Rm 10 - Meta’

¹ Mbɨ bɔŋgɔb, əghɨ ze nɨ mɨ fîŋ ə kə̀bə̀, nɨ mɨə bə̀ kɔ̀ŋgɨ̀ ə Ŋwiə̀ ɨmbə̀ʼ əzɨ əwən yɨ ni wɨ̀ chɨ mɨ̀Izre rəŋgəʼ.

² Mə we tɨ̀ mə ben ni ɨ mbɨə zɨ̀ ətu nɨ faʼ əmbɨ ə Ŋwiə̀, àyɨə chəi mbɨ zɨ ətu yeʼ ɨgun ənû ze nɨ mbɨ kyerɨ ɨmbə̀ʼ ə Ŋwiə̀.

³ Chəi mbɨ kyerɨ ɨchî nɨ Ŋwiə̀ ə ghɨ̀ ni bə̂d təm kùʼnɨ̀. Ɨ mbɨə kə̀bə̀ yeʼ mbə mɨnə̂njɨ̀ nɨ ghɨ ni mbə̀ təm kùʼnɨ̀. Chəi mbɨ nyaʼa gundɨ ə si ɨmbə̀ʼ Ŋwiə̀ ghɨ ni mbɨ təm kùʼnɨ̀.

⁴ Tɨkə rɨ Mose fə nwì ənɨ ə Kristo, ɨmbə̀ʼ wə̀d jìm we nɨ nuŋ fîŋ ɨgun ə Kristo təm kùʼnɨ̀.

Ənû nɨ jwɨ rəŋgəʼ yɨ əmbɨ ə wə̀d jìm

⁵ Mose nyaʼa ŋwàʼnɨ̀ ɨmbə̀ʼ ɨnû nɨ təm kùʼnɨ̀ ɨchî nɨ zɨə yeʼ rɨkə ni, “Wə̀d we nɨə ghɨ̀ ɨnû mbe nɨ yeʼ ɨŋga rɨkə bɨrɨ chub ɨkǎ ɨmbə̀ʼ rɨwən.”

⁶ Àyɨə ənû nɨ təm kùʼnɨ̀ ɨchî nɨ wə̀d nuŋ fîŋ ɨgun ə Kristo ə ghà ni, “Tɨrə̀ ghà e ɨŋga e fîŋ ni, 'À kɨə we nɨ bɨrɨ wo nyɨ ɨkaŋ ə?'” (Əne yɨ ɨmbə̀ʼ swi ə Kristo ə si).

⁷ “Kɨ̀ 'À kɨə we nɨ bɨrɨ swiʼ ɨŋga əbeŋ ɨvɨ bə̂d ə?'” (Əne yɨ ɨmbə̀ʼ zwemnɨ ə Kristo nɨŋ əməd kɔʼ).

⁸ Ə̀ŋwàʼnɨ̀ ə Ŋwiə̀ kɨə ghàə̀ ni yè ə? Ə zɨə ghàə̀ ni, “Ɨŋgam we wɨ ɨban ne, ɨ wɨ ɨŋga e ɨchû bə̀ fɔrɨ ɨŋga e fîŋ” (əne yɨ ɨŋgam ɨmbə̀ʼ ɨbenɨ we nɨ tɨə ghà ɨmbə̀ʼ wɨwən).

⁹ À mɨ ghà ənɨ e ɨchû ni Yeso yɨ Ə̀nùŋɨ̀sɨg bə̀ ben ɨŋga e fîŋ ni Ŋwìə̀ nyaʼa zwemnɨ əməd, à bɨrɨ jwɨ rəŋgəʼ.

¹⁰ À yɨ ɨmbə̀ʼ ɨchî nɨ wə̀d benɨ nɨ ghɨ̀ ni wɨ̀ təm kùʼnɨ̀. À yɨə bə̀ ɨmbə̀ʼ ɨchî nɨ wə̀d ə ghàm ənɨ i ɨchû nɨ ghɨ̀ ni wɨ̀ jwɨ rəŋgəʼ.

¹¹ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ka Ŋwìə̀ bɨrɨ naʼ i tɨ̀nìd ətu əmbɨ wə̀d we nɨ nuŋ fîŋ ɨgwɨ məd,”

¹² ɨmbə̀ʼ ɨghəm nɨ chəi ɨkwepɨ əkaʼ mɨ̀Jû mbɨ ə bə̂d mbe nɨ kaʼi mɨ̀Jû. Àmei Ə̀nùŋɨ̀sɨg we mɔʼ nɨ yeʼ Ə̀nùŋɨ̀sɨg ɨgwɨ ə bə̂d mɨjìm. Àmei məd ə bə̀ zɨ̀ əbɔrəbɔd əbu əbu ɨgwɨ ə bə̂d mɨjìm mbe nɨə kɔ̀ŋgɨ̀ əməd.

¹³ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d jìm we nɨə kɔ̀ŋgɨ̀ ə Ŋwiə̀ ənɨ ɨkum Ə̀nùŋɨ̀sɨg bɨrɨ jwɨ rəŋgəʼ.”

¹⁴ Àyɨə bə̂d kɨə wo kɔŋgɨ əməd rɨ yè nɨ chəi mbɨ nuŋ tə fîŋ ɨgwɨ məd ə? Mbɨ kɨə wo nuŋ tə fîŋ ɨgwɨ məd rɨ yè nɨ chəi mbɨ kweʼ zu ənû ɨmbə̀ʼ əməd ə? Mbɨ kɨə wo zu ənû ɨmbə̀ʼ əməd rɨ yè nɨ chəi wə̀d ghà ɨŋgam Ŋwiə̀ əmbɨ mɨ̀mə̌d ə?

¹⁵ Mbɨ kɨə wo gha ɨŋgam Ŋwiə̀ ɨmbə̀ʼ əməd rɨ yè nɨ chəi mbɨ tom mɨ̀mə̌d ə? Ə zɨ ɨŋga Ə̀ŋwàʼnɨ̀ ə Ŋwiə̀ ni, “À yɨə kàŋ ənû ə chɔ̀m ni bə̂d mbe nɨə ghà ɨkə̂n chɔ̀m mbɨə yeʼe!”

¹⁶ Àyɨə kaʼi bə̂d mɨjìm kɨrɨ ben ɨkə̂n chɔ̀m we. Wə̀d ɨ̀kə̀n Ŋwìə̀ Aizayà nyaʼa ghà ni, “Ə̀nùŋɨ̀sɨg, à kɨə we fə ben ɨkə̂n we nɨ tɨə ghà ə?”

¹⁷ Əne ɨbenɨ wɨə yeʼe tɨ ənɨ ɨnû mbe nɨ bə̂d ə zuə, ɨnû mbe nɨ bə̂d ə zuə mbɨə yeʼe ənjìm ɨnû mbe nɨ mbɨ ghà ɨmbə̀ʼ ə Kristo.

¹⁸ Àyɨə mə wɨə biirɨə ni: chəi mbɨ kɨrɨ zu ə? Təsìʼ yɨ ni mbɨ fə zu. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Ɨkə̂n we nɨ mbɨə ghàə̀ fə jàŋ si jìm, mɨŋgam mɨ̀mə̌d fə wò pè ɨnwǐ ɨsɨg.”

¹⁹ Mə yì biirɨ ni, chəi mɨ̀Izre nyaʼa zu ɨtu mɨ̀mə̌d zeŋ ə? Tɨtu, Mose nyaʼa ghà ni, “Mə bɨrɨ ghɨ̀ ni mbə̀ ghɨ ə̀dìì ɨgwɨ ə bə̂d mbe nɨ chəi mbɨ kuʼ ənɨ tɨ̀ mbɨ tɔŋ ənɨ əbeŋ. Mə bɨrɨ nɨŋ əbeŋ nɨ bə̂d məd yeʼ əneŋ əneŋ, ghɨ̀ mbə sə ɨtəm.”

²⁰ Aizayà nyaʼa berɨ fîŋ nɨ kǎ ɨchî nɨ wɨ̀ nyaʼa gha ni, “Bə̂d mbe nɨ chəi mbɨ nyaʼə kəb əmɨ fə zə əmɨ. Mə fə chwi mɨ ɨnyod əmbɨ ə bə̂d mbe nɨ chəi mbɨ nyaʼə biirɨ əmɨ.”

²¹ À yeʼ ɨmbə̀ʼ ə Izre, wɨ̀ nyaʼa ghà ni, “Mə zǐ zi sèm mbɨ ɨbɔ ɨmbə̀ʼ nɨŋ bə̂d nɨə ghɨ̀ rɨ̀zuə̀ bə̀ kà ətu.”