Rm 13 - Meta’

Mbə̀ zuunɨ bə̂d mbe nɨə tùmbɨ̀ əwən

¹ Wə̀d jìm zuunɨ bə̂d mbe nɨə tùmbɨ̀ əbeŋ, ɨmbə̀ʼ ɨghəm nɨ chəi mbɨ berɨ ɨka nɨ tumbɨ bə̂d kɨrɨ ənɨ à yɨə Ŋwìə̀ naʼ ɨka we əmbɨ mɨ̀mə̌d. À yɨə Ŋwìə̀ nuŋ bə̂d mbe nɨə tùmbɨ̀ ɨbeŋ.

² Əne wə̀d we nɨ ton bə̂d mbe nɨə tùmbɨ̀ əbeŋ, fə bə̀ ton bə̂d mbe nɨ Ŋwìə̀ chɔʼɔ. Bə̂d mbe nɨ ghɨ əne bɨrɨ zɨ ɨsaʼi ɨgwɨ mbə ɨtu,

³ ɨmbə̀ʼ ɨghəm nɨ bə̂d mbe nɨə ghɨ̀ ɨnû rɨbɔ̀ŋ mbɨə bɔə bə̂d mbe nɨə tùmbɨ̀ mɨ̀mə̌d, àyɨə ka mbe nɨə ghɨ̀ ɨnû chɔ̀m mbɨə bɔ ə mɨ̀mə̌d. Mbə wa kə̀b ni tɨ mbə̀ bɔ ə bə̂d mbe nɨə tùmbɨ̀ əwən ə? Mbə̀ ghɨ ɨnû chɔ̀m, ɨmbə̀ʼ mbɨ ben əwən.

⁴ Mbɨ yɨə bə̂d ə̀fàʼì Ŋwiə̀. Ɨ mbɨ əŋgu ɨmbə̀ʼ weerɨ əwən. Mbə mɨ yeʼə ghɨ̀ ɨbə, mbə berɨ bɔ mɨ̀mə̌d, ɨmbə̀ʼ ɨghəm nɨ mbɨ berɨ fàʼ mbɨ ɨka we nɨ Ŋwìə̀ naʼ əmbɨ mɨ̀mə̌d. Mbɨ yɨə bə̂d ə̀fàʼì Ŋwiə̀ ɨmbə̀ʼ zɨ ɨchə ɨgwɨ ə bə̂d mbe nɨə ghɨ̀ ɨnû rɨbɔ̀ŋ.

⁵ Əne mbə berɨ zuunɨ mɨ̀mə̌d, ka àmei ɨmbə̀ʼ ɨchî nɨ mbɨ bɨrɨ zɨ ɨchə ɨgwɨ nən, àyɨə bə̀ ɨmbə̀ʼ ni tɨ tə fîŋ saʼ i əwən.

⁶ Əton nɨ mbə̀ə bə̀ màʼ mɨ̀tagsɨ̀ yɨ ni, bə̂d mbe nɨə tùmbɨ̀ əwən yɨə bə̂d ə̀fàʼì Ŋwiə̀. Mbɨ berɨ zɨ ətu àmei ənɨ ə̀fàʼì ze.

⁷ Mbə̀ naʼ ɨghɨ əmbɨ ə bə̂d mbe nɨ mbə̀ berɨ nɨ naʼ əmbɨ mɨ̀mə̌d. Mbə̀ maʼ mɨ̀tagsɨ̀ əmbɨ ə bə̂d mbe nɨə fetɨ mɨ̀tagsɨ̀. Mbə̀ chwɨ mɨ̀tagsɨ̀ ɨgwɨ ɨghɨ mbe nɨ mbə berɨ əmbɨ ə bə̂d mbe nɨ mbɨə chwɨ əmbɨ mɨ̀mə̌d. Mbə̀ bɔ bə̂d mbe nɨ mbə̀ berɨ nɨ bɔ, bə̀ wumnɨ mbe nɨ mbə̀ berɨ nɨ wumnɨ.

Ɨnû nɨ bə̂d berɨ ghɨ̀ ənɨ mbɨ cherə

⁸ Tɨ mbə̀ yim ə njɔ̌ wə̀d. Njɔ̌ ze nɨ mbə̀ berɨ nɨ yimɨ yɨ nɨ ghaʼ mbə bɔŋgɔb, ɨmbə̀ʼ ɨghəm nɨ wə̀d we nɨ ghaʼ wɨ cherə fə nùŋ tɨkə rɨjìm.

⁹ Ə zɨ ɨŋga tɨkə rɨ Mose ni, “Tɨrə̀ ni e əyi cherə kɨ̀ mbaŋə̀ cherə. Tɨrə̀ zwiirɨ e wə̀d. Tɨrə̀ jɨ e. Tɨrə̀ feenɨ e əghɨ ə wə̀d.” Tɨkə tɔ̂ mbɨ rɨkə cherə fə fɔtɨ ənɨ ɨkə we nɨ gha ni, “À berɨ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod.”

¹⁰ Wə̀d mɨ ghaʼ wə̀d we nɨ tindɨ ɨban məd, ka wɨ̀ bɨrɨ ghɨ i ɨbə̂ ənɨ məd. Əne ɨ ghaʼ bə̂d yɨ nɨ nuŋ tɨkə rɨjìm.

¹¹ Kaʼi əjìm əze, mbə̀ fə kàŋ kyerɨ ə nyùmə̀ wɔ̂ rɨ̀nîn. À yɨə nyùmə̀ ɨ nən nɨ nɔʼ rɨ əŋgwenɨ, ɨmbə̀ʼ ɨghəm nɨ ənû nɨ jwɨ rəŋgəʼ fə tiinɨ ɨban na tɨ̀nîn chè rɨ ənɨ nyùmə̀ we nɨ tɨ̀ nyaʼa be benɨ.

¹² Ɨzimɨ fə kà chè, ɨtuʼ fə sɨə wo chɨg. Əne tɨ̀ waʼ ɨnû mbe nɨ bə̂d ə ghɨ̀ ɨŋga ɨsɨ firɨ, əne tìŋ ɨghɨ bid ɨmbə̀ʼ zɔŋ ənɨ ɨsɨ ə zeŋə.

¹³ Tɨ̀ ghɨ mba ɨnû ɨchî nɨ kuʼnɨ, àmei ɨghabɨ ɨchî nɨ bə̂d ə ghɨ̀ ɨnû əziə. Tɨ rɨ̀ wo a ənɨ ɨchwɨ̂ nɨ bə̂d ə ghɨ̀ ɨnû əbəŋ əbəŋ, kɨ̀ nɨ bə̂d ə nɔə beə. Tɨ rɨ̀ ni a məyi kɨ̀ mbaŋə̀ nɨ kaʼi a ɨwi kɨ̀ a ɨnom, kɨ̀ bè ghɨ ɨnyamnɨ-ɨnû. Tɨ rɨ̀ chɔb a. Tɨ rɨ̀ bɨ ghɨ̀ a ə̀dìì.

¹⁴ Àyɨə mbə̀ ghɨ ni Ə̀nùŋɨ̀sɨg Yeso Kristo kubrɨ əwən ɨchî nɨ ngywɨ̌ ə kubrə bə̂d. Əne tɨ mbə̀ naʼ ə əpan əmbɨ tə nyamnyod ni tɨ ghɨ ɨnû rɨbɔ̀ŋ mbe nɨ nyamnyod ə feenɨə.