Jûd 1 - Meta’

Ə̀chàʼrɨ̀

¹ À yɨə mɔ̌ Jûd, nɨ mə̀ yeʼ wə̀d ə̀fàʼì Yeso Kristo bə̀ yeʼ aŋgɔb Jems, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ əmbɨ ə bə̂d mbe nɨ Ŋwìə̀ Mbǎʼ nyaʼa ghaʼi kwàʼ rɨŋgəʼ, əne tɔŋ mɨ̀mə̌d ni mbɨ yeʼ mbi bə̂d, bə̀ nùŋ mɨ̀mə̌d wòm nyùmə̀ we nɨ Yeso Kristo bɨrɨ wɨrɨ yeʼe.

² Ŋwìə̀ diirɨ əwən, naʼ əbɔrəbɔd ɨ nən bə̀ ghɨ̀ ni ɨghaʼi swi ɨŋga tə fîŋ.

Məchwiə̀-ɨnû mɨghab

³ Mbɨ bɔŋgɔb nɨ mə̀ ghaʼi kwàʼ rɨŋgəʼ, mə wɨə nyaʼə kàŋə̀ kə̀b nɨ ŋwaʼnɨ ɨ nən ɨmbə̀ʼ ɨchî nɨ mba mɨjìm fɔtɨ jwɨ̀ rəŋgəʼ, àyɨə mə nyaʼa zə ni zɨə bɔ̀ŋ ni mə̀ ŋwaʼnɨ tìmbɨ̀ əwən ni mbə̀ zɔŋə wò ɨmbì ɨmbə̀ʼ ɨbenɨ we nɨ Ŋwìə̀ nyaʼa fə zɨ ɨŋga rɨkyerɨ-ɨbɔ mbi bə̂d fən ɨghəm mɔʼ.

⁴ Mə wɨə ghà əne ɨmbə̀ʼ ɨghəm nɨ bə̂d mɔʼɔ nɨ chəi mbɨə wumnɨ ə Ŋwiə̀ fə nyaʼrɨ yeʼe nyɨ əkaʼ nən. Ɨ mbɨə bèŋ ɨ̀chɔ̀m a Ŋwìə̀ ɨmbə̀ʼ ghɨ ɨnyamnɨ-ɨnû. Ɨ mbɨə bə̀ ton ə Yeso Kristo nɨ àmei məd yeʼ a Mbǎʼ ə̀fàʼì bə̀ yeʼ a Ə̀nùŋɨ̀sɨg we mɔʼ. Ə̀ŋwàʼnɨ̀ ə Ŋwìə̀ ə nyaʼa fə ghà rəŋwe ni Ŋwìə̀ bɨrɨ zɨ ɨsaʼi ɨgwɨ mɨ̀mə̌d.

⁵ Ka à bè yeʼi ni mbə nyaʼa fə kyerɨ ɨnû mbɔ̂ jìm, àyɨə mə kə̀b nɔɔrɨ mbə ɨtu ni Ə̀nùŋɨ̀sɨg nɨ nyaʼa chɨ mɨ̀Izre rɨ ə Ɨjìpt, nyaʼa wɨrɨ nimnɨ mbe nɨ chəi mbɨ nyaʼa benɨ.

⁶ Mə wɨə bə̀ nɔ̀ɔ̀rɨ̀ mbə ɨtu ɨmbə̀ʼ mbɨ̀aŋgɨrə̀ mbe nɨ chəi mbɨ nyaʼa yim ɨsɨ mbe nɨ Ŋwìə̀ nyaʼa naʼ əmbɨ mɨ̀mə̌d. Mbɨ nyaʼa sàŋ əsɨ ze nɨ mbɨ nyaʼə chub əŋgu. Ŋwìə̀ fə kod mɨ̀mə̌d ənɨ mɨ̀kàrə̀ koŋ əne nùŋ ɨŋga ɨsɨ mbe rɨ əton nɨə finə kììm. Mbɨ bɨrɨ chub əŋgu sɨə wòm Əni ə kyeŋ ze nɨ Ŋwìə̀ bɨrɨ saʼ ɨsɨg.

⁷ Mbə̀ kɔndɨ ə Sodòm mbɨ Gòmorà bə̀ kɔndɨ ɨbeŋ mbe nɨ nyaʼa ɨban ɨban. Ɨ mbɨə nyaʼə ghɨ̀ ɨnyamnɨ-ɨnû bə̀ ghɨ̀ tɨkwɨrɨ ɨfabrɨ-ɨnû jìm mbe nɨ bə̂d ə feenɨə. Ɨchî nɨ mbɨə zəə ŋgəʼ ɨŋga ɨwid we nɨ ten i koŋ yɨ ənweenɨ əmbɨ ə bə̂d mɨ̀jìm.

⁸ À yɨə bə̀ əndəŋ əndəŋ nɨ məchwiə̀-ɨnû mɨghab mbɔ̂ ə zə ɨnû mɔʼɔ ɨŋga tə njə̀m nɨə ghɨ̀ ni mbɨ fiinɨ tə nyamnyod, tə̀ə̀nɨ̀ ɨka Ŋwiə̀ bə̀ zɔ̀m ɨghɨ mbe nɨ mbɨə wumnɨ ɨkaŋ.

⁹ Ka àbei Maikɨ̀l nɨ yeʼ ətu ɨgwɨ mbɨ̀aŋgɨrə̀, ənɨ wɨ̀ nyaʼə tàŋə̀ mbɨ ə Debɨ̀rə̀ ɨmbə̀ʼ we rəbɔʼ mɨ̀mə̌d nɨ bɨrɨ nɨŋ əvɨ ə Mose, chəi wɨ̀ nyaʼa kɔndɨ nɨ zɨ ɨsaʼi ɨgun ə Debɨ̀rə̀ ɨmbə̀ʼ chəkɨ ɨkum məd. Wɨ̀ nyaʼa ghà ɨ bɔ àmei ni, “Ə̀nùŋɨ̀sɨg gham əbɔʼ nè.”

¹⁰ Àyɨə bə̂d mbɔ̂ mbɨə ghàm ɨŋgam rɨbɔ̀ŋ ɨmbə̀ʼ ɨnû mɔʼɔ mbe nɨ chəi ɨtu mɨ̀mə̌d zeŋ ɨmbə̀ʼ mbɨwən. Ɨnû mbe nɨ mbɨ che kyerɨ kyerɨ mbɨə chə̀kɨ̀ mɨ̀mə̌d. Mbɨ yɨ ɨghabɨ ə nyam rɨ tɔtɔ nɨə ghɨ̀ ɨnû əbəŋ əbəŋ.

¹¹ Ŋgəʼ bɨrɨ nyɨ ɨgwɨ mɨ̀mə̌d! Ɨ mbɨə ghɨ̀ ɨnû mbe nɨ Kaìn nyaʼa ghɨ̌. Ɨ mbɨə ghɨ̀ əfebrɨ-ənû ze nɨ Balàm nyaʼa ghɨ̌ ɨmbə̀ʼ ədɔʼ ɨkab. Ɨ mbɨə ghɨ̀ rɨ̀zuə̀ àmei ɨchî nɨ Korà nyaʼa ghɨ̌. Əne mbɨ bɨrɨ nim ɨghabɨ ə Korà.

¹² Bə̂d mbɔ̂ yɨ ɨghabɨ tɨfiŋɨ nɨə fiinɨ əwən ənɨ mbɨə jɨgə tɨjɨg ɨghaʼi mbɨ nən. Chəi ɨtu ə nìd mɨ̀mə̌d ənɨ mbɨə jɨgə mbɨ nən. Ɨ mbɨə nəŋgɨ àmei tə nyamnyod. Mbɨ yɨ ɨghabɨ pàʼ nɨ ɨfə ə tinə, nɨ chəi tɨə ghɨ̀ ni mbə̀ŋ nɔ. Mbɨ yɨ ɨghabɨ ɨzed mbe nɨ chəi tɨə kɔ rɨtam, ka àbei ənɨ ə nyùmə̀ we nɨ ɨzed ə kɔ rɨtam. Mbɨ yɨ ɨghabɨ ɨzed nɨ mbɨ fə chɔʼ rɨ ə si, mbɨ kwɨ.

¹³ Mbɨ yɨ ɨghabɨ rɨ̀bàà nɨə kɔʼə swiʼə kwàʼ rɨ̀kǎ ghɨ̀ əjo. Əjo ze yɨ tɨ̀nìd ətu əmbɨ mɨ̀mə̌d. Mbɨ yɨ ɨghabɨ rɨtəmɨ te nɨə yènɨ̀ yenɨ, nɨ Ŋwìə̀ fə nuŋ əsɨ əmbɨ mɨ̀mə̌d ɨŋga ɨsɨ mbe nɨə finə kììm. Mbɨ bɨrɨ chub əŋgu koŋ.

¹⁴ À yɨ ɨmbə̀ʼ ə bə̂d mbɔ̂ nɨ Enɔ̀k nyaʼa ghamɨ rəŋwe. Enɔ̀k yɨə nyaʼə tɨ ənɨ əghaŋ ə Adàm nɨ pè ənɨ ɨwaŋ sambe. Wɨ̀ nyaʼa ghà ni, “Mbə̀ zə, Ə̀nùŋɨ̀sɨg wɨə yeʼe mbɨ mbi mbɨ̀aŋgɨrə̀ zeŋɨ chuʼ mbɨ ə chuʼ

¹⁵ ɨ saʼ bə̂d mɨ̀jìm chə mɨ̀mə̌d, bə̀ zɨ̀ ɨsaʼi ɨgwɨ ə bə̂d mɨ̀jìm mbe nɨ chəi mbɨə wumnɨ ə Ŋwiə̀. Wɨ̀ bɨrɨ zɨ ɨsaʼi ɨgwɨ mɨ̀mə̌d ɨmbə̀ʼ ɨnû ɨzɨg mbe nɨ chəi bə̂d mbe nɨə wumnɨ ə Ŋwiə̀ ə ghɨ̀ə̀. Wɨ̀ bɨrɨ bɨ zɨ ɨsaʼi ɨmbə̀ʼ mɨŋgam rɨbɔ̀ŋ jìm mbe nɨ bə̂d mbe nɨə ghɨ̀ ɨnû rɨbɔ̀ŋ, nɨ chəi mbɨə wumnɨ ə Ŋwiə̀ ə gha ɨmbə̀ʼ əməd.”

¹⁶ Bə̂d mbɔ̂ mbɨə ghàmbɨ̀ə̀. Chəi ənû ə mɔʼɔ ə bɔŋ əmbɨ mɨ̀mə̌d. Ɨ mbɨə beenɨ əbɔʼ ɨnû rɨbɔ̀ŋ mbe nɨ nyamnyod tɨ mɨ̀mə̌d ə feenɨə. Ɨ mbɨə nɨŋə mbə mɨchû goŋ ɨgɔ̂ ɨmbə̀ʼ tə nyamnyod. Ɨ mbɨə bə̀ ghàm mɨŋgam nəmɨ nəmɨ ɨmbə̀ʼ berɨ ɨghɨ mbe nɨ mbɨ kəbɨ.

Ɨpatɨ mbɨ ə̀tìmbɨ̀ ɨmbə̀ʼ bə̂d nuŋ fîŋ ɨgun ə Kristo

¹⁷ Àyɨə mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ berɨ kɔndɨ ɨnû mbe nɨ bə̂d tom a Ə̀nùŋɨ̀sɨg Yeso Kristo nyaʼa fə gha ɨ nən.

¹⁸ Mbɨ nyaʼa ghà ɨ nən ni, “Ɨŋga ɨni mbe nɨ sɨ nwìə̀, məbaʼrɨ-bə̂d bɨrɨ yeʼe. Mbɨ bɨrɨ beenɨ əbɔʼ ɨnû mbe nɨ nyamnyod tɨ mɨ̀mə̌d ə feenɨə. Ɨnû mbe mbɨə ghɨ̀ə̀ ni tɨ mbɨ wumnɨ ə Ŋwiə̀.”

¹⁹ Ɨ mbɨə ghàbrə̀ bə̂d. Ɨ mbɨə beenɨ əbɔʼ ɨnû mbe nɨ nyamnyod tɨ mɨ̀mə̌d ə kə̀bə̀. Chəi Əzwî ə Ŋwiə̀ ɨŋga mɨ̀mə̌d.

²⁰ À yeʼ mbə̀nə, mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ wo ɨmbì kwi ɨŋga ə ɨbenɨ we nɨ fə zeŋɨ màànɨ̀. Mbə̀ kɔŋgɨ ə Ŋwiə̀ ɨchî nɨ Əzwî ə Zeŋɨ ə naʼ ɨka ɨ nən.

²¹ Mbə̀ chub kyerɨ ni Ŋwìə̀ ə ghaʼ əwən ɨchî nɨ mbɨə wòmə̀ ni a Ə̀nùŋɨ̀sɨg Yeso Kristo diirɨ əwən, ghɨ̀ mbə̀ jɨg ɨ̀tènɨ̀ rɨ mì.

²² Mbə̀ diirɨ bə̂d mbe nɨə bìdə̀,

²³ chɨ̀ mbɨ mɔʼɔ rɨŋga ɨwid əne chɨ̀ mɨ̀mə̌d rəŋgəʼ. Mbə̀ diirɨ mbɨ mɔʼɔ, àyɨə mbə̀ we əwən ɨmbə̀ʼ ɨnû rɨbɔ̀ŋ mɨ̀mə̌d nɨə tàb əwən. Mbə̀ ban ka àbei ngywɨ̌ te nɨ ɨnyod mɨ̀mə̌d fə fiinɨ ənɨ ɨnû rɨbɔ̀ŋ.

Əbɔrəbɔd nɨ sɨ nwìə̀

²⁴ Tɨ̀ yiirɨ ə Ŋwìə̀ we nɨ tɨ̀ wɨ̀ nùŋ əwən ni tɨ mbə̀ gu ə. Ɨ we tɨ̀ wɨ̀ ghɨ̀ ni mbə̀ zeŋ màànɨ̀ ɨfě məd bə̀ ghɨ̀ ni mbə̀ sɨə ghaʼrɨə.

²⁵ Mbɨ naʼ ɨwumnɨ, nàʼ ənû ɨfɔ̀n ə kyeŋ, nàʼ ɨka bə̀ nàʼ ənû nɨ tumbɨ ɨsɨg əmbɨ ə Ŋwìə̀ we mɔʼ. Məd wɨə chɨ̀ əwa rəŋgəʼ ənjìm a Ə̀nùŋɨ̀sɨg Yeso Kristo. Ɨnû mbɔ̂ nyaʼa i mbɨ məd kɔ rɨ ənɨ ə nyùmə̀ we nɨ nyaʼa fə che i. Ɨ mbɨ mbɨ məd tɨ̀nîn. Mbɨ bɨrɨ yeʼ mbɨ məd koŋ. À yɨ əne.