjìm ɨnyiʼ fîŋ bə̀ fɔrɨ ənjìm ɨka we nɨ Ə̀ŋwàʼnɨ̀ ə Ŋwiə̀ ə nàʼ ɨ na, tɨ̀ we tɨ̀ rɨ̀ wòm ɨnû mbe nɨ Ŋwiə̀ nyaʼa kaʼ ɨ na.

⁵ Ŋwìə̀ we nɨə ghɨ̀ ni tɨ̀ berɨ ɨnyiʼ fîŋ, bə̀ berɨ ɨka fîŋ ghɨ ni mbə̀ chub ənɨ ənû ə mɔʼ mbɨ mbə bɔŋgɔb ɨchî nɨ mbə̀ə beenɨ əbɔʼ Kristo Yeso,

⁶ ɨmbə̀ʼ mbə mbe tɨ mbə̀ fɔtɨ gɨ̂ yiirɨ ə Ŋwiə̀ Mbǎʼ a Ə̀nùŋɨ̀sɨg Yeso Kristo.

Ɨkə̂n chɔ̀m yɨə bə̂ əmbɨ ə bə̂d mbe nɨ kaʼ i mɨ̀Jû

⁷ Mbə nɨŋ wə̀d mɔʼ mɔʼ ɨchî nɨ Kristo fə nɨŋ əwən. Mbə̀ ghɨ əne ɨmbə̀ʼ naʼ ɨwumnɨ əmbɨ ə Ŋwiə̀.

⁸ Mə ghà ɨ nən ni Kristo nyaʼa beŋ ənɨ ə wə̀d ə̀fàʼì əmbɨ mɨ̀Jû, ɨmbə̀ʼ chwi ni Ŋwìə̀ wɨə ghɨ̀ ɨnû mbe nɨ wɨ̀ ghǎ, fɔrɨ ni wɨ̀ bɨrɨ ghɨ ɨnû mbe nɨ wɨ̀ nyaʼa kaʼi əmbɨ mɨ̀mbǎʼ ɨnəbɨ mɨ̀mə̌d.

⁹ Wɨ̀ nyaʼa ghɨ əne ɨmbə̀ʼ bə̂d mbe nɨ kaʼi mɨ̀Jû mbe tɨ mbɨ bə̀ wumnɨ ə Ŋwiə̀ ɨmbə̀ʼ ɨchî nɨ wɨə dììrɨ̀ə̀ mɨ̀mə̌d. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mə bɨrɨ yiirɨ əwe əkaʼ bə̂d mbe nɨ kaʼi mɨ̀Jû, bə̀ kwerɨ mɨkyî yiirɨ əwe.”

¹⁰ Ə zɨə bə̀ ɨŋga Ə̀ŋwàʼnɨ̀ ə Ŋwiə̀ ni, “Mbə̀n mbe nɨ kaʼi mɨ̀Jû, mbə̀ ghaʼrɨ mbɨ ə bə̂d ɨməd.”

¹¹ Mbɨ bə̀ yì ŋwaʼnɨ ni, “Mbə̀n mɨjìm mbe nɨ kaʼi mɨ̀Jû yiirɨ Ə̀nùŋɨ̀sɨg bə̀ ghɨ̀ ni bə̂d mɨjìm yiirɨ əməd.”

¹² Wə̀d ɨ̀kə̀n Ŋwìə̀ Aizayà nyaʼa bə̀ yì ghà ni, “Wan bɨrɨ jwɨ rɨ ənɨ əghaŋ ə Jesè, nɨ bɨrɨ tumbɨ bə̂d mbe nɨ kaʼi mɨ̀Jû, əne mbɨ bɨrɨ nuŋ tə rɨkɔndɨ ɨgwɨ məd.”

¹³ Ŋwìə̀ we nɨə ghɨ̀ ni mbə̀ berɨ ɨghɨ mbe nɨ mbə̀ə wòmə̀, ghɨ ni ɨghaʼi swi ɨŋga tə fîŋ, mbə̀ bə chub ənɨ əbɔrəbɔd ɨchî nɨ mbə̀ ben əməd, ɨmbə̀ʼ Əzwî ə Zeŋɨ ə ghɨ̀ ni mbə̀ wo ɨmbì wòm ɨnû mbe nɨ Ŋwiə̀ nyaʼa kaʼi.

Əton nɨ Pɔ̂l nyaʼa ŋwaʼnɨ ə̀ŋwàʼnɨ̀ zɔ̂ mbɨ ɨka fîŋ

¹⁴ Mbɨ bɔŋgɔb, mə kàŋ kyerɨ ɨmbə̀ʼ əwən ni ɨ̀chɔ̀m ə swi ɨŋga tə fîŋ, ni mbə kyerɨ ɨnû jìm mbɨ ni mbə mbe tɨ̀ mbə kəərɨ mbə bɔŋgɔb.

¹⁵ Mə fə ŋwàʼnɨ̀ ɨnû mɔʼɔ ɨ nən mbɨ ɨka fîŋ ɨmbə̀ʼ nɔɔrɨ mbə ɨtu, ɨmbə̀ʼ ɨ̀chɔ̀m we nɨ Ŋwìə̀ naʼ ɨ num

¹⁶ ni mə yeʼ wə̀d ə̀fàʼì Kristo Yeso əmbɨ ə bə̂d mbe nɨ kaʼi mɨ̀Jû. Mə wɨə fàʼ ɨghabɨ ə wə̀d mbàn Ŋwìə̀ ɨchî nɨ mɨə ghà ɨkə̂n chɔ̀m ɨmbə̀ʼ ə Ŋwiə̀. Əne yɨ ɨmbə̀ʼ bə̂d mbe nɨ kaʼi mɨ̀Jû yeʼ ɨghɨ ə̀fà nɨ Ŋwìə̀ benɨ, nɨ Əzwî ə Zeŋɨ fə bə̀ ghɨ̀ ni mbɨ zeŋ.

¹⁷ Əne, ɨchî nɨ mə yeʼ ənɨ ɨfɔtɨ mbɨ Kristo Yeso, mə berɨ əton nɨ goŋ ɨgɔ̂ ɨmbə̀ʼ ə̀fàʼì ze nɨ mɨə fàʼ əmbɨ ə Ŋwiə̀.

¹⁸ Chəi mə̀ bɨrɨ tɔ gha ənû ə mɔʼɔ, kɨrɨ ənɨ mə̀ gha àmei əze nɨ Kristo che ənjìm num bɔŋ ghɨ̀. Wɨ̀ nyaʼa ghɨ̀ ni bə̂d mbe nɨ kaʼi mɨ̀Jû zuunɨ ə Ŋwiə̀ ənjìm ɨnû mbe nɨ mɨə ghàə̀, ənjìm ɨnû mbe nɨ mɨə ghɨ̀ə̀,

¹⁹ ənjìm ɨnweenɨ-ɨnû nɨ kaanɨ, ənjìm ɨnû yiirɨ bə̀ fɔrɨ ənjìm ɨka we nɨ Əzwî ə Ŋwiə̀ ə nàʼə̀. Əne mə fə ghà ɨkə̂n chɔ̀m ɨmbə̀ʼ ə Kristo ɨŋga ɨsɨ jìm, kɔ rɨ ə Jèrusalèm kad wò pè əbà əbeŋ ze rɨ ə Ilirikùm.

²⁰ Ənû nɨ mɨə kə̀bə̀ yɨ ni mə gha ɨkə̂n chɔ̀m yeʼ ɨŋga ɨsɨ mbe nɨ chəi bə̂d kɨrɨ zu ənû ɨmbə̀ʼ ə Kristo əŋgu, ɨmbə̀ʼ tɨ mə̀ kod əmɨ ɨgun əchɨ ə nəb wə̀d cherə.

²¹ Àyɨə ə zɨ ɨŋga Ə̀ŋwàʼnɨ̀ ə Ŋwiə̀ ni, “Bə̂d mbe nɨ chəi mbɨ kweʼ gha ɨmbə̀ʼ əməd əmbɨ mɨ̀mə̌d bɨrɨ zə əməd, mbe nɨ chəi mbɨ kweʼ zu ɨmbə̀ʼ əməd bɨrɨ zu, ɨtu mɨ̀mə̌d zeŋ.”

Pɔ̂l nyaʼa taŋ ni tə bɨrɨ wo ghandɨ ə Rom

²² Mə nyaʼə kə̀b yeʼe əsɨ nən ɨghəm nɔnɔʼ, àyɨə ɨnû mɔʼɔ nyaʼa kən əmɨ.

²³ Àyɨə tɨ̀nîn nɨ chəi mə̀ wɨrɨ berɨ ə̀fàʼì ɨŋga ɨba ɨbeŋ mbɔ̂ mbɨ ɨchî nɨ mə nyaʼa kàŋ kə̀b ɨghəm ɨwu nɔnɔʼ nɨ yeʼ əsɨ nən,

²⁴ mə fə nùŋ ɨŋga mɨ ɨkɔndɨ ni mə bɨrɨ zə əwən ənɨ mɨə chèə̀ wò ə Speìn. Mə mɨ yeʼe, mə bɨrɨ chubɨ moorɨ mbɨ nən ənɨ əkɔb ə nyùmə̀, ɨmbə̀ʼ mbə wèèrɨ̀ chà əmɨ ənɨ mɨə sɨə wɨrɨə wòə̀.

²⁵ Tɨ̀nîn, mə wɨ ɨnə̂njɨ̀ wò ə Jèrusalèm ɨ wo naʼ ɨghɨ əmbɨ ə bə̂d Ŋwiə̀ mbe nɨ yeʼ əŋgu.

²⁶ Ɨfetɨ bə̂d Kristo we rɨ ə Màsèdonià mbɨ we rɨ ə Àkàiyà nyaʼa zə ni zɨə bɔ̀ŋ ni mbɨ chob ɨkab ənɨ ə ɨghəm nàʼ əmbɨ ə bə̂d ɨkwaŋ mbe nɨ yeʼ əkaʼ bə̂d Ŋwiə̀ mbe nɨ yeʼ ə Jèrusalèm.

²⁷ Mbɨ nyaʼa ghaʼ nɨ ghɨ̀ əne ənɨ ə ɨghəm. Təsìʼ yɨ ni, mbɨ nyaʼa berɨ ghɨ əne ɨmbə̀ʼ ɨghəm nɨ ɨchî nɨ bə̂d mbe nɨ kaʼi mɨ̀Jû fə fɔtɨ mbɨ mɨ̀Jû ɨ jɨg əbɔrəbɔd ze nɨ Əzwî ə Ŋwiə̀ ə nàʼə̀, əne bə̂, mbɨ berɨ bɨ weerɨ mɨ̀Jû mbɨ ɨghɨ mbe nɨ mbɨ berɨ.

²⁸ Ənɨ mə fə maanɨ ə̀fàʼì zɔ̂, nàʼ ɨkab we nɨ mə̀ fetɨ əmbɨ mɨ̀mə̌d, mə bɨrɨ che mo əwən bɔŋ sɨə wò ə Speìn.

²⁹ Mə kyerɨ ni ənɨ mə yeʼe əsɨ nən, əbɔrəbɔd ze nɨ Kristo ə nàʼ əbu əbu ə bɨrɨ swi ɨgwɨ nən.

³⁰ Mbɨ bɔŋgɔb, mə wɨə buʼ ɨbɔ ɨ nən ənjìm a Ə̀nùŋɨ̀sɨg Yeso Kristo bə̀ fɔrɨ ənjìm ɨghaʼi we nɨ Əzwî ə nàʼ ɨ na, ni mbə fɔtɨ mbɨ num jeŋgɨ kɔ̀ŋgɨ̀ ə Ŋwiə̀ ɨgwɨ num.

³¹ Mbə̀ kɔŋgɨ ə Ŋwiə̀ ni wɨ̀ chɨ əmɨ rɨŋga tɨkyerɨ-ɨbɔ bə̂d mbe nɨ chəi mbɨ ben ə Kristo ə Jùdeyà, bə̀ kɔ̀ŋgɨ̀ ni bə̂d Ŋwiə̀ mbe rɨ ə Jèrusalèm nɨŋ ɨkab we nɨ mɨə wò nàʼ əmbɨ mɨ̀mə̌d.

³² Mbə̀ ghɨ əne, ɨmbə̀ʼ Ŋwìə̀ mɨ benɨ, mə we tɨ̀ mə yeʼe əsɨ nən mbɨ ɨghaʼi, mbə ghɨ̀ mɨ fîŋ zùtɨ̀.

³³ Ŋwìə̀ we nɨə nàʼ əbɔrəbɔd chubɨ mbɨ mbə̀n mɨjìm. À yɨ əne.