Rm 1 - Meta’

¹ À yɨə mɔ̌ Pɔ̂l, nɨ mə yeʼ wə̀d ə̀fàʼì Kristo Yeso, ŋwaʼnɨ ə̀ŋwàʼnɨ̀ zɔ̂. Ŋwìə̀ nyaʼa tɔŋ əmɨ ni mə̀ yeʼ wə̀d tom Kristo. Wɨ̀ nyaʼa bə̀ chɔʼ əmɨ ni mə̀ gha ɨkə̂n chɔ̀m.

² Ŋwìə̀ nyaʼa fə bè kàʼ ɨkə̂n chɔ̀m wɔ̂ ənjìm bə̂d ɨ̀kə̀n məd. Əne mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀.

³ Ɨkə̂n chɔ̀m wɔ̂ yɨ ɨmbə̀ʼ Wan məd, nɨ nyaʼə tɨ ənɨ əghaŋ ə Dèvîd ənɨ ɨgywɨ.

⁴ Ŋwìə̀ nyaʼa chwi ənɨ i ɨka ənjìm Əzwî ə Zeŋɨ ni Yeso Kristo a Ə̀nùŋɨ̀sɨg yɨ i Wan. Wɨ̀ nyaʼa chwi əne ɨchî nɨ wɨ̀ nyaʼa zwemnɨ əməd.

⁵ Ŋwiə̀ wɨə ghɨ̀ ɨ̀chɔ̀m ənɨ ə na ənjìm ə Wan məd we. Tɨ̀ yɨə bə̀ ə bə̂d tom ɨmbə̀ʼ jaŋ ɨkum məd əkaʼ bə̂d mɨ̀jìm mbe nɨ kaʼi mɨ̀Jû, ɨmbə̀ʼ mbɨ zɨ̀ tə fîŋ ɨgwɨ məd bə̀ zuunɨ əməd.

⁶ Mbə̀n bə̂ mbɨ əbɔʼ bə̂d mbe nɨ Ŋwìə̀ nyaʼa tɔŋ ni mbɨ yeʼ bə̂d Yeso Kristo.

⁷ Mə wɨə ŋwàʼnɨ̀ əmbɨ ə bə̂d mɨjìm mbe nɨ yeʼ ə Rom. Ŋwìə̀ ə ghaʼ əwən kwàʼ rɨŋgəʼ, əne wɨ̀ fə tɔŋ əwən ni mbɨ yeʼ mbi bə̂d. Ŋwìə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

Pɔ̂l nyaʼa kɔ̀ŋgɨ̀ ə Ŋwiə̀ nàʼ məben-əwe ɨ bɔ

⁸ Ənû rɨtu yɨ ni, mə wɨə nàʼə̀ məben-əwe əmbɨ mɨ Ŋwiə̀ ənjìm ə Yeso Kristo ɨmbə̀ʼ mbə̀n mɨjìm. Mə wɨə ghɨ̀ əne ɨmbə̀ʼ ɨghəm nɨ bə̂d rɨŋga ɨsɨg jìm mbɨə zu ɨchî nɨ mbə̀ nuŋ fîŋ ɨgun ə Ŋwiə̀.

⁹ Ŋwìə̀ we nɨ mɨə fàʼ ɨ bɔ ənɨ mɨ fîŋ jìm, ɨchî nɨ mɨə ghà ɨkə̂n chɔ̀m ɨmbə̀ʼ Wan məd, yɨə zərɨmbin ɨ num ni ənɨ mɨ̀nyùmə̀ jìm mbe nɨ mɨə kɔ̀ŋgɨ̀ əməd, mə wɨə kɔndɨ əwən.

¹⁰ Mə wɨə kɔ̀ŋgɨ̀ə̀ nɔnə ni, wɨ̀ mɨ benɨ, mə we tɨ̀ mə yeʼe əsɨ nən.

¹¹ Mə wɨə kàŋə̀ kə̀b zə əwən, ɨmbə̀ʼ mə ghɨ̀ Əzwî ə naʼ ɨneʼe ɨ nən. Ɨneʼe we bɨrɨ ghɨ ni mbə̀ kaanə.

¹² Əne yɨ ni, ɨbenɨ we tɨ̀ berɨ ɨgun ə Kristo tìmbɨ̀ əwa mbǎ mbǎ, wən tìmbɨ̀ wum, wum bə̀ tìmbɨ̀ wən.

¹³ Mbɨ bɔŋgɔb, mə kə̀b ni mbə̀ kyerɨ ni mə wɨə nyaʼə kàŋə̀ kə̀b nɨ yeʼe əsɨ nən ɨghəm nɔnɔʼ, àyɨə ɨnû mɔʼɔ nyaʼa kən əmɨ. Mə nyaʼa kəb yeʼe ɨmbə̀ʼ mə̀ ghɨ ni bə̂d mɔʼɔ rəkaʼ nən ben ə Ŋwiə̀, àmei ɨchî nɨ mə nyaʼa bə̀ ghɨ̀ əkaʼ bə̂d cherə mbe nɨ kaʼi mɨ̀Jû.

¹⁴ Mə yɨə wə̀d njɔ̌ əmbɨ ə bə̂d mbe nɨ kyerɨ ənû fɔrɨ əmbɨ mbe nɨ chəi mbɨ kyerɨ ənû. Mə yɨə bə̀ wə̀d njɔ əmbɨ ə bə̂d ɨwe bə̀ fɔrɨ əmbɨ ɨneŋ.

¹⁵ À yɨ əton nɨ mə kàŋ kə̀b nɨ bɨ gha ɨkə̂n chɔ̀m əmbɨ mbə̀n mbe nɨ yeʼ ə Rom.

Ɨka we nɨ yeʼ ɨŋga ɨkə̂n chɔ̀m

¹⁶ Chəi mɨ ətu ə nìd ɨmbə̀ʼ ɨkə̂n chɔ̀m, ɨmbə̀ʼ ɨghəm nɨ ɨkə̂n chɔ̀m yɨ ɨka Ŋwiə̀ nɨə chɨ̀ə̀ wə̀d jìm we nɨ benɨ rəŋgəʼ. Wɨ̀ bɨrɨ be chɨ mɨ̀Jû, beenɨ chɨ̀ bə̂d mbe nɨ kaʼi mɨ̀Jû.

¹⁷ Ɨkə̂n chɔ̀m wɔ̂ wɨə chwi ɨchî nɨ Ŋwìə̀ ə ghɨ̀ ni bə̂d təm kùʼnɨ̀ ənjìm ɨbenɨ. Ɨ wɨə kɔ rɨ ənɨ ɨchî nɨ bə̂d nuŋ fîŋ ɨgun ə Kristo bə̀ wò nwì àmei ənɨ ɨchî nɨ bə̂d nuŋ fîŋ ɨgun ə Kristo. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d we nɨ ɨnû məd kùʼnɨ̀ bɨrɨ ten ənjìm ɨbenɨ.”

Ɨgu ənû bə̂d mɨ̀sɔŋɨchù

¹⁸ Ŋwìə̀ we nɨ yeʼ ɨkaŋ wɨə chwi ni tə wɨə sə ɨtəm əbɔʼ ə bə̂d mbe nɨ chəi mbɨə wumnɨ əməd. Ɨ wɨə bə̀ sə əbɔʼ mbe nɨə ghɨ̀ ɨzɨg, ɨmbə̀ʼ ɨghəm nɨ ɨzɨg mɨ̀mə̌d wɨə kənə ni tɨ bə̂d kyerɨ ə rəsìʼ ɨmbə̀ʼ əməd.

¹⁹ Ənû ze nɨ tɨ̀ bə̂d kyerɨ ɨmbə̀ʼ ə Ŋwiə̀ ə zeŋ əmbɨ mɨ̀mə̌d, ɨmbə̀ʼ ɨghəm nɨ à yɨə Ŋwiə̀ ziə fə ghɨ ni zɨə zeŋ əmbɨ mɨ̀mə̌d.

²⁰ Tɨ ənɨ Ŋwìə̀ nyaʼa tekɨ ɨsɨg, mɨchî məd mbe nɨ chəi ənɨ tɨ̀ bə̂d zə, əne yɨ ɨka məd we nɨ ten i koŋ mbɨ ɨchî nɨ məd yeʼ ə Ŋwiə̀, fə jwɨ̀ zeŋ ɨchî nɨ bə̂d ə zə ɨghɨ mbe nɨ wɨ̀ tekɨ. Əne chəi ənɨ tɨ̀ mbɨ ghà ni chəi mbɨ kyerɨ.

²¹ Ka à bè yeʼi ni mbɨ nyaʼa kyerɨ ə Ŋwiə̀, àyɨə chəi mbɨ nyaʼa nàʼ ɨwumnɨ we ɨ bɔ ni məd yɨə Ŋwiə̀, kɨ̀ bè nàʼ məben-əwe ɨ bɔ. Ɨ mbɨə nyaʼə kɔndɨ yeʼ ɨnû əko. Əne ɨchî nɨ tɨkɔndɨ tɨ mɨ̀mə̌d nyaʼa tɨ əko, chəi mbɨ nyaʼə wɨrɨə kɔndɨ ənû ə chɔ̀m ə mɔʼɔ.

²² Mbɨ nyaʼa ghà ni mbə berɨ ɨwe, àyɨə mbɨ nyaʼa bèŋ ənɨ ɨneŋ.

²³ Əmbɨ mɨ̀mə̌d nɨ wumnɨ ə Ŋwiə̀ we nɨ chəi wɨ̀ bɨrɨ nɔ kwɨ, mbɨ nyaʼa bèŋ sɨə wumnɨə yeʼ mbɨ̀anèŋ mbe nɨ fu wə̀d mɨ̀sɔŋɨchù nɨə kwɨə. Mbɨ nyaʼa bə̀ sɨə wumnɨ rɨnən mbɨ ə nyam ɨwu kwè fɔrɨ nyam te nɨə kɔ ɨbum ə si.

²⁴ Ɨchî nɨ mbɨ nyaʼa ghɨ əne, Ŋwìə̀ nyaʼa nàʼ mɨ̀mə̌d əmbɨ tɨfeenɨ te nɨ nyaʼa ɨŋga fîŋ tɨ mɨ̀mə̌d, nɨ nyaʼə tɨfeenɨ nɨ ghɨ ɨnyɔɔnɨ-ɨnû, tɨfeenɨ nɨ ghɨ ɨfabrɨ-ɨnû mbɨ tɨfeenɨ nɨ ghɨ ɨnû mbe nɨə bèènɨ̀ ɨnyod mɨ̀mə̌d.

²⁵ Mbɨ nyaʼa kwepɨ rəsìʼ ɨmbə̀ʼ ə Ŋwiə̀, sɨə benə yeʼ mɨghab. Ɨ mbɨə nyaʼə wumnɨə bə̀ fàʼə̀ yeʼ əmbɨ əghɨ ze nɨ Ŋwiə̀ tekɨ. Chəi mbɨ nyaʼə ghɨ̀ əne ənɨ ə Ŋwiə̀ we nɨ nyaʼa tekɨ əghɨ ze. Məd yɨə Ŋwìə̀ we nɨ mbɨə yiirɨə koŋ! À yɨ əne.

²⁶ À yɨ əton nɨ Ŋwiə̀ nyaʼa nàʼ mɨ̀mə̌d əmbɨ rɨfeenɨ te nɨə bèènɨ̀ ɨnyod mɨ̀mə̌d. Məyi mɨ̀mə̌d nyaʼa sàŋ mbaŋə̀ sɨə niə məyi cherə.

²⁷ À yɨə bə̀ əndəŋ əndəŋ ni mbaŋə̀ rɨ nyaʼə sàŋə̀ məyi bən beenɨ əbɔʼ mbaŋə̀ rɨ cherə. Mbaŋə̀ tɨə nyaʼə ghɨ̀ ɨnû tɨ̀nìd ətu mbɨ ə mbaŋə̀ rɨ cherə. Mbɨ nyaʼa fə berɨ ɨchə nɨ kuʼnɨ mbɨ ɨnû rɨbɔ̀ŋ mbe nɨ mbɨ nyaʼə ghɨ̀ə̀.

²⁸ Ɨchî nɨ chəi mbɨ nyaʼa zə ni zɨə kùʼ nɨ kyerɨ ə Ŋwiə̀, Ŋwìə̀ nyaʼa ghɨ̀ ni mbɨ berɨ tɨkɔndɨ rɨbɔ̀ŋ, ɨmbə̀ʼ sɨə ghɨ̀ ɨnû mbe nɨ chəi mbɨ nyaʼa berɨ nɨ ghɨ̀.

²⁹ Tɨkwɨrɨ ɨzɨg jìm, tɨkwɨrɨ ɨnû rɨbɔ̀ŋ jìm, tɨkwɨrɨ ɨchî jìm nɨ feenɨ ɨghɨ bə̀ fɔrɨ tɨkwɨrɨ ɨbə jìm fə swi ɨŋga fîŋ tɨ mɨ̀mə̌d. Ənû nɨ ghɨ ə̀dìì, ənû nɨ zwiirɨ bə̂d, ənû nɨ chɔb, ənû nɨ tambɨ bə̂d fɔrɨ ənû nɨ taŋ mɨnaŋ fə bə̀ swi ɨŋga fîŋ tɨ mɨ̀mə̌d. Ɨ mbɨə ghɨ̀ mɨniə,

³⁰ ɨ mbɨə chə̀kɨ̀ rɨkum bə̂d, ɨ mbɨə bàn ə Ŋwiə̀, ɨ mbɨə tə̀ə̀nɨ̀ə̀ bə̂d, ɨ mbɨə seenɨə, ɨ mbɨə nɔ̀ ɨnyod, ɨ mbɨə tekɨ mɨnə̂njɨ̀ fi nɨ ghɨ ɨnû rɨbɔ̀ŋ, ɨ mbɨə bə̀ ghɨ̀ rɨ̀zuə̀ əmbɨ mbə mɨ̀mbǎʼ bə̀ fɔrɨ əmbɨ mbə mɨ̀nɨ̌ŋ.

³¹ Ɨ mbɨə ghɨ̀ əneŋ. Chəi mbɨə ghɨ̀ ɨnû mbe nɨ mbɨ kaʼi. Chəi mbɨə kə̀n ənɨ ə wə̀d. Chəi mbɨə bə̀ dììrɨ̀ə̀ wə̀d.

³² Ka à bè yeʼi ni mbɨ kyerɨ tɨkə rɨ Ŋwiə̀ ni bə̂d mbe nɨə ghɨ̀ tɨkwɨrɨ ənû tɔ̂ berɨ kwɨ, àyɨə ɨ mbɨə kɨrɨ wò ɨmbì rəbə ghɨ̀ə̀ ɨnû mbe ghɨ. Ɨ mbɨə bə̀ tìmbɨ̀ ə bə̂d mbe nɨə ghɨ̀ ɨnû rəŋgu.