Mə̀Hibrù 10 - Meta’

Kristo nyaʼa naʼ i ɨnyod ənɨ əghɨ ə̀fà fən ɨghəm mɔʼ

¹ Tɨkə rɨ Mose yɨ əziŋ rɨ ənɨ ɨghɨ chɔ̀m mbe nɨ bɨrɨ yeʼe. Ka rɨkə te yɨ i ɨghɨ chɔ̀m mbe. Ka tɨ bɨrɨ nɔ ghɨ i ni bə̂d mbe nɨ tindɨ ɨban ə Ŋwiə̀ bɔŋ màànɨ̀ àmei ɨmbə̀ʼ ɨchî nɨ mbɨə nàʼ tɨkwɨrɨ ɨghɨ ə̀fà ə mɔʼ ɨgwɨ əghəm əwu.

² À mɨ kə̀ʼ yeʼ ni ɨghɨ ə̀fà mbe tɨ̀ mbɨ zeŋnɨ ɨnû rɨbɔ̀ŋ, njɨ chəi mbɨ kɨrɨ saŋ ənû nɨ naʼ ɨghɨ ə̀fà ə? À mɨ yeʼ nɨ mbɨ nyaʼa fə zeŋnɨ bə̂d mbe nɨə wumnɨ ə Ŋwiə̀ fən ɨghəm mɔʼ, njɨ chəi fîŋ tɨə wɨrɨə saʼə mɨ̀mə̌d ɨmbə̀ʼ ɨnû rɨbɔ̀ŋ.

³ Àyɨə ɨnû nɨ faarɨ ɨghɨ mbe ə ghɨ̀ ni bə̂d kɔndɨ mbə ɨnû rɨbɔ̀ŋ əghəm əwu jìm,

⁴ ɨmbə̀ʼ ɨghəm nɨ ka ənəm ə mbɨ̀rɨkun mbɨ ənəm ə gywɨ ə ze tɨ̀ zɨə nimnɨ ɨnû rɨbɔ̀ŋ.

⁵ À yɨ əton nɨ ənɨ Yeso nyaʼa wo yeʼe ɨŋga ɨsɨg, wɨ̀ nyaʼa ghà ni, “Chəi à kəb ɨghɨ ə̀fà mbɨ ɨghɨ mbe nɨ mbɨə chəmnɨ əwe əŋgu. À fə tekɨ yeʼ nyamnyod nàʼ ɨ num.

⁶ Chəi à ghaʼ ɨghɨ ə̀fà mbe nɨ mbɨə tɔ̀n ɨ ne. Chəi à bə̀ ghaʼ ɨchəmnɨ we nɨ mbɨə nàʼ ɨmbə̀ʼ ɨnû rɨbɔ̀ŋ.

⁷ Əne mə nyaʼa ghà ni, 'Ŋwìə̀ zə, mə fə yeʼe ɨmbə̀ʼ ghɨ ənû ze nɨ à kə̀bɨ,' àmei ɨchî nɨ mbɨ ŋwàʼnɨ̀ ɨmbə̀ʼ əmɨ ɨŋga ə̀ŋwàʼnɨ̀ rɨkə.”

⁸ Wɨ̀ nyaʼa bè ghà ni, “Chəi à kəbɨ kɨ̀ ghaʼ ɨghɨ ə̀fà mbɨ ɨchəmnɨ mbɨ ɨghɨ ə̀fà tɔnɨ fɔrɨ ɨchəmnɨ ɨmbə̀ʼ ɨnû rɨbɔ̀ŋ.” (Bə̂d mbɨə nyaʼə nàʼ ɨghɨ mbɔ̂ ɨchî nɨ zɨə yeʼ ɨŋga rɨkə rɨ Mose).

⁹ Wɨ̀ nyaʼa bə̀ yì ghà ni, “Zə, mə fə yeʼe ɨmbə̀ʼ ghɨ ənû ze nɨ à kəbɨ.” Əne Ŋwìə̀ fə nimnɨ fɨso rɨtu ɨmbə̀ʼ nuŋ fe nɨ beenɨ.

¹⁰ Ɨchî nɨ Yeso Kristo nyaʼa ghɨ ənû ze nɨ Ŋwìə̀ nyaʼa kə̀bɨ, Ŋwìə̀ fə che ənjìm məd zeŋnɨ əwa tɨ ənɨ mba ɨnû rɨbɔ̀ŋ. Kristo nyaʼa ghɨ̀ əne ɨchî nɨ wɨ̀ nyaʼa naʼ i ɨnyod ənɨ əghɨ ə̀fà fən ɨghəm mɔʼ.

¹¹ Wə̀d mbàn jìm wɨə təmə fàʼ mbi ɨ̀fàʼì ɨni jìm. Ɨ wɨə nàʼ ɨkwɨ ə̀fà mɔʼ ɨghəm nɔnɔʼ, nɨ chəi əghɨ ə̀fà ze bɨrɨ nɔ nimnɨ ɨnû rɨbɔ̀ŋ bə̂d.

¹² Àyɨə ənɨ Kristo nyaʼa naʼ əghɨ ə̀fà fən ɨghəm mɔʼ ɨmbə̀ʼ nimnɨ ɨnû rɨbɔ̀ŋ, wɨ̀ nyaʼa chub əbà əbɔ ə jɨg ə Ŋwiə̀.

¹³ Wɨ̀ bɨrɨ chub əŋgu wòm nyùmə̀ we nɨ Ŋwìə̀ bɨrɨ ghɨ bə̂d pə̀n məd ənɨ ətən nɨ wɨ̀ bɨrɨ teerɨ mbi ɨwu ɨgun.

¹⁴ Ənjìm əghɨ ə̀fà ə mɔʼ, wɨ̀ fə zeŋnɨ bə̂d Ŋwiə̀, mbɨ bɔ̀ŋ màànɨ̀ koŋ.

¹⁵ Əzwî ə Zeŋɨ yɨə bə̀ ə zərɨmbin ɨ na ənɨ ɨnû mbe nɨ wɨ̀ nyaʼa ghǎ. Əzwî ze ə nyaʼa bè ghà ni,

¹⁶ “Ə̀nùŋɨ̀sɨg ə ghà ni, fɔ̂ yɨ fɨso fe nɨ mə bɨrɨ san mbɨ mɨ̀mə̌d ənɨ ɨni mbe fə che: Mə bɨrɨ zɨ tum rɨkə ɨŋga fîŋ tɨ mɨ̀mə̌d, bə̀ ŋwàʼnɨ̀ tɨkə te ɨŋga ɨtu mɨ̀mə̌d.”

¹⁷ Wɨ̀ bə̀ yì ghà ni, “Chəi mə bɨrɨ wɨrɨ kɔndɨ ɨnû rɨbɔ̀ŋ mbɨ tɨ̀gurɨ-ɨnû mɨ̀mə̌d.”

¹⁸ Əne chəi əton nɨ wɨrɨ naʼ ɨghɨ ə̀fà ɨmbə̀ʼ ɨnû rɨbɔ̀ŋ ənɨ mbɨ fə waʼ ɨnû rɨbɔ̀ŋ bə̂d.

Tɨ̀ tindɨ ɨban ə Ŋwiə̀

¹⁹ Mbɨ bɔŋgɔb, tɨ̀ kyerɨ ni tɨ̀ bɨrɨ nyɨ ɨŋga Əsɨ nɨ Zeŋɨ Màànɨ̀ ənjìm ənəm ə Yeso.

²⁰ Wɨ̀ nyaʼa chè ənjìm ə ngywɨ̌ ze nɨ mbɨ nyaʼa tam fiʼ ɨnə̂njɨ̀ fi ɨ na ni tɨ̀ che əŋgu jɨg ɨ̀tènɨ̀. Wɨ̀ nyaʼa ghɨ̀ əne ɨchî nɨ wɨ̀ nyaʼa kwɨ ɨmbə̀ʼ əwa.

²¹ Tɨ̀ berɨ ədabɨ ə wə̀d mbàn nɨə nəŋgɨ ə nəb Ŋwìə̀.

²² Əne tɨ̀ tindɨ ɨban ə Ŋwiə̀ mbɨ ə fîŋ jìm bə̀ nùŋ ta rɨkɔndɨ jìm àmei ɨgwɨ məd. Tɨ̀ ghɨ̀ əne mbɨ ə fîŋ nɨ mbɨ fə zeŋnɨ tɨ ənɨ tɨkɔndɨ rɨbɔ̀ŋ. Tɨ̀ bə̀ ghɨ̀ əne ənɨ ə nyamnyod nɨ mbɨ so ənɨ mɨnib nɨ zeŋɨ.

²³ Tɨ̀ jeŋgɨ yim ɨnû mbe nɨ tɨ̀ benɨ bə̀ nùŋ ɨkɔndɨ wòm, ɨmbə̀ʼ ɨghəm nɨ Ŋwìə̀ bɨrɨ ghɨ ɨnû mbe nɨ wɨ̀ kaʼi.

²⁴ Tɨ̀ kɔndɨ ɨchî nɨ timbɨ əwa mbǎ mbǎ, ɨmbə̀ʼ tɨ̀ ghaʼ a ɨnyod bə̀ sɨə ghɨ̀ ɨnû chɔ̀m.

²⁵ Tɨ rɨ̀ waʼ a ənû nɨ kɨə fetɨ, ɨchî nɨ bə̂d mɔʼɔ ə ghɨ̀ə̀, àyɨə tɨ̀ timbɨ a ɨnyod mbǎ mbǎ. Mbə jeŋgɨ ghɨ̀ əne ɨchî nɨ mbə̀ zə ni əni ze nɨ Ə̀nùŋɨ̀sɨg bɨrɨ wɨrɨ yeʼe fə tiinɨ.

²⁶ Tɨ̀ mɨ kyerɨ ɨnû rɨbɔ̀ŋ wɨrɨ ghɨ̀, ənɨ mbɨ fə ghɨ tɨ̀ kyerɨ rəsìʼ, njɨ tɨ̀ kyerɨ ni chəi əghɨ ə̀fà ə mɔʼɔ nɨ wɨrɨ bùʼ nɨ tɨ̀ zɨə ghɨ̀ Ŋwiə̀ waʼ ɨnû rɨbɔ̀ŋ.

²⁷ Ənû nɨ sɨ bùʼ yɨ ni tɨ̀ chubɨ mbɨ ɨbɔɔ wòm əni ze nɨ Ŋwìə̀ bɨrɨ saʼ ɨsɨg. Tɨ̀ bə̀ bɔ ɨwid ka ka we nɨ bɨrɨ nimnɨ bə̂d pə̀n Ŋwiə̀.

²⁸ Chəi mbɨ nyaʼə diirɨ ə wə̀d mɔʼɔ we nɨ chəi wɨ̀ nyaʼə nùŋə̀ rɨkə rɨ Mose. Mbɨ nyaʼa zwiirɨ əməd ənɨ mbɨ nyaʼa zu ɨŋgam rɨ əmbɨ mɨ̀zərɨmbin mɨbe kɨ̀ rɨ əmbɨ mɨ̀zərɨmbin mɨtad.

²⁹ Zɨə nɨə yeʼ əne, njɨ mbə kɔn əzən ni à kɨ ɨkwɨ ɨchə nɨ kaanɨ rɨ ye nɨ tɨ̀ mbɨ nàʼ əmbɨ ə wə̀d we nɨ təənɨ Wan Ŋwìə̀, tìbrɨ̀ ənəm ze nɨ mbɨ nyaʼa nɨŋ san fɨso fe nɨ nyaʼa zeŋnɨ əməd, bə̀ zɔ̀m Əzwî ə Ŋwiə̀ ze nɨə ghɨ̀ ɨ̀chɔ̀m ənɨ ə na ə?

³⁰ Tɨ̀ kyerɨ məd we nɨ nyaʼa gha ni, “À yɨə mɔ̌ ə wìə̀ pə̀n. Mə bɨrɨ wì.” Wɨ̀ nyaʼa bə̀ yì ghà ni, “Ə̀nùŋɨ̀sɨg bɨrɨ saʼ mbi bə̂d.”

³¹ Ənû nɨ wə̀d jìm berɨ nɨ bɔ yɨ nɨ feŋ ɨŋga tɨkyerɨ-ɨbɔ Ŋwìə̀ we nɨ yeʼ ɨkǎ.

³² Mbə̀ kɔndɨ ɨni mbe nɨ nyaʼa fə che i. Mbə̀ kɔndɨ ɨchî nɨ ənɨ mbə̀ nyaʼa zə ɨzeŋɨ zeŋɨ Ŋwiə̀, mbə mbɨə nyaʼə kàŋə̀ zə ə ŋgəʼ àyɨə mbə nyaʼa nyìʼ kwàʼ ɨchî chɔ̀m.

³³ À nyaʼa ənɨ mɨ̀nyùmə̀ mɔʼɔ, ɨ mbɨə nyaʼə zɔ̀m əwən bə̀ chə əwən əkaʼ bə̂d. Ənɨ mɨ̀nyùmə̀ cherə, mbə mbɨə nyaʼə wèèrɨ̀ə̀ bə̂d cherə mbe nɨ mbɨ nyaʼə zɔ̀mə̀ mɨ̀mə̌d bə̀ chəə mɨ̀mə̌d.

³⁴ Mbə mbɨə nyaʼə dììrɨ̀ə̀ bə̂d mbe nɨ nyaʼa ə nəb ndəŋ. Ənɨ mbɨ nyaʼa fe mbə ɨghɨ, mbə̀ nyaʼa ben ənɨ ɨghaʼi. Mbə mbɨə nyaʼa ghɨ̀ əne ɨmbə̀ʼ ɨghəm nɨ mbə̀ nyaʼa kyerɨ ni mbə berɨ ɨghɨ nɨ bɔŋ chè mbe, nɨ yeʼ ɨghɨ nɨ bɨrɨ ten i koŋ.

³⁵ Əne tɨ mbə̀ waʼ əwən ənû nɨ nuŋ fîŋ ɨgun Ə̀nùŋɨ̀sɨg, ɨmbə̀ʼ ɨghəm nɨ əze ə bɨrɨ yeʼe mbɨ ɨchɔʼ ə̀fàʼì kyeŋ.

³⁶ Mbə berɨ nyiʼ, ɨmbə̀ʼ mbə ghɨ ənû ze nɨ Ŋwìə̀ kə̀bɨ. Mbə mɨ ghɨ̀ əne, mbə bɨrɨ berɨ əghɨ ze nɨ Ŋwìə̀ kaʼ ɨ nən.

³⁷ Ə zɨ ɨŋga Ə̀ŋwàʼnɨ̀ ə Ŋwiə̀ ni, “À buʼ àmei ɨkə nyùmə̀, we nɨə yeʼe bɨrɨ yeʼe. Ka wɨ̀ bɨrɨ wɨrɨ tandɨ i.

³⁸ Wə̀d we nɨə ghɨ̀ ɨnû nɨ kuʼnɨ bɨrɨ chubɨ ɨkǎ ənjìm ɨbenɨ. Wɨ̀ mɨ bèŋ rəbɔʼɔ, ka mɨ fîŋ bɨrɨ bɔŋ i mbɨ məd.”

³⁹ Chəi əwa əbɔʼ bə̂d mbe nɨə bèŋ rəbɔʼɔ. Tɨ̀ mɨ bèŋ rəbɔʼɔ njɨ tɨ̀ bɨrɨ nim. Tɨ̀ yɨ əbɔʼ bə̂d mbe nɨ benɨ, əne tɨ̀ fə jwɨ̀ rəŋgəʼ.