Matìyò 14 - Meta’

Ɨchî nɨ Jɔ̌n we nɨ nyaʼə nàʼ mɨnib nyaʼa kwɨ

¹ À nyaʼa ənɨ ə nyùmə̀ we, Herɔ̀d we nɨ nyaʼə tùmbɨ̀ ə Galiliî nyaʼa zu mɨkâ Yeso.

² Wɨ̀ nyaʼa zu əne ghà əmbɨ mbi bə̂d ə̀fàʼì ni, “Mbaŋə̀ zɔ̂ yɨə Jɔ̌n we nɨ nyaʼə nàʼ mɨnib nɨ fə zwemə. À yɨ əton nɨ wɨ̀ berɨ ɨka nɨ ghɨ ɨnû yiirɨ.”

³ Herɔ̀d nyaʼa kɔndɨ əne ɨmbə̀ʼ ɨghəm nɨ wɨ̀ nyaʼa ghɨ̀ ni mbɨ gywɨ̀ ə Jɔ̌n, kod, wò zɨ̀ ə ndəŋ dè ə Hèrɔdiàs. Hèrɔdiàs yɨə nyaʼə ɨwi Filip, nɨ nyaʼə aŋgɔb Herɔ̀d, àyɨə Herɔ̀d nyaʼa nɨŋ əməd ənɨ i ɨwi.

⁴ Jɔ̌n wɨə nyaʼə kɨə ghà əmbɨ Herɔ̀d ni, “Chəi ta rɨkə chwiə ni à nam ə Hèrɔdiàs.”

⁵ Əne Herɔ̀d wɨə nyaʼə kə̀bə̀ ni njɨ tə zwiirɨ əməd, àyɨə ɨ wɨə nyaʼə bɔə bə̂d, ɨmbə̀ʼ ɨghəm nɨ mbɨ nyaʼa ben ni Jɔ̌n yɨə nyaʼə wə̀d ɨ̀kə̀n Ŋwìə̀.

⁶ À nyaʼa ɨgwɨ əni ze nɨ mbɨ nyaʼa gywɨ ə Herɔ̀d, wan əyi Hèrɔdiàs nyaʼa bin ɨfě bə̂d mɨ̀jìm mbe nɨ nyaʼa ənɨ ənû ze. Əze ə nyaʼa ghɨ̀ ni fîŋ Herɔ̀d bɔŋ əku.

⁷ Əne wɨ̀ nyaʼa kàn bə̀ kàʼ wan əyi we ni tə bɨrɨ naʼ əghɨ ze nɨ wɨ̀ biirɨ.

⁸ Ɨŋgɔb məd nyaʼa nyèŋ əməd ni wɨ̀ wo ghà əmbɨ Herɔ̀d ni, “Mə kə̀b ni à naʼ ətu ə Jɔ̌n we nɨə nàʼə̀ mɨnib ɨ num əgha tɨ̀nîn ɨŋga əjeenɨ əkaŋ.”

⁹ Ɨfɔ̂n we nyaʼa kàŋ kə̀nə̀, àyɨə ɨchî nɨ wɨ̀ fə kəʼ kàn ɨfě bə̂d mbe nɨ nyaʼa əŋgu, wɨ̀ nyaʼa ghà ni mbɨ naʼ ətu ze ɨ bɔ.

¹⁰ Əne wɨ̀ nyaʼa chà bə̂d ni mbɨ wo sob ətu ə Jɔ̌n ə nəb ndəŋ,

¹¹ zɨ̀ ɨŋga əjeenɨ əkaŋ wò nàʼ əmbɨ wan əyi we. Wɨ̀ nyaʼa nɨŋ wò nàʼ əmbɨ i nɨŋ.

¹² Mə̀mə̀ə̀nɨ̀-ɨnû Jɔ̌n nyaʼa zu ənû ze, wò nɨŋ tɨ̀gùm əməd wò tweŋɨ. Mbɨ nyaʼa tweŋ əne wò ghà əmbɨ Yeso.

Yeso nyaʼa jə mbaŋə̀ chuʼ rɨ̀tân

¹³ Ənɨ Yeso nyaʼa zu ənû ze nɨ mbɨ nyaʼa ghɨ̌ ənɨ Jɔ̌n, wɨ̀ nyaʼa nɔ̀ʼ rɨ əsɨ ze ɨŋga əbaŋ ɨgyɨ̀, wò rə̀zìʼ wi əsɨ nɨ chə nyaʼa i bə̂d əŋgu. Ənɨ mɨnɔ̂n bə̂d mbe nyaʼa zu ni wɨ̀ fə nɔ̀ʼ rɨ əsɨ ze, mbɨ nyaʼa bə̀ nɔ̀ʼ rɨŋga mbə ɨsɨ beenɨ əbɔʼ məd ɨwu.

¹⁴ Ənɨ wɨ̀ nyaʼa jwɨ rɨŋga əbaŋ ɨgyɨ̀ ze wò əsaŋ, wɨ̀ nyaʼa zə bə̂d kwàʼ mɨ̀nɔnɔʼ. Ə̀kə̀n ə nyaʼa swi ɨŋga fîŋ məd ɨmbə̀ʼ bə̂d mbe, əne wɨ̀ nyaʼa vɨ̀ mbe nɨ nyaʼə wɔ̀nə̀.

¹⁵ À nyaʼa sɨ ɨkwirɨ kwirɨ, mə̀mə̀ə̀nɨ̀-ɨnû mbe nyaʼa wò əsɨ məd pè ghà ɨ bɔ ni, “Nyùmə̀ fə kən chè əku, chəi bə̂d ə bə̀ chub əgha. Əne gha mɨnɔ̂n bə̂d mbɔ̂ wo əwən, ɨmbə̀ʼ ɨ mbe tɨ mbɨ wo zon ɨghɨjɨg ɨŋga ɨsɨ mbe nɨ yeʼ ɨban ɨban.”

¹⁶ Yeso nyaʼa wììrɨ̀ ni, “Chəi əton nɨ mbɨ bɨrɨ wò. Mbə̀ naʼ əghɨ ə mɔʼɔ əmbɨ mɨ̀mə̌d ni mbɨ jɨg!”

¹⁷ Mbɨ nyaʼa wììrɨ̀ ni, “Tɨ̀ berɨ àmei chiŋ ŋgə̀ŋ rɨ̀tân mbɨ əgwi ə be.”

¹⁸ Yeso nyaʼa ghà ni, “Mbə̀ nɨŋ yeʼe naʼ ɨ num əgha.”

¹⁹ Wɨ̀ nyaʼa nɨŋ əne ghà əmbɨ mɨnɔ̂n bə̂d mbe ni mbɨ chub ɨgwɨ ɨfu. Ənɨ mbɨ nyaʼa chubɨ, wɨ̀ nyaʼa nɨŋ chiŋ ŋgə̀ŋ te rɨ̀tân mbɨ əgwi ze əbe, neŋ ɨkaŋ, kɔŋgɨ ə Ŋwiə̀, bəʼrɨ, nàʼ əmbɨ mbi mə̀mə̀ə̀nɨ̀-ɨnû ni mbɨ naʼ əmbɨ mɨnɔ̂n bə̂d mbe.

²⁰ Mbɨ nyaʼa nɨŋ nàʼ, əne mɨ̀mə̌d mɨjìm nyaʼa jɨg kod. Mə̀mə̀ə̀nɨ̀-ɨnû mbe nyaʼa fetɨ tɨkə te nɨ nyaʼa buʼu, tɨ swi mbɨ̀rɨkaʼ wum chɔ̀b rɨ̀be.

²¹ Mbaŋə̀ te nɨ nyaʼa jɨgɨ yɨə nyaʼa ɨghabɨ ə chuʼ rɨ̀tân, nɨ chəi mbɨ nyaʼa taŋ məyi fɔrɨ bɔn.

Yeso nyaʼa yèn ɨgun ə sà

²² Mbɨ nyaʼa mɨ jɨg ə jɨgɨ màànɨ̀, Yeso nyaʼa ghà əmbɨ mbi mə̀mə̀ə̀nɨ̀-ɨnû ni mbɨ nyɨ əbaŋ ɨgyɨ̀ bè baanɨ wò ɨmbì ɨ bɔ ɨnjin wə. Wɨ̀ nyaʼa tə̀n ənjìm ɨ ghɨ ni mɨnɔ̂n bə̂d mbe wo əwən.

²³ Ənɨ wɨ̀ nyaʼa fə ghɨ ni mbɨ wò əwən, wɨ̀ nyaʼa kɔʼ wò ɨkaŋ ɨwum ɨ kɔŋgɨ ə Ŋwiə̀ tə̀zìʼ wi. À nyaʼa sɨ ɨkwirɨ ɨkwirɨ, ɨ wɨə nyaʼa kɨrɨ əŋgu tə̀zìʼ wi,

²⁴ àyɨə əbaŋ ze ə nyaʼa fə wò əgha ə se ɨŋga ɨgyɨ̀. Əfim nɨ nyaʼə yeʼe əba ɨfě nyaʼə tinə mɨnib mbɨ nun əbaŋ ze.

²⁵ À nɨə sɨ ənjɨtuʼ, Yeso nyaʼə yèn ɨgwɨ ə sà ze wò əsɨ mbi mə̀mə̀ə̀nɨ̀-ɨnû.

²⁶ Ənɨ mə̀mə̀ə̀nɨ̀-ɨnû mbe nyaʼa zə əməd ənɨ wɨə nyaʼə yèn ɨgwɨ ə sà ze, mbɨ nyaʼa bindɨ kwàʼ rɨŋgəʼ, əne ghà ni, “À yɨə wə̀d əfub!” Mbɨ nyaʼa kyeŋ ɨmbə̀ʼ ɨghəm nɨ mbɨ nyaʼə bɔə.

²⁷ Yeso nyaʼa ghà əmbɨ mɨ̀mə̌d àmei əwu əwən ni, “Mbə̀ yim fîŋ! À yɨə mɔ̌. Tɨ mbə̀ bɔ ə!”

²⁸ Pità nyaʼa ghà ɨ bɔ ni, “Ə̀nùŋɨ̀sɨg, à mɨ yeʼ àwɔ̀, ghǎ ni mə̀ yen ɨgwɨ ə sà yeʼe əsɨ ne.”

²⁹ Yeso nyaʼa ghà ni, “Yeʼe!” Əne Pità nyaʼa jwɨ̀ rɨŋga əbaŋ ɨgyɨ̀, yèn ɨgwɨ ə sà ze wò əsɨ Yeso.

³⁰ Àyɨə ənɨ wɨ̀ nyaʼa zə əfim ze, ənum ə nyaʼa san əməd, wɨ̀ kɔ nim əton ə sà ze. Əne, wɨ̀ nyaʼa kyeŋ ghà ni, “Ə̀nùŋɨ̀sɨg, chɨ əmɨ rəŋgəʼ.”

³¹ Àmei əwu əwən, Yeso nyaʼa chà əbɔ, yim əməd, ghà ɨ bɔ ni, “E ɨbenɨ ə kə ɨmbə̀ʼ ə yè ə? À bid ɨmbə̀ʼ ə yè ə?”

³² Ənɨ mbɨ nyaʼa nyɨ əbaŋ ɨgyɨ̀ ze, əfim ze ə nyaʼa sobə.

³³ Bə̂d mbe nɨ nyaʼa ɨŋga əbaŋ ɨgyɨ̀ ze nyaʼa wumnɨ əməd, ghàə̀ ni, “À yɨ rəsìʼ ni àwɔ̀ yɨə kàŋ ə Wan Ŋwiə̀.”

Yeso nyaʼa vɨ̀ bə̂d əwɔn ə Gènesarèt

³⁴ Ənɨ Yeso mbɨ mbi mə̀mə̀ə̀nɨ̀-ɨnû nyaʼa baanɨ ə sà ze, mbɨ nyaʼa wò təm ə Gènesarèt.

³⁵ Ənɨ bə̂d mbe rɨŋga əsɨ ze nyaʼa zə əməd kyerɨ, mbɨ nyaʼa chà ɨŋgam ɨŋga ɨsɨ jìm mbe nɨ nyaʼa ɨban ɨban, əne bə̂d nyaʼa nɨŋ mbə bə̂d əwɔn mɨjìm wò əsɨ məd.

³⁶ Mbɨ nyaʼa buʼ ɨbɔ ɨ bɔ ni wɨ̀ saŋ bə̂d əwɔn mbe betɨ kaʼ àmei əchəŋ ə ngywɨ̌ əməd. Bə̂d mɨ̀jìm mbe nɨ nyaʼa betɨ ngywɨ̌ məd nyaʼa bɔtɨ.