Kòlosè 1 - Meta’

Ə̀chàʼrɨ̀

¹ À yɨə mɔ̌ Pɔ̂l, nɨ mə̀ yeʼ wə̀d tom Kristo Yeso nɨ Ŋwìə̀ chɔʼɔ, mbɨ Timotì nɨ yeʼ wa aŋgɔb, ŋwaʼnɨ ə̀ŋwàʼnɨ̀ zɔ̂.

² Tɨ̀ wɨə ŋwàʼnɨ̀ əmbɨ ə mbə̀n bə̂d Ŋwiə̀ mbe nɨ nuŋ fîŋ ɨgun ə Kristo ə Kòlosè. Ŋwiə̀ a Mbǎʼ ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

Pɔ̂l nyaʼa kɔ̀ŋgɨ̀ ə Ŋwiə̀ naʼ məben-əwe ɨ bɔ

³ Tɨ̀ wɨə nàʼə̀ məben-əwe əmbɨ ə Ŋwiə̀ nɨ yeʼ Mbǎʼ a Ə̀nùŋɨ̀sɨg Yeso Kristo. Tɨ̀ wɨə naʼ ənɨ mɨ̀nyùmə̀ jìm mbe nɨ tɨə kɔ̀ŋgɨ̀ ə Ŋwiə̀ ɨmbə̀ʼ əwən.

⁴ Tɨ̀ wɨə nàʼ ɨmbə̀ʼ ɨghəm nɨ tɨ̀ fə zu ɨchî nɨ mbə̀ nuŋ fîŋ ɨgun ə Kristo Yeso bə̀ zu ɨchî nɨ mbə̀ə ghaʼə bə̂d Ŋwiə̀ mɨ̀jìm.

⁵ Tɨ̀ wɨə bə̀ nàʼ ɨmbə̀ʼ ɨnû mbe nɨ mbə nuŋ rɨkɔndɨ wòm nɨ Ŋwìə̀ nuŋ ɨ nən ɨkaŋ. Mbə nyaʼa fə be zu ənû zɔ̂ ɨŋga ɨŋgam rəsìʼ we nɨ yeʼ ɨkə̂n chɔ̀m we

⁶ nɨ fə yeʼe ɨ nən. Ɨkə̂n chɔ̀m wɔ̂ wɨə kwiə bə̀ ghɨ̀ə̀ ni bə̂d mɨ̀jìm ɨŋga ɨsɨg ghɨ ɨnû mbe nɨ Ŋwiə̀ kəbɨ, àmei ɨchî nɨ mbə nyaʼa fə bə̀ fə kɔ ghɨ̌, kɔ rɨ əni ze nɨ mbə̀ nyaʼa zu bə̀ kyerɨ rəsìʼ ɨmbə̀ʼ ɨ̀chɔ̀m Ŋwiə̀.

⁷ Mbə nyaʼa zu ənû ɨmbə̀ʼ ɨ̀chɔ̀m Ŋwiə̀ rɨ əmbɨ Epafràs nɨ yeʼ wa aŋgɔb nɨ tɨ̀ ghaʼi kwàʼ rɨŋgəʼ, nɨ tɨə bə̀ fàʼ ɨnɔ̂n mbɨ məd. Məd wɨə fàʼ əmbɨ Kristo ənɨ i fîŋ jìm ənɨ əza rɨmbin.

⁸ Məd fə ghɨ tɨ̀ kyerɨ ni Əzwî ə Ŋwiə̀ ə zɨə ghɨ̀ ni tɨ̀ ghaʼ mba bɔŋgɔb.

⁹ À yɨ əton nɨ tɨ əni ze nɨ tɨ̀ nyaʼa zu ɨmbə̀ʼ əwən, chəi tɨ̀ kɨrɨ sob nɨ kɔŋgɨ ə Ŋwiə̀ ɨmbə̀ʼ əwən. Tɨ̀ wɨə kɔŋgɨə ni Əzwî əməd ə ghɨ mbə̀ jeŋgɨ kyerɨ ɨnû mbe nɨ wɨ̀ kəbɨ. Mbə ɨtu bɨrɨ zeŋ mbə kyerɨ ɨnû mbe ənjìm ɨwe we nɨ Əzwî ə nàʼə̀.

¹⁰ Tɨ̀ wɨə kɔ̀ŋgɨ̀ əməd ɨmbə̀ʼ wɨ̀ ghɨ ni mbə̀ chub ɨchî nɨ Ə̀nùŋɨ̀sɨg kəbɨ. Tɨ̀ wɨə bə̀ kɔ̀ŋgɨ̀ə̀ ni mbə̀ sɨə ghɨ̀ ɨnû jìm mbe nɨ bɨrɨ ghɨ ni fîŋ məd bɔŋ ə. Ɨchî nɨ mbə̀ə chubə bɨrɨ ghɨ ni mbə ghɨ ɨ̀chɔ̀m ənɨ tɨkwɨrɨ ɨnə̂njɨ̀ nɔnɔʼ bə̀ ghɨ̀ ni mbə sɨə jeŋgɨə kyerɨ ə Ŋwiə̀ wò ɨmbì.

¹¹ Ŋwiə̀ we nɨ berɨ ɨka nɨ chè ɨka jìm ghɨ ni mbə̀ jeŋgɨ təm kàànɨ̀ ɨmbə̀ʼ mbə̀ sɨə nyìʼ əton ə ŋgəʼ, sɨə yimə fîŋ, sɨə ghaʼə bɔŋgɔb,

¹² bə̀ sɨə nàʼ məben-əwe əmbɨ Mbǎʼ we nɨ ghɨ ni mbə kuʼ nɨ berɨ əbà rɨ ənɨ ɨghɨ mbe nɨ wɨ̀ nuŋ əmbɨ mbi bə̂d ɨŋga əsɨ ze nɨ ɨzeŋɨ zeŋɨ ə teə.

¹³ Wɨ̀ fə chɨ əwa rɨŋga tɨkyerɨ-ɨbɔ məd we nɨə tùmbɨ̀ ɨsɨ firɨ, əne zɨ̀ ɨŋga ənû ɨfɔ̀n ə Wan məd we nɨ wɨ̀ ghaʼi kwàʼ rɨŋgəʼ.

¹⁴ À yɨə məd nyaʼa choʼ mba ɨtu bə̀ waʼ mba ɨnû rɨbɔ̀ŋ.

Kristo yɨ ətu ɨgwɨ ɨghɨjìm

¹⁵ Kristo we nɨ mbɨə zəə yɨ ɨghabɨ ə Ŋwiə̀ we nɨ chəi bə̂d ə zəə. Məd yɨə wan-fə̀d ɨgwɨ ɨghɨjìm mbe nɨ Ŋwìə̀ tekɨ.

¹⁶ Ŋwiə̀ nyaʼa chè ənjìm məd tekɨ ɨghɨjìm mbe nɨ yeʼ ɨkaŋ mbɨ mbe nɨ yeʼ ɨgwɨ ə si. Wɨ̀ nyaʼa chè ənjìm məd tekɨ ɨghɨ mbe nɨ mbɨə zəə mbɨ mbe nɨ chəi mbɨə zəə. Wɨ̀ nyaʼa bə̀ chè ənjìm məd tekɨ mbɨ̀aŋgɨrə̀, tekɨ ɨzwî mbe nɨə tùmbɨ̀ ɨsɨ mbe rɨ ɨgwɨ si bə̀ tekɨ ɨzwî ka ka mbe nɨə tùmbɨ̀ ɨsɨ mbe rɨ əton ɨkaŋ. Ŋwìə̀ nyaʼa tekɨ ɨghɨjìm ənjìm məd, bə̀ tekɨ ɨghɨjìm ɨmbə̀ʼ mbɨ wumnɨ əməd.

¹⁷ Ŋwìə̀ nyaʼa tekɨ əməd bɔŋ wɨ̀ nyaʼə sɨə tekɨ ɨghɨjìm. À yɨ ɨŋga məd nɨ ɨghɨjìm fɔtɨ ənɨ mbɨ mɔʼ.

¹⁸ Məd yɨ ətu rɨ ənɨ nyamnyod məd, əne yɨ ɨfetɨ bə̂d Kristo. Məd yɨ ɨkɔ rɨ ənɨ ɨfetɨ we. Məd yɨə bə ə wan-fə̀d nɨ zwemə tɨ ənɨ ɨvɨ. Əne yɨ ni məd yɨ ə̀chèmbì ənɨ ɨghɨjìm.

¹⁹ Zɨə nyaʼa bɔ̀ŋ əmbɨ ə Ŋwiə̀ ni Wan məd berɨ mɨchî məd mɨjìm ɨŋga ni.

²⁰ Zɨə nyaʼa bə̀ bɔ̀ŋ ɨ bɔ ni wɨ̀ chè ənjìm məd màànɨ̀ tàŋ mbɨ ɨghɨjìm, əne yɨ ɨghɨ mbe nɨ yeʼ ɨgwɨ ə si mbɨ mbe nɨ yeʼ ɨkaŋ. Wɨ̀ nyaʼa bə̀ ghɨ̀ ni bə̂d mɨ̀jìm chub ənɨ əbɔrəbɔd. Wɨ̀ nyaʼa ghɨ̀ əne ənjìm ənəm Wan məd ze nɨ wɨ̀ nyaʼa chəmnɨ əzed ə baʼnɨ.

²¹ À nyaʼa ənɨ ə nyùmə̀ mɔʼɔ, mbə mbɨə nyaʼa əsa əgha rɨ ənɨ ə Ŋwiə̀. Mbə mbɨə nyaʼa ənɨ ə pə̀n mbɨ məd ɨmbə̀ʼ ɨchî nɨ mbə mbɨə nyaʼə kɔndɨ ɨnû rɨbɔ̀ŋ bə̀ ghɨ̀ə̀.

²² Àyɨə rɨ̀nîn wɨ̀ fə màànɨ̀ tàŋ mbɨ nən ɨchî nɨ Kristo nyaʼa kwɨ əzed ə baʼnɨ. Kristo nyaʼa kwɨ ɨmbə̀ʼ nɨŋ əwən nɨ mbə̀ fə zeŋ, nɨ chəi ənû rɨbɔ̀ŋ ə mɔʼɔ kɨ̀ ɨsaʼi mɔʼɔ ɨgwɨ nən wò ɨfě Ŋwiə̀.

²³ Mbə berɨ chè ɨmbì yim ə ɨbenɨ bə̀ təm ɨŋga ɨbenɨ we kàànɨ̀. Tɨ mbə̀ suŋgɨ ə rɨ ənɨ ɨnû mbe nɨ mbə̀ nyaʼa nuŋ rɨkɔndɨ ɨgun ənɨ ə nyùmə̀ we nɨ mbə̀ nyaʼa zu ɨkə̂n chɔ̀m. Mbɨ fə ghà ɨkə̂n chɔ̀m wɔ̂ ɨŋga ɨsɨg jìm. Ŋwìə̀ nyaʼa chɔʼ əmɨ, mɔ̌ Pɔ̂l, ni mə̀ gha ɨkə̂n chɔ̀m rəŋgu.

Ɨnû mbe nɨ Pɔ̂l nyaʼa ghɨ̀ əmbɨ ɨfetɨ bə̂d Kristo we rɨ ə Kòlosè

²⁴ Mə wɨə ghaʼə rɨ̀nîn ɨchî nɨ mɨə zəə ŋgəʼ ɨmbə̀ʼ əwən, ɨmbə̀ʼ ɨghəm nɨ mə wɨə màànɨ̀ ɨchî nɨ Kristo nyaʼa zə ŋgəʼ ɨmbə̀ʼ i nyamnyod. Nyamnyod ze yɨ ɨfetɨ bə̂d məd.

²⁵ Ŋwìə̀ nyaʼa fə nàʼ ɨka ɨ num ni mə̀ faʼ əmbɨ ɨfetɨ we, ɨmbə̀ʼ mə̀ ghɨ ni mbə̀ jeŋgɨ kyerɨ ɨŋgam məd.

²⁶ Mbɨ nyaʼa fə nə̀m ɨŋgam we rəŋwe rəŋwe bə̀ nə̀m rɨ əmbɨ rɨghəm rɨ bə̂d nɔnɔʼ. Àyɨə rɨ̀nîn Ŋwìə̀ fə ghɨ ni bə̂d məd kyerɨ.

²⁷ Ŋwiə̀ nyaʼa kàŋ kə̀b ni bə̂d məd kyerɨ ni ənû ə kyeŋ ze nɨ yeʼ ənə̀mə yɨə bə̀ əmbɨ ə bə̂d mbe nɨ kaʼi mɨ̀Jû. Ənû ze nɨ yeʼ ənə̀mə yɨ ni Kristo wɨ ɨŋga mbə̀n mbe nɨ kaʼi mɨ̀Jû. Əne yɨ ni mbə bɨrɨ bɨ berɨ ɨwumnɨ ɨghabɨ wɨ məd.

²⁸ Tɨ̀ wɨə ghà ənû ɨmbə̀ʼ ə Kristo əmbɨ ə wə̀d jìm. Tɨ̀ wɨə nɨŋ ɨwe we nɨ Ŋwìə̀ naʼ ɨ na patɨə mɨ̀mə̌d bə̀ chwi ɨnû əmbɨ wə̀d jìm, ɨmbə̀ʼ tɨ nɨŋ wə̀d jìm we nɨ fə kwi kàànɨ ɨchî nɨ wɨ̀ yeʼ ənɨ ɨfɔtɨ mbɨ Kristo wò ɨfě Ŋwiə̀.

²⁹ Mə wɨə ghɨ̀ ɨnû mbɔ̂ ənɨ ɨka jìm we nɨ Kristo naʼ ɨ num.