Matìyò 9 - Meta’

Yeso nyaʼa vɨ̀ mbaŋə̀ nɨ nyaʼa buʼrə

¹ Yeso nyaʼa nyɨ əbaŋ ɨgyɨ̀ baanɨ wò ɨŋga əsɨ ze nɨ wɨ̀ nyaʼə chub əŋgu.

² Ənɨ wɨ̀ nyaʼa pè əŋgu, bə̂d mɔʼɔ nyaʼa bèʼ mbaŋə̀ ɨgwɨ ɨkon wò əsɨ məd. Mbaŋə̀ ze nyaʼa fə buʼrə. Ənɨ Yeso nyaʼa zə ɨchî nɨ bə̂d mbe nyaʼa nuŋ fîŋ ɨgwɨ ni, wɨ̀ nyaʼa ghà əmbɨ mbaŋə̀ ze nɨ nyaʼa buʼrə ni, “Yim fîŋ kyɨə wan. Mə fə waʼ mbe ɨnû rɨbɔ̀ŋ.”

³ Ənɨ wɨ̀ nyaʼa ghà əne, məchwiə̀ rɨ̀kə̌ mɔʼɔ nyaʼa ghà mbənə mbənə ni, “Mbaŋə̀ zɔ̂ zɨə zɔ̀m ə Ŋwiə̀!”

⁴ Yeso nyaʼa kyerɨ tɨkɔndɨ tɨ mɨ̀mə̌d, əne wɨ̀ nyaʼa ghà ni, “Mbə̀ kɨə kɔndɨ ɨnû rɨbɔ̀ŋ ɨŋga tə fîŋ ɨmbə̀ʼ ə yè ə?

⁵ À kɨ ənû zi ə zam ə? À kɨ ɨ ghà ni, 'Mə fə waʼ mbe ɨnû rɨbɔ̀ŋ', kɨ̀ ɨ gha ni, 'Nɔʼ rətiə yèn ə?'

⁶ Àyɨə mə bɨrɨ ghɨ mbə̀ kyerɨ ni Wan Wə̀d ə berɨ ɨka ɨgwɨ ə si nɨ waʼ ɨnû rɨbɔ̀ŋ.” Ənɨ wɨ̀ nyaʼa ghàm əne, wɨ̀ nyaʼa ghà əmbɨ mbaŋə̀ ze nɨ nyaʼa buʼrə ni, “Nɔʼ rətiə, beʼ e ɨkon, wò əwe ɨnuʼ.”

⁷ Mbaŋə̀ ze nyaʼa nɔ̀ʼ rətiə, wò əwi ɨnuʼ.

⁸ Ənɨ mɨnɔ̂n bə̂d mbe nyaʼa zə ənû ze, mbɨ nyaʼa bɔ, əne yiirɨ ə Ŋwiə̀ ɨchî nɨ wɨ̀ naʼ ɨkwɨ ɨka wɔ̂ əmbɨ ə bə̂d.

Yeso nyaʼa tɔŋ ə Matiù

⁹ Yeso nyaʼa nɔ̀ʼ rɨ əsɨ ze. Ənɨ wɨ̀ nyaʼə yènə̀ wòə̀, wɨ̀ nyaʼa zə mbaŋə̀ mɔʼɔ nɨ mbɨ nyaʼə tɔŋ ənɨ Matiù. Wɨ̀ nyaʼa i ɨŋga nəb nɨ mbɨə fetɨ mɨ̀tagsɨ̀. Yeso nyaʼa ghà ɨ bɔ ni, “Beenɨ əbɔʼ num.” Matiù nyaʼa nɔ̀ʼ beenɨ əbɔʼ məd.

¹⁰ Ənɨ Yeso nyaʼa chub ɨ jɨg ɨŋga nəb Matiù mbɨ mbi mə̀mə̀ə̀nɨ̀-ɨnû, məfetɨ mɨ̀tagsɨ̀ nɔnɔʼ fɔrɨ bə̂d nɨə ghɨ̀ ɨnû rɨbɔ̀ŋ nyaʼa wò fɔtɨ ɨ jɨg mbɨ mɨ̀mə̌d.

¹¹ Ənɨ mɨ̀Farisiî nyaʼa zə ənû ze, mbɨ nyaʼa biirɨ əmbɨ mə̀mə̀ə̀nɨ̀-ɨnû ɨməd ni, “Əchwiə̀-ɨnû wɔ̂ ɨ nən kɨə jɨgə mbɨ məfetɨ mɨ̀tagsɨ̀ bə̀ jɨgə mbɨ ə bə̂d nɨə ghɨ̀ ɨnû rɨbɔ̀ŋ ɨmbə̀ʼ ə yè ə?”

¹² Ənɨ Yeso nyaʼa zu ənû ze, wɨ̀ nyaʼa ghà ni, “Chəi bə̂d mbe nɨ yeʼ ɨkǎ ə kə̀bə̀ wə̀d ɨfuʼ. Bə̂d mbe nɨə kə̀bə̀ wə̀d ɨfuʼ yɨ mbe nɨə wɔ̀nə̀.

¹³ Mbə̀ wo kə̀b əton ənɨ ɨŋgam Ŋwiə̀ we nɨ gha ni, 'Mə kə̀b yeʼ ni bə̂d diirɨ mbɨ cherə, kaʼi ni bə̂d naʼ ɨghɨ ə̀fà ɨ num.' Chəi mə̀ nyaʼa yeʼe ɨ tɔŋ bə̂d nɨə ghɨ̀ ɨnû nɨ kuʼnɨ. Mə nyaʼa yeʼe ɨ tɔŋ yeʼ mbe nɨə ghɨ̀ ɨnû rɨbɔ̀ŋ.”

Ɨbiirɨ ɨmbə̀ʼ ənû nɨ chub rɨ jɨg

¹⁴ Mə̀mə̀ə̀nɨ̀-ɨnû Jɔ̌n we nɨ nyaʼə nàʼ mɨnib nyaʼa wò əsɨ Yeso pè biirɨ ɨ bɔ ni, “Əton nɨ mbǎ mbɨ mɨ̀Farisiî ə chubə rɨ jɨg, àyɨə chəi mbe mə̀mə̀ə̀nɨ̀-ɨnû ə chubə rɨ jɨg kɨ ni yè ə?”

¹⁵ Yeso nyaʼa wììrɨ̀ əmbɨ mɨ̀mə̌d ni, “Tɨ̀ bə̂d mbe nɨ wo jɨg ɨgən chub ənɨ ə̀kə̀nɨ̀ ənɨ ɨnom ɨgən kɨrɨ i mbɨ mɨ̀mə̌d ə? Ɨni mbɨə yeʼe nɨ mbɨ bɨrɨ nɨŋ ɨnom ɨgən we rəkaʼ mɨ̀mə̌d. Ɨni mbe mɨ pè, mbɨ kɨ chubɨ rɨ jɨg.

¹⁶ “Kaʼ wə̀d wɨə baŋgɨ i əghɨ ə ngywɨ ə fi ɨgun ngywɨ̌ ə nun, ɨmbə̀ʼ ɨghəm nɨ əghɨ ə ngywɨ ə fi ze ə bɨrɨ nurə, ghɨ̀ ɨbɨgɨ we wɨrɨ faŋgɨ.

¹⁷ Kaʼ wə̀d wɨə zɨ ə mɨnoʼ zwɨ̀ ɨŋga chəŋ ənun. Wɨ̀ mɨ ghɨ̀ əne, chəŋ te bɨrɨ kwɨ, mɨnoʼ mbe chwɨ̀ i, chəŋ te bə i. Ɨ mbɨə zɨ̀ mɨnoʼ zwɨ̀ yeʼ ɨŋga chəŋ fi, ɨmbə̀ʼ kɨ wə̀d sam i mɨnoʼ bə̀ sam chəŋ.”

Yeso nyaʼa zwemnɨ wan əyi ətu ɨgwɨ mɨ̀sɔgyɨ̀, bə̀ vɨ̀ əyi nɨ nyaʼə wɔ̀n ɨtuʼ

¹⁸ Ənɨ Yeso nyaʼə kɨrɨ ghàmə̀, wə̀d kyeŋ mɨ̀Jû mɔʼɔ nyaʼa wò əsɨ məd, pè chìndɨ̀ ɨtu ɨnywɨ ə si ɨfě ɨ bɔ ghà ni, “Mɨ wan əyi ə cherə kwɨ ə. Yeʼe zab e əbɔ ɨgwɨ məd, əne wɨ̀ bɨrɨ wɨrɨ tènə̀.”

¹⁹ Yeso mbɨ mbi mə̀mə̀ə̀nɨ̀-ɨnû nyaʼa nɔ̀ʼ beenɨ əbɔʼ məd.

²⁰ Əyi mɔʼɔ nɨ nyaʼə wɔ̀n ɨtuʼ nyaʼa wò ənjìm ə Yeso pè bètɨ̀ əchəŋ ə ngywɨ̌ əməd. Wɨ̀ nyaʼa fə wɔ̀n ɨghəm ɨwu wum chɔ̀b rɨ̀be.

²¹ Wɨ̀ nyaʼa ghà ɨŋga i fîŋ ni, “Mə mɨ bètɨ̀ àmei ngywɨ̌ əməd, mə bɨrɨ bɔtɨ.”

²² Ənɨ wɨ̀ nyaʼa betɨ, Yeso nyaʼa bèŋ zə əməd, ghà ɨ bɔ ni, “Yim fîŋ, kyɨ ɨŋgɔbə! E ɨbenɨ fə ghɨ̀ ni à bɔtɨ e.” Àmei əwu əwən əyi we nyaʼa bɔtɨ i.

²³ Ənɨ Yeso nyaʼa wo əkwɨ wə̀d kyeŋ mɨ̀Jû we, wɨ̀ nyaʼa zə bə̂d nɨə fə ɨmbarɨ bə̀ zə ɨnɔ̂n bə̂d nɨ nyaʼə ja ɨsɨ.

²⁴ Ənɨ wɨ̀ nyaʼa zə əne, wɨ̀ nyaʼa ghà ni, “Mbə̀ wo əwən! Chəi wan əyi wɔ̂ kɨrɨ kwɨ. Ɨ wɨə gwen i gwenɨ!” Ənɨ wɨ̀ nyaʼa ghà əne, bə̂d mbe nyaʼa kɔ chəʼ əməd.

²⁵ Ənɨ mbɨ nyaʼa cha ɨnɔ̂n bə̂d we ɨsɨg, Yeso nyaʼa nyɨ ɨŋga nəb ze, yim əbɔ ə wan əyi we, wɨ̀ nɔ̀ʼ təm rətiə.

²⁶ Ɨkə̂n ɨmbə̀ʼ ənû ze nyaʼa jàŋ ɨŋga əbà əbeŋ ze ə jìm.

Yeso nyaʼa vɨ̀ mbaŋə̀ rɨ̀be nɨ nyaʼa fɨgə

²⁷ Ənɨ Yeso nyaʼə nɔ̀ʼə̀ rɨ əsɨ ze, mbaŋə̀ rɨ̀be nɨ nyaʼa fɨgə nyaʼə beenɨ əbɔʼ məd yènə̀ kyeŋə rɨ̀kǎ ghàə̀ ni, “Wan Dèvîd, diirɨ əwa!”

²⁸ Ənɨ Yeso nyaʼa nyɨ ə nəb, mɨfɨgɨ̀ mbe nyaʼa wò əsɨ məd. Əne Yeso nyaʼa biirɨ əmbɨ mɨ̀mə̌d ni, “Mbə̀ ben ni mə we tɨ̀ mə ghɨ̀ mbə̀ zə ɨsɨ ə?” Mbɨ nyaʼa wììrɨ̀ ni, “Ee, kyɨə masà.”

²⁹ Yeso nyaʼa bètɨ̀ əghə mɨ̀mə̌d, ghà ni, “Ənû ze nɨ mbə̀ benɨ, ə ghɨ ənɨ ə nən!”

³⁰ Mbɨ nyaʼa wɨrɨ kɔ zə ɨsɨ. Əne Yeso nyaʼa jeŋgɨ patɨ mɨ̀mə̌d ghà ni, “Tɨ mbə̀ tɔ ghɨ əwən ni wə̀d mɔʼɔ kyerɨ ənû zɔ̂!”

³¹ Àyɨə mbɨ nyaʼa nɔ̀ʼ yènə̀ saʼə mɨkâ Yeso ɨŋga əbà əbeŋ ze ə jìm.

Yeso nyaʼa vɨ̀ mbaŋə̀ nɨ nyaʼə tɨ̀ghàm

³² Ənɨ bə̂d mbe nyaʼə wòə̀, bə̂d mɔʼɔ nyaʼa nɨŋ mbaŋə̀ nɨ əzwî rɨbɔ̀ŋ ə nyaʼa ghɨ̌ wɨ̀ bèŋ ənɨ rɨ̀ghàm wò əsɨ Yeso.

³³ Ənɨ Yeso nyaʼa chɨ əzwî rɨbɔ̀ŋ ze, mbaŋə̀ ze nyaʼa kɔ ghamɨ. Mɨnɔ̂n bə̂d mbe nyaʼa yiirɨ, əne ghà ni, “Chəi tɨ̀ kweʼ zə ənû ɨghabɨ zɔ̂ ɨŋga Izre.”

³⁴ Àyɨə mɨ̀Farisiî nyaʼa ghà ni, “À yɨ ɨfɔ̀n ɨzwî rɨbɔ̀ŋ naʼ ɨka ɨ bɔ ni wɨ̀ chɨ ɨzwî rɨbɔ̀ŋ.”

Yeso nyaʼa kə̀n ənɨ ə bə̂d

³⁵ Yeso nyaʼa ghanə yèn ɨŋga ɨsɨ kyeŋ jìm bə̀ fɔrɨ ɨŋga ɨsɨ kwa jìm. Wɨ̀ nyaʼə yènə̀ chwiə ɨnû ɨŋga nəb tɨ ə̀kàtɨ̀ te nɨ nyaʼa ɨŋga ɨsɨ mbe. Wɨ̀ nyaʼə bə̀ yènə̀ ghà ɨkə̂n chɔ̀m ɨmbə̀ʼ ənû ɨfɔ̀n rɨkaŋ, bə̀ yènə̀ vɨ̀ ɨwɔn jìm bə̀ yènə̀ vɨ̀ ɨnɔʼɔ jìm.

³⁶ Ənɨ wɨ̀ nyaʼa zə mɨnɔ̂n bə̂d mbe, wɨ̀ nyaʼa kàŋ kə̀n ənɨ mɨ̀mə̌d, ɨmbə̀ʼ ɨghəm nɨ mbɨ nyaʼə zəə ŋgəʼ bə̀ fɔrɨ ɨmbə̀ʼ ɨghəm nɨ chəi wə̀d nɨ nyaʼə wèèrɨ̀ mɨ̀mə̌d. Mbɨ nyaʼa ɨghabɨ ə njɨ̀g nɨ chəi wə̀d ə nə̀ŋgɨə.

³⁷ Wɨ̀ nyaʼa zə əne ghà əmbɨ mbi mə̀mə̀ə̀nɨ̀-ɨnû ni, “Ɨghɨ nɨ kwə̀ŋ ə kàŋ nɔʼ, àyɨə bə̂d ə̀fàʼì ə kə.

³⁸ Əne mbə̀ kɔŋgɨ Ə̀nùŋɨ̀sɨg nɨ berɨ mbeŋ ni wɨ̀ cha bə̂d ə̀fàʼì mbɨ wo kwə̀ŋ ɨghɨ məd.”