Filemɔ̀n 1 - Meta’

¹ À yɨə mɔ̌ Pɔ̂l, nɨ mə̀ yeʼ wə̀d ndəŋ ɨmbə̀ʼ ə Kristo Yeso mbɨ Timotì nɨ yeʼ wa aŋgɔb, ŋwaʼnɨ ə̀ŋwàʼnɨ̀ zɔ̂. Tɨ̀ wɨə ŋwàʼnɨ̀ ɨ ne, àwɔ̀ Filemòn, nɨ yeʼ aŋgɔb nɨə fàʼə̀ mbɨ na. Tɨ̀ ghaʼ əwe kwàʼ rɨŋgəʼ.

² Tɨ̀ wɨə bə̀ ŋwàʼnɨ̀ ɨ ne, àwɔ̀ Afìà, nɨ yeʼ a njàbɨ. Tɨ̀ wɨə bə̀ ŋwàʼnɨ̀ ɨ ne, àwɔ̀ Akipùs, nɨ yeʼ ə sɔgyɨ̀ Kristo ɨghabɨ ə mbǎ. Tɨ̀ wɨə bə̀ ŋwàʼnɨ̀ əmbɨ ə bə̂d mɨ̀jìm mbe nɨ yeʼ ɨŋga ɨfetɨ bə̂d Kristo we nɨə nyɨ ɨŋga e nəb.

³ Ŋwìə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

Filemòn nyaʼa ghaʼ bə̂d Ŋwiə̀ bə̀ ben ə Kristo

⁴ Mə wɨə nàʼə̀ məben-əwe əmbɨ ə Ŋwiə̀ ɨghəm jìm ənɨ mɨə kɔ̀ŋgɨ̀ əməd kɔndɨ əwe.

⁵ Mə wɨə ghɨ̀ əne ɨmbə̀ʼ ɨghəm nɨ mə zu ɨchî nɨ à ghaʼ bə̂d Ŋwiə̀ mɨ̀jìm, bə̀ zu ɨchî nɨ à ben Ə̀nùŋɨ̀sɨg Yeso.

⁶ Mə wɨə kɔ̀ŋgɨ̀ ə Ŋwiə̀ ni ɨchî nɨ àwɔ̀ ə ghà ɨnû ɨmbə̀ʼ e benɨ, ə ze tɨ̀ zɨə ghɨ̀ ni bə̂d jeŋgɨ kyerɨ ɨ̀chɔ̀m jìm mbe nɨ yeʼ wa ɨchî nɨ tɨ̀ yeʼ ənɨ fɔtɨ mbɨ Kristo.

⁷ Aŋgɔb, ɨchî nɨ à ghaʼ bə̂d ə fə ghɨ̀ ni ɨghaʼi kaŋ swi ɨŋga mɨ fîŋ. Ɨchî nɨ àwɔ̀ ə zùtə̀ fîŋ rɨ bə̂d Ŋwiə̀ fə bə̀ nəərɨ əmɨ.

Pɔ̂l nyaʼa buʼ ɨbɔ əmbɨ Filemòn ɨmbə̀ʼ ə Ònèsimùs

⁸ Mə we tɨ̀ mə berɨ fîŋ nɨ ka ɨchî nɨ mə̀ yeʼ ənɨ ɨfɔtɨ mbɨ Kristo nɨ gha ɨ ne ni à ghɨ ənû ze nɨ kuʼnɨ,

⁹ àyɨə ɨchî nɨ mə ghaʼ əwe, mə kə̀b yeʼ nɨ buʼ ɨbɔ ɨ ne. À yɨə mɔ̌ Pɔ̂l, nɨ mbɨ zɨ əmɨ ə ndəŋ ɨmbə̀ʼ ɨghəm nɨ mə təm ənɨ ɨkum Kristo Yeso,

¹⁰ ə buʼ ɨbɔ ɨ ne ɨmbə̀ʼ mɨ wan, Ònèsimùs, nɨ mə̀ yeʼ mbǎʼ məd ɨchî nɨ mə̀ yeʼ ə nəb ndəŋ.

¹¹ À nyaʼa rɨmbì, chəi wɨ̀ nyaʼa berɨ ə̀fàʼì ɨ ne, àyɨə tɨ̀nîn wɨ̀ fə berɨ ə̀fàʼì ɨ ne bə̀ berɨ ɨ num.

¹² Mə wɨə wɨrɨə chà əməd ɨ ne, məd we nɨ kaŋ yeʼ mɨ fîŋ.

¹³ Mə kàŋ kə̀ʼ ghaʼ nɨ nuŋ əməd əgha mbɨ num, ɨmbə̀ʼ ɨ we tɨ̀ wɨ̀ fàʼ ɨ num ənɨ əze rɨmbin ɨchî nɨ mə yeʼ ə nəb ndəŋ ɨmbə̀ʼ ɨkə̂n chɔ̀m we nɨ mɨə ghàə̀.

¹⁴ Àyɨə chəi mə̀ ghaʼ nɨ ghɨ ənû ə mɔʼɔ ze nɨ chəi à benɨ, ɨmbə̀ʼ ɨ̀chɔ̀m we nɨ à bɨrɨ ghɨ̀ yeʼ ni à ghɨ̀ ənɨ e ɨghaʼi, kaʼi ni à yɨ mbɨ nyeŋ əwe nyeŋɨ.

¹⁵ Ɨghə̀m, à yɨ əton nɨ wɨ̀ nyaʼa saŋ əwe ənɨ ɨkə nyumə̀, ɨmbə̀ʼ à we tɨ̀ à wɨrɨ nɨŋ əməd rəbɔʼ koŋ.

¹⁶ Chəi à bɨrɨ wɨrɨ nɨŋ əməd ɨghabɨ ə̀bòʼò. À bɨrɨ nɨŋ əməd ɨghabɨ wə̀d nɨ chè ə̀bòʼò. Məd yɨ aŋgɔb nɨ tɨ̀ ghaʼi kwàʼ rɨŋgəʼ. Mə ghaʼ əməd, àyɨə mə kyerɨ ni à ghaʼ əməd chè əmɨ. Ghaʼ əməd ɨghabɨ ə̀bòʼò fɔrɨ ɨghabɨ aŋgɔb ɨchî nɨ tɨ̀ yeʼ ənɨ ɨfɔtɨ mbɨ Ə̀nùŋɨ̀sɨg.

¹⁷ Əne à mɨ kɔndɨ ni mɔ̌ yɨə wə̀d nɨə fàʼə̀ mbɨ ne, nɨŋ əməd ɨchî nɨ tɨ̀ à nɨŋ əmɨ.

¹⁸ À mɨ yeʼ ni wɨ̀ gu ənû ɨ ne, kɨ̀ ni wɨ̀ ə yim e əghɨ ə mɔʼɔ, ŋwaʼnɨ ənɨ mɨ ɨkum.

¹⁹ Àyɨə mɔ̌ Pɔ̂l ŋwaʼnɨ ə̀ŋwàʼnɨ̀ zɔ̂ ənɨ mɨ əbɔ, mə bɨrɨ wi ɨ ne. Kyerɨ ni à yim njɔ ɨ num ɨmbə̀ʼ ɨchî nɨ mə nyaʼa ghɨ ni à ben ə Kristo.

²⁰ Ee, kyɨə aŋgɔb, mə kəb ni à ghɨ ɨ̀chɔ̀m wɔ̂ ɨ num ənɨ ɨkum Ə̀nùŋɨ̀sɨg. Kaŋ zùtɨ̀ mɨ fîŋ ɨchî nɨ tɨ̀ yeʼ ənɨ ɨfɔtɨ mbɨ Kristo.

²¹ Mə kàŋ kyerɨ ənɨ rəsìʼ ni à bɨrɨ ghɨ ɨnû mbe nɨ mə gha ɨ ne. Mə wɨə ŋwaʼnɨ ɨ ne ni à kyerɨ ni à bɨrɨ ghɨ ɨnû mbe chè ɨchî nɨ mə̀ nyaʼa ghɨ ɨ ne.

²² Ənû ə cherə yɨ ni, tekɨ ətu ə nəb ə bə̂d rɨ̀sɔ̀ʼɔ̀ ɨ num, ɨmbə̀ʼ ɨghəm nɨ mə wɨə wòmə̀ ni ənjìm ə̀kɔ̀ŋgɨ̀ ze nɨ mbə̀ə kɔ̀ŋgɨ̀ə̀, Ŋwiə̀ we tɨ wɨ̀ wɨrɨ nàʼ əmɨ ɨ nən.

Ə̀chàʼrɨ̀ nɨ sɨ nwìə̀

²³ Epafràs, nɨ tɨ̀ yeʼ ə nəb ndəŋ ɨnɔ̂n ɨmbə̀ʼ ɨkum Kristo Yeso, wɨə chàʼrɨ̀ əwe.

²⁴ Mbɨ bɔŋgɔb mbe nɨ mɨə fàʼə̀ mbɨ mɨ̀mə̌d əne yɨə Mak, Àristakùs, Demàs mbɨ Luk bə̀ chàʼrɨ̀ əwe.

²⁵ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ mbə̀n mɨjìm.