Matìyò 24 - Meta’

Yeso nyaʼa ghà ɨmbə̀ʼ ɨchî nɨ mbɨ bɨrɨ nɨ sàʼ mbàn Ŋwìə̀

¹ Yeso nyaʼa nɔ̀ʼ rɨ ə mbàn Ŋwìə̀ kɔ wo i. Mə̀mə̀ə̀nɨ̀-ɨnû ɨməd nyaʼa wò əsɨ məd ɨ chwi nəb te rɨ ə mbàn Ŋwìə̀ ɨ bɔ.

² Wɨ̀ nyaʼa wììrɨ̀ əmbɨ mɨ̀mə̌d ni, “Mbə̀ zə ɨghɨ mbɔ̂ jìm ə? Mə ghà rəsìʼ ɨ nən ni chəi ɨti mɔʼ bɨrɨ chub ɨgun wɨ cherə. Mbɨ bɨrɨ kɔd əti ze əjìm ə si.”

Mə̀mə̀ə̀nɨ̀-ɨnû Yeso bɨrɨ zə ŋgəʼ, mbɨ bə̀ nwèndɨ̀ tɨkyerɨ-ɨwu mɨ̀mə̌d

³ Ənɨ Yeso nyaʼa chub ə si ɨkaŋ Ɨwum mɨ̀Olìf, mə̀mə̀ə̀nɨ̀-ɨnû mbe nyaʼa wò əsɨ məd àmei mɨ̀mərə mɨ̀mərə pè biirɨ ni, “Gha ɨ na, ənû zɔ̂ ə kɨə wo ghɨ̀ əwù zi ə? Ənweenɨ ze nɨ bɨrɨ chwi ni à bɨrɨ wɨrɨ yeʼe mbɨ ni ɨsɨg bɨrɨ nwìə̀ kɨ əzi ə?”

⁴ Yeso nyaʼa wììrɨ̀ əmbɨ mɨ̀mə̌d ni, “Mbə̀ we əwən ɨmbə̀ʼ tɨ wə̀d mɔʼɔ ghɨ i ni mbə̀ febə,

⁵ ɨmbə̀ʼ ɨghəm nɨ bə̂d mɨ̀nɔnɔʼ bɨrɨ yeʼe, əne nɨŋ mɨ ɨkum yènə̀ ghàə̀ ni, 'Mɔ̌ yɨə Wə̀d we nɨ Ŋwiə̀ zɔʼɔ.' mbɨ bɨrɨ gha əne fèbrɨ̀ bə̂d mɨ̀nɔnɔʼ.

⁶ Mbə bɨrɨ zu ni ɨbeŋ mbɨə màʼə̀ bid, bə̀ zu mɨŋgam ɨmbə̀ʼ ɨchî nɨ bə̂d ə kəb maʼ bid. Tɨ mbə̀ bɔ ə. Ɨnû mbɔ̂ jìm berɨ ghɨ̀, àyɨə kaʼ à yɨə kɨrɨ i ɨnwǐ ɨsɨg.

⁷ Ɨbeŋ bɨrɨ maʼ bid mbɨ ɨbeŋ cherə. Ɨbeŋ nɨ mɨfɔ̂n ə tùmbɨ̀ə̀ bə̀ màʼ bid mbɨ ɨbeŋ cherə nɨ mɨfɔ̂n ə tùmbɨ̀ə̀. Njì kǎ kǎ bɨrɨ nyɨ, si bə̀ wùd ɨsɨ ɨsɨ.

⁸ Ɨnû mbɔ̂ jìm yɨ ɨghabɨ ɨchî nɨ əyi kɔ zu rɨbuʼ ənɨ wɨə nombɨə.

⁹ “Nyùmə̀ we mɨ kùʼ, mbə bə̂d pə̀n bɨrɨ gywɨ əwən nàʼ ni mbɨ chə əwən bə̀ zwiirɨ əwən. Ɨsɨg jìm bɨrɨ ban əwən ɨmbə̀ʼ əmɨ.

¹⁰ Ənɨ ə nyùmə̀ we, ɨbenɨ bə̂d mɨ̀nɔnɔʼ bɨrɨ bɔd. Bə̂d bɨrɨ fendɨ mbə bɔŋgɔb bə̀ kɔ bàn mbə bɔŋgɔb.

¹¹ Bə̂d ɨ̀kə̀n Ŋwiə̀ mɨghab nɔnɔʼ bɨrɨ jwɨ̀ əne fèbrɨ̀ bə̂d mɨ̀nɔnɔʼ.

¹² Ɨchî nɨ ɨnû ɨzɨg bɨrɨ nɔʼ, chəi bə̂d mɨ̀nɔnɔʼ bɨrɨ wɨrɨə ghaʼə mbɨ cherə ɨchî nɨ mbɨ nyaʼə bèə̀ ghaʼə.

¹³ Àyɨə wə̀d we nɨ nyiʼi wò pè ənɨ ɨnwǐ, Ŋwìə̀ bɨrɨ chɨ əməd rəŋgəʼ.

¹⁴ Bə̂d bɨrɨ gha ɨkə̂n chɔ̀m wɔ̂ ɨmbə̀ʼ ənû ɨfɔ̀n rɨkaŋ ɨŋga ɨsɨg jìm, ɨmbə̀ʼ ɨbeŋ jìm zu. Mbɨ mɨ ghɨ̀ əne, ɨnwǐ ɨsɨg bɨrɨ sɨ yeʼe.

Əghɨ ze nɨə ghɨ̀ ni bə̂d tibrɨ mbàn Ŋwìə̀

¹⁵ “Ənɨ mbə̀ zə əghɨ ze nɨə ghɨ̀ ni bə̂d tibrɨ mbàn Ŋwìə̀, nɨ Dànièl nyaʼa gha ɨmbə̀ʼ əzɨ əwən, nɨ zɨə təm ɨŋga əsɨ ə zeŋɨ (ətu wə̀d we nɨə foŋ ə zeŋ),

¹⁶ bə̂d mbe nɨ yeʼ ə Jùdeyà, mbɨ norə kɔʼ ɨkaŋ tɨwum.

¹⁷ Tɨ wə̀d we nɨ yeʼ ɨdom nəb swiʼ i ɨ wo nɨŋ ɨghɨ mbe nɨ yeʼ ɨŋga nəb məd.

¹⁸ Tɨ wə̀d we nɨ yeʼ ə mbeŋ wɨrɨ bəndɨ i rəbɔʼ ɨ wo nɨŋ i ngywɨ̌ maʼi.

¹⁹ Ŋgəʼ bɨrɨ nyɨ ɨgwɨ məyi mbe nɨ yeʼ rɨ̀bùmə̀, bə̀ nyɨ ɨgwɨ mbe nɨə nyɔŋə bɔn ɨŋga ɨni mbe!

²⁰ Mbə̀ kɔŋgɨ ə Ŋwiə̀ ni tɨ əni ze nɨ mbə̀ bɨrɨ ghanə nòrə̀ ə kùʼ i ənɨ ə nyùmə̀ we nɨ ɨfə ə kɔ əku, kɨ̀ ɨgwɨ əni əkwɨ mɨ̀Jû,

²¹ ɨmbə̀ʼ ɨghəm nɨ bə̂d bɨrɨ zə ŋgəʼ əku ənɨ ə nyùmə̀ we, chè ŋgəʼ jìm ze nɨ kweʼ jwɨ̀ kɔ rɨ ənɨ Ŋwìə̀ nyaʼa tekɨ ɨsɨg yeʼe pè rɨ̀nîn. Chəi ɨkwɨ ŋgəʼ cherə bɨrɨ wɨrɨ jwɨ̀ ɨghabɨ wɔ̂.

²² À mɨ yeʼ nɨ chəi Ŋwìə̀ nyaʼa fə be sobrɨ ɨnun ɨni mbe, njɨ chəi wə̀d mɔʼɔ bɨrɨ jwɨ rəŋgəʼ. Wɨ̀ bɨrɨ wom sobrɨ ɨnun ɨni mbe ɨmbə̀ʼ ɨghəm bə̂d mbe nɨ wɨ̀ nyaʼa fə chɔʼɔ.

²³ “Əne wə̀d mɔʼɔ mɨ ghà ɨ nən ənɨ ə nyùmə̀ we ni, 'Mbə̀ zə, wɔ̂ yɨə Wə̀d we nɨ Ŋwìə̀ zɔʼɔ!' kɨ̀ ni, 'À yɨə məd wə!' tɨ mbə̀ ben ə.

²⁴ Mə wɨə ghà əne ɨmbə̀ʼ ɨghəm nɨ bə̂d mbe nɨ Ŋwìə̀ zɔʼɔ mɨ̀ghab mbɨ ə bə̂d ɨ̀kə̀n Ŋwiə̀ mɨ̀ghab bɨrɨ nɨ jwɨ̀, əne ghɨ̀ ɨnweenɨ-ɨnû ka ka bə̀ ghɨ̀ ɨnû yiirɨ, ɨmbə̀ʼ ɨchî mɨ chwiə, mbɨ fèbrɨ̀ bə̂d mbe nɨ Ŋwìə̀ fə chɔʼɔ.

²⁵ Mbə̀ zə, mə fə ghà ɨnû mbɔ̂ ɨ nən bɔŋ nyùmə̀ sɨə kùʼə̀.

²⁶ “Əne wə̀d mɔʼɔ mɨ ghà ɨ nən ni, 'Mbə̀ zə, məd wɨ ɨŋga ɨbad rɨkwàʼi,' tɨ mbə̀ wo əŋgu, kɨ̀ ni, 'Mbə̀ zə, məd wɨ ɨŋga ɨtu nəb mbe rɨŋga,' tɨ mbə̀ ben ə.

²⁷ Ɨchî nɨ ɨbi mbə̀ŋ ə ŋwàŋ rɨ əbà ze nɨ nyùmə̀ ə tòʼə̀ wò pè əbà ze nɨ nyùmə̀ ə nyɨə, yɨə bə ɨchî nɨ Wan Wə̀d bɨrɨ yeʼe.

²⁸ Əsɨ ze nɨ əvɨ nyam ə yeʼ əŋgu, mɨzam bɨrɨ wo fetɨ əŋgu.

Wan Wə̀d bɨrɨ wɨrɨ yeʼe

²⁹ “Ɨni ŋgəʼ mbe nɨ mɨ mì i mi, nyùmə̀ bɨrɨ fin, kaʼ ɨmɨg bɨrɨ te i, tɨtəmɨ bɨrɨ nɔʼ rɨ əton ɨkaŋ feŋgɨ ə si, Ŋwìə̀ bɨrɨ chɨ ɨzwî mbe nɨ yeʼ ɨkaŋ.

³⁰ “Nyùmə̀ we mɨ kùʼ, ənweenɨ ze nɨ chwiə ni Wan Wə̀d wɨə yeʼe ə bɨrɨ jwɨ̀ əton ɨkaŋ, əne mɨnəbɨ jìm rɨ ɨgwɨ ɨsɨg bɨrɨ dì. Mbɨ bɨrɨ zə Wan Wə̀d nɨə yeʼe ɨgwɨ ə pàʼ, zə ɨka we nɨ wɨ̀ berɨ bə̀ zə ɨwumnɨ kyeŋ we nɨ wɨ̀ bə̀ berɨ.

³¹ Tàŋ mɨ ghàm rɨ̀kǎ, wɨ̀ tom mbi mbɨ̀aŋgɨrə̀ ɨba ɨsɨg mbe kwè ni mbɨ fetɨ mbi bə̂d mbe nɨ wɨ̀ chɔʼɔ, kɔ rɨ ənɨ ɨbu ɨsɨg fibɨ̀ wò pè ənɨ wɨ cherə.

Ənû nɨ tɨ̀ bə̂d kwembɨ rɨ ənɨ əzed ə fîg

³² “Mbə̀ kwembɨ ənû ə mɔʼɔ tɨ ənɨ əzed ə fîg. Tɨtəb rɨ bɔd mɨ jwɨ̀ sɨə chə̀ʼə̀, mbə̀ kyerɨ ni ɨchɨ fə yeʼe.

³³ À yɨ əndəŋ əndəŋ ni mbə̀ mɨ zə ɨnû mbɔ̂ jìm, mbə̀ kyerɨ ni nyùmə̀ we nɨ Wan Wə̀d bɨrɨ yeʼe fə tiinɨ, əne wɨ̀ fə sɨ i ɨchû ɨkam.

³⁴ Mə ghà rəsìʼ ɨ nən ni, kaʼ ɨghəm bə̂d wɔ̂ bɨrɨ che i zɨ rɨ tɨ̀ ɨnû mbɔ̂ jìm ghɨ̀.

³⁵ Ɨkaŋ fɔrɨ si bɨrɨ chè, àyɨə chəi mɨ ɨŋgam bɨrɨ nɔ che ətu ə̀kǒ.

Chəi wə̀d mɔʼɔ nɨ kyerɨ əni ze kɨ̀ nyùmə̀ we nɨ ɨnû mbɔ̂ bɨrɨ ghɨ̀

³⁶ “Chəi wə̀d mɔʼɔ kyerɨ əni ze kɨ̀ nyùmə̀ we nɨ ɨnû mbɔ̂ bɨrɨ ghɨ̀, ka àbei mbɨ̀aŋgɨrə̀ mbe nɨ yeʼ ɨkaŋ kɨ̀ bè ə Wan. Àmei Mbǎʼ rə̀zìʼ wi kyerɨ.

³⁷ Ənû ze nɨ nyaʼa ghɨ ənɨ ə nyùmə̀ Noà, yɨə bə̀ ənû nɨ bɨrɨ ghɨ̀ ənɨ ə nyùmə̀ we nɨ Wan Wə̀d bɨrɨ wɨrɨ yeʼe.

³⁸ À nyaʼa ənɨ ə nyùmə̀ we, bɔŋ Ŋwìə̀ nyaʼə sɨə ghɨ̀ ni mbə̀ŋ nɔ mɨnib kubrɨ ɨsɨ, bə̂d mbɨə nyaʼə jɨgə bə̀ nɔə. Ɨ mbɨə nyaʼə namə bə̀ namnə mbə bɔn. Ɨ mbɨə nyaʼə ghɨ̀ əne wò pè əni ze nɨ Noà nyaʼa nyɨ əbaŋ ɨgyɨ̀ ze nɨ Ŋwìə̀ nyaʼa gha ɨ bɔ nɨ wɨ̀ tekɨ.

³⁹ Chəi bə̂d mbe nyaʼa kyerɨ ənû ze nɨ nyaʼa wò ghɨ̀, pè ənɨ mbə̀ŋ ze nyaʼa nɔ, mɨnib kubrɨ ɨsɨ chè zə̀ mɨ̀mə̌d mɨjìm. À yɨ ɨchî nɨ zɨə bɨrɨ yeʼ we ənɨ ə nyùmə̀ we nɨ Wan Wə̀d bɨrɨ wɨrɨ yeʼe.

⁴⁰ Ənɨ ə nyùmə̀ we, mbaŋə̀ rɨ̀be mɨ yeʼ ə mbeŋ, Wan Wə̀d nɨŋ wɨ fìbɨ̀, saŋ wɨ fìbɨ̀.

⁴¹ Məyi mɨbe bɨrɨ yeʼə wɔ̀ʼə̀ kywɨ̀, Wan Wə̀d nɨŋ wɨ fìbɨ̀, saŋ wɨ fìbɨ̀.

⁴² Əne mbə̀ chub ɨkyèʼe, ɨmbə̀ʼ ɨghəm nɨ chəi mbə̀ kyerɨ əni ze nɨ ə Ə̀nùŋɨ̀sɨg bɨrɨ wɨrɨ yeʼe.

⁴³ Àyɨə mbə̀ kyerɨ ni wə̀d nəb mɨ kə̀ʼ kyerɨ nyùmə̀ we nɨ ɨjɨ ə wo yeʼe ɨzimɨ, njɨ wɨ̀ bɨrɨ chub ɨkyèʼe ɨ nəŋgɨ i nəb ɨmbə̀ʼ tɨ ɨjɨ we toʼ i nəb ze.

⁴⁴ Əne mbə̀n bə̂, mbə̀ tekɨ ɨnyod, ɨmbə̀ʼ ɨghəm nɨ Wan Wə̀d wɨə yeʼe ənɨ ə nyùmə̀ we nɨ chəi mbə̀ə wòm əməd.

Wə̀d nɨə fàʼ ənɨ i fîŋ jìm mbɨ we nɨ chəi wɨə fàʼ ənɨ i fîŋ jìm

⁴⁵ “Wə̀d ə̀fàʼì we nɨə fàʼ ənɨ i fîŋ jìm bə̀ berɨ ɨwe, nɨ mbǎʼ ə̀fàʼì məd nuŋ ni wɨ̀ nəŋgɨ bə̂d ə̀fàʼì ɨŋga i nəb, bə̀ nàʼ ɨghɨjɨg əmbɨ mɨ̀mə̌d ənɨ ə nyùmə̀ nɨ kuʼu kɨ wi ə?

⁴⁶ Ŋwìə̀ zɨ əbɔrəbɔd ɨgun ə wə̀d ə̀fàʼì we nɨ ənɨ mbǎʼ ə̀fàʼì məd bəndɨ, wɨ̀ pè zə əməd ənɨ wɨə fàʼə̀.

⁴⁷ Mə ghà rəsìʼ ɨ nən ni mbǎʼ ə̀fàʼì we bɨrɨ nuŋ əməd ni wɨ̀ sɨə nəŋgɨ mbi ɨghɨjìm.

⁴⁸ Wə̀d ə̀fàʼì we nɨ chəi wɨə fàʼ ənɨ i fîŋ jìm mɨ ghà ɨŋga i fîŋ ni, 'Mɨ mbǎʼ ə̀fàʼì fə tan nɨ yeʼe,'

⁴⁹ əne kɔ som bə̂d ə̀fàʼì cherə, bə̀ kɔ jɨgə bə̀ nɔə mbɨ ɨtəd mɨnòʼ.

⁵⁰ Mbǎʼ ə̀fàʼì məd bɨrɨ yeʼe ɨgwɨ əni nɨ chəi wɨə wòm əməd, bə̀ fɔrɨ ənɨ ə nyùmə̀ nɨ chəi wɨ̀ kyerɨ.

⁵¹ Wɨ̀ bɨrɨ pe zɨ ɨchə ɨgwɨ əməd, bə̀ nɨŋ əməd nùŋ əbɔʼ ɨbekɨ bə̂d, əsɨ nɨ bə̂d bɨrɨ sɨə zə̀ʼə̀ kud əsɔŋ.