Rm 11 - Meta’

Ŋwìə̀ nyaʼa diirɨ mɨ̀Izre

¹ Mə wɨə biirɨə ni Ŋwìə̀ wa fə ton mbi bə̂d ə? Chə̂! Mə yɨə wə̀d Izre. Mə yɨə wan tɨ ənɨ əghaŋ ə Abràham. Mə yɨ rɨŋga ɨnəbɨ Benjamìn.

² Chəi Ŋwìə̀ kɨrɨ ton mbi bə̂d mbe nɨ wɨ̀ nyaʼa be chɔʼ. Chəi mbə̀ kyerɨ ənû ze nɨ Ə̀ŋwàʼnɨ̀ ə Ŋwiə̀ ə gha ɨmbə̀ʼ Èlaijà, ɨchî nɨ wɨ̀ nyaʼa gha əmbɨ ə Ŋwiə̀ ɨmbə̀ʼ ənû ze nɨ mɨ̀Izre nyaʼa ghɨ̀ ə?

³ Wɨ̀ nyaʼa ghà ni, “Ə̀nùŋɨ̀sɨg, mbɨ fə zwiirɨ mbe bə̂d ɨ̀kə̀n bə̀ sàʼ te rɨkwi ɨjə̀ŋ ə̀fààrɨ̀. Àmei mɔ̌ mɔʼ sɨ bùʼ. Ɨ mbɨə bə̀ kə̀b zwiirɨ əmɨ.”

⁴ Ŋwìə̀ nyaʼa wììrɨ̀ ɨ bɔ ni yè ə? Wɨ̀ nyaʼa ghà ɨ bɔ ni, “Mə fə nùŋ bə̂d chuʼ sambe ənɨ mbum, nɨ chəi mbɨ kɨrɨ wumnɨ ŋwìə̀ əko we nɨ mbɨə tɔŋ ənɨ ə Bal.”

⁵ Əne bə̂, ənɨ ə nyùmə̀ wɔ̂ rɨ̀nîn, ə̀bùʼ ə bə̂d ə zɨ əŋgu nɨ Ŋwiə̀ chɔʼ ənjìm ɨ̀chɔ̀m məd.

⁶ Wɨ̀ nyaʼa chɔʼ bə̂d mbe ənjìm ɨ̀chɔ̀m məd, kaʼi ɨmbə̀ʼ ɨnû mbe nɨ mbɨ nyaʼa ghɨ̌. À kɨ nɨ wɨ̀ nyaʼa chɔʼ mɨ̀mə̌d ənjìm ɨnû mbe nɨ mbɨ nyaʼa ghɨ̌, njɨ ka ɨ̀chɔ̀m Ŋwiə̀ yɨə wɨrɨ i ɨ̀chɔ̀m Ŋwiə̀.

⁷ Əne kɨ nɨ yè ə? Chəi mɨ̀Izre nyaʼa berɨ əghɨ ze nɨ mbɨ nyaʼə kə̀bə̀. Bə̂d mbe nɨ Ŋwìə̀ nyaʼa chɔʼɔ nyaʼa berɨ əzɨ əwən, àyɨə ə̀bùʼ ə bə̂d nyaʼa ghɨ̀ tə fîŋ tu.

⁸ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ŋwìə̀ nyaʼa nàʼ əzwî ze nɨə ghɨ̀ ni bə̂d fundɨ əmbɨ mɨ̀mə̌d, bə̀ nàʼ əghə ɨmbə̀ʼ tɨ mbɨ zə ə ɨsɨ bə̀ nàʼ ɨ̀tǒŋ ɨmbə̀ʼ tɨ mbɨ zu ə ɨnû. Mbɨ nyaʼa chub əne yeʼe pè rə̀chɔ̀ŋ.”

⁹ Ɨfɔ̂n Dèvîd nyaʼa bə̀ ghà ni, “Əsɨ ze nɨ mbɨə jɨg əŋgu yɨ ətam nɨ mbɨ bɨrɨ gywɨ mɨ̀mə̌d ɨŋga. À yɨə bə̀ əgum ze nɨ mbɨ bɨrɨ gu ɨgun, bə̀ yeʼ əsɨ nɨ mbɨ bɨrɨ chə mɨ̀mə̌d əŋgu.

¹⁰ Əghə mɨ̀mə̌d ə fə fin ɨmbə̀ʼ tɨ mbɨ zə ə ɨsɨ. Njìm tɨ mɨ̀mə̌d fə bə̀ gumə koŋ.”

¹¹ Əne mə wɨə biirɨə ni mbɨ kə̀ʼ tɨgrɨ ɨmbə̀ʼ wɨrɨ gu ə? Chə̂! À yɨ ɨmbə̀ʼ ɨchî nɨ mbɨ nyaʼa gu ənû nɨ bə̂d mbe nɨ kaʼi mɨ̀Jû nyaʼa jwɨ rəŋgəʼ. Mbɨ nyaʼa jwɨ̀ ɨmbə̀ʼ mɨ̀Jû ghɨ ə̀dìì.

¹² À mɨ yeʼ nɨ ɨgu-ənû mɨ̀Jû nyaʼa ghɨ ni bə̂d rɨŋga ɨsɨg jɨg ɨ̀chɔ̀m, bə̀ ghɨ̀ ni ɨchî nɨ mbɨ nyaʼa ton ə Ŋwiə̀ ə nyaʼa ghɨ̀ ni bə̂d mbe nɨ kaʼi mɨ̀Jû jɨg ɨ̀chɔ̀m, njɨ à yɨ ənû nɨ bɔŋɨ ni mɨ̀Izre mɨ̀jìm fə fɔtɨ əbɔʼ mɨ̀mə̌d!

Bə̂d mbe nɨ kaʼi mɨ̀Jû bɨrɨ jwɨ rəŋgəʼ

¹³ Mə yɨ əni ghàm ɨ nən, mbə̀n mbe nɨ kaʼi mɨ̀Jû. Ɨchî nɨ mə̀ yeʼ wə̀d tom əmbɨ ə bə̂d mbe nɨ kaʼi mɨ̀Jû, mə wɨə zɨ̀ ətu ənɨ ə̀fàʼì ze nɨ Ŋwìə̀ chɔʼ əmɨ ni mə̀ faʼ ə

¹⁴ ɨmbə̀ʼ mbɨ bɔŋgɔb mɨ̀Jû ghɨ ə̀dìì əne ghɨ̀ mə chɨ mbɨ mɔʼɔ rəŋgəʼ.

¹⁵ Ɨchî nɨ Ŋwìə̀ nyaʼa ton mɨ̀mə̌d nyaʼa mɨ chwi ni wɨ̀ fə maanɨ taŋ mbɨ ə bə̂d rɨŋga ɨsɨg, njɨ kaʼ ɨchî nɨ wɨ̀ wɨrɨ ben mɨ̀mə̌d rɨ wa chwi i ni mbɨ fə kwɨ wɨrɨ zwemə ə?

¹⁶ Mbɨ mɨ yeʼə nàʼə̀ ŋgə̀ŋ rɨtu ənɨ əghɨ ə̀fà əmbɨ ə Ŋwiə̀, njɨ ŋgə̀ŋ ze jìm yɨ zɨ məd. Mbɨ mɨ yeʼə nàʼ əghaŋ əzed ənɨ əghɨ ə̀fà əmbɨ ə Ŋwiə̀, njɨ rɨtəb rɨjìm yɨə bə̀ rɨ məd.

¹⁷ Mbɨ nyaʼa sopɨ rɨtəb mɔʼɔ rɨ ənɨ əzed olìf chɔ̀m, əne nɨŋ ɨghə rɨ ənɨ əzed ə olìf bǔʼ wò ban ənɨ əzed ə olìf chɔ̀m ze, ɨmbə̀ʼ wɨ sɔ mɨnib rɨ ənɨ əghaŋ əzed ə olìf chɔ̀m. Mbə̀n bə̂d nɨ kaʼi mɨ̀Jû yɨ ɨghabɨ ɨghə rɨ ənɨ əzed ə olìf bǔʼ nɨ mbɨ nɨŋ ban ənɨ əzed ə olìf chɔ̀m.

¹⁸ Əne tɨ mbə̀ goŋ ə ɨgɔ̂ ɨmbə̀ʼ ɨghəm nɨ mbə̀ fə nɨŋ rɨmbin rɨtəb te nɨ mbɨ sopɨ. Mbə mɨ yeʼə goŋ ɨgɔ̂, njɨ mbə̀ kyerɨ ni kaʼi mbə̀n ə jə əghaŋ ze, à yɨ əghaŋ ze ə jə əwən.

¹⁹ Wə̀d mɔʼɔ rəbɔʼ nən bɨrɨ ghà ni, “Mbɨ nyaʼa sopɨ rɨtəb te ɨmbə̀ʼ mbɨ ban əmɨ ənɨ rɨmbin mɨ̀mə̌d.”

²⁰ Əze yɨ rəsìʼ. Mbɨ nyaʼa sopɨ rɨtəb te, əne yɨ mɨ̀Jû, ɨmbə̀ʼ ɨghəm nɨ chəi mbɨ nyaʼa benɨ, àyɨə mbən ə təm kàànɨ̀ àmei ɨmbə̀ʼ ɨchî nɨ mbə̀ benɨ. Əne tɨ mbə̀ nɔ ə ɨnyod, àyɨə mbə̀ we əwən ɨmbə̀ʼ ənû ze nɨ tɨ̀ zɨə ghɨ̀.

²¹ À mɨ yeʼ nɨ chəi Ŋwìə̀ nyaʼa saŋ rɨtəb chɔ̀m te ni tɨ chubɨ, njɨ chəi wɨ̀ bɨrɨ bɨ saŋ əwən.

²² Mbə̀ zə ɨchî nɨ Ŋwìə̀ ə ghɨ̀ ɨ̀chɔ̀m bə̀ tɔə. Ɨ wɨə tɔ əmbɨ ə bə̂d mbe nɨə gù ənû, àyɨə ɨ wɨə ghɨ̀ ɨ̀chɔ̀m ənɨ ə nən, əne mbə̀ chub àmei ɨŋga ɨ̀chɔ̀m məd. Mbə mɨ ton ghɨ ə əne, wɨ̀ bɨrɨ bɨ sob əwən waʼ.

²³ Ka àbei mɨ̀Jû, mbɨ mɨ waʼ ɨchî nɨ chəi mbɨ benɨ, Ŋwìə̀ bɨrɨ wɨrɨ ban mɨ̀mə̌d, ɨmbə̀ʼ ɨghəm nɨ məd ə berɨ ɨka nɨ wɨrɨ ban mɨ̀mə̌d ənɨ əzed ə chɔ̀m ze ɨghəm cherə.

²⁴ À mɨ yeʼ nɨ mbɨ fə sob əwən tɨ ənɨ əzed ə olìf bǔʼ, əne ban ənɨ əzed ə olìf konɨ, nɨ kaʼi ɨchî nɨ zɨə berɨ yeʼ we, njɨ zɨə zàm ni mbɨ bɨrɨ wɨrɨ ban rɨtəb te ənɨ əzed mɨ̀mə̌d.

Ŋwìə̀ wɨə dììrɨ̀ə̀ bə̂d mɨ̀jìm

²⁵ Mbɨ bɔŋgɔb, mə kə̀b ni mbə̀ kyerɨ ənû ze nɨ yeʼ ənə̀mə, ɨmbə̀ʼ tɨ mbə̀ kɔndɨ ə ni mbə we əku. Ənû ze yɨ ni: Ŋwiə̀ fə ghɨ̀ ni fîŋ tɨ mɨ̀Izre tu. Tɨ bɨrɨ tu wò pè ənɨ ɨnun bə̂d mbe nɨ kaʼi mɨ̀Jû nɨ berɨ yeʼe əmbɨ ə Ŋwiə̀ fə kuʼu.

²⁶ Nyùmə̀ we mɨ kùʼ, mɨ̀Izre mɨ̀jìm bɨrɨ jwɨ rəŋgəʼ. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d we nɨ bɨrɨ chɨ bə̂d rəŋgəʼ bɨrɨ yeʼe rɨ ə Zayɔ̀n. Wɨ̀ bɨrɨ nimnɨ ənû ze nɨ chəi bə̂d ə wumnɨ ə Ŋwiə̀ tɨ ənɨ ə bɔn Jakɔ̂b.

²⁷ Fɔ̂ yɨə fɨso fe nɨ mə san mbɨ mɨ̀mə̌d ənɨ mə̀ waʼ ɨnû rɨbɔ̀ŋ mɨ̀mə̌d.”

²⁸ À yeʼ ɨmbə̀ʼ ɨkə̂n chɔ̀m, mɨ̀Jû yɨə bə̂d pə̀n Ŋwiə̀ ɨmbə̀ʼ əwən. À yeʼ ɨmbə̀ʼ ɨchî nɨ Ŋwìə̀ chɔʼ mɨ̀mə̌d, Ŋwiə̀ ə ghaʼ mɨ̀mə̌d kwàʼ rɨŋgəʼ ɨmbə̀ʼ mɨ̀mbǎʼ mɨ̀mə̌d rəŋwe.

²⁹ Ŋwìə̀ mɨ fə nàʼ ɨneʼe əmbɨ ə bə̂d bə̀ tɔŋ mɨ̀mə̌d ənɨ mbi, chəi wɨ̀ bɨrɨ wɨrɨ kwepɨ i fîŋ.

³⁰ Ɨchî nɨ mbə̀ nyaʼa kweʼ ghɨ̀ rɨ̀zuə̀ əmbɨ ə Ŋwiə̀, əne tɨ̀nîn wɨ̀ fə dììrɨ̀ əwən ɨmbə̀ʼ ɨghəm nɨ mɨ̀Jû nyaʼa bə̀ ghɨ rɨ̀zuə̀.

³¹ Əne mɨ̀mə̌d mbɨə ghɨ̀ rɨ̀zuə̀ rɨ̀nîn ɨmbə̀ʼ Ŋwìə̀ diirɨ mɨ̀mə̌d ɨchî nɨ wɨ̀ fə diirɨ əwən.

³² Ŋwìə̀ fə zɨ̀ bə̂d mɨ̀jìm ə ndəŋ ɨmbə̀ʼ ɨchî nɨ mbɨ nyaʼa ghɨ rɨ̀zuə̀. Wɨ̀ nyaʼa ghɨ̀ əne ɨmbə̀ʼ wɨrɨ diirɨ mɨ̀mə̌d mɨjìm.

Pɔ̂l yiirɨ ə Ŋwiə̀

³³ Wəi! Mbə̀ zə ɨchî nɨ Ŋwìə̀ ə ghɨ̀ ɨ̀chɔ̀m ənɨ ə bə̂d mɨ̀jìm. Mbə̀ zə ɨchî nɨ wɨ̀ berɨ ɨwe bə̀ kyerɨ ɨnû jìm! Chəi ənɨ tɨ̀ wə̀d kyerɨ tɨkɔndɨ məd! Chəi ənɨ tɨ̀ wə̀d kyerɨ mɨchî məd!

³⁴ Ə zɨ ɨŋga Ə̀ŋwàʼnɨ̀ ə Ŋwiə̀ ni, “À kɨə we nɨ kyerɨ ɨkɔndɨ Ə̀nùŋɨ̀sɨg ə? Kɨ̀ à kɨə we nɨə kəərɨ əməd ə?

³⁵ À kɨə we nɨ kweʼ naʼ ɨghɨ ɨ bɔ, ɨmbə̀ʼ wɨ̀ wɨrɨ wì ə?”

³⁶ À yɨə məd nyaʼa tekɨ ɨghɨjìm, ɨghɨjìm mbɨ əŋgu ənjìm məd, ɨghɨjìm yɨə bə mbɨ məd. Tɨ̀ wumnɨ əməd koŋ. À yɨ əne.