Jn 17 - Meta’

Yeso nyaʼa kɔŋgɨ ə Ŋwiə̀ ɨgwɨ mbi mə̀mə̀ə̀nɨ̀-ɨnû bə̀ kɔŋgɨ ɨgwɨ ni

¹ Ənɨ Yeso nyaʼa fə gha ɨnû mbɔ̂, wɨ̀ nyaʼa nèŋ ɨkaŋ ghà ni, “Mɨ Mbǎʼ, nyùmə̀ fə kuʼi. Wumnɨ e Wan, ɨmbə̀ʼ e Wan bə̀ wumnɨ əwe.

² À fə nàʼ ɨka ɨ bɔ ni wɨ̀ tumbɨ bə̂d mɨjìm rɨŋga ɨsɨg, ɨmbə̀ʼ wɨ̀ naʼ ɨ̀tènɨ̀ rɨ mì əmbɨ ə bə̂d mbe nɨ à naʼ ɨ bɔ.

³ Ɨ̀tènɨ̀ rɨ mì yɨ ni bə̂d kyerɨ əwe, àwɔ̀ we nɨ yeʼ mei we mɔʼ nɨ yeʼ Ŋwìə̀ rəsìʼ. Ɨ̀tènɨ̀ rɨ mì yɨə bə ni bə̂d kyerɨ ə Yeso Kristo we nɨ à nyaʼa tomɨ.

⁴ Mə fə wumnɨ əwe ɨgwɨ ə si ɨchî nɨ mə fə maanɨ ə̀fàʼì ze nɨ à nyaʼa naʼ ɨ num.

⁵ Əne tɨ̀nîn, kyɨə Mbǎʼ, wumnɨ əmɨ əsɨ ze nɨ à yeʼ əŋgu. Wumnɨ əmɨ ɨchî nɨ à nyaʼə wumnɨə bɔŋ à nyaʼa sɨə tekɨ ɨsɨg.

⁶ “Mə fə ghɨ̀ ni bə̂d mbe nɨ à nyaʼa chɨ rɨŋga ɨsɨg nàʼ ɨ num kyerɨ əwe. À yɨə nyaʼa mbe bə̂d, əne à nyaʼa fə nàʼ mɨ̀mə̌d ɨ num. Mbɨ fə ghɨ̀ ənû ze nɨ à nyaʼa ghǎ əmbɨ mɨ̀mə̌d.

⁷ Tɨ̀nîn mbɨ fə kyerɨ ni à yɨ àwɔ̀ nyaʼa naʼ ɨghɨjìm ɨ num.

⁸ Mə fə ghà ɨkə̂n we nɨ à nyaʼa ghà ɨ num ni mə̀ gha əmbɨ mɨ̀mə̌d. Mbɨ fə zu bə̀ kyerɨ ənɨ rəsìʼ ni à yɨ àwɔ̀ nyaʼa tom əmɨ. Mbɨ fə bə̀ ben ni à yɨ àwɔ̀ nyaʼa tom əmɨ.

⁹ “Mə wɨə kɔ̀ŋgɨ̀ əwe ɨmbə̀ʼ mɨ̀mə̌d. Chəi mɨə kɔ̀ŋgɨ̀ əwe ɨmbə̀ʼ ɨsɨg. Mə wɨə kɔ̀ŋgɨ̀ əwe yeʼ ɨmbə̀ʼ bə̂d mbe nɨ à nyaʼa naʼ ɨ num ɨmbə̀ʼ ɨghəm nɨ à yɨ mbe bə̂d.

¹⁰ Bə̂d mɨ̀jìm mbe nɨ mə̀ berɨ yɨ mbe. Bə̂d mɨ̀jìm mbe nɨ à berɨ yɨ mbum. Bə̂d fə chè ənjìm mɨ̀mə̌d wumnɨ əmɨ.

¹¹ Tɨ̀nîn mə wɨə sàŋ ɨsɨg sɨə yeʼe əsɨ ne. Àyɨə mɨ̀mə̌d mbɨə kɨrɨ ɨŋga ɨsɨg. Mɨ Mbǎʼ nɨ Zeŋɨ màànɨ̀, nəŋgɨ mɨ̀mə̌d ənɨ ɨka we nɨ yeʼ ənɨ e ɨkum, nɨ yeʼ ɨkum we nɨ à nyaʼa naʼ ɨ num. Nəŋgɨ mɨ̀mə̌d ɨmbə̀ʼ mbɨ yeʼ ənɨ ənû ə mɔʼ, ɨchî nɨ mɔ̌ mbɨ ne tɨ̀ bə̀ yeʼ ənɨ ənû ə mɔʼ.

¹² Ənɨ mə nyaʼa mbɨ mɨ̀mə̌d, mə wɨə nyaʼə nəŋgɨ mɨ̀mə̌d ni tɨ əghɨ ə mɔʼɔ ə ghɨ i mɨ̀mə̌d. Mə wɨə nyaʼə ghɨ̀ əne ənɨ ɨka we nɨ nyaʼa yeʼ ənɨ e ɨkum, nɨ yeʼ ɨkum we nɨ à nyaʼa naʼ ɨ num. Mə wɨə nyaʼə nəŋgɨ mɨ̀mə̌d, əne chəi wɨ mɔʼɔ rəbɔʼ mɨ̀mə̌d nyaʼa nimɨ kɨrɨ ənɨ we nɨ nyaʼa berɨ nim. Wɨ̀ nyaʼa nim ɨmbə̀ʼ ənû ze nɨ mbɨ nyaʼa ŋwaʼnɨ ɨŋga Ə̀ŋwàʼnɨ̀ ə Ŋwiə̀ ə jwɨ ənɨ rəsìʼ.

¹³ “Tɨ̀nîn mə wɨə yeʼe əsɨ ne. Mə wɨə ghà ɨnû mbɔ̂ ənɨ mə̀ kɨrɨ ɨŋga ɨsɨg ɨmbə̀ʼ ɨghaʼi swi ɨŋga fîŋ tɨ mɨ̀mə̌d, ɨchî nɨ wɨ bə swi ɨŋga mɨ fîŋ.

¹⁴ Mə fə gha e ɨŋgam əmbɨ mɨ̀mə̌d. Ɨsɨg wɨə bàn mɨ̀mə̌d ɨmbə̀ʼ ɨghəm ni ka mbɨ yɨ ə bə̂d rɨŋga ɨsɨg, ɨchî nɨ ka mɔ̌ yɨ bə̀ əmɨ wə̀d rɨŋga ɨsɨg.

¹⁵ Chəi mə̀ gha ni à chɨ mɨ̀mə̌d rɨŋga ɨsɨg. Mə ghà yeʼ ni à kən mɨ̀mə̌d tɨ əmbɨ ə wə̀d rɨ̀bɔ̀ŋ.

¹⁶ Ka mbɨ yɨ ə bə̂d rɨŋga ɨsɨg, ɨchî nɨ ka mɔ̌ yɨ bə̀ əmɨ wə̀d rɨŋga ɨsɨg.

¹⁷ Ghɨ mbɨ sweŋ ə ɨnyod ɨ ne ənjìm ɨchî nɨ mbɨ kyerɨ rəsìʼ. Wə̀d mɨ kyerɨ e ɨŋgam əne yɨ ni wɨ̀ fə kyerɨ rəsìʼ.

¹⁸ Ɨchî nɨ à nyaʼa tom əmɨ ɨŋga ɨsɨg, mə fə bə̀ tom mɨ̀mə̌d ɨŋga ɨsɨg.

¹⁹ Mə fə sweŋ mɨ ɨnyod ɨ ne ɨmbə̀ʼ ɨghəm mɨ̀mə̌d, ɨmbə̀ʼ mbɨ bə kàŋ sweŋ ə ɨnyod ɨ ne ənjìm e ɨŋgam we nɨ yeʼ ɨŋgam rəsìʼ.

²⁰ “Mə wɨə kɔ̀ŋgɨ̀ əwe kaʼ àmei ɨmbə̀ʼ mɨ̀mə̌d mbɔ̂. Mə wɨə bə̀ kɔ̀ŋgɨ̀ əwe ɨmbə̀ʼ bə̂d mbe nɨ ben əmɨ ənjìm ɨŋgam we nɨ mbɨ mə̀mə̀ə̀nɨ̀-ɨnû gha əmbɨ mɨ̀mə̌d.

²¹ Mə wɨə kɔ̀ŋgɨ̀ əwe ni mɨ̀mə̌d mɨjìm yeʼ ənɨ ənû ə mɔʼ. Mɨ Mbǎʼ, mə kə̀b mbɨ yeʼ ənɨ ənû ə mɔʼ mbɨ na ɨchî ɨ ni à yeʼ ənɨ ənû ə mɔʼ mbɨ num, mə bə̀ yeʼ ənɨ ənû ə mɔʼ mbɨ ne. Zɨə yeʼ əne ɨmbə̀ʼ ɨsɨg we tɨ̀ wɨ ben ni à yɨ àwɔ̀ nyaʼa tom əmɨ.

²² Mə fə bə̀ wumnɨ mɨ̀mə̌d ɨchî à nyaʼa wumnɨ əmɨ, ɨmbə̀ʼ mbɨ yeʼ ənɨ ənû ə mɔʼ, ɨchî nɨ mɔ̌ mbɨ ne tɨ̀ bə yeʼ ənɨ ənû ə mɔʼ:

²³ mə yeʼ ənɨ ənû ə mɔʼ mbɨ mɨ̀mə̌d, àwɔ̀ bə yeʼ ənɨ ənû ə mɔʼ mbɨ num, ɨmbə̀ʼ mɨ̀mə̌d mɨjìm bə yeʼ ənɨ ənû ə mɔʼ. Mbɨ mɨ ghɨ əne, ɨsɨg we tɨ̀ wɨ kyerɨ ni à yɨ àwɔ̀ nyaʼa tom əmɨ fɔrɨ ni à ghaʼ mɨ̀mə̌d ɨchî nɨ à ghaʼ əmɨ.

²⁴ “Mɨ Mbǎʼ, mə kə̀b ni mɨ̀mə̌d mbe nɨ à nyaʼa naʼ ɨ num yeʼ mbɨ num əsɨ ze nɨ mə yeʼ əŋgu, ɨmbə̀ʼ mbɨ zə ɨchî nɨ à nyaʼə wumnɨ əmɨ, ɨmbə̀ʼ ɨghəm nɨ à nyaʼa ghaʼ əmɨ bɔŋ à nyaʼə sɨə tekɨ ɨsɨg.

²⁵ Mbǎʼ nɨə ghɨ̀ ɨnû ɨchî nɨ kuʼnɨ, chəi ɨsɨg kyerɨ əwe, àyɨə mə kyerɨ əwe. Bə̂d mbɔ̂ nɨ à nyaʼa naʼ ɨ num kyerɨ ni à yɨ àwɔ̀ nyaʼa tom əmɨ.

²⁶ Mə nyaʼa ghɨ̀ ni mbɨ kyerɨ əwe. Mə bɨrɨ kɨrɨ wo ɨmbì ghɨ̀ ni mbɨ jeŋgɨ kyerɨ əwe, ɨmbə̀ʼ ɨchî nɨ à ghaʼ əmɨ bə yeʼ əkaʼ mɨ̀mə̌d, fɔrɨ ni mɔ̌ bə̂ mə̀ bə̀ yeʼ əkaʼ mɨ̀mə̌d.”