Lk 7 - Meta’

Yeso nyaʼa vɨ̀ wə̀d ə̀fàʼì ətu ɨgwɨ mɨ̀sɔgyɨ̀

¹ Ənɨ Yeso nyaʼa fə maanɨ nɨ gha ɨnû mbɔ̂ əmbɨ ə bə̂d mbe, wɨ̀ nyaʼa wò əsɨ ze nɨ mbɨ nyaʼa tɔŋ ənɨ Kàpenàhom.

² Ətu ɨgwɨ mɨ̀sɔgyɨ̀ ɨkɨ fibɨ̀ nyaʼa berɨ i wə̀d ə̀fàʼì nɨ nyaʼə wɔ̀nə̀ sɨə wo kwɨ. Wɨ̀ nyaʼa ghaʼ wə̀d ə̀fàʼì we kwàʼ rɨŋgəʼ.

³ Ənɨ wɨ̀ nyaʼa zu ɨmbə̀ʼ ə Yeso, wɨ̀ nyaʼa tom bə̂d kyeŋ mɨ̀Jû mɔʼɔ əsɨ məd ni mbɨ buʼ ɨbɔ ɨ bɔ ni wɨ̀ yeʼe vɨ̀ i wə̀d ə̀fàʼì we.

⁴ Ənɨ mbɨ nyaʼa wo əsɨ Yeso, mbɨ nyaʼa pè buʼ ɨbɔ ɨ bɔ kwàʼ rɨ̀kǎ ghàə̀ ni, “Mbaŋə̀ zɔ̂ ə kàŋ kùʼ ni à weerɨ əməd,

⁵ ɨmbə̀ʼ ɨghəm nɨ məd ə ghaʼ əbeŋ zɔ̂ ɨ na. Wɨ̀ fə bə̀ vɨ nəb ə̀kàtɨ̀ ɨ na.”

⁶ Ənɨ Yeso nyaʼa zu əne, wɨ̀ nyaʼa nɔ̀ʼ kɔ wò mbɨ mɨ̀mə̌d. Ənɨ wɨ̀ nyaʼa sɨə tindɨ ɨban ə nəb ze, ətu ɨgwɨ mɨ̀sɔgyɨ̀ we nyaʼa chà mbi mɨ̀sə̀ʼ ni mbɨ gha ɨ bɔ ni, “Masà, tɨrə̀ chə e e nyamnyod ɨmbə̀ʼ ɨghəm nɨ mɨ rɨka kùʼ əmɨ ni à nyɨ ɨŋga mɨ nəb.

⁷ Mə bə̀ zə ni mɨ rɨka kùʼ əmɨ nɨ yeʼe əsɨ ne mɔ̌ mɔ̌. Əne gha àmei ɨŋgam, mɨ wə̀d ə̀fàʼì bɨrɨ bɔtɨ i.

⁸ Mɔ̌ yɨə mbaŋə̀ əton mɨ̀sɔgyɨ̀ kyeŋ. Mə bə̀ berɨ mɨ̀sɔgyɨ̀ əton num. Mə mɨ ghà əmbɨ wɨ mɔʼɔ ni, 'Wo ə!', wɨ̀ bə̀ wò. Mə mɨ bə̀ ghà əmbɨ wɨ cherə ni, 'Yeʼe!', wɨ bə̀ yeʼe. Mə mɨ ghà əmbɨ mɨ wə̀d ə̀fàʼì ni, 'Faʼ ə̀fàʼì zɔ̂!', wɨ̀ bə̀ fàʼ.”

⁹ Ənɨ Yeso nyaʼa zu ənû ze, wɨ̀ nyaʼa yiirɨ ɨmbə̀ʼ əməd, əne bèŋ ghà əmbɨ ɨnɔ̂n bə̂d we nɨ nyaʼə beenɨ əbɔʼ məd ni, “Mə ghà ɨ nən ni ka àbei ɨŋga Izre, chəi mə̀ kweʼ zə wə̀d mɔʼɔ nɨ berɨ ɨkwɨ ɨbenɨ wɔ̂.”

¹⁰ Ənɨ bə̂d mbe nɨ mbɨ nyaʼa tom əsɨ Yeso nyaʼa wɨrɨ bə̀ndɨ̀ wò ə nəb, mbɨ nyaʼa pè zə ni wə̀d ə̀fàʼì we fə bɔtɨ i.

Yeso nyaʼa zwemnɨ wan ɨku əyi

¹¹ Chəi əgha ə nyaʼa saarɨ, Yeso nyaʼa wò ɨŋga əsɨ ze nɨ mbɨə tɔŋ ənɨ Naìn. Mə̀mə̀ə̀nɨ̀-ɨnû ɨməd mbɨ ɨnɔ̂n bə̂d nɨ nyaʼa kwàʼ wɨ kyeŋ nyaʼa wò mbɨ məd.

¹² Ənɨ wɨ̀ nyaʼa sɨə wò pe ɨban ɨchû ɨkam we nɨə nyɨ ɨŋga əsɨ ze, wɨ̀ nyaʼa zə ənɨ mbɨ nyaʼə bèʼ əvɨ ə wə̀d mɔʼɔ jwɨ̀ə̀ mbɨ əzɨ əwən. Mbaŋə̀ ze nɨ nyaʼa kwɨ yɨə nyaʼa àmei wan we mɔʼ əmbɨ i nɨŋ, nɨ nyaʼa ɨku əyi. Ɨnɔ̂n bə̂d nɨ nyaʼa kwàʼ wɨ kyeŋ nyaʼə beenɨ əbɔʼ ɨku əyi we.

¹³ Ənɨ Ə̀nùŋɨ̀sɨg nyaʼa zə əməd, wɨ̀ nyaʼa kə̀n ənɨ məd ghà ɨ bɔ ni, “Tɨrə̀ dì e.”

¹⁴ Ənɨ wɨ̀ nyaʼa ghà əne, wɨ̀ nyaʼa wò bètɨ̀ ɨkon we nɨ mbɨ nyaʼa beʼ əvɨ ə wə̀d ze ɨgun. Bə̂d mbe nɨ nyaʼa bèʼ ɨkon we nyaʼa təm. Əne wɨ̀ nyaʼa ghà ni, “Əjɔŋ, mə ghà ɨ ne ni nɔʼ rətiə!”

¹⁵ Mbaŋə̀ ze nɨ nyaʼa kwɨ nyaʼa nɔ̀ʼ chubɨ kɔ ghamɨ. Yeso nyaʼa nàʼ əməd əmbɨ ɨŋgɔb məd.

¹⁶ Ɨbɔɔ nyaʼa swi ɨŋga bə̂d mbe mɨjìm, əne ɨ mbɨə nyaʼə yiirɨ ə Ŋwiə̀ ghàə̀ ni, “Wə̀d ɨ̀kə̀n Ŋwìə̀ nɨ dabə fə jwɨ̀ əkaʼ na!” fɔrɨ ni, “Ŋwìə̀ fə yeʼe ɨ weerɨ mbi bə̂d!”

¹⁷ Ɨkə̂n wɔ̂ ɨmbə̀ʼ ə Yeso nyaʼa jàŋ ɨŋga əba əbeŋ ze rɨ ə Jùdeyà jìm bə̀ jàŋ ɨŋga ɨbeŋ jìm mbe nɨ nyaʼa ɨban ɨban.

Jɔ̌n we nɨ nyaʼə nàʼ mɨnib nyaʼa tom mbi mə̀mə̀ə̀nɨ̀-ɨnû əsɨ Yeso

¹⁸ Mə̀mə̀ə̀nɨ̀-ɨnû Jɔ̌n we nɨ nyaʼə nàʼ mɨnib nyaʼa ghà ɨnû mbɔ̂ jìm ɨ bɔ.

¹⁹ Əne wɨ̀ nyaʼa tɔŋ mɨ̀mə̌d mɨbe, tom mɨ̀mə̌d əsɨ Ə̀nùŋɨ̀sɨg ni mbɨ biirɨ ɨ bɔ ni, “Àwɔ̀ wa kɨə wə̀d we nɨ bə̂d ɨ̀kə̀n Ŋwiə̀ nyaʼə ghàə̀ ni wɨ̀ bɨrɨ yeʼe, kɨ̀ rɨ̀ wa wom wɨ cherə ə?”

²⁰ Ənɨ bə̂d mbe nyaʼa wo əsɨ Yeso, mbɨ nyaʼa ghà ni, “Jɔ̌n we nɨə nàʼ mɨnib fə chà əwa əsɨ ne ni tɨ̀ biirɨ ni, 'Àwɔ̀ wa kɨə wə̀d we nɨ bə̂d ɨ̀kə̀n nyaʼə ghàə̀ ni wɨ̀ bɨrɨ yeʼe, kɨ̀ tɨ̀ wom wɨ cherə ə?'”

²¹ Àmei ənɨ ə nyùmə̀ we, Yeso nyaʼa vɨ̀ bə̂d mɨ̀nɔnɔʼ nɨ nyaʼə wɔ̀n tɨkwɨrɨ ɨwɔn nɔnɔʼ, wɨ̀ nyaʼa chɨ̀ ɨzwî rɨbɔ̀ŋ bə̀ ghɨ̀ ni mɨfɨgɨ̀ nɔnɔʼ zə ɨsɨ.

²² Ənɨ wɨ̀ nyaʼa ghɨ əne, wɨ̀ nyaʼa wììrɨ̀ əmbɨ mɨ̀mə̌d ni, “Mbə wò ghà ɨnû mbe nɨ mbə̀ fə zə bə̀ zu əmbɨ Jɔ̌n. Mɨfɨgɨ̀ mbɨə sɨə zə ɨsɨ, bə̂d nɨ nyaʼə tèʼ ɨwu mbɨə sɨə yèn ɨchî chɔ̀m, əpabɨ ə mì rɨ ənɨ bə̂d mbe nɨ nyaʼə wɔ̀n əpabɨ, mbɨ̀rɨko mbɨə sɨə zu ənû, ɨvɨ bə̂d zwemə, ɨ mbɨə bə̀ ghà ɨkə̂n chɔ̀m əmbɨ ə bə̂d ɨkwaŋ.

²³ Ŋwìə̀ zɨ əbɔrəbɔd ɨgun ə wə̀d we nɨ chəi wɨ̀ bid ənû ə mɔʼɔ ɨmbə̀ʼ əmɨ!”

²⁴ Ənɨ bə̂d mbe nɨ Jɔ̌n nyaʼa tom nyaʼa wo əwən, Yeso nyaʼa kɔ ghǎ ɨmbə̀ʼ ə Jɔ̌n əmbɨ mɨnɔ̂n bə̂d mbe ni, “Mbə nyaʼa kaŋ jwɨ̀ wo zə ye ɨŋga ɨbad rɨkwàʼi ə? Mbə wa nyaʼa wò zə wə̀d nɨ yeʼ ɨghabɨ ɨfu sê nɨ ɨfə ə chìʼ ə?

²⁵ Mbə nyaʼa kaŋ jwɨ̀ wo zə ye ə? Mbə wa nyaʼa wo zə wə̀d nɨ zɨ ngywɨ̌ rɨ chɔ̀m ə? Mbə̀ zə ni bə̂d mbe nɨə zɨ̀ə̀ ngywɨ̌ rɨ chɔ̀m bə̀ fɔ̀ɔ̀nɨ̀ ɨŋga mbɔ̂n mbɨə chub ɨŋga tɔʼ.

²⁶ Mbə nyaʼa kaŋ jwɨ̀ wo zə ye ə? Mbə wa nyaʼa wo zə wə̀d ɨ̀kə̀n Ŋwìə̀ ə? Ee, mə ghà ɨ nən ni mbə nyaʼa zə wə̀d we nɨ che wə̀d ɨ̀kə̀n Ŋwìə̀.

²⁷ Jɔ̌n wɔ̂ yɨə wə̀d we nɨ mbɨ nyaʼa ŋwaʼnɨ ɨmbə̀ʼ əməd ni, 'Zə, mə bɨrɨ cha mɨ wə̀d tom ɨmbì ɨ ne. Məd bɨrɨ tekɨ ɨnə̂njɨ̀ ɨ ne.'

²⁸ Mə ghà ɨ nən ni, rəbɔʼ bə̂d mɨ̀jìm mbe nɨ məyi gywɨ, chəi wɨ mɔʼɔ əŋgu nɨ dabə chè ə Jɔ̌n. Àyɨə we nɨ kə chè mbɨ mɨjìm ɨŋga ənû ɨfɔ̀n ə Ŋwìə̀ ə dabə chè əməd.”

²⁹ Ənɨ bə̂d mbe mɨjìm, màànɨ̀ məfetɨ mɨ̀tagsɨ̀, nyaʼa zu ənû zɔ̂, mbɨ nyaʼa ben ni Ŋwìə̀ nyaʼa ghɨ̀ ɨnû nɨ kuʼnɨ, ɨmbə̀ʼ ɨghəm nɨ à yɨə Jɔ̌n nyaʼa naʼ mɨnib əmbɨ mɨ̀mə̌d.

³⁰ Àyɨə mɨ̀Farisiî mbe mbɨ məchwiə̀ rɨ̀kə̌ mbe nyaʼa ton ənû ze nɨ Ŋwìə̀ nyaʼa fə taŋ nùŋ ɨmbə̀ʼ mɨ̀mə̌d, ɨmbə̀ʼ ɨghəm nɨ chəi mbɨ nyaʼa ben ni Jɔ̌n naʼ mɨnib əmbɨ mɨ̀mə̌d.

³¹ Yeso nyaʼa wò ɨmbì ghà ni “Mə kɨə wò mɨg ɨghəm bə̂d wɔ̂ rɨ̀nîn ənɨ ə ye ə? Mbɨ kɨ ɨghabɨ ə ye ə?

³² Mbɨ yɨ ɨghabɨ ə bɔn kwa nɨ chub ə sǎm ɨwin tɔŋə mbɨ cherə ghàə̀ ni, 'Tɨ̀ nyaʼa fə mɨkyî ɨ nən, àyɨə chəi mbə̀ nyaʼa binɨ. Tɨ̀ nyaʼa kwerɨ mɨkyî ɨdì, àyɨə chəi mbə̀ nyaʼa chweŋ mɨsɨ.'

³³ Jɔ̌n we nɨ nyaʼə nàʼ mɨnib nyaʼa yeʼe, chəi wɨ̀ nyaʼə jɨgə ŋgə̀ŋ, chəi wɨ̀ nyaʼə bə̀ nɔə mɨnoʼ, əne mbə̀ nyaʼa ghà ni, 'Əzwî rɨbɔ̀ŋ ə zɨ ɨŋga məd.'

³⁴ Wan Wə̀d nyaʼa yeʼe. Wɨ̀ nyaʼə jɨgə bə̀ nɔə mɨnoʼ, əne mbə ghà ni, 'Mbə̀ zə mbaŋə̀ zɔ̂! Məd yɨə ndarɨjɨg fɔrɨ ətəd mɨnoʼ. Ɨ wɨə jɨg ə̀sə̀ʼ mbɨ məfetɨ mɨ̀tagsɨ̀ fɔrɨ bə̂d nɨə ghɨ̀ ɨnû rɨbɔ̀ŋ.'

³⁵ Àyɨə bə̂d mbe nɨ ben ɨnû mbe nɨ Ŋwìə̀ ə ghàə̀ mbɨə chwiə ni ɨwe Ŋwiə̀ ə kùʼ.”

Yeso nyaʼa wò əkwɨ Saimòn nɨ nyaʼə Farisiî

³⁶ Farisiî mɔʼɔ nyaʼa tɔŋ ə Yeso ni wɨ̀ yeʼe jɨg mbɨ ni. Əne wɨ̀ nyaʼa wò nyɨ ɨŋga nəb ze, chubɨ jɨg.

³⁷ Əyi mɔʼɔ nyaʼa ɨŋga əsɨ ze nɨ nyaʼə ghɨ̀ ɨnû rɨbɔ̀ŋ. Ənɨ wɨ̀ nyaʼa zu ni Yeso wɨə jɨg ɨŋga nəb Farisiî we, wɨ̀ nyaʼa wò mbɨ mɨwud nɨ nyaʼə nyùʼrɨ ɨfɔ chɔ̀m. Mɨwud mbe nyaʼa ɨŋga chəŋ àlàbastà.

³⁸ Wɨ̀ nyaʼa pè təm ənjìm ə Yeso ɨban ɨwu ɨməd, kɔ chweŋ mɨsɨ zù ɨwu məd əŋgu bə̀ fu ənɨ ti nyôŋ rɨ ətu. Wɨ̀ nyaʼa sɔɔrɨ ɨwu mbe bə̀ zɔʼ ənɨ mɨwud mbe.

³⁹ Ənɨ Farisiî we nɨ nyaʼa tɔŋ ə Yeso nyaʼa zə ənû ze, wɨ̀ nyaʼa ghà ɨŋga i fîŋ ni, “Mbaŋə̀ zɔ̂ mɨ kàŋ kə̀ʼ yeʼ wə̀d ɨ̀kə̀n Ŋwìə̀, njɨ wɨ̀ kyerɨ əyi wɔ̂ nɨə bètɨ̀ əməd bə̀ kyerɨ ɨkwɨ əyi we nɨ wɨ̀ yeʼ wɨwən, ɨmbə̀ʼ ɨghəm nɨ əyi wɔ̂ wɨə ghɨ̀ ɨnû rɨbɔ̀ŋ.”

⁴⁰ Yeso nyaʼa wììrɨ̀ ɨ bɔ ni, “Saimòn, mə berɨ ənû ə mɔʼɔ nɨ gha ɨ ne.” Saimòn nyaʼa biirɨ ni, “À kɨ ənû ə ye ə, Əchwiə̀-ɨnû ə?”

⁴¹ Yeso nyaʼa ghà ɨ bɔ ni, “Mbaŋə̀ mɔʼɔ rɨbe nyaʼa yim ɨkab əmbɨ ə wə̀d nɨ nyaʼə chɔʼ ɨkab. Wɨ̀ fìbɨ̀ nyaʼa yim əməd chuʼ əkɨ ətân, wɨ cherə nyaʼa yim əməd chuʼ ɨwum tân.

⁴² Ənɨ chəi ənɨ tɨ̀ mbɨ nyaʼa wì ɨkab we, wɨ̀ nyaʼa saŋ ɨkab we əmbɨ mɨ̀mə̌d mbe mɨbe. Əne à kɨ wi rəbɔʼ mɨ̀mə̌d mbɔ̂ mɨbe bɨrɨ jeŋgɨ ghaʼ əməd ə?”

⁴³ Saimòn nyaʼa wììrɨ̀ ni, “Mə kɔndɨ ni à yɨ we nɨ wɨ̀ saŋ ɨkab nɔnɔʼ ɨ bɔ.” Yeso nyaʼa ghà ni, “À fə wììrɨ̀ ɨchî chɔ̀m.”

⁴⁴ Ənɨ wɨ̀ nyaʼa ghà əne, wɨ̀ nyaʼa beŋ nèŋ əyi we, ghà əmbɨ Saimòn ni, “À zə əyi wɔ̂ ə? Mə nyɨ ɨŋga e nəb chəi à naʼ mɨnib ni mə̀ so mbɨ ɨwu əŋgu, àyɨə əyi wɔ̂ fə zù mbɨ ɨwu ənɨ mbi mɨsɨ bə̀ fu ənɨ ti nyôŋ rɨ ətu.

⁴⁵ Chəi à sɔɔrɨ mɨ ndə̀ʼ, àyɨə tɨ ənɨ mə nyɨ ɨŋga e nəb, chəi wɨ̀ kɨrɨ sob nɨ sɔɔrɨ mbɨ ɨwu.

⁴⁶ Chəi à zɔʼ mɨ ətu ənɨ mɨwud, àyɨə wɨ̀ fə zɔʼ mbɨ ɨwu ənɨ mɨwud nɨə nyùʼrɨ ɨfɔ chɔ̀m.

⁴⁷ Əne mə wɨə ghà ɨ ne ni, mbɨ fə waʼ ɨnû rɨbɔ̀ŋ məd mbe nɨ nyaʼa kaŋ nɔʼ, ɨmbə̀ʼ ɨghəm nɨ wɨ̀ bə chwi ɨghaʼi nɔnɔʼ. Àyɨə wə̀d we nɨ mbɨ waʼ ɨnû rɨbɔ̀ŋ məd rɨpiî bɨrɨ bɨ chwi àmei ɨghaʼ rɨpiî.”

⁴⁸ Wɨ̀ nyaʼa ghɨ əne, ghà əmbɨ əyi we ni, “Mə fə waʼ mbe ɨnû rɨbɔ̀ŋ.”

⁴⁹ Bə̂d mbe nɨ nyaʼa chubɨ jɨg mbɨ məd nyaʼa kɔ ghà mbənə mbənə ni, “Wɔ̂ kɨə we nɨə waʼ ɨnû rɨbɔ̀ŋ bə̂d ə?”

⁵⁰ Yeso nyaʼa ghà əmbɨ əyi we ni, “E ɨbenɨ fə chɨ̀ əwe rɨ əŋgəʼ. Sɨ wò e ənɨ əbɔrəbɔd.”