Matìyò 19 - Meta’

Ənû nɨ saanɨ ɨnamɨ

¹ Ənɨ Yeso nyaʼa màànɨ̀ nɨ gha ɨnû mbɔ̂, wɨ̀ nyaʼa nɔ̀ʼ rɨ ə Galiliî, wò əbà əbeŋ ze rɨ ə Jùdeyà, ɨnjin ɨgyɨ̂ Jodàn.

² Mɨnɔ̂n bə̂d nyaʼa beenɨ əbɔʼ məd wò əŋgu, əne wɨ̀ nyaʼa vɨ̀ mbe nɨ nyaʼə wɔ̀nə̀.

³ Mɨ̀Farisiî mɔʼɔ nyaʼa wò əsɨ məd ɨmbə̀ʼ kwaʼnɨ əməd. Əne mbɨ nyaʼa biirɨ ɨ bɔ ni, “Tɨkə ə wa chwiə ni mbaŋə̀ saanɨ ɨnamɨ mbɨ i ɨwi ɨmbə̀ʼ ənû ə mɔʼɔ ze nɨ wɨ̀ ghɨ̀ ə?”

⁴ Wɨ̀ nyaʼa wììrɨ̀ ni, “Chəi mbə̀ kɨrɨ foŋ ni wə̀d we nɨ nyaʼa tekɨ bə̂d rɨ ənɨ ɨkɔ, nyaʼa tekɨ mɨ̀mə̌d mbaŋə̀ fɔrɨ əyi,

⁵ əne ghà ni, 'À yɨ əton nɨ mbaŋə̀ bɨrɨ saŋ i mbǎʼ mbɨ i nɨŋ wò fɔtɨ mbɨ i ɨwi, əne mɨ̀mə̌d mbe mɨ̀be bɨrɨ sɨə nyamnyod mɔʼ ə'?

⁶ Əne ka mbɨ yɨə wɨrɨ əwən bə̂d mɨ̀be. Mbɨ yɨə sɨə nyamnyod mɔʼ. Əne tɨ wə̀d mɔʼɔ saanɨ i bə̂d mbe nɨ Ŋwìə̀ fə fɔtɨ.”

⁷ Mbɨ nyaʼa biirɨ ɨ bɔ ni, “Zɨə nɨə yeʼ əne, njɨ əton nɨ Mose nyaʼa sɨ ghà ni mbaŋə̀ berɨ naʼ ə̀ŋwàʼnɨ̀ nɨ chwi ni tə fə saanɨ ɨnamɨ mbɨ i ɨwi bɔŋ sɨə chɨ əməd rɨ ə nəb kɨ ɨmbə̀ʼ ə yè ə?”

⁸ Yeso nyaʼa wììrɨ̀ ni, “Mose nyaʼa ben ni mbə̀ saanɨ ɨnamɨ mbɨ mbə məyi ɨmbə̀ʼ ɨghəm nɨ tə fîŋ ə kà. Kaʼi ɨchî nɨ zɨə nyaʼa we tɨ ənɨ Ŋwìə̀ nyaʼa tekɨ ɨsɨg.

⁹ Əne mə ghà ɨ nən ni mbaŋə̀ mɔʼɔ mɨ saanɨ ɨnamɨ mbɨ i ɨwi, nam əyi cherə, nɨ kaʼi ni əyi we ə ni mbaŋə̀ cherə, njɨ wɨ̀ fə ni əyi cherə.”

¹⁰ Mə̀mə̀ə̀nɨ̀-ɨnû ɨməd nyaʼa ghà ɨ bɔ ni, “À mɨ yeʼ ɨchî nɨ zɨə yeʼ we mbɨ ə mbaŋə̀ mbɨ i ɨwi, njɨ zɨə bɔ̀ŋ ni tɨ wə̀d nam i.”

¹¹ Wɨ̀ nyaʼa ghà əmbɨ mɨ̀mə̌d ni, “Chəi ənû zɔ̂ ə dè bə̂d mɨ̀jìm. Zɨə dè àmei mbe nɨ Ŋwìə̀ ghɨ ni mbɨ ben əne.

¹² Əton nɨ chəi mbaŋə̀ rɨ mɔʼɔ ə namə yɨ ni: à yɨ ɨchî nɨ mbɨ gywɨ mbɨ mɔʼɔ, à yɨə bə̂d zaʼ mbɨ mɔʼɔ, mbɨ mɔʼɔ ton ɨnamɨ ɨmbə̀ʼ ənû ɨfɔ̀n rɨkaŋ. Wə̀d we nɨ tɨ̀ wɨ̀ ben ənû zɔ̂, wɨ̀ benɨ.”

Yeso nyaʼa zɨ̀ əbɔrəbɔd ɨgun ə bɔn kwa

¹³ Bə̂d mɔʼɔ mbɨə nyaʼə nɨŋə bɔn kwa wò əsɨ Yeso ɨmbə̀ʼ wɨ̀ zab mbi ɨbɔ bə̀ kɔ̀ŋgɨ̀ ə Ŋwiə̀ ɨgwɨ mɨ̀mə̌d. Mə̀mə̀ə̀nɨ̀-ɨnû ɨməd nyaʼa ghàm əbɔʼ ə bə̂d mbe.

¹⁴ Àyɨə Yeso nyaʼa ghà ni, “Mbə̀ saŋ bɔn kwa mbe yeʼe əsɨ num. Tɨ mbə̀ kən ə mɨ̀mə̌d, ɨmbə̀ʼ ɨghəm nɨ à yɨə bə̂d ɨghabɨ mbɔ̂ bɨrɨ jɨg ənû ɨfɔ̀n rɨkaŋ.”

¹⁵ Ənɨ wɨ̀ nyaʼa ghà əne, wɨ̀ nyaʼa zab mbi ɨbɔ ɨgun ə bɔn mbe, nɔ̀ʼ wo i.

Ənû ɨmbə̀ʼ əjɔŋ nɨ nyaʼa berɨ mbɔ̂n

¹⁶ Mbaŋə̀ mɔʼɔ nyaʼa wò əsɨ Yeso pè biirɨ ɨ bɔ ni, “Əchwiə̀-ɨnû, ənû ə chɔ̀m ze nɨ tɨ̀ mə ghɨ̀ bɔŋ jɨg ɨ̀tènɨ̀ rɨ mì kɨ ə zi ə?”

¹⁷ Yeso nyaʼa wììrɨ̀ ɨ bɔ ni, “À biirɨ ɨ num ɨmbə̀ʼ ənû ə chɔ̀m ɨmbə̀ʼ ə yè ə? Wə̀d nɨ bɔŋɨ mei we mɔʼ. Əne à mɨ kə̀b jɨg ɨ̀tènɨ̀, à berɨ nùŋ tɨkə rɨ Ŋwiə̀.”

¹⁸ Mbaŋə̀ ze nyaʼa biirɨ ni, “Tɨkə ti ə?” Yeso nyaʼa ghà ɨ bɔ ni, “Tɨrə̀ zwiirɨ e wə̀d. Tɨrə̀ ni e əyi cherə kɨ̀ mbaŋə̀ cherə. Tɨrə̀ jɨ e. Tɨrə̀ ben e zərɨmbin mɨ̀ghab.

¹⁹ Wumnɨ e mbǎʼ mbɨ e nɨ̌ŋ, bə̀ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod.”

²⁰ Əjɔŋ ze ə nyaʼa ghà ɨ bɔ ni, “Mə wɨə nùŋə̀ rɨkə tɔ̂ rɨ̀jìm. À kɨə ye sɨ bu rɨ num ə?”

²¹ Yeso nyaʼa ghà ɨ bɔ ni, “À mɨ kə̀b bɔ̀ŋ màànɨ̀, ndə̀ wo fèndɨ̀ ɨghɨjìm mbe nɨ à berɨ, wò nàʼ ɨkab we əmbɨ ə bə̂d ɨkwaŋ, əne à bɨrɨ berɨ mbɔ̂n ɨkaŋ. À mɨ ghɨ̀ əne, à yeʼe beenɨ əbɔʼ num.”

²² Ənɨ əjɔŋ ze ə nyaʼa zu ənû zɔ̂, wɨ̀ nyaʼa kə̀nə̀, əne nɔ̀ʼ wò i, ɨmbə̀ʼ ɨghəm nɨ wɨ̀ nyaʼa kaŋ berɨ ɨghɨ nɔnɔʼ.

²³ Yeso nyaʼa sɨ ghà əmbɨ mbi mə̀mə̀ə̀nɨ̀-ɨnû ni, “Mə ghà rəsìʼ ɨ nən ni zɨə bɨrɨ se əmbɨ wə̀d mbɔ̂n nɨ nyɨ ɨŋga ənû ɨfɔ̀n rɨkaŋ.

²⁴ Mə yì ghà ɨ nən ni, zɨə zàm əmbɨ ə kàmel nɨ chè ɨbɨgɨ saʼ, chè ɨchî nɨ wə̀d mbɔ̂n bɨrɨ nyɨ ɨŋga ənû ɨfɔ̀n ə Ŋwiə̀.”

²⁵ Ənɨ mə̀mə̀ə̀nɨ̀-ɨnû mbe nyaʼa zu ənû zɔ̂, mbɨ nyaʼa yiirɨ kwàʼ rɨŋgəʼ, əne gha ni, “Zɨə nɨə yeʼ əne, njɨ à kɨə we nɨ tɨ̀ wɨ̀ jwɨ̀ rəŋgəʼ ə?”

²⁶ Yeso nyaʼa nèŋ mɨ̀mə̌d əne ghà ni, “Ənû ə zɨə chè yeʼ bə̂d, àyɨə chəi ənû ə mɔʼɔ nɨ tɨ̀ zɨə che ə Ŋwiə̀.”

²⁷ Pità nyaʼa ghà ɨ bɔ ni, “Zə, tɨ̀ fə sàŋ ɨghɨjìm beenɨ əbɔʼ nè. Tɨ̀ kɨə wo berɨ ye ə?”

²⁸ Yeso nyaʼa ghà əmbɨ mɨ̀mə̌d ni, “Mə ghà rəsìʼ ɨ nən ni, ənɨ Wan Wə̀d bɨrɨ chub ɨgun e ətən ɨfɔ̀n ɨŋga ɨsɨg fi, mbə̀n mbɔ̂ nɨə beenɨ əbɔʼ num bɨrɨ bɨ chub ɨgun ɨtən ɨfɔ̀n wum chɔ̀b rɨ̀be, ɨ saʼ mɨnəbɨ mɨ̀Izre mbe wum chɔ̀b rɨ̀be.

²⁹ Wə̀d jìm we nɨ saŋ ti nəb, kɨ̀ mbi bɔŋgɔb mbaŋə̀ kɨ̀ mbɨ məyi, kɨ̀ i mbǎʼ, kɨ̀ i nɨŋ, kɨ̀ mbi bɔn, kɨ̀ mbi ɨsɨ si ɨmbə̀ʼ beenɨ əbɔʼ num, bɨrɨ wɨrɨ berɨ ɨghɨ ɨghəm ɨkɨ fibɨ̀, bə̀ jɨg ɨ̀tènɨ̀ rɨ mì.

³⁰ Àyɨə bə̂d mɨ̀nɔnɔʼ mbe nɨ yeʼ mbɨ rɨmbì, bɨrɨ yeʼ mbe nɨ sɨ nwìə̀. Mbe nɨ sɨ nwìə̀ sɨ yeʼ mbɨ rɨmbì.”