Ɨnû 9 - Meta’

Tɨ̀taanɨ njə̀m ɨmbə̀ʼ aŋgɨrə̀ nɨ pè ənɨ mbɨ mɨtân

¹ Aŋgɨrə̀ we nɨ pe ənɨ mbɨ mɨtân nyaʼa fə i tàŋ, əne mə nyaʼa zə fɨtəmɨ nɨ nyaʼa nɔʼ rɨkaŋ feŋ ɨgwɨ ə si. Mbɨ nyaʼa nàʼ əfiʼ tɨ ənɨ ɨchû ɨbɨgɨ nɨ chəi ɨnwǐ ɨ bɔ.

² Wɨ̀ nyaʼa fiʼ ɨchû ɨbɨgɨ we nɨ chəi ɨnwǐ, əne ndiʼ nyaʼa jwɨ̀ rɨŋga ɨbɨgɨ we ɨchî nɨ ndiʼ ə jwɨ̀ rɨŋga ɨsweŋ ɨwid ənam kyeŋ. Nyùmə̀ mbɨ əton ɨkaŋ nyaʼa fin tɨ əmbɨ ə ndiʼ ze.

³ Ŋgwèmɨ nyaʼa jwɨ̀ rɨŋga ndiʼ ze yeʼe ɨgwɨ ə si. Mbɨ nyaʼa nàʼ ɨka nɨ nyaʼa ɨghabɨ ɨka mbɨ̀rɨkafuʼ-ɨkon əmbɨ ə ŋgwèmɨ te.

⁴ Mbɨ nyaʼa ghà əmbɨ mɨ̀mə̌d ni tɨ mbɨ tɔ ghɨ ə əghəm ənɨ ɨfu we rɨ ɨgwɨ ə si, kɨ ənɨ ɨkwɨ ɨghɨjìm mbe nɨə zɨ̀ rɨfuʼ, kɨ ənɨ ɨkwɨ ɨzed jìm. Mbɨ ghɨ əghəm àmei ənɨ ə bə̂d mɨ̀sɔŋɨchù mbe nɨ chəi Ŋwìə̀ zɨ ənweenɨ ənɨ ɨkəŋ ɨsɨ mɨ̀mə̌d.

⁵ Ŋwìə̀ nyaʼa ben ni ŋgwèmɨ te chə mɨ̀mə̌d əmɨg ətân, àyɨə tɨ mbɨ zwiirɨ ə mɨ̀mə̌d. Mbɨ nyaʼa chə mɨ̀mə̌d zɨə tɔ ɨchî nɨ tɨkafuʼ-ɨkon mɨ te wə̀d zɨə tɔ.

⁶ Ənɨ əmɨg ze ətân, bə̂d bɨrɨ kəb ni ɨvɨ nɨŋ mɨ̀mə̌d, àyɨə chəi mbɨ bɨrɨ zə ɨvɨ. Mbɨ bɨrɨ kəb ni mbə̀ kwɨ, àyɨə chəi ɨvɨ bɨrɨ yeʼe.

⁷ Ŋgwèmɨ tɔ̂ yɨə nyaʼa ɨghabɨ ə ngyi nɨ mbɨ nyaʼa zi ɨghɨ ɨgun ɨmbə̀ʼ nɨŋ wò ə bid. Ɨghɨ mɔʼɔ nɨ mbɨ kywɨ ənɨ ə gôl mbɨ ə nyaʼa ɨgwɨ ɨtu mɨ̀mə̌d ɨghabɨ tɨdəm mɨfɔ̀n. Tɨfě tɨ mɨ̀mə̌d tɨə nyaʼa ɨghabɨ tɨ bə̂d mɨ̀sɔŋɨchù.

⁸ Nyôŋ ətu tɨ mɨ̀mə̌d tɨə nyaʼa ɨghabɨ ə nyôŋ tɨ məyi. Əsɔŋ ə mɨ̀mə̌d zɨə nyaʼa ɨghabɨ əsɔŋ mɨ̀ŋgwàbaʼ.

⁹ Tɨ nyaʼa zɨ̀ mɨparɨwà ətənɨ kən ɨgɔ̂ əŋgu. Tɨbabɨ̀ tɨ mɨ̀mə̌d tɨə nyaʼə ghàm ənɨ tɨə fìrə̀ ɨghabɨ ɨchî nɨ tɨkarɨ te nɨ ngyi tɨə sùŋə̀ nòrə̀ wò əkɔb bid ə ghàmə̀.

¹⁰ Tɨ berɨ tɨkon mbɨ ɨfim əŋgu ɨghabɨ tɨ mbɨ̀rɨkafuʼ-ɨkon. À yɨ ənɨ rɨkon te nɨ tɨ berɨ ɨka nɨ chə bə̂d əmɨg ətân.

¹¹ Aŋgɨrə̀ we nɨ nyaʼə nəŋgɨ ɨbɨgɨ we nɨ chəi ɨnwǐ yɨ ɨfɔ̀n mɨ̀mə̌d. Ɨkum məd ənɨ ɨŋgam Hibrù yɨə Àbadòn. Ɨkum məd ənɨ ɨŋgam Grik yɨə Àpoliòn. (Əton ənɨ ɨkum we yɨə, “Wə̀d nɨə chəkɨ ɨghɨ.”)

¹² Ŋgəʼ kǎ kǎ rɨtu fə chè. Ŋgəʼ rɨ kǎ kǎ cherə rɨbe tɨə kɨrɨ wo yeʼe.

Tɨ̀taanɨ njə̀m ɨmbə̀ʼ aŋgɨrə̀ we nɨ pe ənɨ mbɨ rɨ̀fuə

¹³ Aŋgɨrə̀ we nɨ pe ənɨ mbɨ rɨ̀fuə nyaʼa fə i tàŋ, əne mə nyaʼa zu gɨ̂ nɨ nyaʼa rɨ ənɨ ə ndɔŋ te rɨkwè nɨ nyaʼa ənɨ rɨbu ɨkwi ɨjə̀ŋ ə̀fààrɨ̀ we nɨ mbɨ nyaʼa tekɨ ənɨ ə gôl. Ɨkwi ɨjə̀ŋ we wɨə nyaʼa ɨfě Ŋwiə̀.

¹⁴ Gɨ̂ ze nyaʼa ghà əmbɨ aŋgɨrə̀ we nɨ pe ənɨ mbɨ rɨ̀fuə ni, “Za mbɨ̀aŋgɨrə̀ mbe mɨkwè nɨ mbɨ kod ɨgyɨ̀ kyeŋ we nɨ mbɨə tɔŋ ənɨ ə Yufretìs.”

¹⁵ Aŋgɨrə̀ we nyaʼa zà mbɨ̀aŋgɨrə̀ mbe mɨkwè. Ŋwìə̀ nyaʼa fə nùŋ ni ɨgwɨ ə awà wɔ̂, ɨgwɨ əni zɔ̂, ɨŋga ɨmɨg wɔ̂ bə̀ fɔrɨ ɨŋga əghəm əwu zɔ̂, mbɨ̀aŋgɨrə̀ mbe bɨrɨ zwiirɨ bə̂d əba ə fibɨ̀ ənɨ mbɨ ghapɨ bə̂d mɨ̀sɔŋɨchù ɨba tad.

¹⁶ Mə nyaʼa zu ɨnun mɨ̀sɔgyɨ̀ we nɨ nyaʼa kɔʼ ngyi. Ɨnun mɨ̀mə̌d yɨə nyaʼa chuʼ əkam əkɨ əbe.

¹⁷ Mə nyaʼa zə bə̂d mbe nɨ nyaʼa kɔʼ ngyi bə̀ zə ngyi te ɨŋga rɨ̀taanɨ njə̀m ze. Mbɨ nyaʼa zɨ̀ mɨparɨwà nɨ kən ɨgɔ̂ nɨ nyaʼə bàŋə̀ ɨghabɨ ɨwid, finə fùʼnə̀ ɨghabɨ ə safi, bə̀ bàŋə̀ fùʼnə̀ ɨghabɨ ə sɔlfò. Ɨtu ngyi te tɨə nyaʼa ɨghabɨ tɨ mɨ̀ŋgwàbaʼ. Ɨwid mbɨ ə ndiʼ fɔrɨ ə sɔlfò mbɨə nyaʼə jwɨ̀ rɨŋga mɨchû mɨ̀mə̌d.

¹⁸ Ŋgəʼ kǎ kǎ tɔ̂ rɨtad nyaʼa zwiirɨ əba ə fibɨ̀ ənɨ mbɨ ghapɨ bə̂d mɨ̀sɔŋɨchù ɨba tad. Ŋgəʼ kǎ kǎ tɔ̂ yɨ ɨwid, ndiʼ mbɨ ə sɔlfò we nɨə jwɨ̀ rɨŋga mɨchû ngyi te.

¹⁹ Ɨka ngyi te wɨ ɨŋga mɨchû mɨ̀mə̌d bə̀ fɔrɨ ɨŋga tɨkon tɨ mɨ̀mə̌d. Tɨkon tɨ mɨ̀mə̌d yɨ ɨghabɨ ə jɔ mbɨ ɨtu. Ɨ mbɨə nɨŋə tɨkon tɔ̂ ghɨ̀ əghəm ənɨ ə bə̂d.

²⁰ Chəi ə̀bùʼ ə bə̂d mɨ̀sɔŋɨchù ze nɨ chəi ŋgəʼ kǎ kǎ tɔ̂ nyaʼa zwiirɨ mɨ̀mə̌d nyaʼa beŋ tə fîŋ tɨ ənɨ ɨghɨ mbe nɨ mbɨ nyaʼa tekɨ ənɨ mbə ɨbɔ. Chəi mbɨ kɨrɨ sob nɨ wumnɨ ɨzwî rɨbɔ̀ŋ bə̀ fɔrɨ nɨ wumnɨ mbɨ̀anèŋ mbe nɨ mbɨ tekɨ ənɨ ə gôl, ənɨ ə sɨrɨvà, ənɨ ə brɔnz, ənɨ ɨti bə̀ fɔrɨ ənɨ ɨzed. Chəi ənɨ tɨ̀ mbɨ̀anèŋ mbɔ̂ zə ɨsɨ, zu ənû kɨ̀ yènɨ̀.

²¹ Chəi mbɨ nyaʼa beŋ tə fîŋ tɨ ənɨ ɨchî nɨ mbɨə zwiirɨ ə bə̂d, tɨ ənɨ ɨchî nɨ mbɨə ghɨ̀ mɨ̀sà, tɨ ənɨ ɨchî nɨ mbɨə ghɨ̀ ɨfabrɨ-ɨnû kɨ̀ rɨ ənɨ ɨchî nɨ mbɨə jɨə.